من نام عن نداء الفجر، كيف يطلب معونة الله لبقية يومه؟
‏الفجر باب البركة، فكن من أول العابرين إليه💚.

#الصلاة_خير_من_النوم
#قوم_أمشي_صلِّ💚

في يوم شفت مقطع لأحد المشايخ قال فيه -بما معناه-
إن كان في من السلف البيقع في ذنب أو بعمل سيئة في مكان وكجزء من توبته يقوم يعمل طاعة أو حسنة في نفس المكان دا

يعنى لو سمع أغنية بالتلفون يقوم يسمع قرآن أو درس شرعي، ولو اطلق بصره في مكان يقوم يستغفر ويتفكر في خلق الله، ولم تجيه أفكار من الشيطان يستعيذ منه ويذكر ربنا في نفسه

لأن الأماكن ذي ماحتشهد علينا يوم القيامة
إننا عملنا كده وكده، فكمان بعمل الطاعات والحسنات نخليها تشهد لينا وتكون حُجة لينا مُش علينا💚

#قوم_أمشي_صلِّ💚

إشتقتوا لي أتندس الصلاة صح!!

صليتو العصر ولا لسه؟👀

أي رفيق صلّى يتفاعل بـ "❤️"

"اللهم ارزقنا لذّة الخشوع وطمأنينة السجود." 💚

#قوم_أمشي_صلِّ💚

وإذا رأيتَ الكربّ طال بقاؤُه
فافزع إلئ الرحمنِ بالدعواتِ💚

واسكب دموعّ الذل لا تبخل بها
مَنْ غير ربك يكشف الكرباتِ؟!

واسألهُ غفرانا وعفواً شاملاً
من غير ربّكَ يغفرُ الزلاتِ؟!

واجعل وقوفك في الصلاة تذللاً
وأطل دعاء الله في السجدات💚

إن اللحوح إذا دعا بدموعهِ
سينالُ ما يرجو من الرغباتِ


#قوم_أمشي_صلِّ💚

للمؤنسات المنتقبات...

هنيئاً لكنَّ وهنيئاً عليكنَّ
رغم الحر والسخانة والمشقة لسه ملتزمات به، طيب عارفين إن كل الوقت دا وانتوا بالنقاب بتكونوا في عبادة دائمة؟
يعني كأنكم قائمين بتصلوا أو بتصوموا أو بتذكروا ربنا، ففي كل لحظة وانتن به حتكتب ليكم قناطير حسنات💚

أجر وثواب عظيم ربنا خصاكم به يستوجب تقولوا
"الحمد لله الذي هدانا لهذا وما كنا لنهتدي لولا أن هدانا الله"
والسلام عليكم💚

#قوم_أمشي_صلِّ💚

صليتو الظهر ولا لسه؟👀

أي رفيق صلّى يتفاعل بـ "❤️"

" اللهم ارزقنا لذّة الخشوع وطمأنينة السجود." 💚

#قوم_أمشي_صلِّ💚

قال رسول الله ﷺ: {المؤمن للمؤمن كالجسد الواحد إذا أشتكى منه عضو تداعى له سائر الجسد بالتعب والحمى}

ديننا الإسلامي كان من أهم أهدافه توحيد الأمم والدول، ورسولنا الحبيب كان يكثر الإهتمام والدعاء لكل من حوله، لأهله وأصحابه حوله ولجميع أمته💚

فاللهم أنصر جنودك البواسل في غـ.زة وأجبر كسرهم وأمن خوفهم، وأجعل كيد أعداءنا وأعدائهم في نحورهم وأنتقم منهم أشد إنتقام.
اللهم أحسن عزاء إخواننا في أفغانستان في الزلزال وأهلنا في دارفور في الإنهيار وارحم موتاهم واشف جرحاهم واربط على قلوبهم.
اللهم أنصر عبادك في الفاشر وفرج عنهم وأجبرهم وأجعل كيد الدعم في نحورهم.

واللهم أنصر جميع عبادك المسلمين في سائر الأرض غربًا وشرقًا وعجل بالفرج يا الله💚

أدعي وشير وإنت ماري💚✨

#قوم_أمشي_صلِّ💚

وسط الزحمة والحر والدوامات… خُت كل شي وامشِ صلّ الظهر 💚

#قوم_أمشي_صلِّ💚

يا سعادة القلب..
تخيّل ربنا يناديك بنفسه ويقول:
﴿يَا أَيُّهَا الَّذِينَ آمَنُوا هَلْ أَدُلُّكُمْ عَلَى تِجَارَةٍ تُنْجِيكُمْ مِنْ عَذَابٍ أَلِيمٍ﴾
ياااه.. نداء يحرّك القلب قبل الأذن 💚

ربنا ما قال "اعملوا" ولا "قاتلوا"، قال هل أدلكم؟
كأنه سبحانه بيعرض علينا فرصة ذهبية، صفقة فيها مكاسب ما بيتكرر!
تجارة ما فيها خسارة، ورأس مالها بسيط:
إيمان صادق، وجهاد بقدر الاستطاعة، وبذل من مالك ونفسك لوجه الله فقط، ابتغاء مرضاته💚.

وفي المقابل؟
ربح لا يُقدّر بثمن:
﴿يَغْفِرْ لَكُمْ ذُنُوبَكُمْ، وَيُدْخِلْكُمْ جَنَّاتٍ﴾
يعني الغفران، والخلود، والطمأنينة، الأبدية.!
الجزاء دا هو هو الفوز العظيم الذي لا يدانيه أيّ فوز.

لكن كرم ربنا ما له حد..
زادنا وقال:
﴿وَأُخْرَى تُحِبُّونَهَا نَصْرٌ مِنَ اللَّهِ وَفَتْحٌ قَرِيبٌ﴾
يعني حتى في دنياك، ربنا بيكافئك بالنصر، وبالفتح القريب والفرج الّبتنتظرو 😭

هي تجارة فيها تعب، لكن والله تستاهل كل تعب.
تخسر شوية دنيا.. وتكسب رضا الله وجنته، وتنال النصر في الدنيا، والفوز بالجنة في الآخرة💚

عايز شنو غير كدا؟

فاسمع النداء بقلبك، ورد عليه بخطوة:
جاهد بمالك، بوقتك، بكلمتك الطيبة، بنية صادقة.

فسارعوا إليه.

#قوم_أمشي_صلِّ💚

"الإستمـرارية صعبـة،
لكـن النهايـات بتستاهـل".💚

هل جربـتَ يوم تمشـي عكس التيـار؟
إحساس الرياح بتضرب في وشـك بقـوة،
وأنـت في مركـب وسط بحـر هائج
بتحاول تمسك تسيطر، وترجع البوصلة لمكانها الصحيح؟

غفلة بسيطة بس يا رفيق
ممكن تقلب المركب، وتغرقك في رمشة عَيِّـن❗

لكن ما تخـاف!!
نحن في صَـلِّ بنجهـز لسلسلة عظيمـة،
حتخليك تمشي عكس التيار، وكمان تلحـق النور قبل ما يفوت الآفوان، حتلقى الإجابات لكل الأسئلـة ال بتدور في بالك:
من وين أبـدأ؟ كيف أستمر؟ وشنو البغـير حياتي فعلاً؟

«رحلة ما بين الذنـب والتوبـة، بين ضعـفك ومحاولتك في إثبـات إنك لسه قادر ترجـع💚.»

انتظرونـا في👀🫵

#رحلة_ملتزم💚
#قوم_أمشي_صلِّ💚

اللي نام عن الفجر بعتقد إنه كدا أخد راحة زيادة، وما عارف إنو الراحة كلها لمن يقيف قدام يدي ربه ويصلي😔💚

فهنيئًا لمن صلى الفجر، وبقى في ذمة الله.

#الصلاة_خير_من_النوم
#قوم_أمشي_صلِّ💚

في عصـر يـوم الجمعـة💚.
اللهـم لا تـدع لنـا حـزنًا في قلوبنـا إلا بدلتَـهُ فرحًا، اللهـم خفف عن أهلـنا المستضعفين، وكن عونًا لهـم في كل حيـن.
يا رب اجعـل لنـا من كل ضـيق مخرجًا، ومن كل هم فرجًـا، ومن كل دعـاءٍ استجابـة.

#قوم_أمشي_صلِّ💚

يا ريت لو ما سمعتها...

دي كانت جملة محمد بعد ما قسى قلبه وانجرف نحو الملهيات، بعد ما فقد لذة استشعار آيات الله وأصبح أسير للمعصية.

محمد كان بيسمع الأغاني ليل نهار، كل ما يحس بالضيق ظنًا منه إنها وسيلة للسكينة حتى لحظاته السعادة ما نجت من الأغاني، كان بيظن إنه قادر يسمع الأغاني و يواظب على ورد القرآن لحدي ما وجد نفسه بيقرأ الآيات بي لسانه فقط لكن قلبه بعيد عنها.

محمد أيقن تمامًا إنه كل طريق معصية حيحرمك من طريق طاعة؛ فقربه من الأغاني أبعده عن القرآن.

لكن ما استسلم، قرر إنه يحذفها وجاهد نفسه والتزم الدعاء، زي محمد كتير لكن لا زالوا غافلين نسأل الله الهداية.


#رحلة_ملتزم 💚
#قوم_أمشي_صلِّ💚

علامات سعادتك ومحبة ربنا ليك 💚

عارف إنه من علامة حب الله ليك، إنك تكون مختار من بين الملايين النائمين عشان تقوم وتصلي الفجر ‼️

#الصلاة_خير_من_النوم💚
#قوم_أمشي_صلِّ💚

بني توضأ بماء طهور ..
فماء الوضوء لوجهك نور
بني توضأ وقم للصلاة ..
وصلي لربك تكسب رضاه
بني توضأ وقم للفلاح ..
ففي طاعة الله سر النجاح

متذكرين الأبيات دي يارفاق؟!
كانت من أيام الإبتدائي والأساس، ودا بورينا حُسن الإعداد للأجيال من الصغر وخاصة في الصلاة والإلتزام بيها💚

فلو عندكم أخوان أو أقارب صغار ربوهم وازرعوا فيهم حب الصلاة والمحافظة عليها، حتى لو كانوا لسه ما مكلفين والصلاة لسه ما مفروضة عليهم💚

#قوم_أمشي_صلِّ💚

لمن تقرأ عن مواقف الصحابة رضي الله عنهم وثباتهم أيام الحروب، والله بتقول براك:
يا سلام قدر شنو كان إيمانهم قوي شديد! 💚

تتخيل؟ في غزوة أُحد كانوا واقفين زي الجبال، بدافعوا عن النبي ﷺ حتى بعد ما الناس قالوا استُشهد!
وفي حصار اليمامة، بيظهر البراء بن مالك بشجاعة عجيبة، دخل الحصن بِنفسه، قاتل بكل قوته، وفتح الباب للمسلمين والدماء بتسيل منو 😢

القصص دي ما خيال ولا فيلم، دي مواقف حقيقية سطرها التاريخ ببسالة، ولسه بنفتخر بيها 💪🏽

منهم بنتعلم معنى الإيمان الحق، والثبات، والشجاعة، وإنه نحنا كمسلمين أقوياء، ما بننكسر، حتى وسط الصعوبات.
بنقيف مع بعض، ونسند بعضنا، في أقسى الظروف.💚

#قوم_أمشي_صلِّ💚

انك تستنشق نسيم الفجر وهواهو العليل صدقني دا نعمة ومنحة من ربنا😍💚
فيا بخت اللي صحى وصلى في جماعة، وقرأ أذكاره وورد القرآن.

#الصلاة_خير_من_النوم💚
#قوم_أمشي_صلِّ💚

أنا مـا الوحيـد البغلـط؟
مـا كـل الناس بتعمـل كده؟
الدنيا كلها بايظـة، جات علي؟

كـلام بنقوله كتيـر، لكـن الحقيقـة؟
دي حجـج بنغطـي بيـها على تقصيـرنا.
زي الطالبـة الما ذاكرت، ولما رسبـت قالت:
"الدكتور صعـب، والكل راسـب!"
هل دا بغيـر إنها ما اجتهـدت؟
أكيـد لا.

ما منطـق تنساق ورا الغلط، عشان الناس كلها بتعمله، أنت ربنا ميـزك بالعقـل، فساد الناس ما مبـرر ليـك.

إنت مـسؤول من نفسـك، والحـساب هنـاك فردي، النجـاة فردية، ومافي زول حيبرر ليك.
فـ بدل تقـول: "ما كل النـاس كده"
قول:"هم كـده وأنا مختلف منهـم."

ربنا ما بسألـك عن النـاس،ما بقـول ليك كنت مع منـو، بقول ليك:إنت عملت شنـو؟
كل واحـد حيوقـف براه، بأفعاله، بكلامـه، بسكوته، فـ راجع نفسك، وجهز جوابك💚.

﴿وَكُلُّهُمْ آتِيهِ يَوْمَ الْقِيَامَةِ فَرْدًا﴾

#قوم_امشي_صلِّ💚

بعد صلاة الصبح، كان المسجد هادي إلا من صوت تسبيح خافت.
محمد لمح عم حسن قاعد في ركن المسجد وكانت عادة ثابته ليه

اقترب محمد وقال مبتسم:
– "عم حسن.. كل يوم بشوفك بعد الصلاة قاعد هنا فترة من الزمن. بتعمل فيها شنو ؟"

عم حسن ابتسم:
– "يا ولدي ده وردي اليومي.. أقرأ جزء من القرآن وأقول أذكار الصباح."

محمد جلس جنبه وسأله باهتمام:
– "لكن شنو الفايدة الكبيرة من الالتزام بي الورد؟"

عم حسن قال وهو يبتسم بحنان:
– "يا محمد.. الورد اليومي ده زي الغذاء للقلب.
القرآن ينور قلبك ، ويطرد الهم والضيق ويقوي إيمانك.

أما الأذكار فهي حصن، تحميك من الشيطان، تحفظك طول يومك، وتجلب البركة في رزقك وصحتك."

محمد تأمل الكلام وسأل:
– "والوقت يا عم حسن؟ مرات بحس ما عندي زمن."

عم حسن ضحك وقال:
– "جرب تلتزم يومين بس.. حتلقى ربنا يبارك ليك في وقتك وتنجز أكتر مما كنت بتنجز قبل."

الكلام مس قلب محمد، ومن اليوم ده صار يجلس بعد الفجر يقرأ جزء من القرآن ويقول أذكاره. مع الأيام لاحظ إنه قلبه صار أهدأ، يومه منظم، وهمومه أخف.

زي محمد كتار.. منتظرين كلمة واحدة تغيّر حياتهم.
يمكن الكلمة دي تكون سبب البداية ليك.

#رحلة_ملتزم💚
#قوم_أمشي_صلِّ💚

والله إنها لأيام ثقال على قلبك، لكنها ما ضاقت إلا لتفرج فاصبر واثبت💚
لا يحزنك الظلم ولا تكسرك المصائب، اصبر واثبت💚

الزم الدعاء وأسأل الثبات💚

#قوم_أمشي_صلِّ💚