Bugun yuqoridagi videoni instagram “Story”sida ulashib, Behruz akani belgilasam, shartta o‘ziga olibdi...

Kutmagandim, xursand bo‘ldim-da, rahmat aytdim. “Aslida sizga rahmat, men gapirib ketaveradigan odamman, ijodimni kuzatib, o‘z auditoriyangizda baham ko‘rishga loyiq topganingiz uchun tashakkur!” desa bo‘ladimi...

Boshqacha ta’sir qildi, haqiqatan ham, aslida biz sizlarga rahmat aytishimiz kerak. Men ham yozib ketaveradigan odamman, Sizdek o‘qiydigan, munosabat bildiradigan, fikr bildirib, yaqinlariga tavsiya qiladigan qadrdonlar bo‘lmasa, bu blog yopiq kundalikligicha qolaverardi.

Boringizga shukr, yaxshilar, sizlarni yaxshi ko‘ramiz!❤️‍🔥

@Ijoddardi

Migratsiya - investitsiya!

Ayniqsa, rivojlangan davlatlarning katta shaharlarida oilaviy yashasangiz, farzandlaringiz o‘sha yerda ta’lim olsa, imkoniyatlardan foydalansa bormi, sizdan qanday minnatdor boʻlishadi?!

Oddiy Toshkentning chekkasidan bir xonali uy ijaraga olib, har tomonlama qisilishib, zoʻrgʻa kun koʻrayotgan oilani tasavvur qiling, qishlogʻida obroʻsi qanday baland boʻladi, chunki u eplayapti, bir-ikki soʻm qarzi bordir boʻynida, ammo uddalayapti: farzandlari poytaxtda ta’lim olyapti, ulg‘ayishyapti!

Endi chet elni, boʻlganda ham katta shaharlarni, u yerdagi imkoniyatlarni oʻylang, oilangiz bilan yashay olyapsizmi, hech qanday ish qilishingiz shart emas hatto, aksar hollarda shu holingizcha Oʻzbekistonda yurgan tengdoshingizdan ancha-muncha koʻp narsani koʻrib qoʻygan boʻlasiz!

Bu gaplar, ayniqsa, biz kabi o‘zi uchun yashashni allaqachon unutib, farzandlarining ertasi, porloq kelajagi, sifatli ta’limi xususida bosh qotirayotganlar uchun muhim. Zero, boshqalar tushunmaydi ham!

Lekin diqqat etiladigan joyi, imkon qadar farzandli bo‘lmasdan ketib, joylashib, barcha qiyinchiliklarni yashab olish kerak. Misol, Sitora ikkimiz bemalol Turkiyaga kelgandik, hozir ikki nafar farzandimiz bilan davlat yo shaharni qo‘ya turing, boshqa ijara uyga ham ko‘cha olmay yuribmiz :)

Har kayfiyatim bo‘lmaganida odamlar yillab orzu qiladigan, pul yig‘ib, falon dollarlar sarflab sayohatga keladigan davlatda yashayotganim, oilam shu muhitdan nafas olayotganini o‘ylab shukr qilaman. Bu his - boshqa daraja!

@Ijoddardi

Otning kallasidek yuragi bor ayol erkakni boy qiladi!

Uylangach, juda ko‘p tavakkal qarorlarimni ayolim sabab qabul qilganman. O‘zimga qolsa...

Turkiyaga grand yutdi. Ketsak, yashab keta olishimizga ishontirdi. “Agar hech ish topa olmasangiz, uyda ovqat pishirib sotib bo‘lsa ham kun ko‘ramiz, sabr qilaman” degani hech qachon esimdan chiqmaydi.

Turkcha kitob sotmoqchi bo‘ldik. Onlayn do‘konni ochib, ancha payt yuritmadim. Chunki nashriyot sohasida ishlagan odam sifatida o‘zbekcha kitoblar savdosi qay holdaligini yaxshi bilardim. Turk tilidagi kitobni kim ham o‘qirdi, deb ikkilandim.

Vaqt o‘tdi, yetti uxlab tushimgayam kirmagan baliqchilikda ishlay boshladim, o‘rgandim, oshpaz yordamchisi bo‘ldim.

Orada Mahdi tug‘ilib, 6-7 oy ishga chiqmadim. Uyda milliy ovqat pishirib sotdik er-xotin, kitob ishimiz ham ancha rivojlandi, epladik xullas.

Uyda qolganimda yashash qiyinlashdi. “Stabilniy” pul kelmaydi hech qayerdan, daromad faqat ovqat va kitob savdosidan. Bir kun ish bo‘lsa, 4-5 kun buyurtma tushmaydi, xarajatlar esa oshib borardi...

Charchoq kuchaydi, stress, bir tomondan darslar, hujjat masalalari, buyurtmalar...

To‘satdan Sitoraning mazasi qochdi. Shifoxonaga borsak, homilador ekan, ikkalamiz ham shokda!

Qarabsizki, “Qanday qilamiz, darslar bor, kamiga Mahdi kichkina, eplay olamizmi, ikkinchi farzandimizni dunyoga keltiramizmi yo‘qmi?” degan mavhum savollar qarshisida qolgandik.

Uyga qaytdik, men ish qidirishni boshladim, chunki endi ham darslari, ovqat pishirish, Mahdi va homiladorlik bosqichi qo‘shimcha yuk edi unga.

Bu xabarni bilganimizda, bolaning yuragi urib boshlagan ekan, “Men farzandimizning yurak tovushini eshitdim, qanday bo‘lmasin dunyoga keltiraman, har qanday sharoitda eplay olamiz, menga ishoning”, dedi.

Shartta eski ishxonam bilan gaplashib, baliqxonaga qaytdim. Oradan vaqt o‘tdi, 3-4 marta tekshirtirishga borganimizda, chaqaloq jinsini ko‘rsatmadi.

Tug‘ilishiga 2 oy qolgandagina qiz ekanini bilganmiz. Quvonchimiz cheksiz, orzu qilganimizdek bir o‘g‘il bir qizimiz bo‘ladi endi deb osmonlarda uchib yurardik...

Mahdi 38 haftada tug‘ilgandi, qizimiz tug‘ilganida Mahdi ikkimizni palataga qo‘ymasliklarini bilib, yordam so‘rab Karabukka, qadrdonimiz Numon akalarning yoniga ketdik. Qizimiz ham 38 haftalik edi o‘shanda.

Bir hafta kutdik, qizimizdan darak yo‘q. Meni ishga chaqirishdi, Anqaraga qaytdim. Sitora Mahdi bilan Karabukda qoldi.

1-noyabrda mehmonga borgan bo‘lsak, 15 kunda Sitora zerikib boshladi. Ko‘p qolib ketdik, Mahdini eplolmayapman, Anqaraga ketgim kelyapti, bizni olib keting deb aytardi har kuni.

Qadrdonlarimiz esa yana ozgina sabr qilishimizni, Anqarada yolg‘iz qiynalishimizni bot-bot takrorlashardi.

19-noyabr kuni ayolimga yozsam, javob yo‘q. Telegramga kirmagan. Xavotirlanib, “boshlandimikan?” deb Numon akaga telefon qildim.

Aka darsdaligi, uyga borib, vaziyatni o‘rganishini aytdi. Men ishda edim, to‘satdan aka qo‘ng‘iroq qilib, “Sitora uyda yo‘q, ko‘ch-ko‘ronini yig‘ib, taksi ushlab kelibdida, hech kimga aytmang deb avtobus saroyiga ketibdi, Anqaraga qaytgan bo‘lsa kerak”, xabar kelsa, bizga ham ayting, dedi...

Davomi keyingi postda...

@Ijoddardi

#davomi

Sim kartasi yo‘qligi uchun telefon qilolmadim, xavotir boshlandi...

40 haftalik homilador ayolning bir chemodan yuk, kolyaska va Mahdi bilan yolg‘iz Anqaraga qanday qaytishini aqlimga sig‘dirolmasdim.

Ishdan javob olib, uyga yugurdim. Kechki soat 8 larda yetib borsam, uyda o‘tiribdi ona-bola. Ruxsat bermaysiz deb so‘ramadim sizdan, ham bezovta qilmay, xavotirga qo‘ymay dedim, Numon akaga ham indamadim, desa bo‘ladimi...

Ovqat buyurtma berdim, choy ichdik. Uyda hech narsa yo‘q edi yolg‘iz yashayotganim uchun. Keyin ayolim huzursizlanib boshladi. Og‘ir ko‘targaningdan, shu holingda uzoq yo‘lda yurib kelganingdan bu, sabr qil, ertalab doktorga boramiz, dedim.

Tong otdi. Tunni qanday o‘tkazgani o‘ziga ayon. Ko‘rikka borsak, doktorlar yugurib, Sitorani tug‘ruq bo‘limiga chiqarib ketishdi. Men qo‘limda Mahdi bilan uyga chopdim, chaqaloq va onaga kerakli narsalarni olib bordim. Allaqachon boshlangan edi...

Oradan bir soat ham o‘tmadiki qizimiz tug‘ildi. Kechqurungi og‘riqlar dard tufayli ekan, muhimi, hammasi yaxshi, ona ham, bola ham sog‘lom, vaqtida keldinglar, dedi shifokor.

Safina mana shunday otning kallasiday yuragi bor qizning farzandi bo‘lib tug‘ildi. Bizni yoniga kirgizishmadi, o‘zi epladi yana hammasini.

Chetda yashaydiganlarning chiroyli rasm/videolari, ko‘zni quvnatadigan go‘zal hayoti ortida mana shunday yurakni larzaga keltiradigan muhim qarorlar, og‘ir kunlar turadi. Hammayam bu haqda gapiravermaydi.

Oilam bilan Turkiyaga bormoqchiman, deb ko‘pchilik maslahat so‘rab yozishadi. Mana shunday hayotning “syurpriz”lariga tayyor bo‘lsangizgina, tavsiya qilaman, yo‘qsa musofirdagi hayot sizga qo‘shib oilangizni ham ezib, yanchib tashlashi shubhasiz!

@Ijoddardi

Kecha stipendiya tushadi deb pulimizni ishlatib bo‘lgandik, tushmadi, oqshom oxirgi pulimga bitta non olib ishdan qaytdim...

Ertalab 600 lira qarz oldim-da, uy tagida yangi ochilgan “Halk ekmek”dan 5 ta non oldim. Do‘konda donasi 15 lira, hokimiyatning bu bufetchalarida 10 liradan olasiz.

550 lira qoldi. Sitora bergan ro‘yxat bilan Mahdini ko‘tarib marketga o‘tdim. Qarasam, “Kooperativ” marketda apelsin chegirmada, 60 liradan 40 qa tushibdi. Shartta 4 kilo ovoldim, uni oilaviy yaxshi ko‘ramiz...

Keyin “A101”ga o‘tdim. Nonushta uchun yeyishga tayyor avokado olaman desam, ikki donalik o‘ram 130 lira ekan. Donasi 65 liradan, vitamin deb savatga soldim.

Sut, yulaf, 2-3 xil shirinliklar, banan, olma va hokazo... ko‘p narsa olib yubordim, xayolimda 550 lira pulim bor deb yuribman, oradagi 4 kilo apelsin esimda yo‘q.

Kassaga kelgach, umumiy 540 lira bo‘ldi, puling yetmayapti deydi. Shirinliklarni chiqardim, hisob 490 liraga tushdi, haliyam pulim yetmayapti deng, avokadoni ham qoldirgandim, to‘landi.

Ishga keldim. Stipendiya ham tushdi. Qarzlarni to‘lab, ishxona yonidagi “Çağdaş” marketga bozorlik qilish uchun javob olib chiqdim.

Yeyishga tayyor avokado chegirmada, donasi 20 liradan ekan bu yerda. 4 ta oldim, 80 lira bo‘ldi. Ertalabkini ololmaganimga shukr qildim :)

Meva-cheva, qovoq, ismaloq, zaytun yog‘i olgach, Mahdiga doim “Migros” marketdan oladigan “Hipp” kashamizga ko‘zim tushdi. Uyda tugagandi, narxi bir xil, 180 liradan ekan. Shartta ikkita oldim.

Kassaga o‘tsam, telefoningda “Çağdaş” ilovasi bo‘lsa, “Hipp” kasha chegirmaga tushadi dedi. Menda u yo‘q edi. Orqamdagi xaridor esa men o‘qitaman deb telefonidagi ilovani berib turdi, 100 lira chegirma berildi yana. Kasha ikkisi 260 liraga tushdi, donasi 130 dan...

Sotuvchiga “respect”, chegirmani aytmasa, bilmasdim, orqamdagi yaxshi insondan esa Alloh rozi bo‘lsin!

Demoqchimanki, Turkiyada marketlar ko‘p, ko‘pincha hammasi bir manzilda joylashadi, bir-biriga o‘ta yaqin. Narxlar ham hammasida har xil, chegirmalar esa navbat bilan barcha mahsulotlarda, rostakamiga bo‘ladi. Shoshilmay o‘rgansangiz, zarar qilmaydi.

Xaridorlarni aldab yoki o‘tmay qolgan “tovar”larni sotish uchun yolg‘ondan chegirma qilishmaydi bu yerda. Maza!

Kiyim-kechak, kitob, pamperslarni esa internetdan buyurtma beramiz. O‘tgan safar 2 raqamli 40 ta pampersni 300 liraga olgandim “Migros”dan, internetdan esa 100 tasini 225 liraga oldik, yetkazib berish bepul :)

Yashayversangiz, shunday yo‘l-yo‘riqlarni o‘rganib olaverarkansiz. Endi go‘shtni qayerdan arzon olishni tekshirib yuribman, uniyam arzon va sifatli joyini topsam, marra meniki!

@Ijoddardi

Bugun farzandlarimiz ismi haqida aytib beray :)

Ko‘pchilik bolalaringga nega turkcha ism qo‘yding, deb so‘rashadi. Har bir kishiga tushuntirmay, post qilib qo‘yay dedim, so‘raganlarga tashlab beraveramiz...

• Mahdi - o‘g‘limning ismi. Arab tilidan olingan, “To‘g‘ri yo‘lni ko‘rsatuvchi", “Alloh yo‘liga yetaklovchi”, “Qutqaruvchi” va “Hidoyat etilgan” ma’nolarini anglatadi. Ijobiy va ruhiy quvvatni ifodalaydigan ism sifatida ham tanilgan.

Islomda “Imom Mahdi” — oxir zamonda kelishi bildirilgan, adolat o‘rnatadigan, Dajjol bilan kurashadigan shaxs sifatida zikr qilinadi. Lekin biz bu ismni farzandimizni unchalik ulug‘lashtirish uchun tanlamaganmiz :)

Rasululloh ﷺ:
“Mahdi mening ahlimdan bo‘ladi. U zulmga to‘lib qolgan dunyoni adolat bilan to‘ldiradi”, deydi (Abu Dovud, Termiziy (Hasan-sahih).

• Safina - qizimizning ismi. Arabchada “Kema” degani. “Qutqaruvchi”, “Olib o‘tuvchi”, “Najotga yetkazuvchi” ma’nolarida keladi.

Qur’onda “السفينة — as-safina” shaklida bir necha oyatda uchraydi, masalan, Nuh alayhissalomning kemasi haqida.

Islom tarixida Safina (r.a.) deb tanilgan mashhur sahoba bor. U haqida sahih rivoyatlar:

Rasululloh ﷺning xizmatchilaridan bo‘lgan. Asl ismi boshqa edi, lekin Rasululloh ﷺ unga: “Sen menga safinaday (kema kabi) yordam beruvchi odamsan” deganlari uchun Safina laqabini qo‘yganlar. Safina ayol bo‘lishiga qaramasdan juda og‘ir yuklarni ko‘tarar, o‘ta mehnatkash va sabrli kishi edi.

Bu ismlarni juda chuqur o‘ylab, izlanib, har tomonlama tahlil qilib qo‘yganmiz. Hatto qizimizga ko‘p muddat Marvarid ismini qo‘ymoqchi bo‘lib yurdik, lekin bu qimmatbaho tosh dengizning eng chuqur yerida bo‘lishi, yorug‘likka chiqishi uchun hayotda ko‘p qiyinchiliklar ko‘rishi kerakligini bilib, Safinada to‘xtaldik. Chunki kema suv yuzasida suzadi, insonlarni qutqaradi, ma‘nosi ham Mahdi bilan bir xil - “Qutqaruvchi” :)

Ma’nolaridan kelib chiqib, ko‘p yaxshi niyatlar bilan tanlaganmiz bu ismlarni. Ilohim, o‘ylaganimizdan ham ortiq natijalar bilan quvontiradigan solih va soliha insonlar bo‘lib ulg‘ayishsin, omiyn!

@Ijoddardi

Ikki yil oldin Turkmanistonlik yosh kelin-kuyov kelgandi ishga, ikkisi ham tengdoshim, turkchasi haminqadar...

Ayoli 4-5 oy ishlab, polisga tushib qoldi va mamlakatiga deport bo‘lib ketdi. Orada men ham ishdan bo‘shadim, u bilan xabarlashmadim umuman.

Yaqinda ishga qaytsam, yigit haliyam shu yerda ekan, hatto turkchasi ancha yaxshilanib, “komi”likdan chiqib, ofitsiantlikka o‘tibdi.

Onlayn qimor o‘yinlar boshlaganini sezib qoldim keyin. Bir qarasang, ertalabgacha uxlamasdan onlayn “kozino”da o‘tirib, totalizatordan bir oylik maoshimizni to‘plab ishga kelardi, bir qarasang, asab, bor-budini yutkazgan...

Kunlar o‘tdi, yigit o‘yinlarni puxta o‘rganib, qimorning piriga aylandi. Ishxonada ham kun bo‘yi o‘ynardi, ijara uyida ham. Yutkazganidan qozongani ko‘p bo‘la boshladi...

Ikki oycha oldin mashina olgandi, markasi esimdan chiqdi. Yaqinda esa “Toyota Camry” oldi, lekin jiddiy qaramagandim, uyidagilar sharoiti yaxshi bo‘lsa olishgandir-da, debman.

Bugun ishdan bo‘shayman, deb qoldi. Oyning 15-siga bilet olibdi. Kattaroq biznes-piznes boshlamoqchiman, Xudo xohlasa, zerikdim bu ishlardan, uyga qaytaman, dedi.

Qanaqasiga, mendan keyin kelganding, qancha pul topa oldingki bu ishlardan, kattaroq biznesni qanday boshlamoqchisan, deb qiziqdim. Javobi esa...

Kuniga 30 ming liradan oz topmadim so‘nggi paytlarda(Salkam oylik maoshi bu). Kamiga ermak uchun(!) ishim, oyligim bor edi. O‘yin qoidalarini, sir-asrorlarini o‘rgandim, yaxshi pul topdim.

Uyda avvaldan mashina bor edi. Men ikkita oldim. Jami uchta bo‘ldi. 10 ming $ dan ziyod to‘plaganim bor yana. Bir mashinani sotib, yig‘gan pulimni qo‘shib, biror sohaga yo‘naltiraman, farzand ko‘raman, ortiq hayotimni yashayman, yo‘qsa vaqtida o‘yindan chiqmasam, boriyam qo‘ldan ketadi, deydi.

Suhbat tugadi. Ming xil xayol bilan ishlashda davom etdim. Endi ichimdagi maraz odamchaning halol-xarom haqidagi ma’ruzasini eshitib, uyga qaytyapman. Qannnnaqasiga?! :)

Umrimda birinchi marta chetga bir ahvolda kelib, turklar ta’biri bilan aytganda, “köşeye dönen adam”ni o‘z ko‘zim bilan ko‘rdim. Havas qilishni ham bilmaysan, hasad qilishni ham...

Aytgancha, bu noqonuniyku, qo‘lga tushib qolmaysanmi desam, email, telefon raqam, plastik karta... birortasi mening nomimda emas, dedi. Bu pulning dinda hukmi qanday desam, yutsang - halol, yutkazsang - xarom, deb hazil qildi...

Erkak kishining omadi bilan o‘ynashib bo‘lmaydi derdimu, lekin bu omadmi yo boshqa narsaligini tushunolmayman 😂

@Ijoddardi

Aeroportga ketadigan avtobus bekatida yo‘lovchimizni kutib o‘tirsam, to‘rt nafar o‘zbek akalar yonimga kelib:

- Здес аэропорт Эсенбоға автобус едить да?! - deb so‘rashdi.

- Да, да! - dedim.

Savol bergani orada “geroy” bo‘lib, sheriklariga “Ana, turklaram o‘rischani biladi” demaganmidim, deb ketdi...

Kulib qo‘ydim :)

@Ijoddardi

So‘nggi kunlarda hamma ish bir oraga tiqilib qolgandi...

Safinaning to‘pig‘idan qon olish, Mahdini emlatish, O‘zbekistonga kitob jo‘natish... deyarli yaxshi uxlamadim.

Hozir esa yelkamdan tog‘ ag‘darilib ishga ketyapman, hammasi bitdi, hamd!

Kitoblar O‘zbekistonga jo‘natildi, bolalarning ham shifoxonadagi ishlari bitdi, ertaga ayasini bir ko‘rikka eltib kelsam bo‘ldi, marra meniki!

Orada oxirgi kitobli o‘yinimiz sovg‘alari pochtada yo‘qolib ketgani, hech biri g‘oliblarga yetib bormagani xabarini oldim, u kitoblarni ham qaytadan jo‘natdik, tez orada yetkazib beramiz!

Farzandlar sog‘lom, Sitora xotirjam, muzlatkich to‘la, ertaga maosh kuni, kitoblar ham kechgacha Toshkentda bo‘ladi, maza, kayfiyatim “akunamatata!” bugun :)

Bundan 2 yil oldin seni Turkiyada shunday hayot kutyapti deyishsa, hech ikkilanmay ko‘chib kelib, bundan-da yaxshi hayot uchun borimni bergan bo‘lardim. Shunisiga ham shukr, Alhamdulillah!

@Ijoddardi

Hozirgi ish joyimga ilk kelganimda, baliq kesishni, tozalashni umuman bilmasdim...

Faqat kichik baliqlarni tushunardim, uni bir ko‘rgan istalgan kishi eplay olardi. Shunga yarasha yaxshi haq ham to‘lashmaydi tajribasizlarga...

Mahdi tug‘ilishiga juda oz qolgandi, hujjatimda muammo bo‘lib, O‘zbekistonga borib keldim. Ham do‘xtirga deb ko‘p javob olganim uchun eski yerim o‘rnimga boshqa odam topdi, kamina esa ishsiz qoldi...

Pul zarur edi. Ish qidirdik er-xotin. Sitorani homilador holida yonimga olib, markazdagi barcha oshxonalarga kirib chiqqanmiz, chunki turkcham yo‘q edi, gaplasholmasdim...

Oylikni o‘ta past aytishdi, aksariyati turk tilini bilmasligim va tajribasizligim uchun ishga olmadi. So‘ng internetdan Anqaradagi  “alkolsuz balık restoranları”ni qidirdim, “Doğan”, ya’ni hozirgi ishxonam zudlik bilan baliq ustasi qidiryapmiz, baliq ishini tushunsang kel, deb chaqirishdi.

Bu yerga ustaman, eski joyimda 25 ming lira oylik olardim deb kelganman, aslida 17 ming edi maoshim. Kamiga, 25 mingdan kam bersang ishlamayman, deganman o‘zimcha. Shunday qilmasam ishga olishmasdi, olsa ham yaxshi haq to‘lashmasdi-da...

Qolganini kanalda yangi format o‘laroq video shaklida ulashyapman, ham ish jarayonimdan lavha, ham uzuuun post o‘qigandan ko‘ra, aytib berganim yaxshi... :)

Ko‘ring, agar yaxshi qabul qilsangiz, videolarni ham ko‘paytiramiz, Xudo xohlasa!

@Ijoddardi