كيَّـف نَرضـىٰ دون أن نَفقِّـد الأمـل؟

الرِضا يا رفيـق ما حـل للمُشكلـة، الرِضـا طريقة للتعامل معـاها، حتسألنـي كيـف يعنـي؟!

لما تمـر بضـيق أسأل نفسـك: هل أرضـى؟ ولا أواصل أحلـم و أحـاول؟
ففكرة الرضـا ما بعنـي تغييـر للواقـع، إنما تغير لي نفسـنا، فالواقـع لـو صعـب، حيظـل صعب سواء رضيـت أو لا.

الفرق إنـه:
الإنسان الراضـي هو إنسـان هادئ، واعـي، بعرف يختـار صاح.
أما الما راضـي هو إنسـان متوتـر، ساخـط، قراراته غالبًـا إنفعاليـة.

‏إنّ الرِّضا عند النوائـبِ سَلْوَةٌ
‏والصّـبْرُ إنْ حلّ الأسـى تطبيبُ

الرِضـا ما بشيـل الوجـع، لكن بخليـك تتحملـه من غيـر ما يكسر ضهـرك.
دائًما إتعـود تخلي قلبـك معلـق باللـه مـا بالنتيجـة.💚

#كيف_نرضى_دون_أن_نفقد_الأمل💚
#قوم_امشي_صلِّ💚

ناس بدأت تقلل قهوة قبل رمضان
وناس بدأت تقلل شاي الصباح وشاي الفطور والغداء
عشان شنو؟
عشان ما تصدع وتتعب في رمضان ويأثره عليك شديد
ف الواحد بحاول بقدر الإمكان يقلل منهم
بس أنا ما جاي أقول ليك قلل ديل، لا لا جاي أقول ليك
قللقاعدك في التلفون بالساعات من غير فائدة
قلل إنك تحضر الريلز والفيديوهات القصيرة، لأنه النظر والسمع بأثروا على القلب بشكل مباشر وكبير وبالتالي قلبك بموت
ما تقول لي اخش اشوف فيديو فيديوهين تلاته واطلع، ح أقول ليك ما ح أقدر لأنه اصلا هي مصممة ومعمولة على إنك تخلص دا وتمشي لي البعده تلقائيا وحتى من غير وعي لما تلقى الساعة بقت ساعتين وتلاته.
قلل كلامك في الناس والغيبة والنميمة والكلام الما كويس، مش صاحبك ولا صحبتك قفلت الخط ولا طلعت منك تبدي تتكلمي فيها طوالي ياخي اتقي الله.
غير نفسك بنفسك، لأنه كدا ح تغيير غصب عنك وأنت ما واعي

لو حابي أنه نواصل في أنه نقلل شنو
أثبت وجودك بي تفاعل واكتب لينا في التعليقات💚
وما تنسوا تجيبوا معاكم اخوانكم أصحابكم.
وقلل عشان ما تصدع🌚💚، اتفقنا؟

#قوم_امشي_صلِّ💚

بكـرة 14 فبرايـر يوم عـادي جِـدًا، إلا لو قررت تخليه يوم ذنـب بإرادتك🤷.

خليني أكـون صريح معـاك يا رفيقـنا:
أنت محتاج عِـبارات؟ أنتِ محتاجة ورود؟
أبدًا والله، بل أنتوا محتاجيـن ضمير صاحـي بس❗️
كل سنـة فاليوم دا الناس بتتبادل قلـوب حمراء=قلـوب بتتعلق بالحـرام وهي عارفة.

بتقولوا حُـب؟
طيب خلينا نكون واضحيـن، رسالة الساعة12، مكالمة مُطولـة بدون سبب حقيقي، إهتمام بالسِر، وعود ما وراها عـقد.

هل دا الحُـب؟
دا تعدي مغلف بكلام لطيـف، مُشكلتنا مافي الشعور، المشكلة في الطريقـة، والشيطان طبعًا شاطر ما حيقول ليك أمشي أعصي، بقول ليك الموضوع بسيط، ياخ هو مجرد يـوم في السنة، مجرد هدايا و كلمات، لكن الذنـب ما بعمل إستثناء لكلمة «مُجـرد» لأنه أنت عارف إنه العلاقات السرية مافيها بركـة، أنت ما جاهل عارف أنه دا كله ما برضي ربـنا، لكن مرات بنغش نفسنا عشان الإحساس يكون أقوى من الخوف ويخِف تأنيب الضمير.

بس رفيقنـا..
الدين ما حرم الحُـب لو فعلًا بتحب
أمشي بالباب عديـل، لو ما قـادر؟👀
أشرف ليك تنسحـب بـدل ما تستهلك قلبها وقلبك.

و أنـتِ يا أختـي:
أنتِ غاليـة شديد؛ أغلى من أنـك تكوني محطة مؤقتـة في حياة زول، أغلى من الرسائل المخفـية، والمتاهات الما عندها نهاية واضحة، أغلى من أنك تبـدي علاقة بأسم الحُـب وتنتهي باسم الظـروف.

بكرة الناس حتحتفـل، وأنتو ممكن تختاروا تكونوا مختلفيـن، ممكن تختاروا تقولـو:
نحن ما حنبيـع آخرتنـا عشان لحظة إحساس الشيطان تالتـها..
نحن ما حنربط كلمة حُـب بحاجة حرام ربنا ما أذن بيـها..نحن ما حنعمل عـيد ربنـا ما شرعو.
الموضوع ما تشـدد❗️
الموضوع ضميـر، وفي النهاية لو قلبك أتحرك بكلامي دا ما تزعـل منـي، ازعـل من نفسك لو كنت عـارف و ساكت، راجع حساباتك الليلـة، و اصلح العلاقـة الاهم في حياتـك وهي علاقتك بربـك، وبكـرة بـدل ما تقـول " Happy Valentine
قـول يا ربِ أغفـر لـي ما فـات، واصلح لي ما هو آت، لا تؤاخذني بتقصيـري، ولا تجـعل لحظة ضعف سبب خسارتـي، اللهم إن كنـتُ أخطأت فاغفـر، وإن زلـلت فاستر، وإن ضعفـت فقـوِّني، وردني إليـك ردًا جميـلًا💚.

#قوم_امشي_صلّ

دايرين الجدول كله أخضر🤩💚

رمضان خلاص بقى على الأبواب، باقي لينا أربعة أيام بس وغالباً الأربعاء الجاية بحول الله نكون صايمين، الناس جارية تجهز في الحاجات وتعوس الآبري وتنشف البصل...
لكن دقيقة!
في تجهيز أهم نسيناه؛ إننا نجهِّز قلوبنا ونجاهد نفسها ونحافظ على صلواتنا تامة وفي مواعيدها

عشان كدا حنعمل معسكر إعدادي في باقي الأيام دي على شكل تحدي عبارة عن جدول بسيط للأيام الأربعة الجاية كل يوم فيهو الصلوات الخمسة والمطلوب منك تقيّم نفسك، ويا ريت لو تطبعه أو تحفظه في التلفون وتلونه كالآتي:
١. صليت الصلاة في وقتها حاضر ومع تكبيرة الإحرام؟
تلون المربع بالأخضر، دي الدرجة الكاملة، وده هدفنا💚
٢. إتأخرت شوية لكن لحقتها قبل دخول وقت الصلاة التانية؟ تلون المربع بالأصفر يعني ماشي حالك، لكن شد حيلك واطرد الكسل المرة الجاية
٣. الصلاة فاتتك ودخل وقت الصلاة البعدها؟
تلون بالأحمر ودا جرس إنذار ليك وإن شاء الله مايكون

الهدف من التحدي إننا عاوزين يوم الثلاثاء بالمساء لم نعاين للجدول نلقاه أخضر من أوله لآخره بإذن الله🤩💚
أكتب "معاكم بإذن الله" في التعليقات وشير البوست خلي غيرك يستفيد وتتنافسوا في الخير كمان💚

#قوم_امشي_صلِّ💚

الـيوم خلـص جدولـك لونـه شنـو؟ 💚💛❤️

أخضـر؟ حافظت على وقـت الصلوات كلها.
أصفـر؟ إتأخرت يا رفيقنا، شد حيلك بكره.
أحمـر؟ فاتتـك الصلاة؟ قوم عوضـها بركعات نافلـة لكل صلاة فاتتـك، و ما تتأخر المرة الجايـة.
إتذكر الهـدف: يوم الثلاثـاء كلـه أخضـر 🥳💚
#تحدي
#قوم_امشي_صلِّ

(١)
استقبالك (رمضان)💚
لا شك أن العبد إذا عمل عملاً، أو زار مكاناً، أو اجتمع إلى شخص، واستشعر أثناء ذلك أنه لن يعود إليه مرة أخرى؛ فإن هذا الشعور يضاعف في نفسه شعوراً آخر بضرورة اغتنام تلك الفرصة التي قد لا تتكرر💚
تعالوا نتصور ... رجلاً مخلصاً يصلي ركعات يعلم أنه يودِّع الدنيا بها
كيف ستكون في تمامها؟.... في خشوعها؟....
في شدة إخلاصها وصدق دعائها..؟
إن الرسول ﷺ يعلمنا بهذا الهَدْي-والله أعلم- كيف نتخلص من آفة تحوُّل العبادة إلى عادة، فلماذا لا نستحضر روح الوادع في عباداتنا كلها، خاصة وأننا إلى وداع في كل حال؟
إن رمضان يحل علينا ضيفاً مضيافاً، يكرمنا إذا أكرمناه، فتحل بحلوله البركات والخيرات من الله💚، يُقدِم علينا، فيقدِّم إلينا أصنافاً من الإتحافات والنفخات.. ضيف لكنه مُضيف، وربما يكون الواحد منا في ضيافته للمرة الأخيرة..!
أو ربما بنزل هو في ضيافة غيرنا بعد أعمار قصيرة..فهلا أكرمنا ضيفنا💚💚..؟! وهلا تعرضنا لنفحات مضيفنا..!

#استقبالك_رمضان💚
#روح_الصيام_ومعانيه💚
#قوم_امشي_صلِّ💚

تِك تُك تِك تُك. ⏳💚

رمضان على الأبواب...
جهزت قائمة المسلسلات ؟
لحد الآن طلعت تقريبًا بخمسة ستة مسلسلات ثابتة والباقي حسب المشغوليات صح ؟
إيّـاك تفّوت المسلسلات الجديدة عشان لما تطلع تريندات ما تكون زي الأطرش في الزفّة...
ما هو لازم تحضر مسلسلات عشان الوقت يمشي وما تحس بالجوع والعطش...

حصل مرة سألت نفسك يا عزيزي القارئ، ليه في رمضان بالذات بتحس المسلسلات أمتع من أي شهر ثاني في السنة، وكل مسلسل بكون أحلىٰ من القبله ؟

ببساطة، هذا ما أرادهُ الشيطان.

أن يلهيك عن شهر رمضان، شهر العِبادة واللي هو أعظم شهر يخصّك كمسلم في السنة!
المسلسلات يا عزيزي
إنت كمسلم
ما تخصّك
سامع ما تخصك دي ؟
ما تخصك وما حقتك
وبالذات في رمضان كمان لو التهيت بيها، يا حسرتك بالجد!
إنت عندك قُرآن
وبودكاستات دينية
وسيرة نبويّة
وِقصص سلف
معقول تخلّي النعيم ده كلللله، وتختار المسلسلات اللي ما بتعمل شيء غير إنها تنقّص أجرك ؟

ممكن المرّة دي بس
تقرر بينك وبين نفسك إنك رمضان ده يكون مختلف ؟

#رمضان_غير
#عام_قرارٍ_لا_تمنِّي
#قوم_امشي_صلِّ💚

الساعة 8:50
الصٌبح ما لحقته حاضر؟
في التحدي دا ما عِندنا أعذار، في تصحيح
قوم اتوضا وصلِّ الضحى💚.
كل زول عارف هو وين واقف.
أي زول مُشارك في التحدي يظهر لينا في التعليقات بالجدول حقه🔥
#قوم_امشي_صلِّ 💚

من مقاصد السورة💚
بيان عاقبة الإسلام بالنصر والفتح، وما يُشرع عند حصول ذلك، كما تشير لقرب أجل النبي صلى الله عليه وسلم💚

نلتقيكم الليلة الساعة السابعة والنص مساءًا بتوقيت السودان والثامنة والنصف بتوقيت بكة💚

متابعين جليس عارفين اليوم موعدنا صح؟
في جَلِيس مع د يزيد المُنير جزاه الله خير الجزاء💚
مجلسنا بعنوان "كيف نُعايش سورة النصر؟

#جليس
#قوم_امشي_صلِّ💚

أول خطوة اتفقنا عليها إنه رمضان السنة دي بدون مسلسلات، طبعًا هي ما الذنب الوحيد اللي بيقع فيه الإنسان في الشهر العظيم ده لكنّه من أعظم الذنوب البتضيّع على الإنسان باب فضل عظيييم لو أدرك؛ لأنها بتاخد وقتك كله بدون ما تشعر.

يعني بعد ما تقعد ٦ ساعات مسلسلات، ونوم ١٢ ساعة مثلًا، باقي في اليوم شنو؟
والمسلسلات دي عندها شيء ثاني شبيه بيها جدًا في تضييع الوقت ألا وهو: السوشال ميديا.

نعم نعم يا عزيزي🫣
ساعتين فيسبوك
وساعة تدخل ترد على الناس في الواتس
وثلاثة ساعات ريلزات انستا
وتيك توك نص ساعة كدا
حيكون باقي في يومك شنو بعد كدا؟😆

معناها السوشال ميديا كمان السنة دي عليها كروس؛ عشان....⤵️💚

يمكن تتساءلوا:
يعني نعيش بدون سوشال ميديا وبدون مسلسلات، حنعمل شنو طيب والوقت حيمشي كيف؟

هذا ما ستعرفونه في النص القادم بإذن اللّٰه.
تاقي أصحابك يستفيدوا معاك، وتابع السلسلة.
في الكومنتات حتلقوا رابط التطبيق👇🏻
والسّـــلام💚

#رمضان_غير
#عام_قرار_لا_تمنِّي
#قوم_امشي_صلِّ💚

"أقبل شهر الصيام بالقرآن نورهُ
فحُقّ للنفسِ أن تفيضَ له بالسرور"💚

ساعات قلائل تفصلنا عن شهر رمضان المُبارك، واللي اتفقنا إنه يكون مختلف السنة دي، صح يارفيق؟!

خلينا نشوف كيف...
أولًا: قبل ما رمضان يدخل، لازم تحدّد مقدار ثابت لوردك القرآني، وكل ما همَّتك تقلّ اتذكر إن الإمام الشافعي رحمه اللّٰه كان بيختم القرآن في رمضان ٦٠ مرّة -اللهم بارك.
أيوا ٦٠ مرّة زي ما قريت!
وعشان كدا جبنا ليكم رابط لقارئ اسمه د.أحمد ديبان، يقرأ القرآن كاملًا حدرًا في ٧ ساعات، ممكن يفيدكم في القراءة الصحيحة والحدر

وننبه على نقطة مهمة شديد...
إن الأهم من إنك تختم مرة أو مرتين وعشرة
إنك تتدبّر الآيات وتعمل بيها!
فما يكون قرءاة لسان ومباهاة بس، ويا حبّذا لو كان عدد ختماتك بينك وبين ربّك وحتى ناس بيتكم ما يعرفوا بيها💚

وكمان نقطة مهمة، قليل مستمر خيرٌ من كثيرٍ منقطع، فبدل ما تقرأ أول يوم ١٠ أجزاء وآخر أيام تترك القراءة، الأفضل إنك تلتزم بجزء واحد كل يوم مثلا، المهم حسب طاقتك

في التعليقات حننزل ليكم....⤵️💚

معانا ياكرام ولا الشيطان حيغلبكم؟!🫣🔥

#رمضان_غير
#عام_قرار_لا_تمنّي
#قوم_امشي_صلِّ💚

رمضان مُبارك💚🌙
وكما قال رسول الله "أتاكم رمضـان .. شهر مُبارك"

مُبارك عليكم الشهر وأعاننا الله وإياكم فيه على الصيام والقيام وتلاوة وتدبر القرآن وكتبنا من عتقائه من النار، أكثروا من الدعاء والذكر يا كِرام💚.
”اللهم أعنَّا على ذكرك وشُكرك وحُسن عبادتك“

اللهم لك الحمد حمدًا كثيرًا طيبًا مباركًا فيه💚

#رمضان_مبارك💚
#قوم_امشي_صلِّ💚

من بُشريات رمضان أن الله تعالى جعل لك مكافأة "عاجلة" في الدنيا، ومكافأة "مؤجلة" في الآخرة.

فرحتك وقت الإفطار هي " عربون " محبة، ورسالة إطمئنان.. أن الذي أذاقك لذة الماء بعد العطش في الدنيا، سيذيقك لذة النظر إلى وجهه الكريم والشرب من حوض نبيه ﷺ في الآخرة.🍃

قال رسول الله ﷺ: ”للصَّائمِ فرحتانِ : فرحةٌ حينَ يفطرُ ، وفرحةٌ حينَ يَلقى ربَّهُ“

فاحتسب تعبك، واجتهد فإنما هي أيامٌ معدودات، والأجر باقٍ بإذن الله.💚

#رمضان💚
#قوم_أمشي_صلِّ💚

هلالُ رمضان قد أطلّ نورًا وسرورًا💚🌙

أعزائي القُرّاء
أول يوم من رمضان باقي ساعات وينتهي.!
جهزت الخطة ولا لسه؟
لو ما جهزتها قوم جيب الورقة والقلم سريييع😠

ممّا يُعين المرء على الإلتزام بعد الدُعاء، والاستعانة باللّٰه
إنك تحدد وقت معين تقرأ فيه وردك؛
يعني مثلًا ما تقول بكرة إن شاء اللّٰه لازم أقرا قرآن...
لأ
قول: بكرة بإذن اللّٰه حأقرأ قرآن من الساعة ٥ بعد الفجر لحد ٦ مثلاً وتبقى الساعة دي للقرآن بس فما تشغل نفسك فيها بأي شيء ثاني، وهكذا في بقيّة العبادات من بابِ التمثيل لا الحصر.

▫️بالنسبة للدعاء:
أغلبنا بيكسل من الدعاء لأنه بيفتكر إنه الدعاء معناها لازم تتوضأ وتستقبل القبلة وفي الثلث الأخير وو....
والحقيقة أن الدعاء ولو بالقلب ممكن!
فاغتنموا أوقاتكم، وماتعجلوا للإجابة وتيأسوا وتقولوا "دعينا دعينا وربنا ما استجاب" لأن ربنا يحب أن يُسأل وأن يُلح عليه بالسؤال

▫️وكذلك الذكّر:
أسهل عبادة وأثقلها في الميزان، عوّد لسانك على الذكر وانت طالع من أو داخل للبيت وإنت ماشي فالطريق ساي أو قاعد فالبيت لدرجة تلقى نفسك بقيت تذكر ربنا بدون ما تنتبه، لكن لا بدّ من التدبّر حتى في الأذكار.

▫️الصدقة:
حاول يكون عندك صدقة يوميّة ولو جنيه واحد، وما إلّا قروش ممكن بالذكر ذي ما قلنا والأمر بالمعروف والنهي عن المنكر ونفع الغير وإعانتهم وصلاة الضحى كمان دي كلها صدقات كمان

وأهم حاجة، احتساب الأجر في كل عاداتك عشان تحوّلها لعبادات، نومك وإفطارك وطبخك وشغلك وكللل شيء بتعمله ممكن يكون في ميزان حسناتك💚

اتفقنا يا كرام؟!
إلى اللقاء في النص القادم بإذن اللّٰه💚
#رمضان_غير
#عام_قرار_لا_تمنِّي
#قوم_امشي_صلِّ💚

رمضان مُبارك وكُل عام وأنتم بخير💚🌙

اليوم وصلنا لنهاية رحلتنا في سلسلة #رمضان_غير

والنص ده خاص ببعض الأنشطة الجديدة الغنيّة بالفائدة وبتعمل تغيير حقيقي في روتينك السنة دي وفي رمضان دا بإذن اللّٰه.

ألا وهي؟
البودكاستات الدينية🫣🔥

حنخت ليكم الروابط كلها في التعليقات بإذن اللّٰه، سواء تفسير أو سيرة نبويّة أو عبادات وإلى آخره...
وطريقة تقسيمها ممكن بالأسبوع وممكن باليوم، يعني مثلًا يوم تسمع سيرة ويوم تفسير وهكذا.

وكمان ممكن تعمل حاجة مختلفة، مثلًا إنك تحفظ جزء من القرآن أو الأربعون النووية، المهم إنك ما تكون واقف في مكانك

وأسمعها مننا
أعمل لرمضان ده كأنه رمضانك الأخير
كيف تُحبّ أن يكون؟
وهل إنت ضامن بالجد إنه ربنا يبلغك رمضان الجاي؟
عشان كدا...
اعمل بكُل ما أوتيت من قوّة واغتنم أوقاتك وشبابك وأكثر من الطاعة ثمّ هنيئًا لك وتذكّر قوله تعالىٰ:
{وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ}

أحكوا لينا استفدتوا شنو من السلسلة، وما تنسوا تشاركوها مع أصحابكم
والسلام عليكم ورحمة اللّٰه وبركاته💚

الروابط ⤵️💚

#رمضان_غير
#عام_قرار_لا_تمنِّي
#قوم_امشي_صلِّ💚

‏ضُـحـاكَ ضُـحــاكَ يــا أوابْ
فــصــلِّ وذكِّـــرِ الأحــبـــابْ
تــوضــأ وابــتـهِـل واسـجُــد
فمن يـدعو الكريمَ وخـابْ؟
وسَـــل مـــولاك غُــفــرانًـــا
ورِزقًــا طــيَّــبًــا مُـنـســـابْ
ويــا ســعـــدَ الـــذي ربِّـــي
كــسـاهُ بـحُـلَّـةِ التـــوَّاب

ضُحاكًم بَاركَ الله فيكُم💚.

#قوم_امشي_صلِّ💚