أكتر حديث من السُنة بتحبوه وبيحسسكم بعظمة الدين
أذكروه لينا في التعليقات ولكم أجر من قرأه وعمل به💚

وأهم شي ما ننسى نصلي على الحبيب المصطفى
اللهم صلِّ وسلم على نبينا محمد وعلى آله وصحبه أجمعين🤲🏽💚

#قوم_أمشي_صلِّ💚

الدنيا ما بتخلو من الوجع..
لكن لما تعيش مع ربنا عز وجل بصدق…قلبك ببقى مطمئن💚

تتألم؟ تقول الحمد لله وتصبر.
يتعطل ليك موضوع؟ تقول يمكن الخير في غيره.
تمر بضيق؟ تقرب أكتر، تستغفر أكتر، تدعي أكتر💚.
وغيرها كتير وكل مره أنت بتقرب من ربك أكتر.

عارف إنو ما في حاجة بتجي ساكت…
وإنه حتى الشوكة البتطعنك فيها أجر وتكفير.

السعادة ما في إنو كل شيء يمشي على مزاجك وكل شيء دايره تلقى قدامك،
السعادة في إنك ترضى بتدبير ربنا عز وجل ليك💚

إنت مخيّر…
ترضي ربك وتلقى السعادة؟
ولا تتبع شهوات لحظية وتعيش في كآبة؟
القرار بيدك، ومن بداية يومك شوف انت عايز شنو💚

#قوم_امشي_صلِّ💚

هنيئا لمن خرجت من بيتها لضرورة
وبرغم حر الهجير ما تزال لنقابها ملتزمة

هنيئاً لها الثبات والصبر وهنيئاً لها عظيم الأجر
هنيئاً لها الإقتداء بؤمهات المؤمنين
وهنيئاً لها بإذن الله العوض الجميل

#قوم_أمشي_صلِّ💚

شنو هي أكتر حاجه خلتكم تحافظوا على الصلاة في وقتها؟!

وما تبخلوا علينا بالجواب يارفاق،
ممكن يساعد زول ويستقيم فيُكتب ليكم صدقه جارية وفي ميزان حسناتكم💚

#قوم_أمشي_صلِّ💚

يوم عدّى بي السمح والشين
بي ذلاتنا وانجازاتنا الفخورين بيها،
عارفين إن في لستة ما اكتملت مهامها، والتقصير حاصل

لكن رغم دا ما يصيبك اليأس يا رفيق، استغفر ربك وجدد النية؛
عساه الخير ما يفارقك يا وجه الخير💚

#قوم_أمشي_صلِّ💚

في مؤنسات لسه ما دخلوا قناة مجالس قوم امشِي صلِّ🌸💚؟
في حاجات جميلة جديدة بتحصل، ومنها حاليا في حفل ختامي لدورتين💚.

المُؤنسات الغاليات يلي معانا في قناة النساء والفعاليات والدورات تعالو احكوا لينا استفدتوا شنو وبتنصحوا البنات يلي ما دخلوا لسه بشنو؟

#قوم_امشي_صلِّ💚

طلاب الشهادة الممتحنين،
إستعينوا بالله في كل ماتعسر عليكم سواء في الدراسة
أو في الإمتحان وأكثروا من الدعاء بقول:

"اللهم أدخلني مدخل صدق وأخرجني مخرج صدق واجعل لي من لدنك سلطانا نصيراً"

وأنظروا إلى كمية اليقين والإعانة والسداد بإذن الله💚

كان الإمام أحمد -رحمه الله- يُكثر من قول:

”اللهم يا مُعلم آدم علمني ويا مُفهم سليمان فهمني.“

وكان شيخ الإسلام ابن تيمية -رحمه الله- يقول:
”إن المسألة لتغلق عليّ، فاستغفر الله ألف مرة أو أكثر أو أقل، فيفتحها الله علي وإن من أسباب راحة البال، استغفار ذي الجلال.“

فاجعلوا ذلك ورداً لكم قبل وأثناء الدراسة وقبل وأثناء جلوس الإمتحان، عسى الله أن يفتح عليكم فتوح العارفين ويُعلمكم ماينفعكم وينفعكم بما يعلمكم ويزيدكم من فضله💚

#قوم_أمشي_صلِّ💚

لكل الناس السألت عن جَلِيس..
أبشروا فمجالس الإثنين رجعت من جديد
أيوا ذي ما قرأتوا جَلِيس راجع ليكم من جديد 🫣💚

والمجلسنا المرة دي حيكون مختلف شوية
فبدل ما تسمعوا مننا، نحنا الحنشوف ونقرأ ونسمع منكم الأفكار والمقترحات عشان نحدد ملامح لمحتوى ومواضيع الفترة الجاية بإذن الله 💚

مع جليسنا العزيز د. يزيد المنير جزاه الله عنَّا خيراً ونفع به،
وذلك بمشيئة الله:

📆 يوم الإثنين | ٢٥ شوال ١٤٤٧هـ الموافق ١٣ أبريل ٢٠٢٦م
⏰ الساعة | ٨:٣٠ مساءًا بتوقيت الخرطوم والقاهرة —
٩:٣٠ مساءًا بتوقيت مكة المكرمة أحبِّ البقاع💚

فانتظروو مجلسنا وجليسنا واضبطوا المنبهات وجهزوا الأفكار والإقتراحات 💚

#جليس
#قوم_امشي_صلِّ💚

يقول النبي ﷺ:
”من قال :

لا إله إلا اللهُ والله أكبرُ،
لا إله إلا اللهُ وحده لا إله إلا اللهُ ولا شريك له،
لا إله إلا اللهُ له الملك وله الحمدُ،
لا إله إلا اللهُ ولا حولَ ولا قوَّةَ إلا باللهِ.

يعقدُهنَّ خمسًا بأصابعِه، -ثم قال- من قالهن في يومٍ أو في ليلةٍ أو في شهرٍ ثم مات في ذلك اليومِ أو في تلك الليلةِ أو في ذلك الشهرِ غُفِرَ له ذنبُه“💚

#قوم_امشي_صلِّ💚

الشيطان ونفسك أقنعوك إن ذنوبك كترت وربنا ما حيتقبل منك ولا يغفر لك؟؟!
ما تشتغل بكلامهم أبداً❌
وأرجع لي ربنا بأي ذنب كنت عليه💚

ااااا اي بأي ذنب مهما كان كبير أو صغير وبأي مشكلة وكون على يقين واتذكر الحديث القدسي ”يا ابنَ آدمَ لو بلغت ذنوبُكَ عَنانَ السَّماءِ ثمَّ استغفرتَني غفرتُ لَكَ، ولا أبالي“
فرحمة ربنا وسعت كل شيء💚

#قوم_أمشي_صلِّ💚

"جَلِيسُ اليَّومُ يكفيكَ ذُكْرُهُ💚
وصُحبتُهُ تجلو الهُمومَ وتَحْلُو..
فإن تُعْطَ في الدنيا جَليسًا مثله💚
فَذَاكَ الكنزُ فاحْرِصْ أن تَصِلْهُ"

"جَلِيس"💚

بسمِ اللهِ نبتدئ وبِهِ نستعين♡

بدأ المجلس..
نافذة التعليقات⤵️💚:

#جليس
#قوم_امشي_صلِّ💚

ربنا ما حيضيع مجاهدتك و اجتهادك يا بطل💚

الخوف والتوتر حيكونوا شديدين على نفسك، لكن اتذكر إن الأمر بيد ربنا ما بكثرت قرايتك ولا سهرك وشطارتك
دا ما معناها إنك ما تقرا وتجتهد،
لا بالعكس لكن معناها إنك توكل الأمر لربنا فالأول وفي الآخر وتعمل بالأسباب بأنك تقرأ وتجتهد على قدر استطاعتك

مُش ربنا سبحانه قال: {إِنَّا لَا نُضِيعُ أَجْرَ مَنْ أَحْسَنَ عَمَلًا}
والنبي ﷺ قال: ”سَدِّدوا وقارِبوا“
فمعناها إنك تعمل العليك والفي وسعك وتتوكل على ربنا أولاً وآخراً💚

ولو كنت متأخر ومراكم دروس والشيطان وسوس ليك بأنك ماحتلحق وماحتشتغل كويس وماحتنجح
فاتذكر قول سيدنا موسى عليه السلام لم كان مع قومه وحاصرهم فرعون وجنده على اليم فقال:
{كَلا إِنَّ مَعِيَ رَبِّي سَيَهْدِينِ}

وقول ليهو ذي ما قال م. أيمن عبدالرحيم -فك الله بالعز أسره- إن ربنا في القرآن الكريم ماذكر النجاح لكن ذكر السعي والفلاح، فإنت مأمور بالسعي بما هو ممكن والمتاح وربنا عليه التوفيق والسداد،
والسلام لقلبك يا بطل💚

#قوم_أمشي_صلِّ💚

ماتيسَّر من سورة يوسف —
بصوت الشيخ أحمد النفيس💚

{وَتَوَلَّىٰ عَنۡهُمۡ وَقَالَ يَٰٓأَسَفَىٰ عَلَىٰ يُوسُفَ وَٱبۡيَضَّتۡ عَيۡنَاهُ مِنَ ٱلۡحُزۡنِ فَهُوَ كَظِيمٞ * قَالُواْ تَٱللَّهِ تَفۡتَؤُاْ تَذۡكُرُ يُوسُفَ حَتَّىٰ تَكُونَ حَرَضًا أَوۡ تَكُونَ مِنَ ٱلۡهَٰلِكِينَ * قَالَ إِنَّمَآ أَشۡكُواْ بَثِّي وَحُزۡنِيٓ إِلَى ٱللَّهِ وَأَعۡلَمُ مِنَ ٱللَّهِ مَا لَا تَعۡلَمُونَ}


#قوم_أمشي_صلِّ💚

إتخيل إنه يجي زول ويقول ليك لو قلت الكلمات الفلانيه دي كل يوم حسخر ليك جيش كامل للحراسه من البتعرفه ومن الما بتعرفه وكمان حاديك بكل كلمة من الكلمات هدية،
هل ده عرض بتفوت؟!👀
أكيد لا..

فإتخيل يا رفيق إنك بأذكار الصباح والمساء
الما بياخدو أكتر من تلت ساعة، ممكن تاخد العرض ده لكن من الله سبحانه وتعالى ما من زول ولله المثل الأعلى طبعا 💚

| أذكار الصباح أثابكم الله

#قوم_امشي_صلّ💚

الإمتحان محطة...
_فخليك فاكر لو ما زبطت معاك في إمتحان أو حسيت إنك مقصر أوعك واليأس
برمج نفسك إنك تفكر في البعده على طول وإنك تتعلم من الغلط العملته هنا، إذا كان في تقصير أو عدم تنظيم أو حتى إهمال

_أبعد تماماً عن الكلام المحبط
إجتهد واخد بالأسباب وبعدين فوض أمرك لله هو الحيعينك ويدبرها ليك 💚

_أثناء الإمتحان نسيت
قال تعالى : {وَاذْكُرْ رَبَّكَ إِذَا نَسِيتَ}
وقال النبي ﷺ:
”مَن نَسِيَ أمرًا فليصلِّ علىَّ فإنه يذكره بإذن الله“

فأكثر من الصلاة على النبي ﷺ وقل اللهم ذكرني مانسيت
وما تنسى أذكرك وكثرة الإستغفار

ونسأل الله لكم التوفيق والنجاح والسداد يا أبطال 💚

#قوم_امشي_صلِّ💚

زحمة الأيام بتنسينا إنو في محطة جاية كلنا بدون استثناء وحنمر بيه وهو "القبر"

القبر دا… ما يوم ولا يومين
دا زمن ما معروف قدره شنو ممكن يكون طويل شديد،
أطول من كل العمر العشناه

وهناك... ما في صاحب، لا موبايل، لا صوت، لا ونسة💔
بس عملك معاك…
وباجتهادك ممكن تبقِّي معاك ونيس 💚

سورة الملك ما مجرد سورة بتتقري وخلاص…
دي نور حقيقي في المكان المظلم دا
ونيس ليك في وحدتك وأمان ليك من خوف ما بتتخيله

تخيل تكون نايم في قبرك… وكلو ظلام
وفجأة يكون في نور، في رحمة، في حاجة بتدافع عنك…
دي سورة الملك💚

قالوا: ”هي المنجية… تنجي صاحبها من عذاب القبر.“

ما محتاجة منك كتير…
بس دقائق قبل النوم، تقراها بقلب حاضر💚
أدي نفسك فرصة يمكن تكون هي السبب في راحة في زمن
ما فيهو راحة💚

اللهم اجعل القرآن نور قبورنا وقلوبنا وأُنس وحشتنا 💚

#قوم_امشي_صلِّ💚