#podcast

Türkiye Bursları bilan Anqarada magistratura o‘qib, hozir Millat umidi universitetida dars berayotgan Gulobar Ganieva bilan suhbat!

Turkiyada o‘qish, grandning imkoniyatlari, O‘zbekistonga qaytgandan so‘ng ish topish masalalari, diplom o‘tish/o‘tmasligi, nostrifikatsiya...

Hammasi haqida gaplashdik, oydinlik kiritishga harakat qildik. Manfaatli bo‘lgan bo‘lsa, mamnunmiz, duo qilib qo‘yasiz😊

@Ijoddardi

Ro‘za, ramazon shukuhi bo‘lardi bolalikda...

Katta hovli, 10-15 jon turardik. Rahmatli katatam, enam, amakimlar, biz...

Iftorga alohida tayyorgarlik ko‘rilardi. Chorpoya salqin yerga ko‘chirilardi, atrofiga nevaralar ariqdan tashib suv separdik. Nozbo‘yi, gultojixo‘roz va boshqa gullarga suv urardik, hidi supaning hidi bilan qo‘shilib gupurardi.

Ayronsiz iftor bo‘lmasdi. Ichiga olma, rayxonlar solib, muzdek tayyorlardik. Kimdir meva yuvgan, kim muzdek suvga solingan tarvuzni kesgan...

Og‘iz ochishga 10 daqiqa qolgach, hamma so‘riga kelardi, dasturxon to‘la, televizorda diniy ma’ruza...

“Bu pallaning savobi katta. Mana, bandam ro‘za tutib, och bo‘lsa ham yonidagi ne’matlarga qo‘l cho‘zmasdan iftor vaqtini kutyapti, so‘raganini beringlar deydi Xudo!”, deb tushuntirardi rahmatli katatam. Bir etak nabiralar jon qulog‘imiz bilan tinglardik...

U payt ro‘za yozda tutilgan ekanda, iftorgacha og‘iz qurib, chanqaaab yetgach, ayron ichish, tarvuz yeyishning gashti bo‘lakcha edi!

Hozir qish bo‘lganigami, yoki ulg‘aydimmi, avvalgidek shukuhni hech topolmayapman. Ishga kelaman, yugur-yugur bilan vaqt juda tez o‘tib ketadi, shoshib iftorlik qilaman, chopib uyga qaytaman...

Anchadan beri ichim notinch, huzursiz, bir nimalarni sog‘inaman, qo‘msayman, istaklarimni tushunmayman. Ilohim, shu ramazonda O‘zimni topish nasib etsin!

@Ijoddardi

Allohim, men keldim!

O‘ta perfeksionistman. So‘nggi paytlarda bu odatimni sekin-asta yo‘qotyapman, chunki mukammallikka intilganim sari boshog‘rig‘im ko‘payib, rejalarim ko‘ngildagidek ketmagani uchun asab bo‘lib yurardim...

26 yil ichida bir marta to‘liq ro‘za tutgan ekanman. Sitoraga uylanish arafasida. Shu qizga yetkaz deb tinmay duo qilardim, ishdan chiqib, “Novza”ga tarovehga borardim, namozni ham to‘liq o‘qishga harakat qilardim: “Sitoraning uydagilari ko‘ngliga rozi-rizolik urug‘larini sepgin” degan duoyimni to‘ydan keyin ham ko‘p aytib yurganman refleks tufayli 😂

Namozni boshlayman deb niyat qildim. Ammo “Qunut” duosini bilmasdim, yodlash uchun o‘qib, eshitib yurdim, birdan besh vaqtni o‘rganganimda boshlayman dedim, hali namoz haqida bilimlarim yetarli emas dedim, xushu yo‘q dedim, erta-indin bilan shuncha vaqt o‘tdi.

Bu yil ro‘zani to‘liq tutaman deb jiddu jahd qildim, astoydil kirishdim. Ishxonadagilar esa namozsiz ro‘za qabul bo‘lmaydi, ro‘za tutsang, nega namoz o‘qimaysan dedi, bu haqda manbalar, ma’ruzalarni ko‘rsatishdi.

Bugun ertalab bomdodni o‘qidim, keyin peshin, asr, shom... Xuftonga kelgach, “Qunut”ni telefondan o‘qiyman deb namozni boshladim. Qarasam, o‘zi yodlagan ekanman, oyatlar miyamga she’rdek quyilib kelardi, telefonga hech hojat sezmadim!

Bu boshqacha his edi, ich-ichimni qandaydir ta’riflab bo‘lmaydigan tuyg‘ular chulg‘ab oldi. Alhamdulillah!

Ilohim, oxiridan suyuntirsin. Bu ramazonda o‘zimni topishga astoydil bel bog‘laganman, shuncha bergan ne’matlari uchun shukr aytish vaqti keldi...

@Ijoddardi

O’sha ro’za meniyam tutgan eng to’liq ro’zam edi: sizni yaxshi ko’rganim uchun hech kim men bilan gaplashmay qo’ygan ro’za!..

“Türkiye bursları”ga hujjat topshirganlar soni

Bu ba’zi oʻlkalar miqyosidagi ko‘rsatkich xolos. Grandga 168 mamlakatdan ariza topshiriladi, har yili 5000 talaba burs orqali Turkiyaga o‘qishga keladi. Batafsil bu qo‘llanmada tanishishingiz mumkin.

O‘zbekistonda ham Türkiye Bursları yildan yilga ommalashib, ariza topshiruvchi nomzodlar soni oshib bormoqda. Bu raqobat yanayam kuchli bo‘ladi, degani.

Yaxshi niyat bilan hujjat topshirgan barchaga omad yor bo‘lsin, Xudo xayrli xushxabarlar bilan siylasin barchangizni. Ko‘p qatorida, bizni ham.

Ishoning, bu grand dasturi tavakkal qilishingizga, maza qilib ta’lim olishingizga ham moddiy, ham ma’naviy tarafdan yuz foiz arziydi. Qo‘rqmasangiz bo‘lgani...

@Ijoddardi

Burs hujjatlari bilan bo‘lib, e’tiborsizlik qilibmiz, Mahdining Turkiyada yashash ruxsatnomasi 2-mart kuni bitarkan...

Maygacha vaqti bor deb yurgandik, u qizil pasportining amal qilish muddati ekan. Endi bursni tugatib yengil tortgandik, bu masala chiqib keldiku.

Hafta og‘ir boshlandi. Dushanba kuni oyog‘imizni qo‘lga olib, elchixonaga yugurdik. Pasportni yangilamasak, ayni vaziyatimizda Mahdiga kimlik uchun “Başvuru” qilolmaymiz...

Tong sahar uydan chiqib, elchixonaga 9 bo‘lmasdan yetib bordik, oxiri bizmiz, qani, navbatga o‘tinglar, deya o‘zbek opalar kutib oldi.

Ish vaqti soat 10 dan boshlanarkan, bizgacha 4-5 kishi navbatda. Havo sovuq, yomg‘ir sevalaydi, Safina kolyaskada, Mahdi qo‘limda...

Navbatim keldi, qabulda yoshroq yigit, “zagslaring bormi o‘zi?” deb so‘radi. Vaziyatni tushuntirsam, 2-mart kuni peshinlarga kelmabsizlarda, deb yana kinoya qildi, tishimni tishimga bosdim, o‘zimda ham ayb bor edi chunki.

Bir qog‘ozcha uzatdi, qarasam o‘tgan safar Mahdiga birinchi marta pasport olganimizda beminnat yordam qilgan tarjimon Vohid akaning vizitkasi. Hujjatlarni shu kishi orqali taxlab kelasiz dedi.

Ishga xabar berdim-da, yugurib akaning yoniga ketdik. O‘tgan safar ishim oson bitgandi, bugun ozgina sarson bo‘lyapmiz desam, elchixona tarkibi yangilangan, avval sizlarga konsul yordamchisi Oybek aka qarashib yuborgandi, hozir u kishi yo‘q, desa bo‘ladimi...

Omadimdan aylanay, birinchi marta kelganimizda hamma ishlarni bir kunda oppa oson bitirib ketgandik, elchixonada otamizning uyiday yurganimiz, bir xonada Mahdini bemalol ovqatlantirganimizni esladim, ich-ichimdan duo qildim akani...

Hujjatlarni taxlab, soat 15:00 dan o‘tganida elchixonaga qaytdik, ish vaqti 16:30 gacha edi chunki. Qo‘ng‘iroqni 15 daqiqacha bosib turdik ham eshikni ochishmadi...

Bolalar uyga qaytishdi, men ishga jo‘nadim. Seshanba kuni hujjatdagi chalalarni bitirib, kamchiliklarni to‘ldirib, chorshanba kuni ertalab yana bordik elchixonaga.

Qabulxonadagi yigit bankka 55$ to‘lov qilib kelasizlar, navbat beramiz, taxminan 1-2 haftadan so‘ng bolani rasm tushirishga olib kelasiz, dedi.

Jon aka, 2-martgacha pasport olmasam, bolamning kimligi tugaydi, jarima to‘lashim kerak keyin, yana chaqalog‘imiz ham bor, hadeb kelib ketolmaymiz, dedim. Ichkariga kirib ketdi.

Qarasam, Fotihxon aka chiqdi, men taniydigan eski elchixona xodimlaridan faqat shu kishi qolibdi chamamda. Oybek aka shu yigitga aytgandi Mahdini rasmga ol deb birinchi kelganimizda.

Bugun navbat ko‘p, pasport tizimi faqat chorshanba kuni ishlaydi, to‘lovini qilib, soat 15:30 da kelsanglar rasm tushirib yubora olaman, deb tushuntirdi.

Bankni qidirib ketdik, havo sovuq. Navbatim kelib, to‘lov uchun plastik bersam, faqat naqd olamiz, dollar qilib kel, deyishdi.

“Döviz” qidirdim. Ularam naqd olisharkan, bankomat izladim, amallab 55$ oldim-da, bankka qaytdim.

To‘lov qilib, elchixonaga bordik. Havo sovuqligi uchun bolalarni ichkariga kirgizib, keyin ishga ketmoqchi bo‘ldim-da. Chunki hali soat 11 edi, 3 yarimgacha 4-5 soat bor, ko‘chada kuta olishmasdi...

Mumkinmas, tashqarida kuting dedi qabulxonadagi yigit. Taksi chaqirib, Sitorani Qiziloy savdo markaziga qoldirdim va ishga yugurdim. Chunki u joy ham issiq, ham oshxonalar bor, “bebek bakım” xonalari mavjud edi.

Sitora 3 larda elchixonaga boribdi, 16:00 larda Fotihxon aka Mahdini rasmga tushiribdi, baraka topsin, keyin uyga qaytishgan. Endi pasportni kutyapmiz...

1-mart hammaga bahorning ilk kuni sifatida quvonch ulashsa, bizni Mahdining kimligi tugashiga bir kun qolishi bilan xavotirga solyapti. Ulgurmasak, jarima to‘laymiz...

Demoqchimanki, oila bilan chetda qonuniy yashasangiz, hujjat masalalariga diqqatli bo‘ling, hatto muhim kunlarni kalendardan aniq belgilab qo‘ying...

Oybek akani Xudo qaysidir yaxshi amalimiz uchun yo‘liqtirgan ekan o‘shanda. Xuddi farzandiday kutib olgandilar bizni.

Pasport tayyor bo‘lib, olishga borganimizda Mahdi uchun hadya berib, elchixonani aylantirib, xodimlarga “Bu yigit jurnalist, dadam bilan intervyu qilgan!” deganlari qayta-qayta ko‘z oldimdan o‘tardi...

@Ijoddardi

FAOL BO‘LAMAN
ozgina nafas rostlab olay...

Kanalga umuman qarolmay qoldim, Mahdining pasporti tayyor bo‘lmadi, kutyapmiz, Turkiyada yashash ruxsatnomasi allaqachon tugagan, endi qancha jarima chiqaradi bilmaymiz...

Yangi Wi-fi o‘rnatgandik, bursga hujjat topshirish uchun internet o‘ta zarur bo‘lib shoshilganmiz, eski uyimizdagini ko‘chirsak bo‘larkan aslida, kompaniya ko‘proq modem aparatini sotish maqsadida bizni chet ellik, tushunmaydi deb shartta yangi wi-fi sotishibdi, endi eski manzilimizda yashamasak ham wi-figa to‘lov qilyapmiz iyun oyigacha...

O‘zimizning adres qaydimizni Varlikdan yangi yerimizga ko‘chirishimiz kerak. Lekin bizdan oldingi ijarachilar hali qaydini o‘chirmagan ekan, bizni kiritib bo‘lmadi. Endi ularning chiqishini kutyapmiz...

Orada shunchalik charchadimki, hammasiga qo‘l siltab ketvorishimga oz qoldi, yo havo almashtirib kelamiz, yoki butunlay qaytamiz dedim. Yaxshiyamki Toshkentda uyimiz yo‘q, ijara uy masalasi qiyinligini bilaman, yana bu yerdagi muammolar hatto ortig‘i bilan qaytalanishini o‘ylab Sitoraga bu haqda indamadim...

Umuman, ko‘pi ketib ozi qoldi. To‘xtashga, yengilishga yo ortga qaytishga haqqimiz yo‘q. Yo‘qsa vaqtida aql o‘rgatgan ayrim qarindosh, qo‘ni-qo‘shni, tanish-notanishlar haq bo‘lib chiqishadi, chiranib bo‘lsa ham maqsadga yetamiz, Xudo xohlasa!

@Ijoddardi

Dunyo notinch, taloto‘p, bir soniyadan so‘ng nima bo‘lishini bilmayapmiz...

Bir qarasang bomba uchyapti, dron, raketalar, minglar insonlar nobud bo‘lyapti...

Bu vaziyatda sayohat ko‘ngilga sig‘adimi? Bayram tatiydimi?! 8-martga balo bormi?! Sovg‘a olishgayam qo‘lim bormayapti, ko‘nglim dosh bermayapti...

Dindoshlarimiz Vatan uchun kurashayotgan nozik va og‘ir pallada men bayram qilmaslikni tanlayman. Siz-chi?! :)

@Ijoddardi

Nasib, sayohatgayam boramiz, eson-omon o‘qishni tugatib, diplomni olib, yorug‘ yuz bilan ortgayam qaytamiz, ayfon ham olamiz...

Kim o‘ylabdi, ikki yil o‘tib Anqarada baliqchi usta bo‘laman, o‘zimiz xohlaganday uyda yashaymiz, farzandlarimizning hech qanday kamchiligi bo‘lmaydi, deb.

Axir, ilk kelganimizda hojatxona tozalashdan ish boshlagandim, ijara uy topolmasdan bir xonalik otelda yashagandik bir oy. Bugun esa...

Alhamdulillah, niyat qilishda haddingizdan oshavering, ko‘p-ko‘p so‘rang, tinimsiz so‘rang. Shunda haddan ortiq natijalarga erisharkansiz. Amallar niyatlarga bog‘liqdir...

@Ijoddardi

“O dil çağırdı beni...”

Turkiyaga ilk marta Sitoradan 10 kun oldin, bir o‘zim kelganman. Rejamiz bo‘yicha, ish va yotoq joy topishim kerak edi u kelgunicha.

Lug‘atimda faqat “Evet” va “Merhaba” bo‘lgan. Atrofimdagilar “Turkcha o‘zbekchaga yaqin”, “O‘zbekcha gapirsang tushunadi” deyishganiga ishonganman, ko‘nglim to‘q bo‘lgan. Lekin unday emas ekan...

Sitora telefonimga asosiy muloqot savollarini yozib bergan, “Izbranniy”imda haligacha saqlanib turadi: “Otobüs durağı nerede?” “Lavabo nerede?” “Telefonunuzdan yararlanabilir miyim?” va hokazo birlamchi ehtiyoj “soru”lari...

Haqiqatan ham, Turk tili chaqirdi meni, tasodifan hayotimga kirib keldi, o‘zining beqiyos jozibalari bilan hayratlantirdi va lol qoldirishda davom etmoqda.

Hayotimning eng unutilmas sahnalarini aynan shu mamlakatda yashadim. Har tomonlama ulg‘aydim, farzandlarim kindik qoni shu yerda to‘kildi. Ikkinchi vatanimizga aylanishga ulgurding, Turkiya...

@Ijoddardi

O‘zbekistonni qaysi davlat boshqaradi, deb savol berishadi siyosatdan gaplashayotgan ustalar birdan menga yuzlanib

“Prezident, Shavkat Mirziyoyev” deyman savolini tushunmasdan. Post yozib o‘tirganim uchun ularning suhbatiga e’tibor bermabman, xayolim boshqa joyda edi...

Iroqlik baliqchi yigit “yo‘o‘o‘o‘q” deydi. Masalan, bizni Amerika boshqaradi, sog‘likni saqlash, mudofaa, ta’lim va shu kabi muhim davlat organlarining hammasida kamida bitta ingliz bor, amerikalik!

Bizda unday emas, Rossiyaning ta’siri bo‘lgan, ammo hozir emas. Xitoy bilan vizasiz rejim bo‘ldi yaqinda, Amerika bilan aloqalar yanayam yaxshilandi, deb Trampning Mirziyoyevni alqagan videosini qo‘yib beraman.

Turkman akalar yozg‘irib boshlashadi keyin: “Biz ko‘p O‘zbekistonda tug‘ilsaydik” deb havas qilamiz. Davlatimizda oyliklar 100-150$, bularda ancha baland. Zo‘r ketishyapti, deyarli hamma davlatlar bilan aloqalari yaxshi...

Shu payt O‘zbekiston va Qozog‘iston Yaqin Sharqdagi barcha fuqarolarini o‘z vataniga evakuatsiya qildi, Dubay aeroporti faqat shu ikki mamlakat yo‘lovchilariga xizmat ko‘rsatyapti, degan xabarlar chiqib keladi.

Ustalar “...davlat vazifasini bajaribdi, bundan ortiq nima qilsin, “helal olsun yaaa” deyishadi. Men esa faxrlanib qo‘yaman :)

P.s. O‘zgarishlar katta, chetdan qarasangiz yanayam yaxshi seziladi bu. Bardavom bo‘lsin!

@Ijoddardi

Insonning osmonga tikilib o‘tirishga vaqti bo‘lishi kerak, ozgina xotirjamlik va bir chimdim umid uchun...

Insonning osmonga tikila oladigan yorug‘ yuzi bo‘lishi kerak, toki amallari go‘zal, vijdoni toza bo‘lsin!

Insonning osmonga birgalikda tikilib o‘tirishga yo‘ldoshi bo‘lishi kerak. Orzular qilishga, ko‘k sarhadlarida chek-chegarasiz sayr etishga...

Insonning osmonga qaragandagina uyg‘onadigan shirin xotiralari, bulutlardek oppoq, musaffo tuyg‘ulari bo‘lishi kerak. Va... bir tomchi bo‘lsa ham ko‘z yoshi, to‘kilmoq, yengil tortmoq uchun!

Vaqt o‘tmayapti. Soatga termulib o‘tiribman. 1 yarim soatdan so‘ng ishim tugaydi. Osmonni sog‘indim...

@Ijoddardi