1️⃣ Davlat xavfsizlik xizmatining Samarqand viloyati bo‘yicha boshqarmasi xodimlari tomonidan viloyat Bojxona va Ichki ishlar boshqarmalari bilan hamkorlikda o‘tkazilgan tezkor tadbirda mamlakatimizga kontrabanda yo‘li bilan olib kelingan katta miqdordagi giyohvandlik vositasi musodara qilindi.
 
Xususan, olingan tezkor ma’lumot asosida Urgut tumanida istiqomat qiluvchi, 1973 y.t. fuqaroning yashash xonadoni xolislar ishtirokida ko‘zdan kechirildi.
 
Natijada, u hovlisiga sof og‘irligi 4 kg 988 gr bo‘lgan “opiy” moddasini ko‘mib qo‘yganligi aniqlanib, ushbu ta’qiqlangan modda ashyoviy dalil sifatida rasmiylashtirib olindi.

2️⃣ Davlat xavfsizlik xizmatining Xorazm viloyati bo‘yicha boshqarmasi hamda viloyat Bojxona va Ichki ishlar boshqarmalari xodimlari hamkorligida o‘tkazilgan tezkor tadbirda qo‘shni davlatdan olib kelingan giyohvandlik vositasi fosh etildi.
 
Jumladan, “Surxondaryo – Xorazm” yo‘nalishida “Kobalt” rusumli avtomashinada harakatlanayotgan, tezkor xodimlar tomonidan oldindan kuzatuvga olingan Termiz shahrida yashovchi, 1989 y.t. 2 nafar fuqaro “Sarimoy” blok-postida to‘xtatildi.
 
Ularga tegishli uyali aloqa vositalari ko‘zdan kechirilganda A-380 xalqaro avtomobil yo‘lining Buxoro viloyati Romitan tumani hududidan o‘tuvchi qismida giyohvandlik vositasi yashirilganligi ma’lum bo‘ldi va ushbu lokatsiyadan 539 gr “opiy” moddasi olindi.
 
Aniqlanishicha, qonunbuzarlar uni Xorazm viloyatida sotishni rejalashtirishgan.

⚡️ Joriy kuz-qish mavsumida mamlakatimizda tabiiy gaz tarmoqlariga ulanmagan hududlar aholisini suyultirilgan gaz bilan uzluksiz ta’minlashga katta e’tibor qaratilmoqda. Xususan, O‘zbekiston Respublikasi Prezidentning joriy yil 12-sentyabrdagi «Aholini suyultirilgan gaz bilan ta’minlash tizimini isloh qilish va bozor mexanizmlarini bosqichma-bosqich joriy etish chora-tadbirlari to‘g‘risida» qarori bilan sohani isloh qilish, gaz resurslaridan samarali foydalanish va aholining ijtimoiy himoyaga muhtoj qatlamini qo‘llab-quvvatlashning aniq mexanizmlari belgilab berilgan.

Lekin, xalq manfaatidan ko‘ra shaxsiy manfaatini ustun qo‘ygan ayrim soha xodimlari ba’zi fuqarolar bilan til biriktirib, davlat tomonidan ajratilgan gaz ballonlarni asossiz ravishda qimmat narxlarda sotib, daromad topishga urinishmoqda.

Ana shunday salbiy holatlarga chek qo‘yish hamda davlat tomonidan ko‘rsatilayotgan ijtimoiy qo‘llab-quvvatlashning manzilliligi va shaffofligini ta’minlash maqsadida Davlat xavfsizlik xizmati, Ichki ishlar vazirligi, Bosh prokuratura, Favqulodda vaziyatlar vazirligi hamda “O‘zenergoinspektsiya” xodimlari tomonidan joylarda reyd tadbirlari o‘tkazilmoqda.

🔹 Xususan, Jizzax viloyatida jami 9 ta holatda 239 ta gaz ballon sotish maqsadida noqonuniy saqlab kelinayotganligi fosh bo‘ldi. Jumladan, muqaddam Zomin tumangaz ta’minot bo‘limida yuqori lavozimlardan birida ishlagan shaxs o‘zining qarindoshiga tegishli xonadonda 152 ta gaz ballonni yashirincha saqlab kelgan. Qo‘shni Sirdaryo viloyatida ham shu kabi holatlar aniqlanib, birgina Xovos tumangaz bo‘limi mansabdorlaridan birining uyidan hech bir hujjatlarsiz saqlanayotgan 30 dona gaz balloni olindi.

Samarqand viloyatida o‘tkazilgan tezkor tadbirda Urgut tumangaz to‘ldirish shoxobchasi qorovuli gaz bilan to‘ldirilgan 3 dona ballonni 2,5 mln so‘mga sotayotgan vaqtida qo‘lga olindi. Viloyatning Pastdarg‘om tumanida yashovchi, 1972 y.t. fuqaroning xonadoni ko‘zdan kechirilganda esa, ushbu manzilda gaz bilan to‘ldirilgan 22 ta ballon borligi ma’lum bo‘ldi. Aniqlanishicha, u gaz ballonlarni tumangaz bo‘limi haydovchisidan 70 ming so‘mdan sotib olib, fuqarolarga 100 ming so‘mdan sotish bilan shug‘ullangan.

Farg‘ona viloyatida ham hamkorlikdagi reyd tadbirlari o‘tkazilib, Qo‘shtepa tumangaz bo‘limi muhandisi hamda chilangari aholi uchun mo‘ljallangan 8 ta gaz ballonlarini o‘z yashash xonadonlarida noqonuniy sotish maqsadida saqlab kelayotganliklari fosh etildi.

Mamlakatimizning janubiy mintaqasi hisoblangan Surxondaryo viloyatida o‘tkazilgan reyd tadbirlarida noqonuniy saqlovda bo‘lgan jami 65 ta gaz ballon tegishli tartibda hujjatlashtirildi. Jumladan, Bandixon tumanida yashovchi 39 yoshli fuqaro tumangaz bo‘limi haydovchisidan 70 ming so‘mdan sotib olgan 32 ta gaz ballonni iste’molchilarga qimmat narxlarda sotib, mo‘may daromad topmoqchi bo‘lgan.

Navoiy viloyatining Xatirchi tumangaz bo‘limi haydovchisining uyidan ham jami 26 ta gaz balloni protsessual tartibda rasmiylashtirib olindi.

Bu kabi noqonuniy holatlar Qoraqalpog‘iston Respublikasi, Xorazm, Namangan va boshqa viloyatlarida ham aniqlandi.

Ta’kidlash lozim, ushbu yo‘nalishdagi reyd tadbirlari Davlat xavfsizlik xizmati va boshqa mutassaddi idoralar hamkorligida muntazam ravishda o‘tkazib boriladi hamda qonunbuzarlarga nisbatan tegishli choralar ko‘riladi.

Hurmatli fuqarolar, aholi uchun mo‘ljallangan suyultirilgan gaz bilan bog‘liq noqonuniy holatlarga duch kelsangiz Davlat xavfsizlik xizmati Call-markazining 1520 qisqa raqamiga qo‘ng‘iroq qilib, xabar bering. Shaxsingizning sir saqlanishi kafolatlanadi.

❗️ Tabiiy gaz tarmoqlariga ulanmagan aholi uchun ajratilgan suyultirilgan gazni talon-toroj qilinishiga yo‘l qo‘ymaslik maqsadida DXX, IIV, BP, FVV, “O‘zenergoinspeksiya” va “Hududgazta’minot” AJ hamkorligida respublika bo‘ylab reyd tadbirlari o‘tkazilmoqda.
 
Jumladan, Samarqand viloyatining Pastdarg‘om tumanida bir guruh shaxslar gaz tarqatish shoxobchasi mansabdorlari bilan til biriktirgan holda, o‘zlariga tegishli noturar binoda 6 tonna hajmli sisterna o‘rnatib, aholiga tarqatish uchun mo‘ljallangan suyultirilgan gaz to‘ldirilgan ballonlarni kompressor orqali ushbu sisternaga bo‘shatib, so‘ngra uni o‘zlariga qarashli avtomobillarga gaz to‘ldirish shoxobchasida noqonuniy sotish bilan shug‘ullanishgan.
Tekshiruv davomida ushbu manzilda qiymati 32,2 mln so‘mlik 3,1 tonna suyultirilgan gaz aniqlanib, ashyoviy dalil sifatida hujjatlashtirildi. Ta’kidlash lozim, 3,1 tonna suyultirilgan gaz o‘rtacha 150 ta xonadonning 45 kunlik ehtiyojini qoplaydi.
Bundan tashqari, mazkur shaxslar tomonidan elektr energiyasiga noqonuniy ulanish orqali davlat manfaatlariga 1 mlrd so‘mlik zarar yetkazilganligi fosh bo‘ldi.
Hozirda aniqlangan holat yuzasidan jinoyat ishi qo‘zg‘atilib, tergov harakatlari olib borilmoqda.
 
Boshqa holatda esa Qo‘shrabot tumanida yashovchi, 1993 y.t. fuqaroning uyida 130 kg suyultirilgan gaz bilan to‘ldirilgan 35 ta gaz balloni noqonuniy saqlanayotgani ma’lum bo‘ldi.
 
Reyd tadbirlari Qoraqalpog‘iston Respublikasida ham faol tarzda amalga oshirilayotgan bo‘lib, birgina Amudaryo tumangaz bo‘limi ishchisi va 1969 y.t. fuqaroning yashash xonadonlarida jami 23 ta gaz balloni borligi aniqlandi.
 
Xorazm viloyati Bog‘ot tumangaz bo‘limining 3 nafar chilangari esa o‘z tanishlarining yashash xonadonlarida jami 300 kg suyultirilgan gaz bilan to‘ldirilgan 25 ta gaz ballonni qimmat narxlarda sotish uchun saqlab kelishgan.
 
Andijon viloyatida o‘tkazilgan tadbirlar davomida 980 kg suyultirilgan gaz to‘ldirilgan 243 ta gaz balloni qimmat narxda sotish maqsadida noqonuniy saqlanayotgani ma’lum bo‘ldi.
Jumladan, Ulug‘nor tumangaz bo‘limi chilangarining uyidan aholi uchun mo‘ljallangan 17 ta gaz balloni, Shahrixon tumangaz bo‘limi chilangarining xonadonidan esa 13 ta gaz balloni olindi.
 
Jizzax viloyatida kuzatilgan holatda Yangiobod tumangaz ta’minoti bo‘limi haydovchisi o‘ziga tanish bo‘lgan 2 nafar fuqaroning yashash xonadonlarida jami 720 kg suyultirilgan gaz to‘ldirilgan 57 ta gaz ballonni noqonuniy saqlayotganligi hujjatlashtirildi.
 
Navoiy viloyati Nurota tumangaz chilangari va haydovchisi esa o‘zaro til biriktirib, “Hududgaz Navoiy” GTF balansida bo‘lgan va suyultirilgan gaz bilan to‘ldirilgan 2 dona gaz ballonni xaridorga 280 ming so‘mga sotayotgan vaqtlarida ushlandi.
 
Ta’kidlash lozim, ushbu yo‘nalishdagi nazorat tadbirlari mutasaddi idoralar hamkorligida muntazam ravishda o‘tkazib boriladi.
 
Hurmatli fuqarolar, aholi uchun mo‘ljallangan suyultirilgan gaz bilan bog‘liq noqonuniy holatlarga duch kelsangiz DXX Call-markazining 1520 qisqa raqamiga qo‘ng‘iroq qilib, xabar bering. Shaxsingizning sir saqlanishi kafolatlanadi.