Ikki yil oldin Turkmanistonlik yosh kelin-kuyov kelgandi ishga, ikkisi ham tengdoshim, turkchasi haminqadar...

Ayoli 4-5 oy ishlab, polisga tushib qoldi va mamlakatiga deport bo‘lib ketdi. Orada men ham ishdan bo‘shadim, u bilan xabarlashmadim umuman.

Yaqinda ishga qaytsam, yigit haliyam shu yerda ekan, hatto turkchasi ancha yaxshilanib, “komi”likdan chiqib, ofitsiantlikka o‘tibdi.

Onlayn qimor o‘yinlar boshlaganini sezib qoldim keyin. Bir qarasang, ertalabgacha uxlamasdan onlayn “kozino”da o‘tirib, totalizatordan bir oylik maoshimizni to‘plab ishga kelardi, bir qarasang, asab, bor-budini yutkazgan...

Kunlar o‘tdi, yigit o‘yinlarni puxta o‘rganib, qimorning piriga aylandi. Ishxonada ham kun bo‘yi o‘ynardi, ijara uyida ham. Yutkazganidan qozongani ko‘p bo‘la boshladi...

Ikki oycha oldin mashina olgandi, markasi esimdan chiqdi. Yaqinda esa “Toyota Camry” oldi, lekin jiddiy qaramagandim, uyidagilar sharoiti yaxshi bo‘lsa olishgandir-da, debman.

Bugun ishdan bo‘shayman, deb qoldi. Oyning 15-siga bilet olibdi. Kattaroq biznes-piznes boshlamoqchiman, Xudo xohlasa, zerikdim bu ishlardan, uyga qaytaman, dedi.

Qanaqasiga, mendan keyin kelganding, qancha pul topa oldingki bu ishlardan, kattaroq biznesni qanday boshlamoqchisan, deb qiziqdim. Javobi esa...

Kuniga 30 ming liradan oz topmadim so‘nggi paytlarda(Salkam oylik maoshi bu). Kamiga ermak uchun(!) ishim, oyligim bor edi. O‘yin qoidalarini, sir-asrorlarini o‘rgandim, yaxshi pul topdim.

Uyda avvaldan mashina bor edi. Men ikkita oldim. Jami uchta bo‘ldi. 10 ming $ dan ziyod to‘plaganim bor yana. Bir mashinani sotib, yig‘gan pulimni qo‘shib, biror sohaga yo‘naltiraman, farzand ko‘raman, ortiq hayotimni yashayman, yo‘qsa vaqtida o‘yindan chiqmasam, boriyam qo‘ldan ketadi, deydi.

Suhbat tugadi. Ming xil xayol bilan ishlashda davom etdim. Endi ichimdagi maraz odamchaning halol-xarom haqidagi ma’ruzasini eshitib, uyga qaytyapman. Qannnnaqasiga?! :)

Umrimda birinchi marta chetga bir ahvolda kelib, turklar ta’biri bilan aytganda, “köşeye dönen adam”ni o‘z ko‘zim bilan ko‘rdim. Havas qilishni ham bilmaysan, hasad qilishni ham...

Aytgancha, bu noqonuniyku, qo‘lga tushib qolmaysanmi desam, email, telefon raqam, plastik karta... birortasi mening nomimda emas, dedi. Bu pulning dinda hukmi qanday desam, yutsang - halol, yutkazsang - xarom, deb hazil qildi...

Erkak kishining omadi bilan o‘ynashib bo‘lmaydi derdimu, lekin bu omadmi yo boshqa narsaligini tushunolmayman 😂

@Ijoddardi

Aeroportga ketadigan avtobus bekatida yo‘lovchimizni kutib o‘tirsam, to‘rt nafar o‘zbek akalar yonimga kelib:

- Здес аэропорт Эсенбоға автобус едить да?! - deb so‘rashdi.

- Да, да! - dedim.

Savol bergani orada “geroy” bo‘lib, sheriklariga “Ana, turklaram o‘rischani biladi” demaganmidim, deb ketdi...

Kulib qo‘ydim :)

@Ijoddardi

So‘nggi kunlarda hamma ish bir oraga tiqilib qolgandi...

Safinaning to‘pig‘idan qon olish, Mahdini emlatish, O‘zbekistonga kitob jo‘natish... deyarli yaxshi uxlamadim.

Hozir esa yelkamdan tog‘ ag‘darilib ishga ketyapman, hammasi bitdi, hamd!

Kitoblar O‘zbekistonga jo‘natildi, bolalarning ham shifoxonadagi ishlari bitdi, ertaga ayasini bir ko‘rikka eltib kelsam bo‘ldi, marra meniki!

Orada oxirgi kitobli o‘yinimiz sovg‘alari pochtada yo‘qolib ketgani, hech biri g‘oliblarga yetib bormagani xabarini oldim, u kitoblarni ham qaytadan jo‘natdik, tez orada yetkazib beramiz!

Farzandlar sog‘lom, Sitora xotirjam, muzlatkich to‘la, ertaga maosh kuni, kitoblar ham kechgacha Toshkentda bo‘ladi, maza, kayfiyatim “akunamatata!” bugun :)

Bundan 2 yil oldin seni Turkiyada shunday hayot kutyapti deyishsa, hech ikkilanmay ko‘chib kelib, bundan-da yaxshi hayot uchun borimni bergan bo‘lardim. Shunisiga ham shukr, Alhamdulillah!

@Ijoddardi

Hozirgi ish joyimga ilk kelganimda, baliq kesishni, tozalashni umuman bilmasdim...

Faqat kichik baliqlarni tushunardim, uni bir ko‘rgan istalgan kishi eplay olardi. Shunga yarasha yaxshi haq ham to‘lashmaydi tajribasizlarga...

Mahdi tug‘ilishiga juda oz qolgandi, hujjatimda muammo bo‘lib, O‘zbekistonga borib keldim. Ham do‘xtirga deb ko‘p javob olganim uchun eski yerim o‘rnimga boshqa odam topdi, kamina esa ishsiz qoldi...

Pul zarur edi. Ish qidirdik er-xotin. Sitorani homilador holida yonimga olib, markazdagi barcha oshxonalarga kirib chiqqanmiz, chunki turkcham yo‘q edi, gaplasholmasdim...

Oylikni o‘ta past aytishdi, aksariyati turk tilini bilmasligim va tajribasizligim uchun ishga olmadi. So‘ng internetdan Anqaradagi  “alkolsuz balık restoranları”ni qidirdim, “Doğan”, ya’ni hozirgi ishxonam zudlik bilan baliq ustasi qidiryapmiz, baliq ishini tushunsang kel, deb chaqirishdi.

Bu yerga ustaman, eski joyimda 25 ming lira oylik olardim deb kelganman, aslida 17 ming edi maoshim. Kamiga, 25 mingdan kam bersang ishlamayman, deganman o‘zimcha. Shunday qilmasam ishga olishmasdi, olsa ham yaxshi haq to‘lashmasdi-da...

Qolganini kanalda yangi format o‘laroq video shaklida ulashyapman, ham ish jarayonimdan lavha, ham uzuuun post o‘qigandan ko‘ra, aytib berganim yaxshi... :)

Ko‘ring, agar yaxshi qabul qilsangiz, videolarni ham ko‘paytiramiz, Xudo xohlasa!

@Ijoddardi

Vaqt qanchalar tez o‘tayotganini bo‘ying o‘sishi, maktabni bitirganing, diplom olganing... bilan emas, ijara uyingning oylik to‘lovi chopqillab kelayotganidan his qilyapsanmi, ulg‘ayibsan!

Sherali Jo‘rayev ashulalarining ma’nosini chuqur anglab boshlaganing ham ortiq yosh bola emasligingdandir masalan.

Eng qimmat bijildoq suvlardanam bezib, oddiy suv va choyga “o‘tirib” qolganing ham endi katta bo‘lganingni anglatadi.

Orzular, olam-olam rejalaring o‘rnini mas’uliyat egallaydi: oilang, ota-onang, boshlig‘ing, jamiyat va kelajaging oldidagi mas‘uliyat!

Dangasalik, so‘kinish, jahldorlik va negativ kayfiyat, ko‘p uxlash, chekish kabi yomon odatlaringdan sog‘liging tufayli emas kelajakda farzandlaring buni normal qabul qilmasligi uchun voz kechdingmi, demak ulg‘ayibsan!

Endi kim kuchli ekanligi tengdoshlaring orasida “birinchi zo‘ri”liging, “sinfkom”liging yo bilagingdagi “vaqvaqa” bilan o‘lchanmaydi. Oilang tinchligi, farzandlaring birovdan kam emasligi, baxtli hayotda yashayotganing seni kuchli inson qilib ko‘rsatadi ulg‘ayganingda...

Dadang bergan ming so‘mga xo‘rozqand olib, ertangi kungayam 200-300 so‘m ortdi deb quvonmaysan endi. Million-million pul topsang ham, kommunal to‘lovlar va boshqa xarajatlaringga yetib, kelasi oyga qarzsiz o‘tganingning o‘zi bayram bo‘ladi...

Charchagan paytingda uxlab emas, yarim kechasi ishdan qaytib, issiqqina uyingda bola-chaqang xotirjam o‘tirganini ko‘rib dam olasan, boshqacha “kayf” beradi bu erkak kishiga...

@Ijoddardi

“A101”, “Şok”, “Koop”, “Bim”, sal narida “Migros”, biroz pastroqda “Çağdaş” kabi katta supermarketlar hammasi bir yerda. Nima balo, joy shunchalar tanqismikan, deb o‘ylardim. Surishtirsam...

Bu aniq o‘ylangan hisob-kitob, kuchli marketing strategiyasi ekan. Turkiyaning deyarli barcha mahallasida bunday holatga duch kelasiz, “A101” ochildimi, tez orada yonida “Bim” paydo bo‘ladi, keyin “Koop” va hokazo.

Raqobatdan qo‘rqishmaydi. Aksincha, har kuni biri bo‘lmasa bittasi ajoyib chegirmalar qilib, xaridorlar oqimini o‘ziga tortadi. Ham deganda, narxlar bozordan ancha arzon...

Bu marketingda “cluster effect” deyilarkan. Bir-biriga yaqin joylashgan do‘konlarga:

• odam ko‘proq keladi,
• tanlov ko‘payadi,
• xaridor bozordan ko‘ra uyiga yaqin marketlardan biriga borishni har tomonlama afzal ko‘radi.

Ahamiyatlisi, har birining kamida bitta maxsus jihati borki, mijozlar shunga ko‘ra tanlov qilishadi:

BİM → eng arzon narx, oziq-ovqatdan tortib, uy-ro‘zg‘or buyumlarigacha!
A101 → keng assortiment, doimiy aksiyalar!
Şok → tez xarid + aqlga sig‘mas chegirmalar!
Migros → sifat va brend uyg‘unligi, premium mahsulotlar shu yerda!
Çağdaş → asosan aristokratlar uchun, mahsulotlar toza, ayniqsa, baliq, go‘sht va sabzavotlarning “Svejiy”ligiga jiddiy e’tibor berishadi. Tez-tez chegirmalar ham bo‘ladi!

Ya’ni, har biri alohida segmentni oladi va bir-biriga to‘siq bo‘lmaydi. Bu — raqobat strategiyasi, psixologik marketing, optimal xaridor oqimini jalb qilish usuli.

Hech kim hech kimning mijozini tortib olmaydi — aksincha hamma birgalikda foyda ko‘radi. Zo‘r a?!

@Ijoddardi

Turkiyadagi bola parvarishi xonasi - “Bebek bakım odası”dan reportaj

Toshkentdagi “Next” savdo markazidagi bir xunuk voqea hech esimdan chiqmaydi. Kursdoshlar bilan aylanib yurib, oq material bilan o‘ralgan burchakni ko‘rgandim.

Yozuvni o‘qimay, qiziqqonligim tutib ochib qarasam, bir opa farzandini emizayotgandi. Juda noqulay bo‘lganman...

Turkiyada esa metro, ish va savdo markazlari, hatto ko‘chalarda ham “Bebek bakım odaları”ni topish mumkin.

Shu paytgacha Mahdi bilan, endi esa qizimiz bilan ham pampersini almashtirish, ovqatlantirish yoki uxlatish bo‘yicha hech muammo yashamaganmiz.

Kecha xizmat sifatini yanayam yaxshilash maqsadida videodagiga o‘xshash “Bebek istasyonu” yo‘lga qo‘yilibdi. Endi shoshilinchda taglik, kasha, so‘rg‘ich va boshqa birinchi darajali ehtiyojlarni shu joydan market narxida sotib olish mumkin.

Batafsil videoda :)

@Ijoddardi

Kecha favqulodda dam oldim. Sababi...

Sitoraning TÖMER til kursidagi kursdoshi, tataristonlik qiz osh va somsa pishirib bera olasanmi deb yozibdi. Darsda ayolim pishirib borgan payti mazasi og‘zida qolib, yegisi kelib yurgan ekan.

U qizdan juda ko‘p yaxshilik ko‘rganmiz. O‘zi batafsil yozadi kanalida, izohda so‘rangizlar :)

Xullas, ertalabdan bozorga ketdim va eski milliy ovqat pishirib sotgan davrlarimizga qaytdim bir muddat.

Go‘sht, un va boshqa kerakli narsalarni olib, er-xotin yarim kilo osh va 10 ta somsa pishirib tashladik. Kechki 5 larda olib ketdi, pul olmaymiz degandik, Mahdi va Safinaga kiyimchalar olib kelibdi :)

Buyurtmani chiroyli qilib topshirdik-da, ko‘chaga chiqdik. O‘tgan yillar davomida ilk marta Anqarada yangi yil shukuhini ko‘rishimiz. Bunchalik e’tibor bilan nishonlanmasdi, bu safar boshqacha tayyorgarlik ko‘rilibdi...

Mahdining ko‘zi quvnab, kechgacha aylanibmiz. Kunimiz mazmunli o‘tdi, hamd!

@Ijoddardi

Endi uydan pulsiz ketib, pul bilan qaytadigan odam dadang emas sen bo‘lasan...

Soqolini olishga vaqti yo‘q, uyquga to‘ymagan, eski oyoq kiyimini yillab kiyadigan odam ham sensan...

Kam gapirib, ko‘p o‘ylash bosqichidasan. Sukut qanchalar go‘zalligini anglagansan, ayniqsa, hamma narsani bilib turib indamaganingda!

Ertalab vaqtli uyg‘onib, shirin uyqudagi oilangni uyg‘otmasdan, choy ham ichmasdan ko‘chaga chiqadigan ham sen bo‘lasan...

Ortiq ulg‘ayding. Non olib kelish bilan non topib kelishning farqiga borib qolasan...

Siz ham shu kunlarni yashayapsizmi, demak ulg‘ayibsiz, jigar! O‘zi qo‘llasin, Alhamdulillah...

@Ijoddardi

😳😳😳

Har kuni choy qilib beraman-kuuu!!

Tinchgina siqilishgayam qo‘yishmaydi... :(

Pulim yo‘q, pulim yo‘q deb, Toshkent markazidan yangi uy olishibdi qurmag‘urlar, degan gap-so‘z bo‘lish nasib qilsin :)

Telegram blogim kundalik, reklama olmayman deb, 100 ming faol va sodiq kuzatuvchi yig‘ibdi, bir yil nari-berisi reklamasiz bo‘sh kunlari yo‘q, degan g‘iybatlarga qolib yuraylik...

Erka o‘g‘li bor ediku, o‘sha Makkada qoriymish. Qizi Oksfordda o‘qiyotganmish, degan “g‘idi-bidi” gaplarni eshitib, “xafa bo‘lib” yuraylik, ilohim!

Odamlar o‘g‘li ustiga yana bitta qizli bo‘lib, talaba holida farzandlarni ulg‘aytirdi, doktoranturani ham bitirib, hozir professor bo‘libdi, deb ayolim orqasidan ham gapirib yurishsin!

Bu bola o‘jar, o‘rtentak, qancha gapirdim, aytganimni qilmadi, o‘z bilganidan qolmadi, haaaliyam erkak boshi bilan baliq, pishir-kuydir qilib yurganmish, oilaviy restoran ochibdi, deya koyib, aql o‘rgatib yuraversin tanish-notanishlar...

Insonlarga xayriya qiladigan boy bo‘libdi qurmag‘urlar, ukasi bir yondan, ota-onasi, ayoli va farzandlari bir tomondan muhtoj oilalarga yordam qilayotganmish. “Captiva”mga benzin olishga pul so‘rasam, bir tiyn bermadi, qurimsoq, deb xafa bo‘lib yursin odamlar...

P.s. Bugun kanalga reklama olish bo‘yicha eng katta fobiyam yo‘qoldi. Naq 50+ odam o‘tibdi. Uyaltirib qo‘ymadingizlar, boringlarga shukr! Yanayam manfaatli va barchamizga foydali narsalarni tavsiya qilishda davom etamiz, Xudo xohlasa!

@Ijoddardi