قال تعالى: ﴿ وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلَاهُمَا فَلَا تَقُلْ لَهُمَا أُفٍّ وَلَا تَنْهَرْهُمَا وَقُلْ لَهُمَا قَوْلًا كَرِيمًا ﴾
﴿ وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيرًا ﴾
﴿ رَبُّكُمْ أَعْلَمُ بِمَا فِي نُفُوسِكُمْ إِنْ تَكُونُوا صَالِحِينَ فَإِنَّهُ كَانَ لِلْأَوَّابِينَ غَفُورًا ﴾

بسمِ اللهِ نبتدئ وبِهِ نستعين..💚

مجلس "وصايا للشباب"
بعنوان وبالوالدين إحسانا
مع الشيخ حاطب محمد بارك الله فيه💚.

رابط المجلس:
https://t.me/Gom9li?livestream=3bd7b449bc1a7ac9b8

نافذة التعليقات⤵️💚:

#قوم_أمشي_صلِّ💚

﴿يا أَيُّهَا المُزَّمِّلُ۝قُمِ اللَّيلَ إِلّا قَليلًا۝نِصفَهُ أَوِ انقُص مِنهُ قَليلًا۝أَو زِد عَلَيهِ وَرَتِّلِ القُرآنَ تَرتيلًا﴾ [المزمل: ١-٤]

يا الله من قيام الليل، و جمال قيام الليل، انت عارف يعني شنو انك تقيم الليل؟ عارف فضل قيام الليل؟ عارف حتلقى شنو في الدنيا والآخرة؟
والله لو تعلم فضله لما تركته قط

تخيل معي واحد نائم يقطع النوم الجميل و يمشي يتوضى و يصلي و يدعي و يرجع ينوم هل دا عند الله زي النائم و ما قام اصلاً؟
عبدالله بن عمرو رضي الله عنهما قال قال رسول الله صلى الله عليه وسلم: ( إن في الجنة غرفاً يرى ظاهرها من باطنها وباطنها من ظاهرها اعدها الله لمن أطعم الطعام و أفشى السلام و صلى بالليل و الناس نيام)
ياخ في أجمل من إنو تكون من الناس ديل؟ انا بقول ليك غرفاً في الجنة بكلمك عن شي كل واحد فينا بعمل في الدنيا دي عشان يفوز بالجنة .

يلا بما إنو الرسالة دي وصلتك قوم صلي و أكثر من الدعاء 💚

#قوم_أمشي_صلِّ💚

الجنه بتستاهل 💚
بتستاهل تصحى رغم إنه عندك شغل في النهار
بتستاهل تطلع من بطانيتك في عز البرد
بتستاهل تتوضى رغم برودة المويه
بتستاهل تمشي المسجد والدنيا ظلام
بتستاهل إنك تبدأ يومك بالصلاه والأذكار ورضا الرحمن
بنتكلم عن الجنه فأكيد بتستاهل ده كله وأكتر فما تحرم نفسك
#الصلاة_خير_من_النوم💚
#قوم_امشي_صلّ 💚

غض البصر ما واجب علينا بس في الشارع💚

غض البصر يا أحباب من أفضل الطاعات، وأمرنا بيهو ربنا عز وجل نحن المسلمين رجال ونساء، وبشمل الواقع والمواقع🫡.
غض البصر ما بس انك تبعد نظرك، لكن هو حماية لي قلبك من انو تتعلق بي حاجة زائلة، وكمان تحرير لي نفسك من قيود الشهوة، وعنده منافع كتيرة.
كل نظرة محرمة بتزرع في قلبك ضلمة بتبعدك عن الطمأنينة، فاحفظ نظرك تحفظ قلبك يا رفيق.

اللهم أعنا على غض أبصارنا وحفظ فروجنا💚.

#قوم_أمشي_صلِّ💚

في يوم من الأيام، كان أحمد قاعد مع أصحابه بعد المحاضرات، وكانوا بيتونسوا ويتكلموا عن مواضيع مختلفة.
فجأة قال واحد منهم وهو بيضحك:
*"يا زول أحمد ده معقد ساي، ما بيختلط مع البنات وما بيقعد معانا لما نكون بنونس معاهم!"*

الكل ضحك، لكن أحمد ابتسم وقال:
*"والله يا شباب، ما الموضوع تعقيد… بس في حاجات الدين وضّحها لينا، ولو عرفنا الحكمة من وراها، حنفهم إنها لحمايتنا نحنا."*

سكتوا شوية، وقال محمد:
*"لكن يا أحمد، نحنا في جامعة، طبيعي نختلط، ده ما زمن الصحابة!"*

أحمد قال ليهم بهدوء:
*"صحيح نحنا في زمن مختلف، لكن مبادئ الدين ما بتتغير… الاختلاط الزايد بيجيب مشاكل كتيرة – تعلق، شهوات، غفلة، وبعد عن الله."*

*"قال تعالى: *قل للمؤمنين يغضوا من أبصارهم ويحفظوا فروجهم…*، يعني ربنا أمرنا نغض البصر قبل أي حاجة، عشان النظر هو أول طريق الفتنة."*

*"والنبي ﷺ قال: *إن النظر سهم من سهام إبليس…**
يعني المسألة ما بس (نظرة وسلام)، ممكن تكون بداية لضياع كبير."**

محمد سكت شوية، وبعد كم يوم، بدا ...

#رحلة_ملتزم💚
#قوم_امشي_صلِّ 💚

إنت خلاص قررت تنوم؟
طيب خلينا قبل النوم نعمل خطوة بسيطة…
نقوم نتوضّى ونصلّي ركعتين، وننوي بداخلنا إنو نقوم نصلي الفجر حاضر، وبعدها نرجع نرقد براحتنا.

والله الموضوع ما بياخد أكتر من 5 دقايق… يعني قدر 10 مقاطع ريلز بس 👀
وبالطريقة دي نكون صلّينا قيام الليل وربطنا النوم بالطاعة بدل السهو.

جربها الليلة… يمكن تكون أبرك لحظة في يومك 💚

#قوم_أمشي_صلِّ💚

صبـاح الخيـر جِـدًا..
يُشـرق الصبـاح في قلبـك حين تؤمـن أن الله معـك، وما دُمـت تعود إليه فلن يردك خائبًـا، واجعل هِمتـك دليلًا عليـك، فبقدر العزائم تأتـي المكـارم.
وتذكـر أن سعيـك لا يثمـر إلا إذا توكلت على رب السعـي ومُسبب الأسباب، فقط ثِق بأن كل ما يكتبه الله لـك هو الخيـر مهما بدا لك غير ذلـك💚.

#قوم_امشي_صلِّ💚

﴿وَالَّذينَ جاهَدوا فينا لَنَهدِيَنَّهُم سُبُلَنا وَإِنَّ اللَّهَ لَمَعَ المُحسِنينَ﴾ [العنكبوت: ٦٩]

جهاد النفس صح صعب لكن الجزاء في النهاية جميل شديد، لمن تحس بي انك ما قادر اتذكر انو الإنسان خلق في كبد.
اتخلقت عشان تحارب نفسك وتحارب الشيطان، وتحارب كل ملهيات الدنيا.
لمن تقع قوم تاني، لمن تنتكس ارجع تاني وأتذكر طالما انت بتجاهد ربنا حيسهل ليك الطريق، وعشان تصل لي مبتغاك اللي هو الجنة 🥰💚.

فاللهم ارزقنا الجنة بغير حساب ولا سابق عذاب.

#قوم_أمشي_صلِّ💚

«الله أكبر»
حصل وقفت في الجملة دي واستشعرت معناها ؟؟

دي جملة لو وقفنا فيها وفهمناها كانت ح تخفف علينا حاجات كتيرة جدًا .
لما الحياة تدوخك، و تحاول تلحق مشاوير، وتسمع خبر يضايقك، وتجيك مسؤوليات فوق راسك…
و يجي المُؤذن ويقول:
«الله أكبر💚».
وكأنها تذكير بسيط:
في حاجة أهم من الركض ده كله، في رب شايف، وعارف، وقادر.

لما تضايق من موضوع ، ولا تحس إنه ما في حل😔
«الله أكبر» بتذكرك إنه في رب أكبر من الموضوع و المشكلة نفسها.

ما معناها إنه المشاكل ح تختفي فجأة، ولا الهموم حتبقى صفر، لكن ببساطة:
بتربيك على الهدوء، على إنك ما تكبر الموضوع في داخلك أكتر من حجمه 💚.

المرة الجاية لما المُؤذن يرفع الأذان،
خذ نفس عميق، واسمع أول كلمة فيه:
الله أكبر.
"أَلَا بذكر الله تَطْمَئِنُّ الْقُلُوبُ"
وقول لنفسك:
محلولة ، ربنا أكبر من تفكيري وتوتري ✨.

#قوم_أمشي_صلِّ💚

بعد يومين من غياب أحمد وتخلفه عن الجلوس مع أصحابه، قرروا يحاولوا مرة تانية ويقنعوه.

بدا محمد الحديث فقال: يا أحمد والله كانت ونسة عادية والزمن دا أصلا ماف ونسة بتخلو من الغيبة، بعدين احنا بنقول في كلام حقيقي ما كذبنا فيهم والجامعة كلها عارفة.

بعد نظرة حزينة وسكوت لفترة قصيرة رد أحمد: يا أحباب والله لولا حرصي ومحبتي ليكم وخطر ظاهرة الغيبة البقت منتشرة كأنها شي عادي أنا ما كنت حأزعل للدرجة دي.
قال صلى الله عليه وسلم: لما عرج بي مررت بقوم لهم أظفار من نحاس يخمشون وجوههم وصدورهم، فقلت من هؤلاء يا جبريل؟ قال: هؤلاء الذين يأكلون لحوم الناس ويقعون في أعراضهم. 
لمن تتكلم عن زول كأنه بتاكل من لحمه.
ظهرت الدهشة في عيون محمد وأصابه الندم والخوف بعد ما سمع الحديث وكذلك باقي الشباب، فقال: طيب يا أحمد أنا اغتبت ناس كتار أعمل شنو؟
رد أحمد: يا صحبي طالما إنك ندمت فربنا غفور رحيم بس استغفر وأدعي للزول الاغتبته وربنا يثبتنا على الحق ويبعدنا عما يغضبه.
أضاف عمر علي كلام أحمد: بعدين يخوانا الكمال لله، إحنا نتكلم في الناس كأنه ما عنده عيوب ولا حصل غلطنا، تاني يا شباب لو زول جاب سيرة زول بزعل أكتر من أحمد وما بقعد معاكم.

و من اللحظة ديك الشباب بيجاهدوا نفسهم إنه مجالسهم تخلو من الغيبة، ما نفسك تكون شلتك كدا برضو؟!💚

#رحلة_ملتزم💚
#قوم_أمشي_صلِّ💚

أغلبية الناس وبالذات نحنا الشباب في الفترة دي بنشكي أنه الزمن جاري ومتين اليوم بخلص، وهو اصلا جايط قدر ما أحاول ارتبه،
ومتين اليوم السبت أمس ما كانت الأربعاء،
ومتين الشهر خلص وأنا مخطط اعمل حاجات كتيرة وما عملت ولا شيء وتفاجأت أنه يوم ٢٨ من الشهر يعني خلاص..😳

وغيره من الكلام يلي بدل على عدم وجود البركة في الوقت.!

دي مشكله كبيرة جدا في حياتنا كلنا ومحتاجين أنه نشوف ليها حل ونراجع حساباتنا مع نفسنا.

يا ترى الحل شنو؟🧐💚
هو شيء قدامنا وفي متناول الجميع.!

ورونا في التعليقات شايفين الحل شنو، ولا نحنا برانا جايين من كوكب زحل وحاسين كدا🫢

#قوم_امشي_صلِّ💚

"لا عليك هي بإذن الله وليست بإذن البشر".

في حاجات بتقلق قلوبنا ساي، بس لما نقعد ونفكر: حتتم؟ ما حتتم؟ منو البحدد؟
والحقيقه بسيطة جِدًا:
الحاجة الربنا كاتبها ليك، بتجيك.. في وقتها، بشكلها، وبقدرها، أنت بس عليك السعي و الدعاء.
أما التيسير؟ دا بيد الله وحده!
وما دام الأمر عند رب العالمين، إطمئن
فالمكتوب ليك ما حيتخطاك💚.

#قوم_أمشي_صلِّ

صلاة الفجر  لا يدركها إلا قلب احبه الله
‏واحب لقائه "اللهم اجعلنا من اهل الفجر"💚

‏ #قوم_أمشي_صلِّ

رايك شنو الليلة نبدأ شي جديد في حياتنا و نخلي شي ثابت كل يوم و نعتبر الليلة أول خطوة لينا

صلاة الضحى 💚

في حديث عن أبي هريرة رضي الله عنه، قال:
"أَوْصَانِي خَلِيلِي (صلى الله عليه وسلم) بِثَلَاثٍ: صِيَامِ ثَلَاثَةِ أَيَّامٍ مِنْ كُلِّ شَهْرٍ، وَرَكْعَتَيْ الضُّحَى، وَأَنْ أُوتِرَ قَبْلَ أَنْ أَنَامَ."

فيلا من دون كسل نقوم نتوضّى و نصلي ركعتين و ندعي 💚

#قوم_أمشي_صلِّ

قال ﷺ
"لا يموتن أحدكم إلا وهو يُحسن الظن بالله".

حُسن الظن بالله عبادة عظيمة، وسبب لراحة القلب وطمأنينته.
فمهما اشتدت عليك الظروف… ما تيأس، واتأكد أن ربك أرحم بك من نفسك، وكل أمرٍ يقدّره علينا، ح يجي في وقته المناسب، وبالخير العظيم. 💚

قال ابن مسعود رضي الله عنه:
"قسمًا بالله ما ظن أحد بالله ظنًا، إلا أعطاه إياه."

فاجعل قلبك دائمًا مُعلّق بالله، وتوقع منه الخير…
فالعبد على قدر ظنه بربه. 💚

#قوم_أمشي_صلِّ 💚

اسمعني يا عزيزي…
حابّي أبشّرك إنو نحن في بكرة القلت حتبدأ فيها.
والآن انت — بنسبة كبيرة — إمّا:

🔹 مقرِّر تنتظر الفجر عشان تبدأ… لكن الشيطان بيوسوس ليك: لسه باقي كتير، نوووووم شويه
أو
🔹 أصلاً بديت لكن قاعد تعدّيها ريلز و تمشي مقطع وراء مقطع
أو
🔹 قاعد تقرأ الكلام دا ومركز و جاد في الموضوع
وفي النهاية… النتيجة واحدة: انت الآن صاحي.

وطالما إنك صاحي فـ دا أنسب وقت نغتنمو.
ما حنطوّل عليك… بس خمس دقائق:

🌧️ نقوم نتوضّى
🌧️ نصلي ركعتين
🌧️ وندعو ربنا و نقول ليه كل الفي قلوبنا ونطلب العون والثبات

وبعدها نرجع… والموضوع ما حيفوت 5 دقائق.

عشان ما نضيع الوقت:
قوم الآن… صلّي… و تعال
وحتلقى باقي الكلام في التعليقات.

يلا… منتظرينك💚

#قوم_أمشي_صلِّ