​Магнит смартфонга зарар етказиши мумкинми?

Магнитнинг электрон қурилмаларга таъсири ҳақида турли хил маълумот ва миш-мишлар мавжуд. Баъзилар магнит туфайли смартфон экрани шикастланади дейишса, бошқалар эса унинг хотирасидаги маълумотлар ўчиб кетади, деб хавотирланишади.
Ҳақиқатан ҳам ушбу хавотирлар ўринлими?

Мутахассис фикри, Мэтт Ньюби, first4magnets компанияси:
"Одамларда бундай фикрлар эски электрон қурилмалардан – масалан, магнит майдонларга сезгир бўлган CRT-монитор ва телевизорларидан қолган. Ушбу қурилмалардан бири яқинига кучли магнитни жойлаштириш тасвирни бузиши мумкин. Яхшиямки, замонавий телевизор ва мониторлар у қадар сезгир эмас."

Смартфонлар ҳақида нима дейиш мумкин?
Ҳаммаси магнитнинг кучига боғлиқ. Магнитли ғилоф (чехол) ва автомобил ушлагичлар смартфоннинг ишлашига таъсир қилиш учун етарли кучга эга эмас. Бироқ, кучли магнитлар (неодимовый) смартфондаги магнетометр ва рақамли компасга сезиларли даражада халақит бериши мумкин.

Магнетометр мобил телефоннинг муҳим элементи бўлиб, у ҳаракат йўналишини белгилайди. Унинг ёрдами билан олинган маълумотлар Яндекс Хариталар ёки Google Хариталар каби навигация иловаларида қўлланилади. Магнетометрдан олинган маълумотлар баъзи ўйинларда ҳам керак.
Кучли магнит iPhone смартфонлари камерасидаги оптик стабилизация ва автофокус ишига салбий таъсир қилиши ҳақида Apple компанияси расмий сайтида ҳам маълумот берган.

Бугунги кунда смартфон ишлаб чиқарувчиларининг оригинал аксессуарларида ҳам магнитлар қўлланилади. Шунинг учун, агар улар қурилмаларнинг ишлашига қандайдир таъсир қиладиган бўлса, ушбу маҳсулотлар ишлаб чиқарувчилар томонидан сотилмасди.

Мавзуга оид каналимиздаги қўшимча маълумот:
• Смартфонлардаги датчиклар: улар нима ва нима учун керак?
• Смартфон камерасидаги оптик стабилизация нима?

#маълумот

​Навигация иловалари: харита, справочник ва навигатор (автомобиль ҳайдовчилари ва барчага фойдали хусусиятлари)

Бугунги кунда навигация иловалари, нафақат автомобиль ҳайдовчилари учун, балким бирор манзилга шаҳар транспортида (автобус, метро, маршрутка) етиб бормоқчи бўлганларга ҳам фойдали бўлади.
Масалан, автомобиль ҳайдовчиси борадиган манзилини билган тақдирда ҳам, йўлдаги вазият (ремонт, авария, тирбандлик), камера, радар, чекланган тезлик ва бошқа маълумотларни навигация иловалари орқали ўз вақтида олиши мумкин.

Шаҳар транспортидан фойдаланувчилар эса, транспортнинг бекатга келиш вақти ёки бир манзилдан бошқа манзилга қайси транспортда бориш мумкинлиги тўғрисидаги маълумотларни навигация иловаларидан олишлари мумкин.

Навигация иловаларининг ўзим тез-тез фойдаланадиган хусусиятларидан яна бири, бормоқчи бўлган жой ҳақида фойдаланувчиларнинг шарҳлари ва контакт (телефон рақами, расмий интернет сайти) маълумотлари билан танишиб чиқиш.
Айтайлик, номи чиққан дўкон бўладими ёки банк, клиника ва бошқа объектлар тўғрисида аввал фойдаланувчилар шарҳларини ўқиб, керак бўлганда телефон рақамидан қўшимча маълумот олиб, кейин хизматдан фойдаланаман.

Қуйидаги навигация иловаларини тавсия қиламан:
• Яндекс.Карты (транспорт, навигатор и справочник) – юқорида кўрсатилган ва ундан ҳам ортиқ имкониятларга эга илова. Керакли ҳудуд картасини олдиндан интернет орқали юклаб олиб, иловадан офлайн (интернетсиз) режимда ҳам фойдаланиш мумкин.
Ҳозирча иловада автобусларнинг келиш вақтини кўрсатиш имконияти йўқ.
Ушбу илованинг фақат автомобиль ҳайдовчилари учун (справочник ва шаҳар транспортисиз) мўлжалланган версияси Яндекс.Навигатор – пробки и навигация по GPS.

• 2ГИС — справочник, карта и навигатор без интернета. Бу иловада ҳам барчаси биттада ва керакли ҳудуд картасини олдиндан интернет орқали юклаб олиб, офлайн (интернетсиз) фойдаланиш мумкин.
Яндекс.Карты иловасидан маълумотлар базаси ва маршрут тузиш вариантлари бироз камлиги билан фарқланади.
Айнан ушбу иловада автобусларнинг ҳаракати жадвали (бекатга келиш) Тошкент шаҳри учун йўлга қўйилган.

• Waze (социальный навигатор) – фақат автомобиль ҳайдовчилари учун навигация иловаси. Юқорида кўрсатилган Яндекс.Карты иловасидан, йўлдаги вазият (ремонт, авария, тирбандлик) ва жойи ўзгариб турадиган радарлар (ГАИ) тезроқ кўрсатилиши билан фарқланади. Маълумотларни илова фойдаланувчиларининг ўзлари тўлдириб боришади. Офлайн режим йўқ, яъни интернет билан ишлайди.

• MAPS.ME — Офлайн карты, навигация и путеводители. Ушбу иловадан ўзим актив фойдаланиб кўрмаганман, лекин канал ўқувчилари тавсия беришган.

Савол: Навигация иловаларидан фойдаланасизми ва кўпроқ қайси имкониятларидан? (Илова номлари ва бошқаларидан афзалликлари ҳақида ёзиб қолдиринг)

#маълумот #APK #навигация

Telegram учун фойдали ботлар:

• @somedo_bot — Instagram дан расм, видео, stories ва igtv ни юклаб олишга ёрдам беради. Шунингдек TikTok ва YouTube ни ҳам қўллаб-қувватлайди.

• @pdfbot — Ушбу бот PDF файллар билан ишлаш (яратиш, ўқиш, ҳажмини камайтириш, матнни ажратиб олиш) имконини беради.

• @Online_Cinema_Bot — Ушбу бот филмлар ва сериаллар топишда ёрдам беради. Филмларни исталган сифатда томоша қилишингиз ва юклаб олишингиз мумкин.

• @virus_total_scan_bot — VirusTotal сайти орқали файл ва иловаларни вирусларга текшириш боти.

• @ColoriZatioN_Bot — ушбу бот, сунъий интеллект ёрдамида монохром (оқ-қора) расмни ранглига ўзгартириши мумкин. DeepAI усулидан фойдаланилади.

• @fakemailbot — 5 сониядан кам вақт ичида электрон почта манзилини яратинг. Турли хил сайт ва хизматларда асосий электрон почтангизни кўрсатмаслик учун, ушбу ботдан фойдаланишингиз мумкин.

• @bexatobot — Кирилл алифбосида ёзиш қийинми? Лотин алифбосида ёзинг ва BeXato орқали ўгиринг.

• @ejarimabot — Маъмурий ҳуқуқбузарлик тўғрисида маълумот олиш ва йўл ҳаракати қоидалари бўйича фото ва видео радарлари учун баённомаларни қидириш.

Каналимизда 100 дан ортиқ турли хил Telegram ботлар ҳақида маълумот мавжуд. Ўзингизга кераклисини топиш учун #Бот хештегини танланг.

#Telegram #Бот #Телеграм

​Айтишларича, Beeline мобил операторида бепул қисқа рақамларга қўнғироқлар алоҳида нархланар экан.

Масалан хонадонингизда электр энергияси ўчиб қолганда 1154 ёки Uzonline интернет провайдери 1084 қисқа рақамларига қўнғироқ қилиб 30-40 минут (омадингиз келса) "ажойиб мусиқа" дан баҳраманд бўлиб кутасиз.

Шу кутилган вақтнинг ҳар бир минути учун 125 сўмдан ҳисобингиздан пул ечилар экан (30 минут учун 3750 сўм).

Нима учун бепул қисқа рақамларга қўнғироқ, тариф режада мавжуд бўлган минутлардан сарфланмаслиги абонентлар учун жумбоқ.

Бугунги кунда қисқа рақамларнинг кўплиги ва кутиш вақтини ҳисобга олсак, ҳисобингиздаги маблағга эҳтиёткор бўлишингизга тўғри келади.

Савол:
1. Сизда ҳам Beeline операторида ушбу ҳолат кузатилганми ва бошқа мобил операторларда (UzMobile, Ucell, Mobi.uz) вазият қандай?
2. Мобил операторларнинг абонент ҳисобидан автоматик пул ечадиган яна қандай хизматларини биласиз?

#оператор #маълумот

​Смартфонни ўзиники бўлмаган ёки кучлироқ адаптер билан зарядлаш мумкинми?

Оиламизда бир нечта смартфон мавжуд ва уларнинг барчасини заряд қилиш учун одатта битта адаптердан фойдаланамиз.

Смартфонни ўзиники бўлмаган адаптердан зарядлаш мумкинми?
Ҳа, мумкин. Смартфон ва зарядлаш адаптерининг мослиги, унинг смартфон билан бир хил компания томонидан ишлаб чиқарилганлигига боғлиқ эмас. Чунки барчаси стандартлар билан тартибга солинади.
Лекин баъзи ишлаб чиқарувчилар смартфонларида қўлланилган тез зарядлаш технологияси бошқа адаптердан фойдаланилганда ишламаслиги мумкин.

Агар адаптер кучлироқ бўлса-чи?
Масалан 1.55 амперга мўлжалланган смартфонни, 2А ёки ундан ортиқ ток кучига эга адаптер билан зарядлаганда унга сезиларли зарар етмайди. Лекин смартфон тезроқ ҳам зарядланиб қолмайди, чунки замонавий смартфонлар батареяси ўзига кераклича ёки ундан камроқ қувват олиш учун мўлжалланган. Бунинг учун улар зарядлаш жараёнини кузатадиган махсус контроллер ҳимоя схемаси билан жиҳозланган.

Агарда катта батарея сиғимига эга бўлган смартфон ёки планшетни кам қувватли адаптерга уласангиз, зарядлаш жуда секин бўлиши ёки умуман бошланмаслиги мумкин. Мисол учун 5000 мАч сиғимли батареяни 1А ток кучига эга адаптер билан тахминан 6 соат, 2А адаптер билан 3 соатда тўлдириш мумкин.

Юқорида келтирилган маълумотлар фақат оригинал зарядлаш адаптерларига таалуқли, қалбаки маҳсулотлардан эҳтиёт бўлган маъқул.

• Смартфонни тўғри зарядлаш ва батареясига оид қўшимча маълумотлар
• Афсона ва ҳақиқат: смартфон ёки планшет батареясини қандай қилиб тўғри заряд қилиш керак

#маълумот

​Янги бюджет смартфон ёки эски флагман: қайсини танлаган маъқул?

Энг сўнги русумдаги флагман смартфонлар нархи йилдан-йилга юқорилаб бормоқда. Кечагина тақдимоти бўлиб ўтган Samsung Galaxy S21 смартфонининг нархи 9 399 000 сўм этиб белгиланибди.
Лекин ҳар бир флагман эртами-кечми ўз ўрнини бошқасига бўшатиб беради. Шунда эскисини арзон нархда сотиб олиш мумкин бўлади. Яхши танлов, тўғрими?

Аммо танганинг иккинчи томони ҳам бор. Унда янги бюджет смартфонлари мавжуд. Улар замонавийроқ кўринади ва танлаш имконияти ҳам кўпроқ. Хўш, қайси бирини сотиб олган яхшироқ: нархи анча тушиб кетган собиқ флагманними ёки янги бюджет смартфонними?

Собиқ флагман смартфонлар нимаси билан яхшироқ?
Собиқ флагманлар тоифасига ўтган йил ёки ундан олдинроқ чиқарилган ва ўз ўрнини кучлироғига бўшатиб берган қурилмалар киради. Улар биринчиликни қўлдан беришган бўлсада, ҳали ҳам кўплаб афзалликларга эга.

1. Яхши камера
Смартфондаги камера имконияти бюджет сегментида ҳам ривожланаётган бўлсада, аммо энг зўр аппарат қисми флагманларга тўғри келади. Премиум сегмент ҳар қандай суратга олиш шароитлари учун мўлжалланган энг яхши объектив ва матрицалардан фойдаланади.

2. Сувдан ҳимоя
Сувдан ҳимояланганлик - бу ҳали бюджет сегментига етиб келмаган афзалликлардан биридир. Баъзи бир смартфон ишлаб чиқарувчилар бюджет смартфонларда сув сачрашидан ҳимояни таклиф қилишган. Албатта бу ҳеч қандай ҳимоя бўлмаганидан яхшироқ, лекин барибир тўлиқ сувдан ҳимоя эмас.

3. Дастурий таъминотни узоқ муддатли қўллаб-қувватлаш
Флагман смартфонларнинг қиммат бўлишининг сабабларидан бири, ишлаб чиқарувчилар қурилмадаги дастурий таъминот долзарб бўлиши учун вақт ва ресурсларни сарфлайдилар. Дастурдаги янгиланишлар қурилма турли хил янги илова ва вазифалар билан мос келишини таъминлайди. Бундан ташқари, одатта флагман серияси барқарор хавфсизлик тузатишларини олиб боради.

4. Ноёб дизайн
Якуний маҳсулот нархини камайтириш учун бюджет смартфон ишлаб чиқарувчилари ҳар томонлама тежашади. Маҳсулот шаблонга мувофиқ яратилади, уларнинг йиллар давомида ўзгармаган дизайни бунинг энг яққол мисолидир.
Агар бюджет смартфонлар одатда бир-бирига ўхшаш кўринишга эга бўлса, флагманларда эса аксинча инновацион ечимлар туфайли ўзига жалб қилади.

5. Сифатлироқ дисплей
2-3 йил олдин флагман деб ҳисобланган смартфонлар экран ёрқинлиги ва равшанлиги жиҳатидан ҳали ҳам бюджет қурилмалардан устунроқ. Шунингдек аксария флагман қурилмалар Quad HD экран ўлчамига эга, бюджет сегментида эса 1080р энг юқори ўлчам.

6. Тез ва симсиз зарядлаш
Бюджет смартфонлар сегментида тез ва симсиз зарядлаш жуда кам учрайди. Премиум сегментда аккумулятор юқори тезликда зарядланади ва симсиз зарядлаш (тескари зарядлаш) имконияти мавжуд.

7. Процессор
Янги бюджет смартфонлар юқори даражадаги энг сўнги процессорлар билан жиҳозланган бўлиши мумкин, лекин айнан бюджет сегментидаги процессорлардан фойдаланилади.
Бироқ, 2-3 йил олдинги флагман чипсетлари ишлаш кўрсаткичлари бўйича ҳали ҳам яхши натижани кўрсатмоқда. 3D-ўйинлар ва бошқа мураккаб вазифаларни янги бюджетга нисбатан яхшироқ бажаришади.

Юқорида кўрсатилганлар флагман смартфонларнинг барча афзалликлари эмас, қолганларини каналимиз ўқувчиларидан шу хабар остида ёзиб қолдиришларини сўраймиз.

Кейинги хабарларимизда янги бюджет смартфонининг флагмандан афзалликлари ҳақида маълумот берамиз.

#маълумот

Янги бюджет смартфон ёки эски флагман: қайсини танлаган маъқул? Давоми

Олдинги хабаримизда собиқ флагман смартфонларнинг янги бюджет смартфонларига нисбатан афзалликлари ҳақида маълумот бергандик. Бугун эса аксинча:
Янги бюджет смартфонлар нимаси билан яхшироқ?

1. Янгилиги ва танлаш имконияти
Янги русумдаги бюджет смартфон эгасига замонавийлик ҳиссини берибгина қолмай, расмий кафолат ва кенг танлов имкониятини ҳам беради. Турли хил нарх ва техник параметрларга эга бюджет смартфонларни деярли барча савдо дўконларидан топишингиз мумкин.
Флагман смартфонлар асосан йилида бир марта янгиланади ва вақт ўтган сари эски русумдагиларини излаб топиш ҳам қийинлашади.

2. Катта сиғимли батарея
Одатта бюджет смартфонлари қалинроқ бўлади. Уларнинг корпусида етарли жой бўлгани сабабли кўпинча катта сиғимли батареялар билан жиҳозланади.
Флагман серияси смартфонлари, аксинча, ингичка ва нафис кўринади. Дизайн жиҳатидан бу албатта плюс, лекин батарея қувватининг кўпга етиши жиҳатидан минус. Шунингдек бюджет смартфонларда ўрнатилган процессор нисбатан кучсизроқ ва экран ўлчамлари юқори бўлмаганлиги сабабли, батарея қуввати секинроқ сарфланади.

Лекин ҳар доим ҳам катта сиғимли батарея, смартфон қувватини кўпга етишини англатмайди.

3. Дастурий таъминотнинг ўрнатилган сўнгги версияси
Флагман сериясида хизмат кўрсатишнинг давомийлигига эътибор қаратилади. Бюджет смартфонларнинг қулайлиги ва жозибадорлиги эса энг сўнгги дастурий таъминот ўрнатилган бўлиши. Янги Android тизимининг имкониятларидан фойдаланиш учун ойлаб кутишингиз шарт эмас, смартфонни қутидан олишингиз билан сўнгги дастурий таъминот ўрнатилган. Ягона савол, смартфон қанча муддат янгиланишларни олишида.

4. Тезкор ва доимий хотиранинг кўплиги
Янги русумдаги бюджет смартфонларида эски флагманларга қараганда катта ҳажмдаги хотира ўрнатилган ҳолатлари кўп учрайди. Албатта ушбу хотираларнинг технологияси ва ишлаш тезлиги ўртасида катта фарқ бор (бу ҳақида кейинги хабарларимизда маълумот берамиз)

5. Алоҳида карта слотлари
Бюджет сегментида бирданига иккита SIM-карта ва MicroSD картасини жойлаштирадиган смартфонни топиш мумкин. Лекин ҳозирги ва эски флагманларда алоҳида слотларга эса смартфонни топиш мушкул.
Смартфон учун хотира картасини қандай танлаш керак?

Юқорида кўрсатилганлар бюджет смартфонларнинг барча афзалликлари эмас, қолганларини каналимиз ўқувчиларидан шу хабар остида ёзиб қолдиришларини сўраймиз.

#маълумот

Signal иловаси нима ва нима учун у оммалашмоқда?

Signal — бу шифрланган хабарларни алмашиш мессенжери. Яъни WhatsApp, Telegram, Viber, Skype каби иловаларнинг хавфсизроқ муқобил варианти деб ҳисобланади.

Асосий эътибор махфийлик ва хавфсизликка қаратилган (аммо, илова ўз-ўзидан махфий ва хавфсиз бўлмаган мобил қурилма ва рақамга уланишни талаб қилади).

Signal бирон бир корпорацияга тегишли эмас ва худди шу номдаги нотижорат фонд томонидан фақат хайрия маблағлари ҳисобидан 2013 йилда ишлаб чиқилган. Мессенжер фойдаланувчилар ҳақида маълумот тўплашга ёки реклама кўрсатишга уринмайди.

Signal нинг ўзига хос хусусияти — мажбурий E2E-шифрлаш. Бу — ҳеч ким, шу жумладан Signal эгалари ҳам хабарларингизни ўқий олмаслигини англатади. Telegram да бундай шифрлаш фақат алоҳида фаоллаштириладиган махфий чатларда қўлланилади.
Signal иловасининг иккала қисми (клиент ва сервер) коди тўлиқ очиқ . Маълумот учун Telegram иловасининг фақат клиент қисми очиқ.

Нима учун Signal тўсатдан машҳур бўлиб қолди
2021 йилнинг январида яна бир машҳур мессенжер WhatsApp махфийлик сиёсатини ўзгартириб, барчани ўз маълумотларини Facebook билан бўлишишига рози бўлишга мажбур қилганидан сўнг, кўплаб фойдаланувчилар ғазабланди. Бундай фойдаланувчилар орасида Илон Маск ҳам бор эди, у ўзининг Twitter аккаунтида Signal иловасидан фойдаланишни маслаҳат берди.

Сўнгги бир ҳафта ичида Signal 8,8 миллион янги фойдаланувчиларга эга бўлди.
Таққослаш учун, шу давр мобайнида Telegram 11 миллион марта юклаб олинган ва WhatsApp юклаб олиш сони 11,3 дан 9,2 миллионга камайди.

Signal иловаси Android, iPhone, Windows, macOS ва Linux тизимлари учун мавжуд.
Signal иловасида Telegram мессенжери каби қурилмалар ўртасида синхронлаш, бот ва каналлар мавжуд эмас.

#APK #иловаянгилик #Telegram

#Биласизми

🔰 Таълим олувчиларга ўқув машғулотлари вақтида қуйидагилар қатъиян тақиқланади:
● телефон орқали сўзлашиш ҳамда SMS (ММS) ва бошқа турдаги хабарларни жўнатиш;
● телефонни стол устига қўйиш;
● мусиқа, шу жумладан наушниклар орқали тинглаш;
● сурат ва видео тасвирларни кўрсатишда телефондан фойдаланиш (ўйинлар билан шуғулланиш), тасвир (матн, расм, видеоёзув ва фотосуратлар) кўриш, диктофон, калькулятор, календарь, блокнот, ён дафтарча кабилар сифатида фойдаланиш;
● суратга олиш ва видео тасвирга тушириш;
● телефон (GPRS, Bluetooth, Интернет ва шу кабилар) орқали бошқа хизматлардан фойдаланиш.

☑️ Ўқувчиларга машғулотлар ва тадбирлар оралиғида фақат асосли ва кечиктириб бўлмайдиган зарур ҳолатларда ота-онаси, яқин қариндошлари, мактаб раҳбарлари ёки ходимлари билан зудлик билан боғланиш мақсадида телефонлардан фойдаланишга (қўнғироқ қилишга, SМS, ММS, GPRS жўнатишга, Bluetooth, Интернет ва шу кабилар хизматидан фойдаланишга) рухсат этилади.

Каналга уланиш👇👇👇
https://t.me/huquqiyaxborot

​Xiaomi Mi 11 флагманида кўплаб камчиликлар аниқланди

2021 йилда сотувга чиқарилган Xiaomi Mi 11 флагман смартфони, энг сўнгги Qualcomm Snapdragon 888 платформасига асосланган бозордаги биринчи қурилма бўлди. Gizmochina онлайн-нашри мутахассислари қурилмани синовдан ўтказиб, аниқланган муаммолар рўйхатини тузиб чиқишди.

Айни пайтда қуйидаги муаммолар маълум:
• Фойдаланиш вақтида ўз-ўзидан ўчиб қолади
• Камера иловаси баъзида суратга олишда "чиқиб кетади", шунингдек унинг имкониятлари ўртача
• Баъзи ўйинлар тўғри ишга туширилмайди, экранда пикселли тасвир кўринади
• Snapdragon 888 процессори тез қизийди, натижада Mi 11 смартфони SoC нинг ишлаш қувватидан тўлиқ фойдалана олмайди, чунки қурилма процессор ишлаш тезлигини (частотаси) пасайтиради (Смартфон процессоридаги троттлинг нима?)
• Чарм (кожа) вариантида карнай орқали овоз эшитилганда "хириллайди".

Юқоридаги муаммоларнинг баъзилари кейинги дастурий янгиланишлар ёрдамида ҳал қилиниши мумкин, лекин Хитойда нархи 600 доллардан ошадиган смартфонни сотиб олишдан олдин (дилерларда нарх янада баланд), эҳтимол юзага келиши мумкин бўлган муаммолар ҳақида билишингиз керак.

Изоҳ:
• Смартфон ёки процессорлар техник характеристикасида кўрсатилган айрим рақамларнинг бошқасига нисбатан юқорироқ бўлиши, унинг "энг зўрлигини" билдирмайди
• Смартфондаги дастурий таъминот ва совутиш тизимининг "чалалиги", ҳар қандай процессор ва бошқа қисмларнинг "кучини" йўққа чиқаради
• Ҳар доим ҳам энг сўнги русумдаги смартфон барқарор бўлмаслиги мумкин, "шошқалоқ" ишлаб чиқарувчи учун сиз "текин синовчи" вазифасини ўтаб берасиз
• Машҳур бенчмарк (қурилманинг иш тезлигини баҳолаш ва таққослаш) иловалари ва YouTube-блогерлар қайсидир томоннинг манфаати учун хизмат қилиши мумкин
• Барча соҳалар каби узоқ йиллик тажриба смартфон ишлаб чиқаришда ҳам муҳим аҳамиятга эга
• Смартфон ишлаб чиқарувчиларнинг ким ўзарга мантиқсиз пойгаларидан фойдаланувчилар учун ҳеч қандай наф йўқ.

#маълумот #янгилик #мулоҳаза

​Xiaomi смартфонларида минтақанинг ўзгариши нимага таъсир қилади?

Xiaomi смартфонларида танланган минтақага қараб, MIUI қобиғи тизим созламаларини ўзгартириши, баъзи иловаларни ва параметрларини қўшиши ёки яшириши мумкин.
Минтақани фақат Xiaomi ёки Redmi смартфонларида ўзгартириш мумкин, фақат Mi A1/A2(+ Lite)/A3 фойдаланувчилари бундан мустасно, чунки ушбу қурилмаларда "тоза" Android ўрнатилган.

Нима учун минтақа танлови Xiaomi смартфонлари созламаларига таъсир қилади?
Ҳар бир давлат ёки минтақанинг электроникага бўлган талаблари, ишлаб чиқарувчилар учун ўз стандартлари ва шартлари мавжуд. Шу сабаб, компаниялар ўз қурилмаларини сотмоқчи бўлган давлатларнинг талабларига риоя қилиши ва бажариши шарт.

Xiaomi смартфонларида минтақани ўзгартириш учун: "Созламалар" ➔ "Қўшимча созламалар" ➔ "Минтақа" (Настройки ➔ Расширенные настройки ➔ Регион) бўлимига ўтинг.
Минтақани ўзгартиргандан сўнг, смартфонингизни қайта ишга туширишни (перезагрузка) унутманг!

Минтақани ўзгартириш нималарга таъсир қилади:

Карнай ва наушникда овоз баландлашиши
Агар минтақани "Ҳиндистон" ёки "Сингапур" га ўзгартирсангиз, қурилманинг ташқи карнай ва наушникдаги овози баландлашади.
Нима учун айнан ушбу иккала минтақанинг танлови овоз параметрларига таъсир қилади?
Сабаби ушбу давлатлар қонунчилиги билан боғлиқ бўлиши мумкин, масалан Европа стандартларга мувофиқ, смартфонда овоз баландлиги 80 дБ дан ошмаслиги керак, бошқа мамлакатларда эса — 110 дБ.

Юз билан очиш (распознавание лица) имконияти қўшилиши
Агарда Xiaomi смартфонингизда экран қулфини "Юз билан очиш" имконияти мавжуд бўлмаса, минтақани Ҳиндистонга ўзгартириб кўринг. "Юз билан очиш" функцияси, айниқса бармоқ изи сканерига эга бўлмаган Redmi 7A ва 8A смартфонлари фойдаланувчилари учун қулай.

Мавзу (тема) ва фон расмларида қўшимча имкониятлар
Минтақани "Ҳиндистон"га ўзгартиргандан сўнг, "Мавзулар" (Темы) иловасида рингтон ва шрифтларни ўрнатишингиз ва танлашингиз мумкин бўлади. Бошқа минтақаларда бу ерда фақат мавзулар ва фон расмлари жойлашган.
Шунингдек, фон расмларини жадвал бўйича ўзгартириш функцияси "Карусель обоев" қўшилади.

Ҳиндистон минтақасини танлашнинг яна бир афзаллиги, смартфонингизга тизим янгиланишлари тезроқ келиши мумкин. Сабаби Ҳиндистон бозори Xiaomi учун асосий ҳисобланади.

Минтақани ўзгартиришнинг қандай камчиликлари бор:
Бир нечта қизиқарли функциялар пайдо бўлишига қарамай, минтақани ўзгартириш баъзи ноқулайликларни келтириб чиқаради. Масалан вақт минтақаси (часовой пояс) ўзгариши натижасида, Ўзбекистон +5 ўрнига +5,5 Ҳиндистон ўрнатилиши мумкин. Лекин буни қўлда тузатиш мумкин.

Шунингдек, минтақани ўзгартириш тақвим (ва тегишли равишда таътил кунларига) тилининг ўзгаришига ва баъзи навигация (хариталар) иловалари нотўғри ишлашига олиб олиб келиши мумкин.

Баъзи минтақаларни танлаганда Xiaomi иловалари рекламалар кўрсатишни бошлайди. Айнан Ҳиндистон минтақасида қўшимча имкониятлар бўлгани билан, рекламалар ҳам кўрсатилиши мумкин. (DNS созламаси ёрдамида рекламалардан халос бўлиш)
Буюк Британия, Германия ва АҚШ каби минтақаларда рекламалар кўрсатилмайди, деб таъкидлашади.

Савол:
Xiaomi смартфонингиз минтақасини ўзгартириш қандай ўзгаришларга сабаб бўлган?

#Xiaomi #маълумот

Бизнинг назаримизда керакли ва фойдали программалар:

• Простая Галерея: Фото и Видео Альбом и Редактор
Фото ва видеоларни сақлаш ва таҳрирлаш учун ажойиб илова. Бошқа иловаларга ўтмасдан расм ва видеоларни сақлашингиз, таҳрирлашингиз, турли хил филтрлар ва эффектларни қўшишингиз мумкин.
- Интернетга уланишни талаб қилмайди ва рекламалар кўрсатмайди
- Расм, видео ва файлларни тезкор қидириш
- Расм ва видеоларга парол ўрнатиш. Шунингдек, илованиннг ўзи ёки бирор функциясига кириш учун PIN, бармоқ изи каби ҳимоя турларидан фойдаланиш
- Ўчирилган расм ва видеоларни тиклаш
- Расм ва видеолардан слайд-шоу яратиш
https://play.google.com/store/apps/details?id=com.simplemobiletools.gallery

• VLC for Android
Деярли барча форматларни қўллаб-қувватлайдиган Android видео плеерлардан бири. MKV, MP4, AVI, MOV, Ogg, FLAC, TS, M2TS, Wv ва AAC каби барча форматларни қўллаб-қувватлайди.
Барча кодеклар илованинг ўзида мавжуд ва алоҳида юклаб олинмайди. Шунингдек субтитрлар, телематн ва яширин титрларни қўллаб-қувватлайди.
Ушбу илова турли хил аудио форматларини ўқий оладиган, эквалайзер ва филтрларга эга тўлақонли аудио плеер ҳам ҳисобланади.
VLC иловаси бутунлай бепул ва реклама ёки пуллик функциялари йўқ.
https://play.google.com/store/apps/details?id=org.videolan.vlc&hl=uz

• YouCut - видеоредактор без водяных знаков
YouTube ва бошқа ижтимоий тармоқлар учун энг яхши видео таҳрирлаш ва кесиш бепул иловаси.
Қуйидаги хусусиятларга эга: расм ва мусиқалардан видео яратиш, видеони таҳрирлаш, видеони кесиш, видеони бирлаштириш, видеони секинлаштириш, видеони тезлаштириш, фонни хиралаштириш, видеога матн қўшиш, Интернетга уланишни талаб қилмайди.
https://play.google.com/store/apps/details?id=com.camerasideas.trimmer&hl=uz

• AIDE- IDE for Android Java C++
Android иловаларни Android қурилмада ишлаб чиқиш воситаси. Дастурлашнинг интерактив дарсларидан ўтинг ва босқичма-босқич дастур ишлаб чиқиш бўйича мутахассис бўлинг.
AIDE тўлиқ ишлаб чиқиш даврийлигини амалга оширади, таҳрирлаш-компиляция-ижро: код ёзиш учун жуда кўп функциялар тўпламига эга муҳаррир мавжуд, жумладан кодни тўлдириш, реал вақтда хатоларни текшириш, қайта ишлаш, код бўйлаб ақлли навигация ва иловангизни ишга тушириш.
https://play.google.com/store/apps/details?id=com.aide.ui

• iTicket.UZ (Uzbekistan) - Онлайн продажа билетов
Ушбу илова барча турдаги тадбирлар (театр, футбол, ​​концертлар, кўргазмалар ва бошқалар) учун чипталарни тез ва осон сотиб олиш имконини беради.
Барча чипталар расмий нархларда сотилади. Иловада буюртма қилинган чипталарни онлайн тарзда тўлаш (Click, PayMe) ва электрон почта орқали олиш мумкин.
Қатор ва ўриндиқлар бўйича чипталарни, шунингдек оддий кириш чипталарини қулай танлаш.
https://play.google.com/store/apps/details?id=uz.iticket.iticket&hl=uz

Каналимизда 200 дан ортиқ турли хил иловалар ҳақида маълумот мавжуд. Ўзингизга кераклисини топиш учун #APK хештегини танланг.

#APK

Биз ва ҳамкорларимиз томонидан тақдим этилаётган смартфонлар учун хизматлар

@gsmgurus_FAQ канали администраторлари, смартфонларга сервис хизматлари кўрсатиш (таъмирлаш, дастурий таъминот) соҳасида фаолият юритишгани боис, шу йўналишдаги касбий маҳоратларини ошириб, кўпчиликни қизиқтирган саволларга жавоб бериб келмоқдалар.

Ушбу соҳадаги 14 йиллик тажрибамиз ва техника маркази Тошкент шаҳри "Малика" савдо мажмуасида фаолият юритишимиздан келиб чиқиб, обуначиларимизга, янги Telegram каналимиз (@gsmgurus_FAQ_shop) орқали ўз хизматларимизни таклиф қилмоқчимиз.

Шунингдек янги каналимизда (https://t.me/gsmgurus_FAQ_shop) турли хил аксессуарлар, фойдаланилган ва янги смартфонлар билан савдо қилувчи ҳамкор сотувчилар маҳсулотлари нархлари ва муддатли тўлов шартлари билан таништириб борамиз.

Ўз тажрибамиздан келиб чиқиб, республикамиз бўйича смартфонларни таъмирлаш йўналишидаги уста мутахассислар ҳақида ҳам тавсиялар бериб борамиз.

Режаларимизда смартфонлар учун Trade-in (эскисини янгисига алмаштириш) ва суғурталаш хизматларини йўлга қўйиш ҳам мавжуд.

Мобил операторлар тарифларидаги ижтимоий тармоқ, мессенжер ва YouTube иловалари учун трафик лимитлари ҳақида

Бугунги кунда Beeline, Humans, Ucell каби мобил операторлар баъзи тариф режаларида ижтимоий тармоқ, мессенжер (Telegram, Whatsapp) ва YouTube иловалари учун махсус трафикни тақдим этишган.
Яъни юқорида кўрсатилган тармоқларнинг иловаларидан ёки веб-версияларидан* фойдаланиш, умумий трафикингизга таъсир қилмаслиги ва ҳисобингиздан маблағ ечмаслиги керак.

* кўплаб интернет хизматларнинг иловасини ўрнатмасдан, веб-версиясидан ҳам фойдаланиш мумкин. Масалан www.instagram.com, www.web.telegram.org, www.web.whatsapp.com.

Лекин баъзи ҳолларда интернет трафик тармоқларга ажратилганидан эмас, умумий трафикдан ёки ҳисобингиздаги маблағдан ечиб олинади.

Бунинг сабаблари эса қуйидагича:
• VPN, прокси ва бошқа трафикни шифрлаш хизматларидан фойдаланиш (Прокси ва VPN бу нима?)
• Махсус трафик тақдим этилган иловаларнинг норасмий версияларидан (масалан Telegram иловаси ўрнига Telegraph) фойдаланиш
• Интернетни тезлаштириб ёки трафикни камайтириб (сиқиб) берадиган махсус илова (Samsung Max) ва браузерлардан (UC Browser, Opera Mini) фойдаланиш
• Аксарият хизматлар ва иловаларнинг нафақат ўзларининг, балки умумий трафикни оз бўлсада сарф қилиши мумкин бўлган бошқа ресурсларидан ҳам фойдаланади. Масалан баннер рекламалари, ижтимоий тармоқларда жойлаштирилган бошқа сайтларнинг видеолари ва ҳ.к.з. лар.

Махсус трафик тақдим этилган тариф ёки хизматларнинг тавсифи билан мобил операторлар сайтида тўлиқ танишиб чиқинг.
Масалан Ucell операторининг "Uchar internet" тариф режасида Telegram учун ажратилган трафик мавжуд. Лекин хизматнинг тавсифида қуйидагича ёзилган: "27. Telegram иловаси орқали видеоқўнғироқ қилганда ижтимоий тармоқлар йўналишига ажратилган интернет-трафик эмас, балки тариф режасида берилган умумий лимит доирасидаги интернет-трафик сарфланади."

Махсус трафик тўғри сарфланаётганини билиш учун, ҳисобингиздаги маблағни ёки умумий интернет трафик қолдиғини кузатиб боринг.

Савол: Юқорида кўрсатилган трафик лимитларидан фойдаланишда қандай тушунмовчилик ва муаммоларга дуч келгансиз?

#маълумот #оператор

Telegram 7.4.1 версиясига янгиланди (бошқа мессенжерлардан чатлар тарихини кўчириш, қўшимча махфийлик ва бошқалар)

Бошқа иловалардан ёзишмаларни ўтказиш
• WhatsApp, Line ва KakaoTalk каби бошқа мессенжерлардан чатлар тарихини Telegram га кўчириш имконияти.

Янада кўпроқ махфийлик
• Хабарлар, гуруҳлар, махфий чатлар ва чақирувлар тарихини ҳар икки томон учун изсиз ўчириш имконияти.

Яхшиланган овозли чатлар
• Овозли чатда алоҳида иштирокчи учун товуш баландлигини созлаш имконияти.
• Чақирувлар тарихидаги фаол овозли чатлар.

Яхшиланган аудио плеер
• Плеерда ижрочининг исмини босиш орқали унинг барча чатларидаги тароналари рўйхатига ўтишингиз мумкин.
• Таронани паузалаш ва давом эттиришда товуш энди равон пайдо бўлади ёки йўқолади.
• Таронани олдинга суриш ёки орқага қайтариш учун “Кейингиси” ва “Аввалгиси” тугмаларини босиш мумкин.

Сохта каналлар устидан шикоят қилиш
• Таниқли шахслар ёки ташкилотлар номидан очилган сохта каналлар ёки гуруҳлар устидан шикоят қилиш имконияти.

Ва бошқа янгиликлар
• Янги рўйхатдан ўтган контактларингизга таклиф қилинган стикерлардан бирини юбориб саломлашинг.
• Кўзи ожизлар учун воситаларни (TalkBack) қўллаб-қувватлаш яхшиланди.

Кейинги янгилашда
• Экран виджетлари: Каналдаги хабарлар ёки танланган чатлар рўйхатини бош экранда кўриш имконияти. (Смартфонда виджет нима ва у нима учун керак?)

Кўпроқ маълумот ушбу мақолада:
https://telegram.org/blog/move-history/uz

Иловани юклаб олиш: Google Play, APK расмий сайтдан ёки тасдиқланган каналдан.

#Telegram #Телеграм

​Смартфондаги "чўнтак режими" нима ва нима учун керак?

Чўнтак ёки сумкангизда бўлган смартфон экрани ўз-ўзидан босилиб кетиши муаммоси сизга танишми?
Гап шундаки, смартфоннинг сенсорли экрани нафақат бармоқлар тегинишига жавоб қайтаради. Чўнтак ёки сумкангизда бўлган смартфон бехосдан кимгадир қўнғироқ қилиши ва ҳатто паролланган экран блокини қайта-қайта очишга уриниши ҳам мумкин. Фойдаланувчини ушбу нохуш ҳолатлардан халос қилиш учун чўнтак режими керак бўлади.

Чўнтак режими қандай ишлайди?
Чўнтак режимининг ишлаши яқинлик датчикига боғлиқ. Ушбу кичик детал одатда олд камеранинг ёнида жойлашган. Датчик олдида бирон бир тўсқинлик қиладиган нарса пайдо бўлганда (қўл, қулоқ, шим матоси ва ҳ.к.з), экран блокланади ва ўчади. Ушбу функция нафақат смартфонни чўнтагингизга солганингизда, балки қўнғироқ қилганингизда ҳам ишлайди.

Агар яқинлик датчики муаммосиз ишлаётган бўлса, чўнтак режими ҳам хатосиз ишлайди. Датчикни текшириш осон — қўнғироқ пайтида ёки овозли хабарни тинглаш пайтида уни ёпинг. Агар экран ўчиб қолса, унда датчик тўғри ишламоқда.

Агар телефонда баъзида ҳеч қандай сабабсиз "Экраннинг юқори қисмини ёпманг" ёки "Наушник майдонини ёпманг" (Не закрывайте верхнюю часть экрана ёки Не закрывайте область динамика) ёзуви пайдо бўлса, экран ўчиб қолса ёки аксинча, ўз вақтида блокланмаса, яқинлик датчикини текшириш керак бўлади (чўнтак режимини ўчириб қўйиш ҳам муаммони ҳал қилади).

Яқинлик датчики нафақат экранни, балки бармоқ изи сканери ва ёқиш/ўчириш тугмасини ҳам блоклайди. Агар тугма чўнтагингизда тасодифан босилса, смартфон блокдан очилмайди ва экранда чўнтак режими ёқилганлиги ҳақидаги маълумотни кўрсатади.

Баъзи смартфон моделларида, масалан, Huawei да, чўнтак режими телефон чўнтагингизда эканлигида қўнғироқ овозини баландроқ кўтаради.

Ушбу режимни, смартфонингиз созламаларига кириб юқори қидирув қисмида "чўнтак" ёки "карман" (тизим тилидан келиб чиқиб) калит сўзини ёзиш орқали топишингиз мумкин.

#маълумот

​Хотирани тозалаш иловалари билан боғлиқ муаммолар

"Роскачество" давлат ташкилотининг "Рақамли экспертиза маркази" мутахассислари смартфон хотирасини тозалаш иловалари хавфсизлигини таҳлил қилишди.
Жами 60 та илова ўрганиб чиқилди, энг тез-тез учрайдиган камчилик — бу иловани ишга тушириш ва ундан фойдаланишни қийинлаштирадиган кўплаб рекламаларнинг мавжудлиги.
Шунингдек, турли функцияларга кириш учун ортиқча рухсат сўровлари ва Wi-Fi тармоғига шубҳали қизиқиш кўринишидаги камчиликлар мавжуд. Ўрганилган иккита иловада шпион дастурининг аломатлари бор.

Рекламаларнинг мавжудлиги барча хотирани тозалаш иловаларида аниқланган асосий муаммо. Таҳлил қилинган иловаларнинг атиги 4% да, уни ўчириш имконияти мавжуд. Баъзи ҳолларда рекламаларнинг сони ва кетма-кетлиги мантиқий чегарадан ҳам чиқиб кетади: масалан, Master Phone Cleaner, Junk Clean, Cache cleaner, All Cleaner — Memory Clean, Speed Booster ва Phone Master Cleaner: Cache clean & Speed Booster кабиларда.

Кўп ҳолларда хотирани тозалаш жараёни тугагандан сўнг тўлиқ экранли реклама анимацияси кенг тарқалган. Ҳаддан ташқари реклама, зарарли саҳифаларни яшириши мумкин бўлган реклама баннерини тасодифий босиш билан хавфли.

Таҳлил қилинган иловаларнинг 50% дан ортиғи смартфон уланган Wi-Fi тармоқни "тинглайди" ва бошқа уланган қурилмаларнинг тармоқ идентификаторларини олади. Бундай йўл тутадиган иловаларга: Cleaner Ultimate — Battery Saver booster & cleaner, Super Power Cleaner ва Clear Cache & Speed Up Phone киради.

Оператив хотирани тозалайдиган ва ишлашни тезлаштирадиган иловага кенг доирадаги рухсатлар керак, лекин уларнинг баъзилари кўплаб шубҳали рухсатларни сўрашади. Масалан, Cleaner Ultimate — Battery Saver booster & cleaner микрофон ва овоз ёзиб олишни сўрайди, Super Power Cleaner, Clear Cache & Speed Up Phone ва Ace Cleaner камера рухсатисиз ишлашни хоҳламайди. Баъзи иловалар геолокацияга рухсатни талаб қилади (реклама мақсадида) — масалан, Master Phone Cleaner Battery Saver & Speed Booster ва Phone Cleaner App 2020 — Android Cache Cleaner.

Энг жиддий шубҳага иккита илова сабаб бўлди: Speed Cleaner — Phone Booster & Battery Saver ва Phone Cleaner — Clean Ram & Junk Cleaner & Booster. Улар контактлар ва қўнғироқларни бошқаришни ўз ичига олган тўлиқ рухсатлар пакетини сўрашади. Бундай ортиқча рухсатлар шпион дастурларнинг аломатларидир ва фойдаланувчи маълумотларини ўғирлаш ва контактлар рўйхатига спам юбориш учун ишлатилиши мумкин.

Тавсиялар:
• Иловаларни фақат расмий дўконлардан юклаб олинг (Google Play, Galaxy Store, Huawei AppGallery, Mi GetApps).

• Фойдаланувчиларнинг шарҳларига, иловаларнинг рейтингларига ва ишлаб чиқувчиларнинг жавобларига эътибор беринг.
Агар шарҳлар салбий бўлса, жавоблар кам ёки шубҳали бўлса, рейтинглар паст бўлса, бундай иловани юклаб олишдан воз кечган маъқул. Бироқ, бу усул тўлиқ ечим эмас (чунки баъзи бир шубҳали иловаларда жуда юқори баҳоларга эга) ва ҳар доим қўшимча омилларни синчковлик билан текширган маъқул.

• Ўрнатиш жараёнида илова сўраган рухсатларга эътибор беринг. Яхшиси таваккал қилманг, агар иловага нима учун бу рухсатлар кераклигини тушунмасангиз, уларга рухсат берманг, яхшиси бошқа иловани танланг. Энг хавфли рухсатлар: Контактлар, хабарлар ва қўнғироқларни бошқариш.

Мавзуга оид каналимиздаги қўшимча маълумот
• Иловалар учун рухсатлар ва уларга нима учун эътиборли бўлиш керак
• Android смартфонлар оператив хотирасини тозалаб туришдан наф борми?
• Google Files: телефонингизда жой бўшатиш иловаси

#маълумот