O‘zbekiston Respublikasi Prezidentining 2025-yil 8-oktabrdagi "Alohida tuman (shahar) va mahallalarni aholining yashashi hamda tadbirkorlik faoliyati bilan shug‘ullanishi uchun namunali hududga aylantirish chora-tadbirlari to‘g‘risida"gi qarori ijrosi doirasida "Hududiy elektr tarmoqlari" AJ Sirdaryo hududiy filiali tomonidan tumanning Paxtakor, Oqibat, Yoshlik va Shirin mahallalarida elektr ta’minoti infratuzilmasini tubdan yangilash ishlari boshlandi. Loyiha doirasida 560 dona temir-beton tayanch, 21,5 kilometr zamonaviy elektr uzatish tarmog‘i hamda 10 ta yangi transformator punkti barpo etilishi rejalashtirilgan. Ushbu ishlar yakunlangach, elektr ta’minotining ishonchliligi oshib, uzilishlar kamayadi hamda aholi va tadbirkorlik subyektlariga ko‘rsatilayotgan xizmat sifati yanada yaxshilanadi. Qurilish-montaj ishlarini sifatli va qisqa muddatlarda amalga oshirish uchun viloyatdagi barcha tuman va shahar elektr ta’minoti korxonalaridan 200 nafardan ortiq malakali xodimlar hamda 22 ta maxsus texnika va 28 ta avtomashinalar safarbar etilgan.

Davlatimiz rahbari tomonidan belgilangan vazifalar ijrosini ta’minlash maqsadida “Issiqlik elektr stansiyalari” AJ boshqaruvi raisi Bahodir Joʻrayev boshchiligida tashkil etilgan maxsus ishchi guruh Sirdaryo tumanida elektr ta’minoti infratuzilmasini yaxshilash bo‘yicha keng ko‘lamli ishlarni olib bormoqda. Sirdaryo tumanida bugungi kunda 32 mingdan ortiq iste’molchi 405 ta transformator punkti va 1 153,6 kilometr elektr tarmoqlari orqali elektr energiyasi bilan ta’minlanmoqda. O‘rganishlar natijasida 405 ta transformator punktining 239 tasi (59 foizi) hamda 327 kilometr elektr tarmoqlari ta’mirtalab ekani aniqlandi. Hozirga qadar 70 ta transformator punkti va 230 kilometr elektr uzatish tarmoqlari ta’mirlandi. Ushbu ishlarga 185 nafar mutaxassis, 15 ta ta’mirlash brigadasi hamda 20 ta maxsus texnika jalb qilinib, zarur transformatorlar, avtomatik o‘chirgichlar, rubilniklar va boshqa elektr uskunalari bilan ta’minlandi.Shuningdek, raqamlashtirish yo‘nalishida ham ishlar davom etmoqda. Xususan, ASKUE tizimi bo‘yicha so‘nggi uch kun ichida aloqasi uzilgan 68 ta elektr hisoblagichining uzluksiz ishlashi tiklandi.