عزيزي المسلم تعال اوريك كنز من كنوز أداء الصلاة في وقتها💚

عن أبي هريرة -رضي الله عنه- قال: قال رسول الله ﷺ: "لو يعلم الناس ما في النداء والصف الأول، ثم لم يجدوا إلا أن يستهموا عليه لاستهموا."
يعني لو الناس عرفت فضل وثواب التبكير للصلاة كان اتسابقوا عشان يصلوا فالأول💚

وزي ما عارفين الصلاة كفارة لما قبلها من الذنوب وبتصل بينك وبين ربك💚
حاجة كدا عظمة على عظمة💚
يلا يا اخي المسلم

#قوم_امشي_صلِّ💚

تخيل انك لقيت مكان مهجور وفيه حاجات ثمينه حاتقيف تشيل منه صح؟
طيب لو قلت انو المكان دا هو السلسله دي والحاجات الثمينه هي "سنن نبويه"🥹💚
هجرها الناس واجرها عظيم وانت ماعارف عنها شي؟

في ثروه من الأحاديث النبوية والاعمال الصالحه نساها كثير من الناس وضيعها وهي أعمال بسيطه من هدي النبي صلى الله عليه وسلم ولكنها كادت تختفي
حانبدا رحله نكتشف فيها الثروه دي ونرجعها لحياتنا وننال اجر إحياءها💚
لقول النبي ﷺ:«مَنْ أَحْيَا سُنَّةً مِنْ سُنَّتِي فَعَمِلَ بِهَا النَّاسُ، كَانَ لَهُ مِثْلُ أَجْرِ مَنْ عَمِلَ بِهَا، لَا يَنْقُصُ مِنْ أُجُورِهِمْ شَيْئًا»
(رواه ابن ماجه)

_ح نقدم شنو في السلسلة دي؟
-تعريف بسنه نبويه مهجورة
-ذكر فضلها ودليلها
-شرح كيفيه تطبيقها تطبيق عملي سهل
-تحفيز الجميع على إحيائها ونشرها

كونو معانا على الموعد وشاركونا كمان بسنن شايفين انها هُجرت وخلينا نتقاسم الأجر😁💚

#سنن_مهجورة
#قوم_امشي_صلِّ💚

أنا مذنبٌ، أنا مخطئٌ، أنا عاصي
هو غافرٌ، هو راحمٌ، هو كَافي
قابلتهن ثلاثةً بثلاثةٍ
و لتغلبنْ أوصافهُ أوصافي

ما تيأس من الفات وركز مع الجاي، ربك رحيم ولطيف بعباده، أخلص نيتك ولو وقعت ألف مرة قوم وأسعى، عساها الطمأنينة ما تفارقك وعساه قلبك يبصر النور💚

قوم_امشي_صلِّ💚

عارفين إنه النوم هو موت أصغر؟👀
أيوة زي ما سمعت؛ الواحد فينا لما ينوم ف دا يعتبر موت أصغر ليه، ومنه ممكن تصحى وممكن لا..

عشان كده في دعاء بنقولو أول ما نصحى من النوم ولازم جدا نقوله كحمد لله انه صحينا بعد الموت،
عرفتوه؟
اكتبو لينا في التعليقات🤩
ولو ما عرفتوه؟
برضو اكتبو لينا في التعليقات🤩.

#قوم_امشي_صلِّ💚

الصلاة هي ركن الإسلام التاني وعموده وأول حاجة بنتحاسب عليها يوم القيامة وهي صلة بين العباد وربنا وبتقربنا إليه ولمحبته سبحانه💚

وزي ماعارفين من ترك الصلاة فقد كفر
وانو بين الرجل وبين الشرك والكفر ترك الصلاة، وتأخير الصلوات عن وقتها عقابه عظيم وحتى التأخر عن الصف الأول؛
فالنبي ﷺ يقول: (لا يزال قوم يتأخرون عن الصف الأول حتى يؤخرهم الله في النار)💔

اخي المسلم خليك بعيد عن أي حاجة بتلهيك عن الصلاة
وكون من المصلين المحافظين عليها، تنال الثواب من الله وتبتعد عن العقاب والعذاب💚

#قوم_امشي_صلِّ💚

من رحمة وحكمة الله سبحانه وتعالى انو جعل "إياكَ نعبد وإياكَ نستعين" فرض ملازم للسان كل مسلم ١٧ مرة على مدار اليوم💚

علشان يذكرنا انو العبادة والاستعانة به سبحانه هي مفاتيح النجاح والسعادة الدنيوية والاخروية كمان💚.

بداية يوم جديد خليها بداية حياة جديدة كمان وخلي عبادتك خالصة لوجه الكريم واتوكل عليه في كل امورك واستعين بيه في كل شيء💚

#الصلاة_خير_من_النوم
#قوم_امشي_صلِّ💚

في مرة النبي ﷺ كان مع سيدنا سعد بن أبي وقاص -رضي الله عنه- فقال له:
“إنك لن تنفق نفقة تبتغي بها وجه الله إلا أُجرت عليها، حتى ما تجعل في فيِّ امرأتك”💚

يعني شوفوا حتى اللقمة الزول البيأكل بيها زوجته أو أهل بيته، لو قصد بيها وجه الله، بتُحسب له أجر💚

وجاء عن سيدنا معاذ بن جبل -رضي الله عنه- أنه قال: “إني لأحتسب نومتي كما أحتسب قومتي”💚
يعني نومو البينامو بيرتاح بيهو، كان بيخلي نيتو لله عشان يقوى بيهو على العبادة والعمل.

العبرة هنا: ما في شي بسيط عند الله.
شغلك، قرايتك📚، خدمتك لأهلك، مساعدتك ليهم في البيت، حتى الراحة البتاخدها عشان تقويك…
كلّه لو ابتغيت بيها وجه الله حيكون ليك عبادة وثواب بإذن الله💚

فخلو نواياكم دايمًا متوجهة لله، عشان تلقو حياتكم كلها ماشية في ميزان حسناتكم💚.

#قوم_امشي_صلِّ💚

أربع كلمات تفتح لك أبواب الجنة🫣.

يا طيب المحيا، خليني أسألك:
كم مرة دخلت مكان وما سلمت؟
كم مرة قلت "هلا" أو "هاي" بدل

السلام عليكم ورحمة الله وبركاته؟ 👀

والنبي ﷺ قال:
"لا تدخلوا الجنة حتى تؤمنوا، ولا تؤمنوا حتى تحابّوا،
أولا أدلكم على شيء إذا فعلتموه تحاببتم؟ أفشوا السلام بينكم."
(رواه مسلم)

ما شرط تكون بتعرف الزول!
لو ماشي في الشارع، سلم.
لو دخلت مكان، سلم.
لو ركبت مواصلات، سلم.

السلام كلمة بسيطة، لكن أثرها عظيم:
محبة، أُلفة، دعاء، بركة، وأجر، ومفتاح للجنة💚.

خلي السلام عادة على لسانك،
عشان تلقى السلام في قلبك، في بيتك، وفي آخرتك بإذن الله 💚

#سنن_مهجورة
#إفشاء_السلام
#قوم_امشي_صلِّ💚

واحد من كنوز صلاة الفجر والبورينا إن ليها فضل عظيم؛
إن في كتير من الأحاديث النبوية ورد عنها توضح بأهميتها، فعن أبي هريرة -رضي الله عنه- قال:
قال رسول الله ﷺ: "ولو يعلمون ما في العتمة والصبح لأتوهما ولو حبوا"💚

فخلي صلاة الفجر من أولوياتك؛
عشان تلقى السعادة في دنياك وآخرتك💚

#قوم_امشي_صلِّ💚

التوكل على الله واحدة من أعظم مقامات الإيمان واجمل العبادات وايسرها وهو سر من اسرار قوة المؤمن وسبب طمأنينته في الدنيا🌿

فالتوكل ببساطة هو إنك تعتمد على ربنا سبحانه وتعالى اعتماد كامل في كل أمورك، مع إنك أيوا تعمل بالأسباب المتاحة ليك -يعني شنو يعني؟!
= يعني نجد ونجتهد ونعمل بالاسباب ونترك النتائج على ربنا سبحانه وتعالى عكس التواصل اللي هو م نعمل العلينا وننتظر نتيجة ترضينا🌿

ربنا سبحانه وتعالى قال:
*"وَمَن يَتَوَكَّلْ عَلَى اللَّهِ فَهُوَ حَسْبُهُ"*
وجاء في الحديث الشريف عن النبي صل الله عليه وسلم أنه قال:
*"لو أنكم تتوكلون على الله حق توكله، لرزقكم كما يرزق الطير؛ تغدو خماصاً وتروح بطاناً"*

شوفو كيف ضرب النبي صلى الله عليه وسلم المثل بالطير ما بتقعد في عشها تنتظر الرزق لكنها بتسعى وتطير في طلبه ومع ذلك قلبها مطمئن بأن رزقها عند الله مضمون💚

#قوم_امشي_صلِّ💚

حي على الصلاة، حي على الفلاح💚

لما تسمع نداء ربك، وتختار تنشغل بالونسة مع أصحابك، أو دراستك، أو شغلك…
فكّر كويس:
هل دراستك ح تنفعك يوم تقيف قدام ربك؟
ولا أصحابك حيحلّوك لما تُسأل عن صلاتك؟

واتذكّر يا رفيق:
ما في توفيق في الدنيا دي ولا بركة في العمل… إلا بأداء الصلاة💚

#قوم_امشي_صلِّ💚

الحمد لله على نعمة الفجر… نعمة بتفتح لينا باب يوم جديد مليان خير ورضا وبركة💚.

تخيّل يا صاحبي، من بين ملايين الناس، ربنا اختارك انت بالذااات، وألهمك تقوم رغم نعاسك وتعبك لأداء الفجر!

لأنو سبحانه بحب يسمع همسك البسيط، دعاءك الصادق، وإلحاحك في الطلب… عشان يجزيك بنعيم الدنيا و رضوان الآخرة.

فاستعن بالله وقوم صلِّ الفجر، وخلي بداية يومك مع ربك💚.

#قوم_امشي_صلِّ💚

قبل أيام زعموا أنهم قتـ.لوا المُلثم...
فإن فعلوا فهنيئاً له الشهادة وشرف الجهاد والمرابطة على الثغور، هو حيٌ عند ربه فرحاً بما عنده ويستبشر بمن سيأتون من بعده

وإن لم يفعلوا فلا جديد فهم يحاولون منذ عقدين ولم يستطيعوا لذلك سبيلاً...
وإن فعلوا وغدروه فغيره ماضٍ وغـ.زّة أرض الرجال
ودرة تاج المسلمين
وإن غاب الملثم فمن ورائه ألف ألف ملثم🍉

#قوم_امشي_صلِّ💚

كل ترتيب بتشوفو بعينك، في ترتيب تاني… ساكن جوّاك 💚

في حاجات بتجرى في حياتنا، نحتار ليه حصلت وليه اتأخّرت،
لكن لو تأمّلت شويّة… بتلقى الحكمة ظاهرة بهدوء، زي نسمة تمرّ في عزّ الهجير 💚

دي سلسلة خفيفة على القلب، لكن تقيلة بالمعنى.
نمشي فيها سوا، نفتح نوافذ التأمل، ونشوف كيف ربنا رتّبنا بلُطف، وعلّمنا بلُطف، ومشّانا في طرق لو رجعنا ليها نقول:
ياااااه… سبحانك، يا مَن رتّبتنا بحنانك 💚

🔹 ح نغوص في التفاصيل الصغيرة،
🔹 ونحسّ بالمعاني الكبيرة،
🔹 ونرجع نحب الحتّة البسيطة فينا، ونشوفها بعين جديدة 💚

📍خلي قلبك معانا، وخلّي روحك تسمع.
قريب نبدأ أول همسة من سلسلة سبحان من رتّبنا
وربّنا يكتب لينا فيها النور، وليكم الأثر 💚

#سبحان_من_رتبنا
#قوم_امشي_صلِّ💚

إذا المرء لم يغلب هواه أقامه.. ... ..بمنزلة فيها العزيز ذليل

مجاهدة النفس يا رفيق طريقها طويل، فإما تصبر وتجاهد أو تتنازل عن جنة عرضها السموات والأرض مقابل شهوات ومغريات فانية!

نخلي طريق الجنة عشان ساعة نوم يا رفيق؟

#الصلاة_خير_من_النوم
#قوم_امشي_صلِّ💚

من فجر الجمعة لحد غروبها في كنوز وسنن عظيمة، تعالوا نذكّر بعض بيها:

من صلاة الفجر: من السنة إنو الإمام يقرأ بـ سورة السجدة والإنسان.

دخل وقت الجمعة:من السنة الاغتسال، التطيّب، ولبس أنضف وأجمل الثياب، وما تنسى وكمان التبكير للمسجد.

خلال اليوم: أكثِر من الصلاة على الرسول ﷺ، واقرأ سورة الكهف.
بعد صلاة العصر: أكثر من الدعاء لأنو في ساعة ما بيوافقها عبد مسلم يسأل الله حاجة إلا أعطاه.

اللَّهُمَّ اجعل لنا في هذا اليوم دعوةً لا تُرد، ورزقًا لا يُعد، وبابًا للجنة لا يُسد.

#قوم_امشي_صلِّ💚

"الضِيقٌ قبلٌ الفَرج"

مرات بِنمٌـر بلحظات ضيق، تعب، غـم، وعدم فهم للحاصل..
بنسأل نفسنا: لـيه؟ ليـه الحاصل دا؟
في اللحـظة دي، بنكون عايشين الألـم، بنحاول نصبر، لكن ما ساهلة.
وبرغم الضيـق، سُبحان الله، بنلقى الأمور اتزبطت من غـير ما نخطط..
ناس دخلوا حياتك فجاة، فرص ظهرت، والموقف الصعب اتقلب لخير ما كنت بتتخيله💚.
زي قصة الصحابي الجليل– كعب بن مالك رضي الله عنه لما تخلف عن غزوة تبوك:
ولأنه كان صادق وما كذب في سبب غيابه، النبي أمر الصحابة يقاطعوه لفترة طويلة جِدًا

إتخيـل!
لا كلام ، لا سلام، لا تواصل
لكن كعب صبر وما جامل ولا كذب، وبعد ما مرت الأربعين يوم الكانت صعبة جٍدًا عليه، ربنا أنزل فيه آية من القرآن تقول:
"وعلى الثلاثة الذين خُلفِّوا، حتى إذا ضاقت عليهم الأرض بما رحُبت..."
يعني حسو إنه كل الدنيا ضاقت عليهم لكن سبحان الله بعدها ربنا تاب عليهم ورتّب أمرهم بلٌطف عجيب.

القصة دي بتورينا إنه:
مرات التأخـير في الشي البتتمناه هو ذاته الرحمة، الزول البعد مـنك، ممكن يكون حماية ليك، والمواقف البتحصل فجأة، بتكون مرتبة بدقة من ربنا الرحيم

فسبحان من رتّبنا.. بلُطف، وبدون ما نشعـر 💚.

#سبحان_من_رتبنا
#قوم_امشي_صلِّ💚

قال تعالى:"وَلْتَكُن مِّنكُمْ أُمَّةٌ يَدْعُونَ إِلَى ٱلْخَيْرِ وَيَأْمُرُونَ بِٱلْمَعْرُوفِ وَيَنْهَوْنَ عَنِ ٱلْمُنكَرِ ۚ وَأُو۟لَٰٓئِكَ هُمُ ٱلْمُفْلِحُونَ".

فلاح الأُمة وصلاحها وخِيرتها، مُرتبط بأمرها بالمعروف ونهيها عن المُنكر...
فهو حِماية للمُجتمع وحِفاظ على قِيمه، ويمنع من انتشار الفساد، وزوال البركة والنِعم، وسبب في رضا الله تعالى💚
ف كونك تسكت عن المُنكر، ما معناه حِماية نفسك من المشاكل، معناه بقيت شريك في استمراره وانتشاره.

ومافي شي اسمو أنا ما شيخ أو علمي محدود، النصيحة بتكون بأي طريقة بتقدر عليها، فالرسول ﷺ قال:"مَنْ رَأَى مِنكُم مُنْكَرًا فَلْيُغَيِّرْهُ بِيَدِهِ، فَإِنْ لَمْ يَسْتَطِعْ فَبِلِسَانِهِ، فَإِنْ لَمْ يَسْتَطِعْ فَبِقَلْبِهِ، وَذَلِكَ أَضْعَفُ الْإِيمَانِ"💚.

#قوم_امشي_صلِّ💚

رجال الأمة..!💚
حصل سألت نفسك أنه هل أنت قدوة لي زول ولا لا؟

شافع صغير بقول لي أمه، يا أمي أنا لما أبقى قدر عمو وأبوي ما ح أصلي في الجامع...!
لكن لما أبقى قدر جدو عبدالله صلواتي كلها في الجامع وطوالي بسبح وبستغفر💚

لي الشافع دا قال كدا؟!

تابع معاي في التعليقات⤵️:

#راجع_نفسك_وارجع_صلي
#قوم_امشي_صلِّ💚

سبحان الله العظيم الذي قال: "وَهُوَ الَّذِي جَعَلَ اللَّيْلَ وَالنَّهَارَ خِلْفَةً لِّمَنْ أَرَادَ أَن يَذَّكَّرَ أَوْ أَرَادَ شُكُورًا"

ورد في تفسير الآية إنو ربنا خلق لينا الليل والنهار يخلفو بعض يعني العمل الصالح الفاتك في الليل ادركو في النهار والفاتك في النهار الحقو في الليل💚

بالله اتأمل رحمة ربنا بينا في كل كبيرة وصغيرة!حتى الليل البيعقبو نهار والنهار البيعقبو ليل ماهم إلا رحمات من الله وفرص جديدة لذكر الله وشكره وحسن عبادته💚
وكمان أمانات حنتحاسب اذا فرطنا فيها!

أحسن استغلال نهارك وليلك وخليهم شهداء ليك ماعليك واتدارك ساعاتهم بالأعمال الصالحة وإن قلَّت💚

#قوم_امشي_صلِّ💚