يوم الجمعة فرصة كبيرة لينا، ربنا سبحانه قال:
{وَإِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ}

خلونا نتحدى نفسنا الجمعة دي بالدعاء..
كل زول يرفع إيديه ويدعي من قلبه: لنفسه، لأهله، لبلدنا، ولإخوانا المستضعفين وللأمة
يمكن تكون ساعة الإستجابة دي يغير الله بيها حالنا لِما هو خير وأحسن🥹💚

اللهم تقبل منا ومنكم صالح الأماني والدعوات💚

#قوم_امشي_صلِّ💚

قال تعالى : ﴿ قُلْ يَاعِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ ﴾

تعبت وانت بتجاهد نفسك..
في فعل الطاعات
وفي ترك المعاصي
؟!.
وحاسي أنه بعد كل الذنوب والمعاصي دي ربنا ما يقبل توبتك ويغفر ليك؟

إطمئن
ما عليك إلا أنه ما تحبط من نفسك، ولا تيأس ولا تقنط من رحمة ربنا
قال جل جلاله:
"وَرَحْمَتِي وَسِعَتْ كُلَّ شَيْءٍ"

توب واستغفر ربك
﴿ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ﴾

#قوم_امشي_صلِّ💚

متذكرين زمان أيام المدرسة كان بنلقى في غلاف الكراسات مكتوب حِكم وأمثال، منها
"الصلاة الصلاة، لاتضيعها فتضيع آخرتك"💚

الظهر فات، العصر قرّب،
حتفوته كمان؟!

أقرا الهاشتاق⤵️
#قوم_امشي_صلِّ💚

"بعد رمضان… حسيت قلبك اتغير؟ الكسل رجع؟"

ولهذا قررنا إننا الليلة نتكلم عن الظاهرة دي، بما إن أغلب الأسئلة البتواجهنا الأيام دي: "كيف أطلع من الإنتكاسة؟!"

أولًا يا عزيزي القارئ، خليك عارف إنه في فرق بين الإنتكاسة، وبين حاجة تانية اسمها ضعف الإيمان...

▫️عارف ضعف الإيمان ده شنو ؟
ضعف الإيمان إنك تجي عليك فترة يكون فيها كسل في الطاعات… لسه بتعملها لكن ما زي قبل.
مثلًا زي إنك تفقد الخشوع في الصلاة!
لكن ضميرك بكون مؤنبك، عايز ترجع بس ما عارف كيف.

▫️أما الإنتكاسة، فهي أخطر من ضعف الإيمان.
والإنتكاسة إنك تترك طاعات كنت بتعملها، زي مثلًا إنك تخلي الصلاة كم يوم والعياذ بالله، أو ترجع لمعاصي كنت تبت عنها بصورة متكررة.

كدا فرّقنا بين المفهومين صح ؟
عشان ما كلما تفتر تقول انتكست، لأنه مفهوم كبير محتاج فهم للحالة أول ثمّ معالجتها.

وبما إن التفاصيل في الموضوع ده كثيرة، اخترنا إنه نكمل الكلام في بوست آخر، لكي لا نُطيل عليك عزيزنا القارئ...

وبالمناسبة🫣
السلسة دي خطييييرة
لازم تتابعها كلها
لأنها حتفرق معاك بإذن اللّٰه في دينك
وفي تعاملك مع نفسك
فخليك قريب😉

#ولربك_فاصبر
#قوم_امشي_صلِّ💚

ما كل الحاجات الحلوة بتنتهي بانتهاء الموسم🫣. .

رمضان خلص، صح؟
لكن الإحساس البدا جواك؟ لسه عندك فرصة تكمله.

صُمت واتعودت على الطاعة؟
لسه في أبواب مفتوحة، صيام التطوع موجود.

في التراويح حسيت بالٌقرب ؟
الليل لسه طويل والقيام ما مربوط بشهر.

فرحت بالعطاء وزكاة الفطر؟
الخير ما عنده موسم يدك ممكن تفضل ممدودة طول السنة.

الفكرة ما في رمضان ذاته😁!
الفكرة: أنت كنت شنو في رمضان، وعايز تفضل شنو بعده.

ولو عجبك الطريق كمل فيهو💚.

#قوم_امشي_صلِّ💚

وصايا الرسول ﷺ 💚.

لو قلت ليك في ٣ عبادات بس
ممكن تغير يومك كله ويمكن حياتك؟🤩

خلي بالك معاي:

◻️ صلاة الضحى
ركعتين خفيفات، لكنها جبر لكل تقصيرك، وقُرب حقيقي من ربنا.

◻️صيام الأيام البيض
٣ أيام في الشهر، وأجرها؟
كأنك صايم السنة كلها!

◻️ الوتر قبل النوم
قبل ما تنوم، اختم يومك بسجدة، وخلي آخر لحظة ليك مع ربنا.

السؤال الحقيقي:
لو الحاجات البسيطة دي أجرها عظيم كدا، نحن ليه مقصرين فيها؟

جرب تبدأ بواحدة بس
وخليها عادة ثابتة في يومك.🌷

فاللهم أعنا على ذكرك وشكرك وحسن عبادتك💚.

#قوم_امشي_صلِّ

رحل الضـيف وأُغلق المسرى
واليوم نعاني من أسْى الأسرى!
رحل الصوت واللثامُ
وسكت الإعلام
رحل السنوار
وسقطت العصا والأمة تنهار!
حسبنا الله ونعم الوكيل
لسنا في قلة نحن اليوم!
ولكنه الوهن، ولكنه الوهن..

‏اللهم إنا نسألك بعزتك أن تنصر الأسرىٰ في فلسطين، وأن تنتقم من ظالميهم.
إلىٰ الله المشتكىٰ وحسبنا الله ونعم الوكيل!
اللهم عليك بهم فإنهم لا يعجزونك.

#أُمتك_يا_مسلم
#قوم_امشي_صلِّ

تذكير يا رفاق
بكرة الأربعاء أول الأيام البيض لشهر شوال، فلو لسه ما صمت الستوت فدا أنسب وقت عشان تبدأ💚

ولو واصلت الأيام مع بعض
واستحضرت النوايا حتنال أجر صيام الأيام البيض والست من شوال والإثنين والخميس كمان، فاغتنم أيام الخير والنفحات وما تنسى إخوانك المستضعفين من الدعاء،
فما لهم غير الله من ولي ولا نصير
والله المستعان وحسبنا الله ونعم الوكيل.

#قوم_امشي_صلِّ💚

رمضان فات لكن ربُّ رمضان باقٍ.!😔💚

ممكن نروق؟!
عارفين أحلى حاجة في دينا إن باب التوبة والتعويض ما بنقفل بآذان العيد🙅🏼‍♂️
لو حاسس إنك قصرت أو رمضان سُرق منك وما عملت العاوزه.. ما تضيقها على نفسك وتخلي الشيطان يركب في راسك ويقول ليك "خلاص خربت ودي كانت فترة وانتهت"

لسه في فرصة!
رب العالمين حيّ قيوم، ولسه عندك الستوت والسنّة كلها قدامك، كل ما تجي نهاية موسم حتلقى بداية لموسم جديد والبدايات الجديدة إتعملت للناس العرفت أثر التقصير وقررت تصحح المسار وتعود

عشان كدا أرح معانا نبدأ في سلسلة جديدة بعنوان
(حتى يأتيك اليقين)
حنتعلم كيف نلحق الركب ونخلي جمر التقوى الولعناها في رمضان يفضل مولع طول العام💚
إن شاء الله تكونوا جاهزين؟😉

#حتى_يأتيك_اليقين
#قوم_امشي_صلِّ💚

أهلًا أهلًا. 🫣🔥

زي ما وعدناكم رجعنا ليكم بالنص الثاني من سلسلة #ولربك_فاصبر

واليوم حنتكلم عن ضعف الإيمان
ومعلومة أغلبكم ما مُدركين معناها تمامًا

#ولربك_فاصبر
#قوم_امشي_صلِّ💚

إنك أنت كـ مُسلـــم
ما حتكون كل حياتك في درجة إيمانية واحدة، لكن الطبيعي إنك
يوم تكون في قمة الخشوع؛ ويوم تاني تحس بفتور، لا بدّ إنه تجي عليك فترات تكسل فيها، ما كره للطاعة، لكن عدم قدرة على تأديتها.

▫️طيب ليه تحصل معاك الحاجة دي وسببها شنو؟!
أسمع معاي القصة دي وحتفهم

في صحابي اسمه حنظلة بن الربيع رضي الله عنه، خرج في يوم من الأيام وهو يقول بحسرة: "نافق حنظلة، نافق حنظلة!"

فسمعه أبو بكر الصديق رضي الله عنه، وسأله: "ما تقول يا حنظلة ؟!"

فحنظلة ردّ ليه: "نكون عند النبي محمد صلى الله عليه وسلم، يذكرنا بالجنة والنار حتى كأنّا نراها رأي العين…
فإذا خرجنا من عنده، عافسنا الأزواج والأولاد والضيعات، فنسينا كثيرًا".

يعني بنكون في مجلس النبي ﷺ في حالة إيمانية عالية، ونطلع من عنده نرجع لما كنّا عليه أو ننسى ويضعف إيماننا!

في اللحظة دي تتوقع إنه أبو بكر الصديق رضي الله عنه يعاتبه مثلًا أو يستنكر عليه أو يأيده في وصفه للتصرف ده بأنه تصرف نفاق صح ؟

لكن اتخيل معاي حصل شنو؟!
نكمّل ليك في البوست الجاي بإذن اللّٰه
إذا وجدنا منك تفاعلاً وحماسًا..
فتابع معانا السلسة وترقّب🫣🔥

#ولربك_فاصبر
#قوم_امشي_صلِّ💚

الدعاء بظهر الغيب أقرب للقبول وأرجى للإستجابة
وبما إننا في آخر ساعات يوم الجمعة فألحوا وأكثروا الدعوات💚

أكتبوا دعوة غالية تتمنوها في التعليقات
لعل أحدكم يكون أقرب إلى الله فيؤمِّن عليها
فتُستجاب💚

#قوم_امشي_صلِّ💚

بتتذكر ولانسيت ؟!

بتتذكر لما كان أكبر همك تخلص وردك بتاع اليوم ؟!
نسيت إحساس الراحة بعد نهاية صلاة التراويح
اجتهدت وحصلت على قلب نضيف فما تجي هسة تملاه بشخابيط الذنوب وترجع 'توسخه' تاني😐

العبرة ما بإنك كنت ملاك في رمضان، العبرة بإنك بقيت زول أحسن بعد رمضان💚
الذنوب بتهدم السكينة اللي تعبت فيها شهر كامل وجاهدت فيها نفسك فحافظ على النور الجواك وعلى نظافة قلبك💚

ولو غلطت -وكلنا بنغلط- إستغفر وتوب سريع وارجع،
ما تخلي باب المعصية يفتح ليك أبواب تانية تنسيك حلاوة القرب من الله وتنسيك حالك في رمضان💚

#حتى_يأتيك_اليقين
#قوم_امشي_صلِّ💚

أهلًا أهلًا. 🫣🔥

زي ما وعدناكم مستمرين معاكم بالنص الثالث من سلسلة #ولربك_فاصبر

واليوم حنتكلم عن قمة الخشوع والفتور💚

#ولربك_فاصبر
#قوم_امشي_صلِّ💚

لسه محافظ على حماسك لبقيّة القصة ؟

خلينا نكمّل...
حنظلة بن الربيع صحابي جليل، وأبو بكر الصديق غنيّ عن التعريف، يكفيه شرفًا أنه صاحب الرسول ﷺ، ومُبشَّر بالجنة!
رضوان الله عليهم جميعًا.

فردّ عليه أبو بكر الصديق وقال: "واللّٰه إنا لنلقى مثل هذا"

زيّنا زيك، وضعنا زي وضعك
هذا وهم من ؟!
أفضل الناس بعد النبي مُحمد ﷺ!

فالحصل إنهم مشوا للرسول ﷺ يسألوه، فحكى له حنظلة نفس الكلام، وتخيّل ماذا كان ردّ النبي محمد ﷺ ؟!

"والذي نفسي بيده، لو تدومون على ما تكونون عندي وفي الذكر، لصافحتكم الملائكة على فرشكم وفي طرقكم، ولكن يا حنظلة… ساعة وساعة"

يعني لو أنك تدوم على حالتك الإيمانية العالية
لصافحتكم الملائكة في طرقكم، تخيّل ؟
لكن هذه طبيعة الحياة
وطبيعة النفس البشرية،
وزي ما قال الرسول ﷺ: "والذي نفسي بيده، لو لم تُذنبوا لذهب الله بكم، ولجاء بقومٍ يُذنبون فيستغفرون الله فيغفر لهم"

يعني يا عزيزي، اتطمن كدا واستريح
وخليك عارف إن حالتك دي مرّت على كثيرين قبلك، وقاعدة تسري على الجميع💚 ...
هل معنى الكلام ده إنك تركن وتستسلم ؟

أببببددددددددًا.

انتظر معانا البوست الجاي، عشان نوافيك فيه بالحل بإذن اللّٰه☝🏻

#ولربك_فاصبر
#قوم_امشي_صلِّ💚

الليلة حصل شنو خلال اليوم؟
وقتك الضاع قدر شنو؟
هل حافظت على الصلاة في وقتها

الفكرة من الأسئلة دي إنك في آخر اليوم تقيف مع نفسك بهدوء، تراجع يومك: عملت شنو، قصّرت في شنو، وحسيت بمعية ربنا معاك في شنو؟
ما عشان تجلد نفسك زيادة، لكن إعترف بغلطك بصراحة، وافهم إنت كنت حاس بشنو وقتها.

لو في حاجة بتتصلح حاول تصلّحها، ولو في زول اتأذى اعتذر له، ولو في حاجات ما بتتصلح اقبلها واتعلم منها وخليها ليك درس💚
بدل ما تقول "أنا فشلت"، قول "أنا اتعلمت"
وما تحاكم نفسك القديمة بعقلك الحالي، لأنك زمان ما كنت عارف زي هسة💚

وفي النهاية، سامح نفسك، واستغفر، واعزم إنو بكرة تكون نسخة أحسن منك —بأعمال أكتر وقلب أخف— عزيزي المسلم قبل تنوم بـ ١٥ دقيقة راجع يومك، اتعلم من غلطك، سامح نفسك، واحمد ربك… وابدأ يوم بكرة بأحسن من الليلة💚

وأسي امسحوا ذنوبكم قبل ما تناموا
لأن النبي ﷺ قال: ”من قال حين يأوي إلى فراشه :

لا إله إلا اللهُ وحده لا شريك له ، له الملكُ ، وله الحمدُ ، وهو على كلِّ شيءٍ قديرٌ ، لاحولَ ولا قوةَ إلا بالله العليِّ العظيمِ ، سبحان اللهِ، والحمدُ لله ، ولا إله إلا اللهُ ، واللهُ أكبرُ.

غفرت له كل ذنوبه وخطاياه وإن كانت مثل زبد البحر“💚

#قوم_امشي_صلِّ💚

أفرد وشك😆

غيرك أصبح مفجوع بي فقد روح، غيرك أصبح بي أصوات المدافع، غيرك كان الصباح آخر نصيبه من الحياة!

أحمد ربك على الصحة والفرصة الجديدة، بين أهلك ولسه بتسعى وتنافس الركب للجنة.
اللهم لك الحمد كما ينبغي لجلال وجهك وعظيم سلطانك 💚

#قوم_أمشي_صلِّ💚

ألم يأنِ لك يامسلم أن تجاهدَ نفسكَ في ركعتين تعدلان صدقةً عن كل مفصلٍ فى جسمك؟

#صلاة_الضحى💚
#قوم_امشي_صلِّ💚

عارف يعني شنو تصوم ٦ أيام من شوال؟ 🤔

يعني ببساطة كأنك صُمت السنة كُلها!
تخيل الكرم الرباني ده؟ 💚
دي الفرصة الذهبية بالجد؛
عشان تعوض أي تقصير حسيته في رمضان

والدليل على كدا
عن أبي أيوب الأنصاري رضي الله عنه، أن رسول الله ﷺ قال:
”مَنْ صَامَ رَمَضَانَ ثُمَّ أَتْبَعَهُ سِتًّا مِنْ شَوَّالٍ، كَانَ كَصِيَامِ الدَّهْرِ“

ونصيحة بسيطة
عشان ما تمل وتكملها للآخر، خدها "حبة حبة":
- ابدأها شوية شوية:
ما ضروري تكون ورا بعض، صوم يوم وأفطر يومين، المهم تنجزها قبل نهاية الشهر💚
- جدد الروح:
هي دي "الحصانة" اللي بتحمي قلبك من الفتور وبتخلي روحك لسه متصلة بالعبادة والراحة
- طعم الفرحة:
صيام الستوت بيخلي طعم العيد يستمر معاك وتضوق حلاوة الطاعة بجد مع الإفطار💚

يلا، ما تخلي الكسل يغلبك
ابدء من بكرة وخلّي قلبك ينور بالراحة والسكينة💚

#حتى_يأتيك_اليقين
#قوم_امشي_صلِّ💚

قال خطوة أخرى ثم أعود، فإذا به جثة على الأرض!

الفتنة يا رفيق
إن أقبلتَ نحوها خطوة سَلَبتك خطوات،
فلا تقربها ما استطعت إليه سبيلا، لا تدري متى وفي أي حال يأخذ الملك روحك!

#قوم_أمشي_صلِّ💚