صبـاح الخيـر جِـدًا..
يُشـرق الصبـاح في قلبـك حين تؤمـن أن الله معـك، وما دُمـت تعود إليه فلن يردك خائبًـا، واجعل هِمتـك دليلًا عليـك، فبقدر العزائم تأتـي المكـارم.
وتذكـر أن سعيـك لا يثمـر إلا إذا توكلت على رب السعـي ومُسبب الأسباب، فقط ثِق بأن كل ما يكتبه الله لـك هو الخيـر مهما بدا لك غير ذلـك💚.

#قوم_امشي_صلِّ💚

﴿وَالَّذينَ جاهَدوا فينا لَنَهدِيَنَّهُم سُبُلَنا وَإِنَّ اللَّهَ لَمَعَ المُحسِنينَ﴾ [العنكبوت: ٦٩]

جهاد النفس صح صعب لكن الجزاء في النهاية جميل شديد، لمن تحس بي انك ما قادر اتذكر انو الإنسان خلق في كبد.
اتخلقت عشان تحارب نفسك وتحارب الشيطان، وتحارب كل ملهيات الدنيا.
لمن تقع قوم تاني، لمن تنتكس ارجع تاني وأتذكر طالما انت بتجاهد ربنا حيسهل ليك الطريق، وعشان تصل لي مبتغاك اللي هو الجنة 🥰💚.

فاللهم ارزقنا الجنة بغير حساب ولا سابق عذاب.

#قوم_أمشي_صلِّ💚

«الله أكبر»
حصل وقفت في الجملة دي واستشعرت معناها ؟؟

دي جملة لو وقفنا فيها وفهمناها كانت ح تخفف علينا حاجات كتيرة جدًا .
لما الحياة تدوخك، و تحاول تلحق مشاوير، وتسمع خبر يضايقك، وتجيك مسؤوليات فوق راسك…
و يجي المُؤذن ويقول:
«الله أكبر💚».
وكأنها تذكير بسيط:
في حاجة أهم من الركض ده كله، في رب شايف، وعارف، وقادر.

لما تضايق من موضوع ، ولا تحس إنه ما في حل😔
«الله أكبر» بتذكرك إنه في رب أكبر من الموضوع و المشكلة نفسها.

ما معناها إنه المشاكل ح تختفي فجأة، ولا الهموم حتبقى صفر، لكن ببساطة:
بتربيك على الهدوء، على إنك ما تكبر الموضوع في داخلك أكتر من حجمه 💚.

المرة الجاية لما المُؤذن يرفع الأذان،
خذ نفس عميق، واسمع أول كلمة فيه:
الله أكبر.
"أَلَا بذكر الله تَطْمَئِنُّ الْقُلُوبُ"
وقول لنفسك:
محلولة ، ربنا أكبر من تفكيري وتوتري ✨.

#قوم_أمشي_صلِّ💚

بعد يومين من غياب أحمد وتخلفه عن الجلوس مع أصحابه، قرروا يحاولوا مرة تانية ويقنعوه.

بدا محمد الحديث فقال: يا أحمد والله كانت ونسة عادية والزمن دا أصلا ماف ونسة بتخلو من الغيبة، بعدين احنا بنقول في كلام حقيقي ما كذبنا فيهم والجامعة كلها عارفة.

بعد نظرة حزينة وسكوت لفترة قصيرة رد أحمد: يا أحباب والله لولا حرصي ومحبتي ليكم وخطر ظاهرة الغيبة البقت منتشرة كأنها شي عادي أنا ما كنت حأزعل للدرجة دي.
قال صلى الله عليه وسلم: لما عرج بي مررت بقوم لهم أظفار من نحاس يخمشون وجوههم وصدورهم، فقلت من هؤلاء يا جبريل؟ قال: هؤلاء الذين يأكلون لحوم الناس ويقعون في أعراضهم. 
لمن تتكلم عن زول كأنه بتاكل من لحمه.
ظهرت الدهشة في عيون محمد وأصابه الندم والخوف بعد ما سمع الحديث وكذلك باقي الشباب، فقال: طيب يا أحمد أنا اغتبت ناس كتار أعمل شنو؟
رد أحمد: يا صحبي طالما إنك ندمت فربنا غفور رحيم بس استغفر وأدعي للزول الاغتبته وربنا يثبتنا على الحق ويبعدنا عما يغضبه.
أضاف عمر علي كلام أحمد: بعدين يخوانا الكمال لله، إحنا نتكلم في الناس كأنه ما عنده عيوب ولا حصل غلطنا، تاني يا شباب لو زول جاب سيرة زول بزعل أكتر من أحمد وما بقعد معاكم.

و من اللحظة ديك الشباب بيجاهدوا نفسهم إنه مجالسهم تخلو من الغيبة، ما نفسك تكون شلتك كدا برضو؟!💚

#رحلة_ملتزم💚
#قوم_أمشي_صلِّ💚

أغلبية الناس وبالذات نحنا الشباب في الفترة دي بنشكي أنه الزمن جاري ومتين اليوم بخلص، وهو اصلا جايط قدر ما أحاول ارتبه،
ومتين اليوم السبت أمس ما كانت الأربعاء،
ومتين الشهر خلص وأنا مخطط اعمل حاجات كتيرة وما عملت ولا شيء وتفاجأت أنه يوم ٢٨ من الشهر يعني خلاص..😳

وغيره من الكلام يلي بدل على عدم وجود البركة في الوقت.!

دي مشكله كبيرة جدا في حياتنا كلنا ومحتاجين أنه نشوف ليها حل ونراجع حساباتنا مع نفسنا.

يا ترى الحل شنو؟🧐💚
هو شيء قدامنا وفي متناول الجميع.!

ورونا في التعليقات شايفين الحل شنو، ولا نحنا برانا جايين من كوكب زحل وحاسين كدا🫢

#قوم_امشي_صلِّ💚

"لا عليك هي بإذن الله وليست بإذن البشر".

في حاجات بتقلق قلوبنا ساي، بس لما نقعد ونفكر: حتتم؟ ما حتتم؟ منو البحدد؟
والحقيقه بسيطة جِدًا:
الحاجة الربنا كاتبها ليك، بتجيك.. في وقتها، بشكلها، وبقدرها، أنت بس عليك السعي و الدعاء.
أما التيسير؟ دا بيد الله وحده!
وما دام الأمر عند رب العالمين، إطمئن
فالمكتوب ليك ما حيتخطاك💚.

#قوم_أمشي_صلِّ

صلاة الفجر  لا يدركها إلا قلب احبه الله
‏واحب لقائه "اللهم اجعلنا من اهل الفجر"💚

‏ #قوم_أمشي_صلِّ

رايك شنو الليلة نبدأ شي جديد في حياتنا و نخلي شي ثابت كل يوم و نعتبر الليلة أول خطوة لينا

صلاة الضحى 💚

في حديث عن أبي هريرة رضي الله عنه، قال:
"أَوْصَانِي خَلِيلِي (صلى الله عليه وسلم) بِثَلَاثٍ: صِيَامِ ثَلَاثَةِ أَيَّامٍ مِنْ كُلِّ شَهْرٍ، وَرَكْعَتَيْ الضُّحَى، وَأَنْ أُوتِرَ قَبْلَ أَنْ أَنَامَ."

فيلا من دون كسل نقوم نتوضّى و نصلي ركعتين و ندعي 💚

#قوم_أمشي_صلِّ

قال ﷺ
"لا يموتن أحدكم إلا وهو يُحسن الظن بالله".

حُسن الظن بالله عبادة عظيمة، وسبب لراحة القلب وطمأنينته.
فمهما اشتدت عليك الظروف… ما تيأس، واتأكد أن ربك أرحم بك من نفسك، وكل أمرٍ يقدّره علينا، ح يجي في وقته المناسب، وبالخير العظيم. 💚

قال ابن مسعود رضي الله عنه:
"قسمًا بالله ما ظن أحد بالله ظنًا، إلا أعطاه إياه."

فاجعل قلبك دائمًا مُعلّق بالله، وتوقع منه الخير…
فالعبد على قدر ظنه بربه. 💚

#قوم_أمشي_صلِّ 💚

اسمعني يا عزيزي…
حابّي أبشّرك إنو نحن في بكرة القلت حتبدأ فيها.
والآن انت — بنسبة كبيرة — إمّا:

🔹 مقرِّر تنتظر الفجر عشان تبدأ… لكن الشيطان بيوسوس ليك: لسه باقي كتير، نوووووم شويه
أو
🔹 أصلاً بديت لكن قاعد تعدّيها ريلز و تمشي مقطع وراء مقطع
أو
🔹 قاعد تقرأ الكلام دا ومركز و جاد في الموضوع
وفي النهاية… النتيجة واحدة: انت الآن صاحي.

وطالما إنك صاحي فـ دا أنسب وقت نغتنمو.
ما حنطوّل عليك… بس خمس دقائق:

🌧️ نقوم نتوضّى
🌧️ نصلي ركعتين
🌧️ وندعو ربنا و نقول ليه كل الفي قلوبنا ونطلب العون والثبات

وبعدها نرجع… والموضوع ما حيفوت 5 دقائق.

عشان ما نضيع الوقت:
قوم الآن… صلّي… و تعال
وحتلقى باقي الكلام في التعليقات.

يلا… منتظرينك💚

#قوم_أمشي_صلِّ

مهما إتقال عنها مستحيل زول يقدر يوصف السعاده والرضا والسكينه البتجي من صلاة الفجر💚
لأنها ما حاجه تتقال دي حاجه بحسها البجاهد نفسه عليها بس .

#الصلاة_خير_من_النوم💚
#قوم_أمشي_صلّ💚

انك تبدأ يومك بذكر الله… دي أجمل بداية💚
ولو كان الفجر نعمة ومنحة، فـ الضحى زيادة نور وسعة في الرزق وطمأنينة للقلب✨

ما تفوِّت صلاة الضحى…
ركعتين بس، لكنها مفتاح بركة يومك، وتوفيق ربنا الما بنقطع💚


#قوم_أمشي_صلِّ💚

في كافتيريا الجامعة، الشباب قاعدين يفطروا، ومحمد جالس متردد يسال أحمد من انو لاحظ ليه عنده عادة ثابته و اتجه عليه

ضحك وقال:
– "يا أحمد 😅.. كل يوم اثنين وخميس ما بتأكل معانا.. ليه؟"

أحمد ابتسم بهدوء وقال:
– "أنا صايم يا محمد. بحب أحيي سنة النبي ﷺ.
قال رسول الله ﷺ: تُعرض الأعمال يوم الاثنين والخميس، فأحب أن يُعرض عملي وأنا صائم."

محمد سأل بدهشة:
– "يعني بتصوم كل أسبوع؟ ما بتتعب؟"

احمد قال بحماس:
– "في الأول كان صعب شوية، لكن بعدين بقيت أستناهم بشوق 💚
الصيام بيربّي النفس، يطهّر القلب، ويقربك من ربنا.
غير كده، بتحس بخفة ونشاط طول اليوم."

محمد فكر وقال بتردد:
– "والله شكلها حاجة جميلة.. لكن ما متعود أصوم غير في رمضان."

أحمد ابتسم وشجعو:
– "جرب ابدأ ، حتى لو مرة واحدة بس.
حتتفاجأ براحة قلبك ونشاط جسمك."

الكلام لمس قلب محمد، وقرر يجرب.
ولما التزم بالصيام لفترة قصيرة حس براحة ما حس بيها قبل، ومن يومها بقى يستنى الاثنين والخميس بشوق.

زي محمد، ممكن تكون البداية التغير ليك إنت كمان 💚.

#رحلة_ملتزم
#قوم_أمشي_صلِّ💚

إذا وفقك الله أن تصلي الفجر فأبشر والله !

فإن الذي رزقك صلاة هي خير من الدنيا وما فيها لقادر على أن يرزقك . الدنيا وما فيها.

هنيئاً لكم يا أهل الفجر💚✨

#قوم_أمشي_صلِّ 💚

يومُ الجُمعة، أنوارٌ تتنزل، وبركاتٌ تتكاثر، وأحب ما نُتقرب به في هذا اليوم: الإكثار من الصلاة والسلام على خير الأنام، سيدنا محمد ﷺ… الشفيع، الكريم، البسام، الذي امتلأ نورًا وهديًا ورحمةً للعالمين.

اللهم صلِّ وسلم وبارك عليه عدد ما ذكره الذاكرون وغفل عن ذكره الغافلون💚.

#قوم_امشي_صلِّ

الوقت كالسيف، إن لم تقطعه قطعك!

مثل بنسمعو كثير… لكن السؤال الحقيقي:
هل استثمار الوقت مرتبط بالشغل والنجاح الدنيوي بس؟
في الحقيقة يا صاحبي، الحياة محتاجة مننا توازن بين دنيانا وآخرتنا.

بخطوات بسيطة مثلاً:
اذكر ربنا في طريقك وانت ماشي المسجد أو الدكان وإنت راجع كمان،
اخُد دقائق للذكر والصلاة على النبي ﷺ وسط يومك،
واحرص على صلاة الضحى والنوافل وقيام الليل…
قد تشوفها خطوات صغيرة، لكن أثرها كبييييير في وقتك وبركة يومك وراااحتك💚.
وخلي دعاءك دايمًا:
”اللهم أعنّا على ذكرك وشكرك وحسن عبادتك.“

#قوم_أمشي_صلِّ💚

في آخر مجلس لينا مع الشيخ حاطب عرفنا قدر شنو بر الوالدين ومجاهدة النفس والشيطان لرضاهم وطاعتهم شيء عظيم وطريق لمحبة الله تعالى ولدخول الجنة💚

- طيب دا وهم موجودين، لكن لو متوفيين أعمل شنو؟!
= لابأس عليك ياصاحبي وربنا يجمعك بهم على الحوض وفي غرفات الجنة،
من الطرق الممكن تبرهم بيها إنك تدعو ليهم وتتصدق بأسمائهم
وممكن تعمل وقف أو تساهم في حفر بئر أو توزع بلح على المصلين ودا كله وأكتر كمان وانت مستحضر نية بِرهم وإنك عملت الأعمال دي عشان ثوابها يصلهم ويكتب ليهم💚

وما كدا وبس، حتى في نفسك لم تهذبها وتعلمها علم شرعي وعلم نافع وتنفع به غيرك، ومعاملاتك وحديثك يكون طيب وحسن حيُذكر والديك بالخير وبأنهم أحسن التربية والإعداد

فهنيئا لمن قابل الإحسان بالإحسان وبرَّ والديه ونال محبة الرحمن💚

#قوم_أمشي_صلِّ💚

صلاة الفجر نورٌ في القلب ، وراحةٌ في الروح ، وبركةٌ في اليوم ، من حافظ عليها فاز بخير الدنيا والآخرة

هنيئاً لكم يا أهل الفجر💚✨

#قوم_أمشي_صلِّ 💚

يقول :
"في أيام النزوح وبعد طلعنا من بيوتنا كان مشينا منطقة ماكنت بعرف فيها ناس كتيرين فكنت حاسي نفسي غريب وما لي مكان هنا فماكنت بطلع إلا لحاجة أو ضرورة أو للصلاة
ففي يوم مرة واحدة سلم على من بعيد وقرب علي شوية شوية لحدي ماوصلني وسلم علي واتصافحنا أنا ماكنت بعرفه لكن هو كان بعرفني وقال لي جملة خلتني فعلا اتعلق بربنا أكتر
قال لي :
"أنت يمكن مابتعرفني لكني بعرفك بتصلي معانا في الجامع"💚
فسبحان الله اليسر لي الصلاة في المسجد وجبر خاطري بأحد يحسسني بكلامه إني مرحب بي وإني طالما محافظ على صلاتي فأنا في معية الله ولطفه بي"

فمن وجد الله فماذا فقد!💚

#قوم_أمشي_صلِّ💚