Yaxshi niyat qilish muhimligi haqida

Sahifamizda «Shamoilul-Muhammadiya» tanlovi oʻtkazilganidan xabardorsiz. Shu tanlov haqida faqat oʻzimiz biladigan bir holatni eslab, sizlar bilan boʻlishmoqchi edim.

Tanlovni tashkil qilish arafasi edi, hali asosiy eʼlonni qilmaganmiz. Ishchi guruhdagilar bilan, tanlovning mutlaq gʻolibiga umraga yoʻllanma beramiz, deb niyat qildik. Vaholanki, oʻsha paytda hamyonimizda 1000 soʻm ham yoʻq edi.

Hasanxon ustoz videoda tanlovning eʼlonini qilib berdilar. Bizdek oddiy kishilarning iltimosiga labbay deganlaridan juda xursand boʻldik. Sekin-asta homiylar chiqa boshladi. Har oy maʼlum summa oʻtkazib turishdi, bu pulga gʻoliblar uchun kitob olib, joʻnatib turdik. Qolgan pulni esa umraga yoʻllanma uchun yigʻib bordik.

Maʼlumot uchun, «Shamoil» tanlovi gʻoliblariga «Oʻzlikka qaytish» tanlovi gʻoliblaridan farqli ravishda bir dona kitob berilar edi. Ha, shunday sodda, ammo samimiy tanlov boʻlgan edi «Shamoil»…

Tanlov oxiriga yaqinlashdi. Boshidagi niyatimiz – mutlaq gʻolibga umra yoʻllanmasini hadya qilishimiz kerak. Yuqori 3 oʻrin sohiblariga telefon, noutbuk kabi qimmatbaho sovgʻalar oldik. Shu sababli umraga yoʻllanma uchun pulimiz qolmadi. Biroz tushkunlikka tushdik. Chunki haqiqatan niyatimiz jiddiy edi, rosa xohlagandik.

Tanlovning soʻnggi bosqichi oʻtgach, Hasanxon ustoz ishtirokida tadbir qilishni reja qildik. Ustozga buni bildirgandik, rozi boʻldilar. Shu orada tadbir haqida maslahatlashish uchun ustoz bilan koʻrishishim kerak boʻldi. Oldlariga bordim.

Tadbir qanday oʻtishi, nimalar qilinishi haqida soʻraganlaridan keyin: «Bizga xizmat yoʻqmi?» dedilar. Paytdan unumli foydalandim-da, gʻolibga umra berishni niyat qilganimizni, ammo boshqa sovgʻalar olganimiz uchun pulimiz qolmaganini aytdim. Ustoz biroz oʻylanib turdilar, keyin: «Ertaga xabarlashaylik», dedilar.

Aytmoqchi, u paytlar 2023-yil, ustoz shayx hazratlarining masjidlarida imom noibi boʻlib xizmat qilardilar.

Ertasi kuni yana ustozning oldlariga bordim. Eshikdan kutib olib, salom-alikdan soʻng ushbu xushxabarni aytdilar:

«Bir tanishimiz bilan gaplashdim. Bir kishilik umraga yoʻllanma beradigan boʻldi. Raqamini yozib oling, qoʻngʻiroq qilib, meni aytsangiz, qolganini tushuntiradi»…

Juda xursand boʻlib ketdim. Qayta-qayta ustozga tashakkurlar aytib, xayrlashdim.

Bir-ikki kun oʻtib, tanlovimizning xatmona tadbiri oʻtkazildi. Ustoz mehmon boʻldilar, chiroyli suhbat qilib berdilar. Yakunda gʻoliblar taqdirlandi. Birinchi oʻrin sohibasiga umraga yoʻllanma berildi. Juda boshqacha holat boʻlgandi oʻshanda. Tadbirni ushbu havola orqali toʻliq koʻrishingiz mumkin.

Shunday qilib, tanlov hali boshlanmasidan oldin qilgan niyatimiz amalga oshdi, «Shamoilul-Muhammadiya» gʻolibiga umraga yoʻllanma berildi. Alloh taologa hamd-u sanolar boʻlsin!

@hasanhusayn

Yaxshi niyat qilish muhimligi haqida (2-qism)

Sahifamizda 2025-yilgi mavlid oyida tanlov oʻtkazildi. Juda koʻtarinki ruhda oʻtdi. Nafaqat ishtirokchilar, oʻzimizga ham boshqacha taʼsir qildi.

Tanlovdan soʻng juda koʻpchilik davom etishni soʻradi. Koʻpga choʻzmay «Oʻzlikka qaytish» tanlovini eʼlon qildik.

«Shamoil»dagi holat, yaʼni gʻolibga umra yoʻllanmasi berilgani esimizda. Shuning uchun bizdan nima ketdi, niyat qilaveraylik, Oʻzi yetkazar deb bu galgi tanlovning gʻolibiga ham umraga yoʻllanma berishni maqsad qildik.

«Oʻzlikka qaytish» tanlovining homiylari koʻpayib ketdi. Shu qadarki, eng boshidagi bosqichlarda sovgʻalar koʻpligidan qaysi hadyani nechanchi oʻringa berishni oʻylab chalkashib ketgandik, mashaalloh.

Homiylar koʻpaydi-ku-ya, ammo aksariyatlari oʻz mahsulotlari bilan hamkorlik qilishardi. Yaʼni moddiy hamkorlik kam edi. Bizga esa umraga yoʻllanma uchun pul kerak edi. Oʻzidan umid qilib, tanlovni davom ettiraverdik.

Aytganimdek, moddiy hamkorlik boʻlmagani uchun tanlov oxirlaganda umraga yoʻllanma uchun pulimiz yetmasligini tushundik. Yana kayfiyatimiz tushib ketdi. Lekin bu gal ichimizda qandaydir ishonch bor edi, negadir umidimiz soʻnmadi. Bejiz emas ekan…

Oxirgi bosqich oʻtkazilishiga bir hafta qoldi. Shu kuni bir tanishimiz 10 ta insonga umraga yoʻllanma hadya qilmoqchi ekanliklarini, shunga mos odam boʻlsa, dalolat qilishimni aytib qoldi…

Rasululloh alayhissalom sahobalari bilan oʻtirarkanlar, ummatlaridan 70 ming kishi savol-javobsiz jannatga kirishini bashorat qildilar. Shunda Ukkosha ibn Mihson roziyallohu anhu shartta turadilar-da: «Yo Rasululloh! Men oʻshalardanmanmi?» dedilar. Paygʻambarimiz alayhissalom: «Sen oʻshalardansan», deb javob berdilar. Holatning guvohi boʻlgan sahobalardan biri ham turib: «Yo Rasululloh! Men oʻshalardanmanmi?» deb soʻradilar. Nabiy alayhissalom esa: «Ukkosha sendan oʻtib ketdi», deb javob beradilar (Imom Buxoriy rivoyati).

Men ham tanishimning soʻroviga shartta javob berdim: «Ha, bor. Bir tanlov boʻlyapti. Unda odamlar Hasanxon, Husaynxon ustozlarning suhbatlari asosida tuzilgan savollarga javob berib kelishyapti. Siz bermoqchi boʻlgan umraga yoʻllanmadan bittasini shu tanlovning gʻolibiga bersak-chi?» Shu va shu kabi gap-soʻzlarni qoʻshib-chatib soʻzimni tugatdim. Tanishim rozi boʻldi.

Alloning nasibini qarang, a! Agar tanishim mendan soʻramaganida hech qanday gap-soʻz boʻlmasdi, oʻzimizda pul yetmagani uchun yoʻllanmani ololmasdik. Niyatimiz ham amalga oshmasdi.

Shu zahoti umraga yoʻllanmani qanday berishimiz haqida jamoadagilar bilan maslahat qildik. Gʻoliblar oʻrtasida tanlov qilishga kelishdik. Vazifani berib, savollarni tuzib, maʼlum kunda tanlov oʻtkazdik. Gʻolib aniqlandi. Keyin nima boʻlganidan koʻpchiligimizning xabarimiz bor.

Alloh taolo bu safar ham noumid qilmadi! Ilohim, davomiy boʻlsin!

Shunday ekan, tez orada boshlanadigan tanlovga ishtirok etishga harakat qiling. Umid qilamiz, Alloh taolo niyatlarimizni isloh qilib, oʻngidan keltirsa…

@hasanhusayn

«Eng faxrli soatlarimiz bo‘ladi»

2021-yilda Hasanxon ustoz shayx hazratlarining masjidlarida «Shamoilul-Muhammadiya» kitobini o‘qib, sharh qilib bergandilar. Adashmasam, 1 yarim yil davom etgandi. Har hafta bitta dars bo‘lardi.

Shunday suhbatlarning birida ustoz quyidagi so‘zlarni aytgandilar:

«Hozir mana shunday ilmiy majlis hamma yoqda ham bor emas. Alhamdulillah, bizda bor. Undan foydalanishimiz kerak, unga vaqt ajratishimiz, qunt qilishimiz kerak. Inshaalloh, Allohning huzurida mana shu soatlarimiz eng faxrli, eng javobi oson, hayotimiz va oxiratimiz uchun eng manfaatli soatlarimiz bo‘ladi. Chunki biz Rasululloh alayhissalomning siyratlarini o‘rganyapmiz…»

O‘sha paytda bu gaplarni to‘liq his qilolmagan ekanmiz. Oradan biror vaqt o‘tib, suhbatlar to‘xtab qoldi. Shu bahona ilmiy majlislarga bormaydigan, vaqt ajratmaydigan bo‘ldik. Ammo kunlar o‘tarkan, ichimizda ulkan bo‘shliq paydo bo‘layotgani, kundan kunga kattarib ketayotganini sezib qoldik. Shundagina juda katta ne’matdan ayrilib qolganimizni, ilmiy suhbatlarsiz hayotimizda mazmun yo‘qolib qolayotganini his qildik.

Shu g‘am tanlovlar o‘tkazishga sababchi bo‘ldi. Chunki tanlov sabab ishtirokchilar bilan birga o‘zimiz ham suhbatlarni diqqat bilan eshitardik. Kunlarimizning ma’lum soatlarini tanlovga ajratadigan bo‘ldik. Xayolimizning bir chetida tanlov uchun savollar tuzish, g‘oliblarni aniqlash, sovg‘alarni taqsimlash, egalariga yuborish kabi o‘ylar band qilib turardi.

Chetdan qaralsa, boshqalar qatori oylikka ishlaydigan oddiy insonlar uchun o‘z ishlaridan ortib, bu kabi tanlovlar o‘tkazish ortiqcha yuklamalarni hosil qiladigandek ko‘rinishi mumkin. Chunki ish doim ham silliq ketmaydi: ba’zida xatoimiz sabab odamlardan e’tirozlar keladi, ba’zida hadyalarni yuborishda chalkashib ketamiz va hokazo.

Ammo jamoamizdagilar mana shu «yuklamalar» hayotlarida o‘chib qolgan nurni qayta yoqishga sabab bo‘layotganini anglagan edi. Har birimiz bu kabi suhbatlardan uzilib qolsak, qanday ko‘yga tushishimizni ko‘rib, his qilgandik.

Shunday ekan, yangi boshlangan bu tanlovimiz davomiy bo‘lishini, O‘zi rozi bo‘ladigan tarzda o‘tishini umid qilib qolamiz. Alloh taolo tanlov bilan o‘tadigan yaqin 1 yil davomidagi hayotimizni eng faxrli, eng javobi oson, hayotimiz va oxiratimiz uchun eng manfaatli soatlarimiz bo‘lishini nasib qilsin! Chunki biz Rasululloh alayhissalotu vasallamning hayotlarini o‘rganish arafasida turibmiz…

@hasanhusayn