حصل وقعت في ذنب وبعد ما عملته حسيت إنك خلاص من أهل النار وإنه مستحيل ربنا يتوب عليك من الذنب ده،
وخلاص قنعته من مغفرة ربنا ليك عشان الذنب أكبر من إنه يغتفر
وبعدها بقيت تفكر في إنك بتصلي عشان إنت منافق وبتصوم نفاق وبتتصدق نفاق وأي عمل صالح نفاق؛ لأنك مذنب قبل كده بذنب لا يغتفر ؟

طيب إنت عارف إنه ده مدخل معروف من مداخل الشيطان ؟
النفس اللوامه حاجة كويسة شديد بس
{قَالَ وَمَن يَقْنَطُ مِن رَّحْمَةِ رَبِّهِ إِلَّا الضَّالُّونَ}

ربنا رحيم بفرح بالعبد الأول ما يعرف إنه أذنب ..
يهرول طوالي للتوبة ويوعده وعد صادق بعدم الرجوع ويطمع في مغفرته ورضاه،
أما غير كده فدي أفكار شيطانية بييأسك بيها؛
عشان ما تعمل البحبه منك ربنا وتستمر في الذنب

فحتى ولو ضعفت نفسك مره وإتنين وتلاته ..
أرجع تاني وتالت ورابع إلى قيام الساعة فباب التوبة مفتوح ورحمة ربنا وااسعه💚

#قوم_امشي_صلّ💚

يوم الجمعة عارفين حنقول ليكم شنو صح ؟👀

#قوم_امشي_صلِّ💚

ذُكر إن أحد السلف رحمه الله كان إذا صلى العصر يوم الجمعة، استقبل القبلة، ولم يكلم أحدًا حتى تغرب الشمس.

تفتكروا كان بعمل شنو؟! 👀
كان بدعو ربنا وبيُكثر من الدعاء والتضرع له من بعد صلاة العصر إلى أن تغرب الشمس؛ لأن دي ساعة فيها إستجابة للداعين وإعطاء السائلين💚.

وانتوا كيف حتستغلوا وقتكم من بعد صلاة العصر إلى مغيب الشمس!؟

#قوم_أمشي_صلِّ💚

صباح الخير جِدًا 💚

{وَإِن تَعُدُّوا نِعْمَةَ اللَّهِ لَا تُحْصُوهَا}
نحن مرات بنغفل، بننشغل بالحاجات الحولينا وننسى النِعم العندنا!

احمد ربنا على كل صغيرة،
على إنك صحيت ولسه معاك وقت تتوب،
على إنك بتتنفس، على إنك قادر تمشي، على كباية الشاي على السقف القاعد فيه، والموية البتشرب فيها.

الحمدلله على كل حاجة بنملكها وما بننتبه ليها، على كل لحظة راحة بتمر علينا وننسى نردد فيها "الحمدلله".
احمد واشكر الله، واتذكر إن الشُكر يجّلب المزيد 💚.

#قوم_امشي_صلِّ💚

يا وصية الرسول ﷺ

الالتزام والستر بالنقاب مرات بيكون صعب شديد،
خصوصاً في ظروفنا الحالية… الجامعات، الشغل، وحتى في الأماكن العامة مرات بتحسّي بالضيق وده شيء طبيعي

لكن اتذكري دايما الصبر على الالتزام والستر في كل الظروف له جزاء عظيم عند الله، وربنا يراك ومقدر ليك كل خطوة في طريق الحق مهما كان الواقع صعب
فما تخلي الناس أو الظروف تثنيك عن الحق،
الأجر عند ربنا كبير أكبر من رضا البشر، وما في زول حيقدر يعوضك عن صبرك وحفاظك على دينك وكرامتك

كوني صابرة، حافظي على حياءك، خليك فخورة بنفسك لأنك بترضي ربنا وبتزرعي قدوة حسنة للأجيال الجاية 💚

#قوم_امشي_صلِّ💚

يا جماعة إنتو لما بتمرضوا بتعملوا شنو؟! 🤔
من غير كذب كدا...إنت من ياتو نوع؟
النوع البيرفع "ستوري" طوالي في الواتساب وصورة الكانيولا والقطرة النازلة وكاتب(يا رب هون)؟
ولا النوع البيسخط ويقعد يندب حظه ويسأل: ليه أنا يا رب؟
تعالوا أحكي ليكم قصة تقلب المقاييس دي كلها وتخلينا نراجع حساباتنا.✨

في قلب المدينة المنورة، كان حَبر الأمة عبد الله بن عباس رضي الله عنهما واقف مع تلميذه عطاء ابن عباس التفت لتلميذه وقال له: ألا أريك امرأة من أهل الجنة؟!
التلميذ قال: بلى
فقال ابن عباس:هذه المرأة السوداء.
المرأة دي هي الصحابية الجليلة أم زفر رضي الله عنها،
أم زفر ما كانت قائدة جيوش لكنها كانت بتخوض معركة شرسة كل يوم مع مرض الصرع النوبة كانت بتجيها فجأة تقع على الأرض وتفقد وعيها تماماً وتتألم.
في يوم من الأيام مشت للنبي ﷺ وقالت له: "يا رسول الله، إني أُصرع فادعُ الله لي"
النبي ﷺ خيرها خيارين
الخيار الأول: "إن شئتِ دعوتُ الله أن يعافيكِ"
الخيار الثاني:"وإن شئتِ صبرتِ.. ولكِ الجنه!

قالت الكلمة الخلّدت اسمها: "بل أصبر!" باعت عافية الدنيا المؤقتة واشترت الجنة.
بعد ما وافقت تصبر على المرض، اتذكرت مشكلة ثانية والتفتت للنبي ﷺ وقالت: "إني أتكشّف فادعُ الله لي أن لا أتكشّف!"
ركزوا معاي هنا بالله واصحوا:🧐
هي مريضة مغمى عليها ومرفوع عنها القلم يعني لو هدومها اترفعت وهي فاقدة الوعي ما عليها ولا ذرة ذنب! ورغم ذلك كلو كان همّها الأكبر عفتها وحياءها وحشمتها خايفة جسمها يظهر وهي ما حاسة!
النبي ﷺ دعا ليها وبقيت تجيها النوبة وتقع وسط الطريق لكن سبحان الله يظل لبسها ثابت وجسدها مستور.
القصة دي رسالة لكل واحد مننا المرض اللابتلاك به ربنا المصيبة الخطفت استقرارك و الأزمة اوالظروف الصعبة البتمر بيها حالياً دي ما عقاب من ربنا دي أعظم فرصة وتنبيه عشان تقربك من ربنا. الوجع والابتلاء بيمسح الذنوب، بيصفي الروح، وبيخليك تقيف في باب ربنا بصدق وانكسار وتدعي من قلبك، واللجوء دا ما كنت حتعرفه وأنت في كامل عافيتك وراحتك.
بسبب عقلية الصبر والاحتساب دي نالت أم زفر البشارة بالجنه فالمرة الجاية لما تتعب أو تمر بظروف ضاغطة واجه ظروفك بصبر شجاع واحتسب كل لحظة ألم عند الله و اتذكر:
{إِنَّهُ مَن یَتَّقِ وَیَصۡبِرۡ فَإِنَّ ٱللَّهَ لَا یُضِیعُ أَجۡرَ ٱلۡمُحۡسِنِینَ}

#قوم_امشي_صلِّ💚

ما تعاين لحسابك البنكي في اليوم مرتين وتلاتة وتقعد تحسب قروشك كم وباقي منها كم وحتكفي لنهاية الشهر ولالا

واتذكر قصة أم المؤمنين عائشة رضي الله عنها لم قالت:
توفي رسول الله ﷺ وما في بيتي من شيء يأكله ذو كبد، إلا شطر شعير في رف لي، فأكلت منه حتى طال علي، فكلته ففني.
وآخر كلمتين ديل ياهو الشاهد من القصة
أنها رضي الله عنها كانت بتشيل من الشعير دا وتآكل منه فترة من الزمن لحدي ما في يوم وزنته وعرفت مقداره وعرفت إنو حيقعد معاها كم يوم بالتحديد فانتهي بعد الأيام دي

فخليك متوكل على ربنا ومستودعه مالك ورزقك،
وما كل شوية تشوف قروشك كم وزادت ولا نقصت وحتقضيك لنهاية الأسبوع ولالا؛ عشان البركة ما تنزع منها لأن المقدار ما مهم بقدر البركة والتوكل واليقين بالله 💚

#قوم_امشي_صلِّ💚

السلام عليكم ورحمة الله وبركاته،
آل صلِّ الكرام نعتذر منكم عن قيام مجلس اليوم من جَلِيس ومُقبل الأسابيع كذلك

لكن ماتقلقوا فحيكون في تسجيلات تتحضر وتترسل بإذن الله، فما تبخلوا علينا أكتبوها لينا في التعليقات المواضيع والأفكار العاوزين د. يزيد يتحدث عنها
إن شاء الله

#قوم_امشي_صلِّ💚

لم تضيق عليك الأيام وتكون في مشكلة أو ظرف صعب
ما تمشي طوالي وتفتش الحل عن زول تاني؛
لكن أقبل على الله في الأول والجأ إليه واشكي له حالك وضعفك وهو أعلم بك

واتوكل عليه سبحانه؛ لأن من توكل على الله فهو حسبه وكافيه ما أهمّه في جميع أموره، واستغفر وتوب؛ لأن ما نزل بلاء إلى بمعصية وما رُفع إلا بتوبة وأكثر من الصلاة على النبي ﷺ؛
لأن بها تكفي همك ويُغفر ذنبك 💚

واتذكر حديث النبي ﷺ لم قال:
”ما أصاب أحدًا قط همٌّ و لا حزنٌ فقال:
(اللهمَّ إني عبدُك ، و ابنُ عبدِك ، و ابنُ أَمَتِك ، ناصيتي بيدِك ، ماضٍ فيَّ حكمُك ، عدلٌ فيَّ قضاؤُك ، أسألُك بكلِّ اسمٍ هو لك سميتَ به نفسَك ، أو علَّمتَه أحدًا من خلقِك ، أو أنزلتَه في كتابِك ، أو استأثرتَ به في علمِ الغيبِ عندَك ، أن تجعلَ القرآنَ ربيعَ قلبي ، و نورَ صدري ، و جلاءَ حزني ، و ذَهابَ همِّي)،
إلا أذهبَ اللهُ همَّهُ و حزنَه، و أبدلَه مكانَه فرجًا.“
والسلام لقلبك 💚

#قوم_امشي_صلِّ💚

مواسم الخيرات تروح وتغدوا فالحمد لله على هذه النِعم،
بعد بكرة إن شاء الله حنكون في يوم عظيم
يوم نجى الله تعالى فيه سيدنا موسى عليه السلام وقومه من فرعون وجنوده، ويوم أجر الصيام فيه عظيم وما ذي أي يوم تاني 💚

قال رسول الله ﷺ:

”وصِيامُ يومِ عاشُوراءَ، إِنِّي أحْتَسِبُ على اللهِ أنْ يُكَفِّرَ السنَةَ التِي قَبْلَهُ.“

يوم عاشوراء فرصة ما بتتعوض
ونفحة من نفحات الله علينا فما تفرط في اليوم دا، تخيل إنك تصوم ساعات قليلة في اليوم دا فربنا يكفِّر عنك ذنوب سنة كاملة ٣٦٥ يوم مضت
شارك في الأجر وذكر غيرك ناس البيت وأصحابك ومن تحب، فالدال على الخير كفاعله 💚

تذكير: يُستحب صيام يوم قبله أو بعده عشان نخالف أهل الكتاب

#قوم_امشي_صلِّ💚

من برنامج رسائل سلام | (حسن الظن بالله)
أ. ياسر الحزيمي

”ســهرت أَعيــن ونــامت عيــونُ
فــي أُمــورٍ تكـونُ أو لا تكـون
فادرأ الهم ما استطعتَ عن النَفس
فَحِملانُـــكَ الهُمـــومَ جُنــونُ
إنَّ ربــاً كفــاك بِـالأمسِ ماكـان
ســكفيكَ فـي غـد مـا يكـونُ“

#قوم_امشي_صلِّ💚

زي ما بتحرص إنك تنوم بالنهار وتجهز نفسك عشان تقدر تساهر وتحضر الكورة بالليل في وقتها ، فكمان من باب أولى إنك تحرص أنك تقوم لصلاة الفجر

واتذكر قول الله تعالى

{يُنَبَّأُ الْإِنسَانُ يَوْمَئِذٍ بِمَا قَدَّمَ وَأَخَّرَ * بَلِ الْإِنسَانُ عَلَىٰ نَفْسِهِ بَصِيرَةٌ * وَلَوْ أَلْقَىٰ مَعَاذِيرَهُ}

فإنت يوم القيامة حتُسأل وتُخبر عن العملته في الدنيا،
قدمت شنو على حساب شنو، قدمت الكورة والسهر على صلاة الفجر ولا العكس وما حينفع العذر والإعتذار في الوقت دا

#قوم_امشي_صلِّ💚

قبل ماتطلع من البيت إتذكر ..
إنت ما براك وفي عدو منتظر ليك الزلة والخطأ ويراك وقبيله من حيث لا تراهم ويكيدوا ليك الشر والسوء

فقول "بسمِ اللهِ، توكَّلتُ على اللهِ، لا حولَ ولا قُوَّةَ إلا باللهِ" فيُقال لك: حسبُكَ، قد هُدِيتَ وكُفيتَ ووُقِيتَ.
والشيطان لو حاول يقرب منك في واحد تاني حيقول له:
كيف لك برجلٍ قد هُدِيَ وكُفِيَ ووُقِيَ ؟

يعني ما حتقدر تعمل حاجة لواحد ربنا هداه وكفاه وبيحميه، فحافظوا على ذكر الله في يومكم عشان ربنا يحفظكم 💚

#قوم_امشي_صلِّ💚

”صلوا على المبعوث فينا رحمة
تُكتب لكن عشراً لدى الرحمن
صلى عليك الله يا خير الورى
ما ضجت الآفاق بالآذان“

اللهم صلِّ وسلم على نبينا محمد ﷺ

#قوم_امشي_صلِّ💚

تعالوا نتأمل المشهد العظيم في خواتيم سورة المائدة مشهد تقشعر له الابدان.💚

ربنا سبحانه وتعالى بيسأل سيدنا عيسى بن مريم عليه السلام وهو عالم بالسر وأخفى:
﴿ءَأَنتَ قُلْتَ لِلنَّاسِ اتَّخِذُونِي وَأُمِّيَ إِلَٰهَيْنِ مِن دُونِ اللَّهِ﴾

ربنا طبعاً عالم بكل شيء لكن السؤال لإظهار الحق.
شوفوا هنا أدب النبوة والذوق الرفيع في الخطاب سيدنا عيسى ما اندفع سريع يدافع عن نفسه ويقول: أنا ما قلت ليهم!
لا لان ده مقام وقوف بين يدي ملك الملوك.
سيدنا عيسى أول كلمة بدأ بيها كانت: ﴿سُبْحَانَكَ﴾. بدأ بتنزيه الله تعظيمه، وبعد داك قال بكل انكسار وعبودية: ﴿مَا يَكُونُ لِي أَنْ أَقُولَ مَا لَيْسَ لِي بِحَقٍّ﴾.
الدرس ده لينا نحن هسي ونحن مقبلين على ساعة الاستجابة:
لما تقعد هسي قبل المغرب، والدنيا ضايقه بيك والطلبات تُزاحم راسك (داير تنجح، داير التوفيق، وداير حاجات كتيرة من متاع الدنيا)، قبل ما ترفع يدينك و تقول لستة طلباتك اتذكر مشهد سيدنا عيسى.🍃
اتأدب مع المَلِك:لازم نعرف إنو الله بحب الأدب والذوق من عباده هو سبحانه غني عننا وعن عبادتنا، لكن يحب العبد اللحوح الما يمل، لأنو الله لا يمل حتى تملوا فأسأل الله بإلحاح.

عاين لقلبك جوة: قبل ما تدعو، ختّ شواغل الدنيا دي كلها بعيد؛هل قلبك مشغول ببكرة حيحصل شنو؟ ولا حاضر ومعلق مع الله؟ استشعر عظمتو، واتذكر إنو هسي شايفك وسامعك.
ادخل بمدخل الفقير خلو مدخلنا لربنا هو مدخل العبد التعبان، الما عنده الحيلة، الواقف في عتبة المَلِك الغني.

وهنا السّر والجمال كلو:🌷
ما تشيل هم ترتيب الكلام، ولا تظن إنك لازم تجيب كلمات فصيحة ومعقدة عشان ربنا يقبلك. ربنا حنين شديد حنين لدرجة إنو بيسمع غُصة قلبك المخفية، وعارف الدمعة الما قادرة تنزل، وسامع الكلمة المشتتة الفي خشمك وما قادر ترتبها أرفع يدينك وقول: يا رب أنا عبدك الذليل الفقير وما عندي غيرك.. والكسر الجواك ده هو ذاتو البوابة البتفيض منها الرحمات.

أبدأ دعاءك بالثناء على الله، احمده ومجّده، وصلّي على النبي ﷺ أتدبروا الحتة دي في ناس بيسرحوا في جمال التعظيم والثناء، ولمن يفوقوا بيلقوا نفسهم نسوا حاجتهم ولستة طلباتهم الدنيوية كلها انشغلوا بـ المُعطي.
ما تخلو عينكم بس على :يارب نجحني وسوّي لي وكدا خلو عينكم وقلبكم مع الله وحده.

ربنا العالِم بالخفايا بيكفيه منك حال قلبك وهو ما داير مننا إلا العبادة الصادقة، والدعاء ده هو لب العبادة وجوهرها.
فإذا صلح القلب، وتعلّق بالله حقًا كفاك الله همّك كله، وساق لك الخير والتوفيق من حيث لا تحتسب.

اللهم أصلح قلوبنا، وعلّقها بك وحدك.🤲

#قوم_امشي_صلِّ💚

بتساعدي في تجهيز الأكل وجرحتي نفسك بالغلط
عاوزة تقلبي المُلاح وفتحتي الغطاء فحرقتي يدك
بترتبي في البيت ورفعتي السرير وكان ثقيل فاثر على ظهرك

هنيئاً لك وأبشري بالخير؛
لأن كل عضو حيجي يوم القيامة ويشهد ليك،
يقول إنك في اليوم الفلاني ساعدتي والدتك وجهزتي الأكل والشراب لناس البيت ورتبتي البيت عشان تساعدي أختك وتبري والديك

هنيئاً لك لأن النبي ﷺ قال:
”خيرُكُم خيرُكم لِأهْلِهِ ، وَأَنَا خيرُكم لِأَهْلِي“
ولأن في رجل شال غصن عن طريق المسلمين فربنا دخله الجنة، فما بالك بالبتعمليه وما ظنك بربنا لم ينظر لعملك وصنيعك دا يوم القيامة ؟

#قوم_امشي_صلِّ💚

في ناس لم تسمع الآذان بكون حاجة عادية
وما بعملوا شيء، لكن في ناس تانيين أول ما تسمع الآذان بتعمل كم حاجة ولازم نحنا كمان نعملها:

> تردد مع المؤذن وذي ما بقول نقول وراه،
إلا في "حي على الصلاة" و"حي على الفلاح" بتقول:
"لاحول ولا قوة إلَّا بالله"

> بعد ينتهي الآذان في ذكر بتقوله ذكره النبي ﷺ فقال:
”مَن قال حينَ يَسمَعُ النِّداءَ: (اللهُمَّ رَبَّ هذه الدَّعوةِ التَّامَّةِ، والصَّلاةِ القائِمةِ، آتِ مُحَمَّدًا الوسيلةَ والفَضيلةَ، وابعَثْه مَقامًا مَحمودًا الذي وعَدتَه)“ حيحصل شنو طيب ؟🤔
تابع بقية الحديث.. ”حَلَّت له شَفاعَتي يَومَ القيامةِ.“ 💚

> بعد تقول الذكر كمان تدعو؛ لأن دا وقت إستجابة للدعاء،
قال رسول الله ﷺ: ”الدُّعاءُ بين الأذانِ والإقامةِ مُستجابٌ ، فادْعوا“

> أخيرا نتجهَّز للصلاة عشان نلحق أجر الصف الأول أو على الأقل تكبيرة الإحرام؛ لأن في الحديث
”مَنْ صلَّى للهِ أربعينَ يومًا في جماعةٍ ، يُدْرِكُ التَّكْبيرَةَ الأُولَى ، كُتِبَتْ لهُ بَرَاءَتَانِ : بَرَاءَةٌ مِنَ النارِ، و بَرَاءَةٌ مِنَ النِّفَاقِ“

ربنا يثبتنا أجمعين ويعينا على ذكره وشكره وحُسن عبادته، ويهدينا صراطه المستقيم 🤲

#قوم_امشي_صلِّ💚

صاحبك الكان معاك في الثانوي إتخرج واسي شغال في الوظيفة الفلانية
وصاحبتك عرست وإنتي لسه

إتذكروا قول الله تعالى :
{وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ ۚ وَرِزْقُ رَبِّكَ خَيْرٌ وَأَبْقَىٰ}

فما تعاين لما عند الناس ولسان حالك بقول:
وأنا متين حأكون كدا ؟،
متين حيحصل معاي كدا ؟!
مامعروف يمكن ربنا حيبتليهم بالحاجات الأداها ليهم دي،
وما أداها ليك اسي عشان إنت لسه ما مستعد

لسه ربنا عاوز يأخرها عنك؛
عشان يديك ليها أحسن وأكبر وفي الوقت المناسب،
ما خطر ليك ولو من باب المواساء إن كل حاجة حُرمت منها ربنا بدفع عنك سوءها وحيبدلك ويجبر بخاطرك بخير منها ؟💚

#قوم_امشي_صلِّ💚

ما تيسَّر من سورة الرحمـٰن –
القارئ علاء عقل 💚

{ٱلرَّحۡمَٰنُ * عَلَّمَ ٱلۡقُرۡءَانَ * خَلَقَ ٱلۡإِنسَٰنَ * عَلَّمَهُ ٱلۡبَيَانَ * ٱلشَّمۡسُ وَٱلۡقَمَرُ بِحُسۡبَانٖ * وَٱلنَّجۡمُ وَٱلشَّجَرُ يَسۡجُدَانِ * وَٱلسَّمَآءَ رَفَعَهَا وَوَضَعَ ٱلۡمِيزَانَ * أَلَّا تَطۡغَوۡاْ فِي ٱلۡمِيزَانِ * وَأَقِيمُواْ ٱلۡوَزۡنَ بِٱلۡقِسۡطِ وَلَا تُخۡسِرُواْ ٱلۡمِيزَانَ * وَٱلۡأَرۡضَ وَضَعَهَا لِلۡأَنَامِ * فِيهَا فَٰكِهَةٞ وَٱلنَّخۡلُ ذَاتُ ٱلۡأَكۡمَامِ * وَٱلۡحَبُّ ذُو ٱلۡعَصۡفِ وَٱلرَّيۡحَانُ * فَبِأَيِّ ءَالَآءِ رَبِّكُمَا تُكَذِّبَانِ}

#قوم_امشي_صلِّ💚

ألا يكفيك أنه يعلم ما في قلبك وأقرب إليك من حبل الوريد ؟
ألا يكفيك أنه إذا قال كن سيكون ؟

أيا رفيق،
مالي أراك تحمل الهم وتمضي بخطوات ثقيلة يائسة،
ما بالك لا تسعى بيقين ؟!

قف شامخًا يا طيب المحيا وَاِسعَ بقلبٍ متوكل على خالقه، مؤمن بقدره وموقن برحمته، لا تجزع ولا تيأس، واجعل من الصعاب تحدٍ لصبرك واعزم ألا تفشل في التحدي.

أيا رفيق،
استعن بالله ولا تعجز 💚

#قوم_امشي_صلِّ💚