HADISLAR

Forwarded from -

«Абу Зарънинг чўрисига келсак, Абу Зарънинг чўриси қандоқ ҳам чўри!» Етук инсон бўлгани учун Абу Заръ ҳатто хизматкор чўриларни ҳам энг яхши ҳолда тутар экан. «Гапимизни ҳеч таратмайди». Абу Зарънинг чўриси одобли, итоаткор, вафодар бўлганидан оиланинг гапини ташқарига чиқармас экан. Бу хизматкорлардаги энг яхши фазилатлардандир. «Таомимизни ҳеч бузмайди». Хизматкор қизнинг асосий ишларидан бири таом пишириш экан. Таомни ҳеч бузмай, аъло даражада пиширадиган хизматкор нодир хизматкордир. «Уйимизни қуш уясига ўхшатиб ҳас-чўпга тўлдирмайди». Яъни, тоза-покиза тутади. «Абу Заръ сут мешлари чайқатилиб турганда ташқарига чиқди». Бу баҳор пайтида чиққанига ишорадир. Ўшанда сут мешлари чайқатилиб, ундан ѐғ олиш авжига чиққан пайт бўлади. «У икки боласи худди икки йўлбарсча каби қўлтиғи остидаги икки анорини ўйнаб турган аѐлни кўрди». Бу васфлар ўша аѐл келишган, насли пок ва тоза, кўрган одам ҳавас қиладиган, яхши бола туғадиган аѐл эканлигига ишорадир. «Мени талоқ қилиб, уни никоҳлаб олди». У аѐлдан яхши фарзандлар орттирмоқчи бўлди. «Ундан кейин бир шарафли кишига никоҳландим». Умму Заръ Абу Заръдан ажрашгандан кейин бир аслинасли яхши кишига эрга теккан. «У учқур от минган, хоттий найза тутган эди». У одам чавандоз ва баҳодир инсон экан. Хоттий найза Баҳрайн томондаги Хот деган номга нисбат берилган бўлиб, ўша вақтнинг энг яхши найзалари ўша ерда қилинар эди. Энг яхши баҳодирларгина хоттий найза тутар эдилар. «У менга кўп неъматларни тўкиб ташлади». Иккинчи эр ҳам бой-бадавлат ва сахий одам экан. Умму Зарънинг маишат маъносида ҳолати аввалгидек қолди. «У менга ҳар тур ҳайвондан жуфтлаб берди ва «Эй Умму Заръ, ўзинг егин, аҳлингга ҳам бергин!» деди». Аѐл кишига эри томонидан қариндош-уруғларига бирор нарса берилиши, ўзига бергандан ҳам яхши ѐқади. «Унинг менга берган ҳамма нарсаси Абу Зарънинг энг кичик идишича ҳам бўлмади». Бундан Умму Заръ молу дунѐ, фаровон турмушнинг эмас, ҳақиқий инсоний муносабат, ҳақиқий муҳаббатнинг гадоси эканини кўрсатади. Кўз очиб кўрганига етмайди, дегани шу бўлади. Ушбу ҳадисда зикр қилинган эрларнинг ичида хотинига энг ѐққани, албатта, Абу Заръ бўлган. Шунинг учун ҳам Пайғамбаримиз соллаллоҳу алайҳи васаллам бу гаплар зикр этилганидан кейин Оиша онамизга: «Мен сен учун Абу Заръ Умму Заръга қандоқ бўлса шундоқ бўлдим», дедилар». Аммо Абу Зарънинг томонидан Умму Зарънинг талоқ қилиниши маъқул иш бўлмагани учун, фақат фироқ ва жафода эмас, деб қўшиб ҳам қўйдилар.

Ушбу ҳадисдан уламоларимиз кўпгина фойдалар чиқарганлар баъзиларини эслаб ўтамиз:
1. Шахси маълум бўлмаган аѐлнинг яхши фазилатларини васф қилиш мумкинлиги.
2. Аѐлига муҳаббат изҳор қилиб, унинг кўнглини кўтариб туриш яхшилиги. Пайғамбаримиз соллаллоҳу алайҳи васаллам Оиша розияллоҳу анҳо-га қилганларидек.
3. Бошқа уммат вакилларининг яхши фазилатларидан ўрнак олиш жоизлиги. Агар шариатга хилоф бўлмаса.
4. Аѐл киши эрининг яхшиликларига шукр қилиши лозимлиги. Ибн Умардан Имом Насаий ривоят қилган ҳадисда Пайғамбаримиз соллаллоҳу алайҳи васаллам:
«Эрига ношукрлик қилган аѐлга Аллоҳ назар солмайди», деганлар. Ҳеч шубҳа йўқки, аѐлларнинг ўз эрлари ҳақидаги ушбу чин кўнгилдан чиққан мулоҳазаларини диққат билан ўрганиш ҳар бир эркакка ҳам, аѐлга ҳам кўпгина фойдалар келтиради.

Манба: Ҳадис ва Ҳаёт 13📚

📚
https://t.me/+wI70PN3SmkIyNTBi