​Норасмий (кастом) прошивка нима ва унинг хусусиятлари.

Каналимизда кўп марталаб норасмий прошивкалар (тизим) ҳақида эслаб ўтганмиз, лекин ушбу турдаги прошивкалар ҳақида маълумот бермаган эканмиз.
Бугун норасмий прошивка нима, унинг афзаллик ва камчиликлари ҳақида маълумот бериб ўтамиз.

Смартфон ишлаб чиқарувчиси томонидан қурилмага ўрнатилган тизим "расмий ёки сток прошивка" деб номланади.

Бир ёки бир нечта фойдаланувчилар томонидан ўзгартиришлар киритилган тизим "норасмий ёки кастом прошивка деб номланади. Маълумот учун: Xiaomi компаниясининг биринчи маҳсулоти ҳам Android смартфонлар учун норасмий прошивкалар бўлган.

Норасмий прошивка нима учун керак?
Қисқача жавоби: Тизим ташқи кўринишини ўзгартириш ва имкониятларини кенгайтириш, смартфонни ўзингизга мослаштириш, ишлаб чиқарувчи томонидан тизим янгиланиши тўхтатиб қўйилганда мустақил янгилаш ва ҳоказолар.

Норасмий прошивка афзалликлари:
- Аввало, бу расмий прошивкада мавжуд бўлмаган қўшимча имкониятлар. Масалан:

• Маълум бир давлат учун чиқарилган смартфонларни Global тизимига ўгириш ва қўшимча тиллар қўшиш;
• Смартфонни ўчириб ёққандан сўнг асосий паролни сўрамасдан, бармоқ изи (отпечатка) ёки Юз билан очиш (распознавание лица) ёрдамида экран блокини очиш;
• Google Camera (GCam) иловаси ишлаши учун керак бўладиган файлларнинг мавжудлиги, "вспышка" батарея қуввати кам бўлганда ҳам ишлаши;
• Қўнғироқларда овозни ёзиб олиш имконияти (Samsung Galaxy смартфонлари учун);
• Интернет тезлиги ва трафик сарфини ҳолат сатрида кўрсатилиши (Samsung Galaxy смартфонлари учун);
• Қўшимча овоз эквалайзерлари ёки кучайтиргичлар (Stereo Dual speaker);
• Смартфон ишлаб чиқарувчиси томонидан ўрнатилган ва хотирани банд қилиб турган "кераксиз" иловаларнинг бўлмаслиги. (Bixby, Play Музыка ва Фильмы);
• Баъзи ҳолатларда тизимнинг нисбатан тезроқ ишлаши ва батарея қуввати кўпроққа етиши;
• Root ҳуқуқининг мавжудлиги.

Норасмий прошивка камчиликлари:
• Тизим (Android) янги версияларини автомат тарзда янгилай олмайсиз;
• Смартфонингизга берилган 1 йиллик кафолат (Гарантия) ҳуқуқидан махрум бўласиз;
• Прошивкани тажрибаси бўлмаган киши нотўғри ўрнатганда, смартфонингиз ишламай қолишига сабаб бўлиши мумкин (мутахассис ёрдамида муаммони хал қилса бўлади);
• Синалмаган норасмий прошивка турли хил хатоликлар билан ишлаши мумкин.
#маълумот

Android учун Telegram 5.14 версиясига янгиланди.

Нима янгиликлар:
-Сўровномаларнинг учта янги тури: оммавий, кўп жавобли ва викториналар.
• Оммавий сўровлар: ким қайси вариант учун овоз берганини, ҳамма кўриши мумкин.
• Бир нечта жавобли сўровлар: битта жавоб вариантининг ўрнига сиз бир нечтасини танлашингиз мумкин.
• Викториналар: ушбу сўровларда сиз тўғри вариантни белгилашингиз мумкин.
• Учала сўровномани ҳам бирлаштириш мумкин.

Шунингдек:
- Файлни серверга юклаш ва юклаб олиш жараёни тўғрисида аниқ маълумотни акс эттирадиган кўрсаткич.
#Telegram #Телеграм

​".thumbnails" папкаси нима ва уни тозалаш мумкинми?

Ҳар бир замонавий Android қурилмада кўплаб папкалар ва файллар мавжуд, уларнинг кўпчилиги тизимни ишлатиш жараёнида автоматик тарзда яратилади. Шулардан бири файлларни вақтинча сақлаш учун мўлжалланган ".thumbnails" папкаси.

".thumbnails" папкасининг асосий ва ягона вазифаси смартфонда мавжуд бўлган ҳар бир расмнинг кичик ҳажмдаги копиясини сақлашдир. Айнан ушбу папка туфайли расмларнинг галереяда очилиши ва кўриш тезлашади. Яъни ушбу папка Галерея учун кеш вазифасини бажариб беради.

".thumbnails" асосан қурилма ички ва ташқи хотирасидаги (Sd карта) DCIM папкасининг ичида яширин тарзда жойлашган бўлади. Ушбу папкага смартфонингизда ўрнатилган Файл менеджери ёки бошқа файл менеджерлари (масалан ASTRO File Manager) орқали киришингиз мумкин, фақат илова созламаларида яширин файлларни кўрсатиш (показывать скрытые файлы) пунктини ёқиб қўйинг.

Папкадаги файллар ичида смартфонингизда мавжуд ёки айрим ўчирилган расмларнинг нусхалари ва каттароқ ҳажмдаги тизим томонидан яратилган кеш файллари жойлашган. Хохласангиз кераксиз файлларни ўчиришингиз ёки бошқа папкага кўчиришингиз мумкин. Лекин хотирани бўшатиш мақсадида тез-тез барча файлларни ўчириш бефойда, чунки тизим ушбу папка ва файлларни яна қайта яратади.

Умуман тизимдаги деярли барча яширин файллар ва папкаларнинг ўз вазифаси бор ва уларни кераксиз деб ўчириб туришнинг фойдаси йўқ.
#маълумот

​Хотира (microSD) карталаридаги учраб турадиган муаммолар ва "LOST.DIR" папкаси нима?

microSD картаси фойдаланувчиларида учраб турадиган турадиган муаммолар сирасига:

- Файл ва папкаларнинг ўз-ўзидан йўқолиб қолиши;
- Расм, видео ва мусиқаларнинг "ярим чала" ўқитилиши;
- Смартфоннинг қотиб ишлаши, ўчиб қолиши, батарея қувватининг тез сарфланиши;
- microSD картасининг "формат" сўраб қолиши ва тез-тез узилиб кетиши;
- "LOST.DIR" папкасининг тушунарсиз файллар билан тўлиб кетиши
ва ҳоказолар киради.

Юқоридаги муаммоларнинг асосий сабаблари "қалбаки" ва "умри тугаган" microSD карталаридан фойдаланиш.

"Қалбаки" хотира картаси Samsung, SanDisk, Toshiba, Transcend ва ҳоказо номлар билан учраши мумкин, лекин ишлаб чиқарувчи номи ёзилмаган "microSD" ёзувининг ўзи кўрсатилганлари ҳам мавжуд. Одатда ёзувлардаги ранглар ҳам тиниқ эмас ва тезда ўчиб кетади.
Хотирани тўлдириш учун кўпроқ маълумот ёзилганда, маълум миқдордан сўнг ёзиш тезлиги камайиб, хатоликлар кўрсатиши мумкин. Сабаби хотиранинг ҳақиқий ҳажми дастурий қисми ўзгартирилган бўлади. Масалан 8 Гб ҳажмдаги хотирани 32 Гб кўрсатиш мумкин. Шунинг учун янги microSD картасини харид қилганда, имкон борича биринчи ўринда муҳим бўлмаган маълумотларни кўпроқ ҳажмда ёзиб текшириб кўринг.

"Умри тугаган" microSD карталар асосан йиллар давомида мунтазам фойдаланилган ва манбаси (ресурс) тугаб бораётганлари ҳисобланади.
Умуман деярли ҳар бир хотира турида ёзиш ва ўқиш цикли чегараланган бўлади ва йиллар давомида автомобил видеорегистраторида қўлланилган microSD картани смартфонингизга ўрнатмасликни маслаҳат берардим.

microSD картадаги "LOST.DIR" папкасини текшириб туриш ҳам, муаммоларни аниқлашга ёрдам беради.

LOST.DIR папкаси бу - хотира картаси смартфонга ўрнатилганда, автоматик равишда яратилган Android тизим папкаси. Lost "йўқотилган" деб таржима қилинади ва DIR "папка" деган маънони англатади ёки аксинча "каталог" нинг қисқартмаси.
Одатда ушбу папка бўш бўлади, лекин ташқи хотирадан мунтазам фойдаланиш жараёнида саноқли ва тушунарсиз файллар пайдо бўлишни бошлаши мумкин.
Ҳажми кичик (Кб, Мб) ва сони 5-10 та бўлган файлларнинг ушбу папкада бўлиши табиий деб қараш мумкин. Лекин файлларнинг сони ва ҳажми ошиб борса, демак хотира картасида муаммо бор ва имкон борича зарур маълумотларни бошқа жойга кўчириб олганингиз маъқул.
#маълумот

​Смартфондаги гироскоп: бу нима ва нима учун керак?

Замонавий смартфонлар кўп датчикларга эга ва улвр турли вазифаларни бажариши мумкин. Ушбу датчиклардан бири гироскоп деб номланади - сирли, аммо жуда фойдали восита. У деярли ҳамма жойда ишлатилиши мумкин ва агар сиз баъзи иловаларни тўғри созласангиз, унда гироскоп туфайли сиз смартфонингиз билан тезроқ ва қулайроқ ишлашингиз мумкин.

Смартфонда гироскоп - бу қурилманинг фазодаги ҳолатини ўлчаш учун мўлжалланган датчик. Ушбу қурилма одамга смартфоннинг эгилиш бурчаги ва ҳаракат тезлигини, яъни унинг ҳолатини ўлчашга ёрдам беради. Гироскоп туфайли смартфоннинг ер юзасига нисбатан қандай ҳаракатланишини аниқлаб, ушбу маълумотларни ўз мақсадларингизга қўллашингиз мумкин.

Гироскоп нима учун керак?
У иловаларда, ўйинларда ва ҳатто тизимнинг ўзида ҳам ишлатилади. Смартфонингиз ушбу датчикни қандай ишлатишини бир неча мисоллари:

- Баъзи иловаларда сиз смартфонингизни айлантириш ёки уни силкитиб, функцияни фаоллаштиришингиз мумкин. Мисол учун, калкуляторда смартфонни 90 даражага айлантирсангиз, қўшимча меню очилади.

- Смартфонингизни бирор юзага қўйганингизда қулфлаш ва очиш имконини берувчи иловалар мавжуд. Яъни, датчик сиз қурилмани қўйганингизни аниқлайди ва у ҳаракат қилмайди - бу ҳолда у қулфланади. Гироскоп смартфоннинг қўлга олиб, кўтарилганлигини аниқлагач, экран қулфдан чиқарилади.

- Тизимда экранни қай тарзда айлантиришингизга қараб чиройли ҳаракатланадиган жонли фон расмлари мавжуд. Бу ҳам айнан шу датчикнинг иши - бу сиз смартфонни қаерга ўгириб олганингизни аниқлайди ва жонли фон расми учун буйруқ беради.

- Видеони 360 даражада кўриш учун сиз гироскопдан фойдаланишингиз мумкин, шунчаки экранни керакли йўналишга айлантиринг ва сизга ушбу йўналишдаги видеонинг қисми кўрсатилади.

- Гироскоп навигация тизимига ёрдам беради.

- Ўйинларда, айниқса пойга пайтида, чап ёки ўнг бурилишларни бошқаришингиз мумкин. Гироскоп туфайли сиз пойга пайтида смартфондан автомобил рули сифатида фойдаланишингиз мумкин.

#маълумот

​Смартфонлардаги датчиклар: улар нима ва нима учун керак?

Кечаги хабаримизда гироскоп датчики ҳақида маълумот бериб ўтгандик. Бугун смартфонимиздаги бошқа асосий датчиклар ҳақида ҳам маълумот бериб ўтамиз.

Яқинлик датчики (Датчик приближения, proximity sensor). Номидан кўриниб турибдики, бу унинг олдидаги бирор нарсанинг мавжудлигини аниқлашга ёрдам берадиган датчик. Энг оддий мисол - смартфон қулоғингизга тутилганда экранни ўчиради. Шунингдек, яқинлик датчики смартфон сумкада ёки чўнтакда бўлганида экран ўз-ўзидан ёқилиб қолишини олдини олади.


Ёруғлик датчики (Датчик освещения). Бундай датчик экраннинг ёрқинлигини автоматик равишда ўрнатишга ёрдам беради. Замонавий ёруғлик датчики одатда смартфоннинг AI (сунъий ақл) технологияси билан биргаликда ишлайди. Масалан, агар датчик маълум бир ёрқинликни ўрнатган бўлса ва сиз уни қўлда тузатган бўлсангиз, смартфон буни эътиборга олади ва кейинги сафар экранни ўзи ёрқинроқ қилади.

Холл датчики (Датчик Холла) - бу смартфондаги энг сирли датчиклардандир, чунки кўпчилик бу нима учун кераклигини билишмайди. Холл эффекти деб номланган датчик магнит майдонни аниқлайди ва унинг интенсивлигини ўлчайди.
Одатда қўшимча аксессуарлар учун Холл датчики керак бўлади. Масалан, магнит чехолни очганизда смартфонингиз экрани активлашади ёки ёпганизда соат (заставка) пайдо бўлади. Айтганча, ушбу функцияда яқинлик датчики Холл датчики ўрнини босиши мумкин.

Барометр - одатда бундай датчик билан фақат флагманлар мақтана олади. Барометр GPS га кўмаклашади ва баландликни аниқлашга ёрдам беради. Бундай датчикнинг мавжудлиги фойдалидир, чунки биноларнинг схемаси Google Maps да пайдо бўлишни бошлаган ва барометр сизнинг қайси қаватда эканлигингизни аниқлайди. Барометр жисмоний фаолиятни аниқлайдиган иловаларда ҳам қўлланилади. Масалан: неча қаватдан ўтганингизни аниқлаш учун.

#маълумот

​Қўнғироқ қилиш (телефон) иловалари

Смартфонимиздаги ўрнатилган қўнғироқни амалга ошириш иловасининг имкониятлари ва муаммолари баъзида қўшимча шу турдаги иловаларни излашимизга сабаб бўлади.

Масалан: Xiaomi янги смартфонларида кўпчилик ўрганиб қолган MIUI қўнғироқ қилиш иловасининг ўрнига, Google томонидан тақдим этилгани ўрнатилгани.
Контактларни излашда (T9*), рақам теришдаги ноқулайликлар, қўнғироқлар тарихи рўйхатининг чегараланганлиги, овоз ёзиб олиш имкониятининг йўқлиги каби муаммоларнинг ечими сифатида қўшимча иловаларни келтириб ўтамиз.

Google Phone / Телефон - қўнғироқ филтри, GOOGLE DUO видеоқўнғироқлар, спамдан ҳимоя қилиш ва АОН, визуал овозли почта, кичрайтирилган қўнғироқ ойнаси ва бошқа имкониятлар. Энг асосийси илованинг янги версияларида қўнғироқларда овозни ёзиб олиш имконияти қўшилиши режалаштирилган.

True Phone Телефон Контакты:
- Қўнғироқ тарихи ва контактлар орасида Т9* ёрдамида тезкор қидирув
- Қўнғироқлар тарихини гуруҳлаш
- Оддий ва ишлатиш учун қулай интерфейс
- Замонавий ва осон созланадиган дизайн
- Турли мавзуларни (тема) қўллаб-қувватлаш


AGContacts - Қўнғироқ ва Контактлар менежери. Тўлиқ созланадиган фойдаланувчи интерфейсига эга, 6000 га яқин созламалар орқали иловани ўзингизга мослаштириб олишингиз мумкин.


*T9 - Ушбу киритиш тизими сиз киритмоқчи бўлган сўзни олдиндан билиш учун яратилган. Тизим маълум бир фойдаланувчига мослашади ва у ёзишмаларда кўп ишлатадиган сўзларни таклиф қилади. Натижада сиз ёзишга камроқ вақт сарфлайсиз.

#APK

​Компютерда ишловчилар яхши билишади, бир неча вазифаларни бирданига бажариш қулайлигини. Яъни кўплаб хизматлар ва дастурлар мунтазам равишда ишга туширилади ва улар орасида ўтиш бир зумда амалга оширилади.

Смартфонларда ҳамма нарса бошқача. Экран ўлчамлари йил сайин ўсиб бораётган бўлсада, биз одатда қурилмада битта иловадан фойдаланамиз ва кейин кейингисига ўтамиз. Аммо бу чекловни енгиб ўтишга имкон берадиган бир нечта усуллар мавжуд. Шулардан бири ҳақида яқиндагина каналимизда "Тасвир устида тасвир" режими ҳақида маълумот берган эдик. Бугун эса:

Экранни иккига бўлиш:
Масалан, Telegram да бир вақтнинг ўзида мулоқот қилиш ва бирор мақолани ўқиш ёки видео томоша қилиш керак бўлганда жуда қулайдир. Экраннинг бир қисмида мақола, бошқасида эса илова бўлади. Бунинг ёрдамида матнни нусхалаш ёки таҳрирлаш орқали ҳужжатлар билан ишлаш анча осонлашади.

Экранни иккига бўлишни фаоллаштириш жуда оддий.
Асосий ва иккинчи иловани ишга туширинг ва навигация панелида (Орқага, Бош экран, Энг сўнгги иловалар тугмалари) "Энг сўнгги иловалар" тугмасини танланг, сўнгра бўлинган экраннинг юқори қисмида кўрсатмоқчи бўлган иловани босиб ушлаб туринг. Пайдо бўлган қўшимча менюдан, экранни иккига бўлиш белгисини танланг ва иккинчи иловани ҳам белгиланг.

Иловалар ўртасидаги ажратгични суриш орқали, қайси иловага экранда кўпроқ жой ажратишни танлашингиз мумкин. Агарда ажратгични юқорига ёки пастга тортсангиз экранни иккига бўлиш режимидан чиқасиз.
#маълумот

​Нима учун смартфон батареяси тезда тугайди?

Ушбу саволни тез-тез гуруҳимизда бериб туришади, каналда бу ҳақида айрим маълумотлар мавжуд бўлса ҳам (1, 2, 3, 4, 5), ушбу мавзуга яна бир марта тўхталишга қарор қилдик.

Смартфон ёки планшет батарея қувватида қанча вақт ишлаши керак? саволига каналимизда 3300 мАч аккумулятор хажмига эга бўлган смартфоннинг тахминий статистикасини кўрсатиб ўтган эдик.

Батарея сарфланиши муддати нафақат унинг хажмига, балки бир қанча омилларга боғлиқ.
Масалан:

1. Фойдаланиш жараёни ва нима вазифалар бажарилаётгани.
Ҳаммаси оддий: смартфонни жуда кўп ишлатсангиз - батарея қуввати тезроқ тугайди. Аммо ишлаш вақти, смартфонда бажарилаётган вазифаларга ҳам боғлиқ.
Мобил Интернетдан домий фойдаланиш, филмлар кўриш ёки яхши графикали ўйинлар ўйнаш туфайли батарея қуввати - бир неча (2-5 соат) ичида тугаши мумкин.
Айтайлик мусиқа тинглаш, китоблар ўқиш, СМС ёки суҳбатларда батарея камроқ сарфланади.

2. Ўрнатилган иловаларнинг сони ва сифати
Смартфонингизда ўрнатилган иловалар қанча кўп бўлса, батареянгиз шунча тез сарфланади. Сифат ҳам кучли таъсир кўрсатади: ёмон ишлаб чиқарилган иловалар доимий равишда процессорни банд қилади ва қурилманинг "ухлаш режимига" ўтишига халақит беради.

3. Операцион тизимдаги хатолар
Ишлаб чиқарувчи томонидан тизимни янгилашдаги хатолар. Янги тизимнинг смартфонда ўрнатилган иловалар билан мос келмаслиги ва ҳоказолар. Хатолар қанча кўп бўлса, батарея шунча тез сарфланади.

4. Батарея ҳолати
Вақт ўтиши билан батарея манбаси (ресурси) камайиб боради. Батареянинг "ёши" қанчалик катта бўлса, унинг заряд ушлаши камроқ бўлади. Тахминан 500 цикллик зарядлаш жараёнидан сўнг ресурс камайиши бошланиши мумкин.

5. Мобил алоқа сигнали
Тармоқ сигнали қанчалик ёмон бўлса, батарея тезроқ сарфланади. Бунинг сабаби, қурилма узатгичи (радиоблок) тармоққа уланишни амалга ошириш учун юқори зўриқиш билан ишлашга мажбур. Шу сабабли алоқа зарур бўлмаган вақтда (тунда), самолёт (парвоз) режимини ёқиб қўйиш яхши натижа бериши мумкин.

Хулоса
"Менинг смартфоним бир неча соат ичида заряди тугаб қолади, бу нормал ҳолатми?" саволига аниқ жавоб бериш мушкул. Чунки жуда кўплаб омиллар бунга сабабчи бўлиши мумкин.

Гуруҳимизда шу каби саволларга, смартфон созламаларидан "Батарея сарфи" (статистикаси) менюси скриншотини (расмини) йўллаган ҳолда жавоб олишингиз мумкин.
#маълумот

​Смартфонда бажариладиган ёмон одатлар

Смартфон (инглизча smartphone - ақлли телефон) инсоният томонидан яратилган энг яхши ва энг ёмон ихтиро десак тўғри бўладими?
Албатта юқорида келтирилган таъриф, унинг имкониятларидан қандай фойдаланишимизга боғлиқ.

Бир томондан, ушбу кичкина қурилма ёрдамида, сухбатлашиш, керакли маълумотларни топиш ва кундалик ҳаётимизда қўллаш, илм олиш, хизматлардан фойдаланиш ёки аксинча хизмат кўрсатиш, маҳсулот харид қилиш ёки таклиф қилиш каби вазифаларда асосий восита бўлиб хизмат қилади.
Бошқа томондан, унинг имкониятларидан фойдаланишдаги ёмон одатлар турли хил салбий оқибатларга ҳам олиб келади.
Бугун ушбу ёмон одатларнинг бир нечтаси ҳақида маълумот бериб ўтамиз, қўшимча фикр билдирмоқчи бўлганлар ўз шарҳларини комментарии шаклида ёзиб қолдиришлари мумкин.

Телефонингизни доимий равишда текшириш
- Ижтимоий тармоқ ва мессенджер хабарлари, тизим огоҳлантиришлари ва бошқа билдиришномалар туфайли, сиз телефонингизни тез-тез текшириб турасиз. Муаммо шундаки, жуда кўп текшириш диққатни жамлаш ва сергаклик қобилиятингизга халақит бериши мумкин.

Ижтимоий тармоқларга қарамлик
- Instagram, Snapchat каби ижтимоий тармоқлар ёшларнинг руҳий саломатлигига салбий таъсир кўрсатиши, ҳасад ва тушкунлик каби ҳолатларга олиб келиши мумкин.

Ухлашдан олдин "кўз югуртириш"
- Уйқудан олдин, айниқса қоронғуликда телефондан фойдаланиш уйқу бузилишига олиб келади. Смартфондан чиқаётган кўк чироқ ҳақида каналимизда ёзган эдик.

Экранни тозаламаслик
- Аксарият фойдаланувчилар телефонни овқатланиш вақтида ҳам қўлларидан қўймайдилар. Тадқиқотлар шуни кўрсатадики, смартфонлар кўринганидан кўра анча ифлос. Улар юзасида қанча патоген бактериялар тўпланса, уларни ўзингизга шунча кўп ўтказасиз.
Аслида, қўл инфекциянинг энг катта қўзғатувчиси ва микроорганизмлар сизнинг телефонингизда тўпланишига сабаб бўлади.

Ён атрофга эътиборни сусайтириш
- Хаёли телефонда бўлган пиёда ёки ҳайдовчи билан содир бўлган нохуш хабарларни ҳаммамиз эшитганмиз. Шунинг учун ҳам қонунчиликда йўлнинг қатнов қисмида электрон воситалардан фойдаланган ҳайдовчига ҳам, пиёдага ҳам жавобгарлик мавжуд.

Смартфонга соатлаб термулиш
- Қизиқ маълумотни ўқиш ёки бирор ўйин ўйнаш жараёнида, кўзимизни етарли даражада юмиб очмаймиз. Бу эса кўзлар толиқишига ва хиралашишига олиб келади.
#саломатлик

​Смартфонни тез зарядлаш (Fast, Quick charge) нима?

Замонавий смартфонлар турли хил имкониятларга эга, улардан бири тез зарядлаш технологияси.
Яқин-яқингача ушбу функция асосан флагман смартфонларда қўлланиларди, лекин бугунги кунда кўплаб смартфонлар ушбу имкониятга эга.

Тез зарядлаш нима?
Технологиянинг номи билан маълумки, у смартфонни тез зарядлаш учун яратилган. Аниқроқ қилиб айтганда, у тез зарядлаш функцияси билан жиҳозланмаган смартфонларга қараганда тезроқ заряд олиши мумкин.
Масалан, 3650 мАч батарея сиғимига эга бўлган Huawei P30 смартфони 30 минутда 50% заряд олиши мумкин, оддий қувватлашда эса 30 минутда тахминан 15% ни ташқил қилади.

Смартфон қандай тез зарядланади?
Тез зарядлашни қўллаб-қувватлайдиган смартфонларда ишлатиладиган махсус адаптерлар қурилмага кўпроқ кучланиш ва токни қабул қилиш имконини беради. Ушбу технология туфайли смартфон тезроқ заряд олади.

Лекин, эътиборга олиш керак бўлган жуда муҳим томони бор. Аслида, қурилмани тезкор зарядлаш бир неча босқичларга бўлинади. Биринчи босқичда максимал ток таъминланади, шунинг учун қурилманинг зарядланиши ҳақиқатдан тезлашиб, батерея фоизи ошиб боради. Бироқ, 50-70% га етганда, ток кучи кескин пасайишни бошлайди, бунинг натижасида қолган 100% гача зарядлаш тезлиги пасаяди. Сабаби батарея қизиб кетмаслиги ва ишдан чиқмаслиги учун. Айнан, шу учун тез зарядлаш технологияси рекламасида: "атиги 30 дақиқада сиз смартфонингизни 50 фоизгача зарядлашингиз мумкин!" дейишади, чунки қолган 100 фоизгача қурилмани яна бир соат ёки ундан ҳам кўпроқ вақт давомида зарядлаш мумкин.

Тез зарядлаш учун смартфоннинг ўзи ҳам, зарядлаш адаптери ҳам ушбу технологияни қўллаб-қувватлаши керак. Одатда, ушбу адаптер ва кабел смартфонингиз қутисида бўлади.
Оддий зарядлаш адаптери ёки USB порти 5В кучланишни қурилмага 0,5 дан 2,5А гача ток кучи билан етказиб беришга қодир.
Тез зарядлаш адаптери ток ва кучланишнинг ошиши билан фарқланади. Турли хил стандартларда бу қийматлар 20В ва 5А га етиши мумкин.

Тез зарядлаш адаптери харид қилганда махсус ёзувларга эътибор беринг "Quick Charge", "Fast Charging". Асосан, Huawei смартфонларида тез зарядлаш фақат ўзининг стандартида (Super Charge) ишлайди. Яъни Samsung ёки Xiaomi адаптерлари Huawei смартфонларини тез зарядламайди ёки аксинча.


Тез зарядлашни қандай ёқиш мумкин?
Одатда ушбу функция ёқилган бўлади, смартфонни зарядга уланг ва экранда "Тез зарядлаш" (Быстрая зарядка) ёзувини текширинг. Ушбу функцияни ўчириб қўйиш имконияти Samsung Galaxy смартфонларда мавжуд ва бу ҳақида каналда ёзган эдик.
#маълумот

Мобил операторлар алоқа ва интернет хизмати сифати бугунги кунда кечиктириб бўлмайдиган муҳим масалалардан бири деб ўйлайман.

Айниқса, Аҳолининг 75 фоизи интернетга мобил қурилмалар орқали кираётганини ҳисобга олса ва 2020-йилнинг республикамизда “Илм, маърифат ва рақамли иқтисодиётни ривожлантириш йили”, деб ном беришилиши, соха вакиллари олдига янада кўпроқ талабларни қўяди.

"Ўтган йили барча шаҳар ва туман марказларини юқори тезликдаги Интернетга улаш ишлари якунланганини ҳисобга олиб, яқин 2 йилда барча қишлоқ ва маҳаллаларни ана шундай тезкор Интернет билан таъминлашимиз керак." дейилади президентнинг Олий Мажлисга Мурожаатномасида.

Интернет тезлиги 10 баробарга оширилгани фақат янгиликларда қолиб кетди шекилли, на кундалик ҳаётимизда, на интернет тезлиги бўйича рейтингларда бунинг исботини кўрдик. Ҳа албатта, давлатга қарашли “Ўзбектелеком”* компанияси "биз интернет тезлигини операторлар ва провайдерлар учун тезлаштириб бердик, энди натижани улардан кутинг" дейиши мумкин.

* Ўзбектелеком республикамиздаги интернет хизматлари кўрсатадиган барча оператор ва провайдерларга ташқи интернет каналдан трафикни харид қилиб, ички бозорга сотувчи ягона давлат ташкилоти.

“Ўзбектелеком” таркибида бўлган UZONLINE провайдери ва UZMOBILE оператори, компаниянинг "юзи". Яъни республикамиздаги интернет тезлиги, сифати ва нархини "кўз-кўз" қилувчи ва бошқа хусусий компанияларга ўрнак бўлиши керак. Кундалик ҳаётимизда эса ҳаммаси аксинча, бунинг исботи сифатида гуруҳимиздаги хабарларни ёки компаниянинг расмий Facebook саҳифасидаги, республикамизнинг турли хил вилоятлари абонентлари қолдирган шарҳларидан (1. 2. 3. 4. 5 ) билишингиз мумкин.

Ҳа тўғри, айрим худудларда интернет хизмати муаммосиз ишлаётган бўлиши мумкин, лекин ахоли гавжум худудларда, интернет белгиси 4G ёки 4G+ кўрсатгани билан тезлиги оддий интернет сахифаларни ҳам "зўрға" очади. Тезлик эса, иш фаолияти бевосита интернет билан боғлиқ абонентларга ўта муҳим.

Каналимизда бир неча марта эслаб ўтганимдек, UZMOBILE мобил операторидан фойдаланиш даврида турли хил муаммоларга дуч келганман. Расмий мурожаатлардан керакли натижани олмагандан сўнг, операторни ўзгартириш ягона ечим сифатида кўринади. Лекин "эски" рақамни янгисига алмаштириш, айниқса анча йилдан бери фойдаланилаётган ва ҳисоби бир неча ойга тўлдирилган бўлса кўзинг қиймайди.

Ривожланган давлатларда, масалан қўшни Қозоғистонда ҳам эски мобил рақамингизни сақлаган ҳолда бошқа мобил операторга ўтиш хизмати (MNP) 2016-йил 1-январдан буён мавжуд.

Ўзбекистон президенти 14.05.2018 имзолаган "Электрон тижоратни жадал ривожлантириш чора-тадбирлари тўғрисида" ги қарорида "2018 йил якунига қадар мобиль алоқа тармоғи абоненти бошқа мобиль алоқа тармоғига ўтганда телефон рақамини сақлаб қолиш тартибини " ишлаб чиқиш назарда тутилган эди.

UZONLINE провайдери хизматидан фойдаланмаганим учун, компаниянинг расмий Facebook саҳифасидаги аксарият салбий фикрлар вазиятни баҳолашга ёрдам беради. Ўзим билганим эса, ушбу провайдерга уланиш учун фақат қўнғироқ қилиб ёки расмий сайти орқали ариза қолдириб бўлмайди. Албатта яқин атрофингиздаги АТС га бориб, ариза қолдириш ва компанияга бир неча марта қўнғироқ қилиб, хизматни улаб беришини илтимос қилиб туришингиз керак. Мижоз йиғиш учун ҳаракат қилаётган бошқа провайдерларга эса битта қўнғироқнинг ўзи кифоя.

Халқимиз бежизга"Яхши отга бир қамчи, ёмон отга минг қамчи" деб айтмаган. Вазиятни яхшилашнинг ягона йўли “Ўзбектелеком” компанияси хусусийлаштириш ёки рақобатни кучайтириш учун бошқа компанияларга ҳам тенг имтиёзлар бериш деб ўйлайман.

#оператор

Телефон батареясини тежаш учун керакли маслахатлар.

#мақола
Каналга уланиш 👉@gsmgurus_FAQ

​Смартфон экранини қувват тугмасисиз (Power) ёқиш ва ўчириш усуллари:

Бу нима учун керак бўлиши мумкин:
- Смартфонда қувват тугмаси ҳар доим ҳам қулай жойлашмаган бўлса ёки қийин босилса ва ишдан чиққан ҳолатларда.
- Катта ҳажмдаги қурилмани "кичкина" қўлда ёқиш ва ўчириш қулай бўлмаган ҳолатларда.
- Экран қулфини ечишда, вақтни тежаш мақсадида ва ҳоказолар.

- LG ва Xiaomi смартфонларнинг кўпчилигида тизим созламаларида "Ёқиш учун экранни икки марта босиш" (Активация экрана двойным касанием) функцияси мавжуд. Ушбу имконият мавжуд бўлмаган смартфонлар учун, қуйидаги иловани тавсия қиламиз:

Double Tap (https://play.google.com/store/apps/details?id=com.vinance.lockdown)

Хусусиятлари
* Экранни ўчириш учун бош экранда икки марта босинг
* Экранни ўчириш учун уй (домой) тугмасини икки марта босинг
* Экранни ёқиш учун овоз баланд тугмасини босинг.

- "Уйғотиш учун кўтариш" (Включение при поднятии) функцияси кўпчилик смартфонларда мавжуд ва алохида илова ўрнатишни талаб қилмайди.
Вазифаси номидан кўриниб турганидек смартфонни қўлингизга олишиз билан экрани ёқилади. Смартфон созламаларида "ko'tarish" (тизим рус тилида бўлса поднятии) калит сўзи орқали ушбу функцияни топишингиз мумкин.

Парол ёки Пин код ўрнига юз билан очиш (распознавание лица) усулидан фойдаланилганда экранни қулфдан очиш жараёни автоматлашган ҳолда амалга оширилади.

Афсуски юқоридаги имкониятлар асосан охирги 2-3 йилда чиқарилган смартфон моделларида мавжуд. Агарда Сизда излаб топишда ёки фойдаланишда муаммолар юзага келса гуруҳимизга мурожаат қилинг.
#маълумот

​Telegram даги SCAM белгиси нимани англатади?

Инглиз тилидан SCAM таржимада "фирибгарлик" (мошенничество) деган маънони англатади. Telegram даги бундай ёрлиқни фойдаланувчилар, каналлар ва ботлар олиши мумкин. Ушбу ёрлиқ билан биргаликда инглиз ёки рус тилида (расмда кўрсатилган) қуйидагича шарҳ берилган:

⚠️ Warning: Many users reported this account as a scam. Please be careful, especially if it asks you for money.

Таржима нимани англатади?

⚠️ Диққат: кўп фойдаланувчилар ушбу аккаунтни фирибгар деб хабар беришди. Илтимос эҳтиёт бўлинг, айниқса сиздан пул талаб қилинса.

SCAM белгиси тайинланган аккаунтлар мессенжернинг ўзидаги глобал излашда кўрсатилмайди. Ушбу канал, бот ёки фойдаланувчи билан ёзишмаларга фақат унга тўғридан-тўғри ҳавола орқали кириш мумкин.

Ҳар қандай Telegram фойдаланувчиси фирибгарлар ҳақида хабар бериши мумкин.
#маълумот