الليلة حصل شنو خلال اليوم؟
وقتك الضاع قدر شنو؟
هل حافظت على الصلاة في وقتها

الفكرة من الأسئلة دي إنك في آخر اليوم تقيف مع نفسك بهدوء، تراجع يومك: عملت شنو، قصّرت في شنو، وحسيت بمعية ربنا معاك في شنو؟
ما عشان تجلد نفسك زيادة، لكن إعترف بغلطك بصراحة، وافهم إنت كنت حاس بشنو وقتها.

لو في حاجة بتتصلح حاول تصلّحها، ولو في زول اتأذى اعتذر له، ولو في حاجات ما بتتصلح اقبلها واتعلم منها وخليها ليك درس💚
بدل ما تقول "أنا فشلت"، قول "أنا اتعلمت"
وما تحاكم نفسك القديمة بعقلك الحالي، لأنك زمان ما كنت عارف زي هسة💚

وفي النهاية، سامح نفسك، واستغفر، واعزم إنو بكرة تكون نسخة أحسن منك —بأعمال أكتر وقلب أخف— عزيزي المسلم قبل تنوم بـ ١٥ دقيقة راجع يومك، اتعلم من غلطك، سامح نفسك، واحمد ربك… وابدأ يوم بكرة بأحسن من الليلة💚

وأسي امسحوا ذنوبكم قبل ما تناموا
لأن النبي ﷺ قال: ”من قال حين يأوي إلى فراشه :

لا إله إلا اللهُ وحده لا شريك له ، له الملكُ ، وله الحمدُ ، وهو على كلِّ شيءٍ قديرٌ ، لاحولَ ولا قوةَ إلا بالله العليِّ العظيمِ ، سبحان اللهِ، والحمدُ لله ، ولا إله إلا اللهُ ، واللهُ أكبرُ.

غفرت له كل ذنوبه وخطاياه وإن كانت مثل زبد البحر“💚

#قوم_امشي_صلِّ💚

أفرد وشك😆

غيرك أصبح مفجوع بي فقد روح، غيرك أصبح بي أصوات المدافع، غيرك كان الصباح آخر نصيبه من الحياة!

أحمد ربك على الصحة والفرصة الجديدة، بين أهلك ولسه بتسعى وتنافس الركب للجنة.
اللهم لك الحمد كما ينبغي لجلال وجهك وعظيم سلطانك 💚

#قوم_أمشي_صلِّ💚

ألم يأنِ لك يامسلم أن تجاهدَ نفسكَ في ركعتين تعدلان صدقةً عن كل مفصلٍ فى جسمك؟

#صلاة_الضحى💚
#قوم_امشي_صلِّ💚

عارف يعني شنو تصوم ٦ أيام من شوال؟ 🤔

يعني ببساطة كأنك صُمت السنة كُلها!
تخيل الكرم الرباني ده؟ 💚
دي الفرصة الذهبية بالجد؛
عشان تعوض أي تقصير حسيته في رمضان

والدليل على كدا
عن أبي أيوب الأنصاري رضي الله عنه، أن رسول الله ﷺ قال:
”مَنْ صَامَ رَمَضَانَ ثُمَّ أَتْبَعَهُ سِتًّا مِنْ شَوَّالٍ، كَانَ كَصِيَامِ الدَّهْرِ“

ونصيحة بسيطة
عشان ما تمل وتكملها للآخر، خدها "حبة حبة":
- ابدأها شوية شوية:
ما ضروري تكون ورا بعض، صوم يوم وأفطر يومين، المهم تنجزها قبل نهاية الشهر💚
- جدد الروح:
هي دي "الحصانة" اللي بتحمي قلبك من الفتور وبتخلي روحك لسه متصلة بالعبادة والراحة
- طعم الفرحة:
صيام الستوت بيخلي طعم العيد يستمر معاك وتضوق حلاوة الطاعة بجد مع الإفطار💚

يلا، ما تخلي الكسل يغلبك
ابدء من بكرة وخلّي قلبك ينور بالراحة والسكينة💚

#حتى_يأتيك_اليقين
#قوم_امشي_صلِّ💚

قال خطوة أخرى ثم أعود، فإذا به جثة على الأرض!

الفتنة يا رفيق
إن أقبلتَ نحوها خطوة سَلَبتك خطوات،
فلا تقربها ما استطعت إليه سبيلا، لا تدري متى وفي أي حال يأخذ الملك روحك!

#قوم_أمشي_صلِّ💚

طيب ما هي الحلول العملية لموضوعنا السابق ؟
لو ما قريته أمشي أقراه من الأول😠

#ولربك_فاصبر
#قوم_امشي_صلِّ💚

من الحلول:

▫️أولًا، وأهم عامل: ما تقسىٰ على نفسك!
لنفسك عليك حقّ
ليه كل ما تقصر تلومها وتجلدها
ولما تجتهد وتتقن تعمل نفسك ميّت من إنجازها وما تكافئها
أهذا عدلٌ منك ؟

فالمطلوب منك
ارفق بنفسك، إن لم ترفق بها من سيفعل ؟
"ارفق بنفسك لا تجرح تصبّرها
قد كاد يكفي من الأيام ما طحنت!"

ما معناه إنك ما تحاسبها، لكن كل شيء يزيد عن حدّه ينقلب ضدّه، فاتعلم التوازن؛ لأن التأنيب أكثر من اللازم يؤدي لليأس والقنوط من رحمة الله، وده هدف الشيطان.
لذلك حاذِر، ولا تترك للشيطانِ مدخلًا.

▫️تاني حاجة: توكّل على الله، وتبرأ من حولك وقوتك والجأ إلى حول الله وقوته، وخليك مُدرك وموقن أن القيام بالطاعة على أكمل وجه، ما هو إلا توفيق الله لنا ولو تُركنا لأنفسنا لهلكنا.

▫️ثالثًا: الدعاء من أهم المُعينات على الطاعة، وأذكرك ونفسي بدعاء الرسول ﷺ وصّى بيه أحد الصحابة:

"اللهم أعنّا على ذكرك وشكرك وحسن عبادتك"
ما تفرّط فيه أبدًا💚

▫️رابعًا: الرفيق الصالح، من يُقوّم اعوجاجك، ويصحح أخطاءك، ويأخذ بيدك، ويعينك على الطاعة، ويا لحظّ من غنِم بهذا.

انتهت الحلول ؟
لسسه مكملين معاكم بإذن الله في بوست آخر
خليك قريب عشان ما يفوتك الجديد🔥

#ولربك_فاصبر
#قوم_امشي_صلِّ💚

تخيل يا عزيزي المصلي
صلاة نافلة أقسم الله بمعيادها في القرآن حيكون أجرها كيف؟!
وسميت بصلاة الأوابين كثري الرجوع إلى الله💚

داوم عليها النبي ﷺ في حياته والصالحين من بعده؛
لتكون غنيمة سهلة وفيها أجر عظيم وسبب في تجديد الطاقة والصفاء الذهني

فبادر وقوم أدي الضحى حقه
وناس كثيرة مشغولة وجارية مع الدنيا إلَّا أنت والقليل💚

#قوم_امشي_صلِّ💚

سَلِ الله الثبات دائماً ولا تغتر باستقامتك!
حيّ على صلاة العصر ياسائلَ الإستقامةِ وراغبَ الجنّةِ💚

#قوم_امشي_صلِّ💚

عارف لمن تجي آخر الليل وتفكر في كل يومك،
عملت شنو وفعلت شنو؟!
واحدة من أكتر الأساليب الممكن تخليك تشعر بالنصر والإنبساط إنك عملتها هي صلاتك للشفع والوتر 💚

بما أنها نافلة حافظ عليها النبي ﷺ
ونحنا بنقتدي به ونهتدي بهديه؛ فركعات الشفع والوتر هي مسك الختام ليومك ما بس لأن وقتها آخر الليل -ويا حبذا لو قبلها صلينا ركعتين قيام ليل👀- ولكن الصلاة دي فيها كمية من السكينة والهدوء عجيبة وحـ تنبهر بيها 💚

عارف وإنت في الركعات دي بتفرغ تعب اليوم وتوتره وتخيل في أجمل من إنك تفضي تعبك وتوترك وكل الضايقك وكل العملته بين يدى رحيم كريم؟ 💚

فاللهم اجعلنا ممن تقرب إليك بالنوافل يا الله وتقبل قيامنا وصلاتنا وقربنا إليك 💚

#قوم_امشي_صلِّ💚

تخيل يا عزيزي المصلي، يوم القيامة والناس ماشية في الظلام الحالك إنت بتكون ماشي في نور وطريقك واضح 💚

ونور في قبرك وتكون في ذمة الله وحفظه طوال اليوم
قال رسول الله ﷺ: ”بَشِّرِ الْمَشَّائِينَ فِي الظُّلَمِ إِلَى الْمَسَاجِدِ بِالنُّورِ التَّامِّ يَوْمَ الْقِيَامَةِ“
عرفت شنو هم الصلاتين اللي في الظُلم ؟!🤔

ديل صلاتي العشاء والفجر وبرضو كمان ديل أثقل صلاتين على المنافقين فتخيل إنك تكون من أهل الفجر وبركة الفجر ورزقها وتكون من أهل العشاء وقيام الليل وتأخد كل فضل وثواب وبركات الصلاتين 💚

فاللهم اجعلنا من المشائين إليك في الظلمات،
وأنر قبرنا وطريقنا يوم القيامة على الصراط 💚

#قوم_امشي_صلِّ💚

في زمن كثر فيه الهرج والفتن
واختلطت فيه الأمور على كتير من المسلمين،
محتاجين لوقفة صادقة مع أنفسنا ولساعة تذكر نعرف بيها

كيف ننجو بقلوبنا؟
وكيف يكون موقفنا ثابت ولا يتزعزع؟
وماهو هدي النبي ﷺ في التعامل مع المتغيرات من حولنا؟

”يُصبِحُ الرَّجُلُ مُؤمِنًا ويُمسي كافِرًا، أو يُمسي مُؤمِنًا ويُصبِحُ كافِرًا...“؛ لأن القلوب بين أصبعين من أصابع الرحمن يقلبها كيف يشاء، فنحنا محتاجين لمجلس نتذاكر فيه سُبل الثبات والنجاة💚

عشان كدا منتظرنكم في مجلس بعنوان (موقف المسلم من الفتن) مع شيخنا العزيز عبدالرحمن موسى جزاه الله عنَّا خيراً، وذلك:
📆 يوم الأربعاء ٢٢ شوال ١٤٤٧ هـ
الموافق ٨ أبريل ٢٠٢٦ م
⏰ الساعة ٨:٣٠ مساءًا بتوقيت الخرطوم والقاهرة
٩:٣٠ مساءًا بتوقيت مكة المكرمة أحبِّ البقاع💚

فكونوا على الموعد؛
فثبات المؤمن مع إخوانه أقوى يشد بعضه بعضاً
وماتنسوا ضبط المنبهات ودعوة الرفاق💚⏳

#قوم_أمشي_صلِّ💚

خلونا نتفق على أشياء:

إنك ما ممكن تحرز الدرجة العايزها وانت وقتك كله في الفيسبوك
وما ممكن تحضر محاضرتك من التليجرام والإنستا قدامك
وما ممكن توصل لمرحلة الخشوع في الصلاة وانت وقتك كله مقضيه ريلز وشورتس، صح؟!👀

إنتظرونا في بوست جديد وأخير من السلسلة بعد قليل🫣

#ولربك_فاصبر
#قوم_أمشي_صلِّ💚

تكملة للكلام السابق، فالحل الخامس لضعف الإيمان:
▫️التخلية قبل التحلية: كل حاجة بتشتت تركيزك، اتخلص منها، وشوف النتائج بعينك، أضبط نفسك ثمّ زكّيها، وضحت ؟!

▫️سادسًا: ”قليلٌ دائم خيرٌ من كثيرٍ منقطع“، الطاعات البتعملها أمسك فيها قوي، وبعداك زوّد عليها💚

▫️سابعًا: حافظ على أذكارك، أذكارك حِصنك...
مُسلم بدون أذكار = سهل إنه يضيع!

وأخيرًا وليس آخرًا
جاهِد
وكابِد
واسعى بكُل ما أوتيت من قوة
ليه ؟
لأنك ما بتحاول لأمر عادي من أمور حياتك
إنت بتحاول لجنّة ونار
”ألا إن سلعة الله غالية، ألا إن سلعة الله الجنّة!“

واتذكّر إنه الطريق محتاج صبر، وعشان كدا اخترنا الاسم ده للسلسلة #ولربك_فاصبر، وللدين اصبر، وللطاعة اصبر، وعن الهوى والمعصية اصبر...

وماذا أيضًا ؟
قف دون رأيك في الحياة مُجاهدًا
إن الحياة عقيـــــدةٌ وجهــــادٌ.
وزي ما قال الإمام الشافعي:
"بقدرِ الكدِّ تُكتسبُ المعالي"

ختامًا:
{وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ}.
﴿سورة العنكبوت: 69﴾

كدا بنكون وصلنا لنهاية السلسلة إذا خرجت منها بفائدة واحدة خليها: عدم الاستسلام، مهما ساء وضعك!
نتمنى إنها تكون أحدثت تغيير ولو يسير في أنفسكم،
وإلى لقاء قريب بإذن اللّٰه تعالىٰ💚

سبحانك اللهم وبحمدك، نشهد ألا إلـٰه إلَّا أنت نستغفرك ونتوب إليك.

#ولربك_فاصبر
#قوم_امشي_صلِّ💚

”بادروا بالأعمالِ فتَنًا كقطعِ اللَّيلِ المظلمِ ، يصبحُ الرَّجلُ مؤمنًا ويمسي كافرًا ، ويمسي مؤمنًا ويصبحُ كافرًا يبيعُ أحدُهم دينَهُ بعرضٍ منَ الدُّنيا“

بسمِ اللهِ نبتدئ وبِهِ نستعين..

"موقف المسلم من الفتن"
مع الشيخ عبدالرحمن موسى حفِظهُ الله💚.

رابط المجلس:
https://t.me/Gom9li?livestream=1a504a317dbbf4c7f8

نافذة التعليقات⤵️💚:

#قوم_أمشي_صلِّ💚

لقاء موقف المسلم من الفتن 💚

🎙️ الشيخ عبدالرحمن مُوسىٰ -حفظه الله - واجزل له المثوبة.

#لقاءات@Gom9li

#قوم_أمشي_صلِّ💚

واعمل لدار غد رضوان خازنها
والجار أحمد والرحمن بانيها

قصورها ذهب والمسك طينتها
والزعفران حشيش نابت فيها

أنهارها لبن مصفى ومن عسل
والخمر يجري رحيقاً في مجاريها

والطير تجري على الأغصان عاكفة
تسبح الله دهراً في مغانيها

من يشتري الدار في الفردوس يعمرها
بركعة في ظلام الليل يخفيها


#قوم_امشي_صلِّ💚