Maylida, men ishga ketdim. Uyda bir kun qolganimga sal qoldi foodbloger boʻlib ketardim😂

Lekin ovqat oʻylaganimdan ham zoʻr chiqdi. Uydagilar anchagacha uning mazasini esidan chiqarmaydi, qoʻlim dard koʻrmasin!

P.s. Sitor, bilsang bilarsan :)

@Ijoddardi

Bir shirinlik izidan

Uylanishning faqat yaxshi tomonlarini ko‘rsatyapsiz, deb yozg‘irgandi ayrim bo‘ydoq qadrdonlar. Mana bu videoni ko‘ring :)

Shirinlikni O‘zbekistonga qaytgach yeymiz endi. Nailoj, bu yerdan topolmadik. Lekin uni qidirishdagi jarayon qiziq, buning gashti boshqacha...

@Ijoddardi

Yaxshi ota bo‘lishga maksimal harakat qilyapman...

Toki Mahdi va Safina hozir ham, ulg‘aygach ham orqasida dadasi borligini hamisha his qilib tursin.

Ko‘p turklar bilan aynan oila mavzusida uzoq gaplashdim, eng nozik nuqtasi bu ularning. Xulosalarim, fikrlarim yetarlicha bu mavzuda. Ulardek baxtsiz o‘smirlar yetishtirishdan doim O‘zi asrasin!

Mayli, qariganimda meni boqmasin, ayasi ikkimizni hajga jo‘natmasin, sovg‘a-salomlar qilmasin. Ammo ota-onasidan rozi, hayotda o‘z yo‘lini topgan, bolaligi go‘zal xotiralarga boy baxtli insonlar bo‘lishsin ilohim.

Har qanday vaziyat va sharoitda o‘g‘il-qizlarim bilan g‘ururlanaman, faxrlanaman va buni baralla aytaman. Xudodan oxiridan suyuntirishini qayta-qayta so‘rayman, porloq kelajagiga ishonaman...

Sitor, agar qaysidir tongda men mangu uyquga ketib, faqat sen uyg‘onsang, birinchi vazifang, farzandlarimga otasini unuttirma. Kiyimim doim eshik orqasiga ilinib tursin. Bolalar nimadir istashsa, dadangning cho‘ntagidan ol deysan, tamam mı?

@Ijoddardi

Ertalab ishga kelishdan oldin ro‘zg‘orga u-bu narsa olgani chiqib, shirinlikni olib keldim

Uyimiz yonidagi “Fırın”da tayyorlab boshlabdi. Kechqurun ishdan qaytishda ko‘rib qolgandim, yonimda pulim kamligi uchun qarz so‘rasam berishmagandi.

Tongda uyg‘onishim bilan borib olib keldim. Sitora umuman kutmagandi, reaksiyasi videoda :)

@Ijoddardi

Bozorga bormaganimga ancha bo‘ldi, supermarket ham yaqin, ham chegirmali narxlar, ham eskirib qolmagan toza narsalarni saralab olasiz...

Bozordagi sotuvchining qosh-qovog‘iga qarab, ezilgan pomidor qo‘shmang, chirigan kartoshka-piyoz solmang deb “pachakilashib” o‘tirgandan shunisi qulay bizga.

Yana bozor tiqilinch, odam ko‘p, narsalar joylashuvi pala-partish... u yerdagi shovqinni yomon ko‘raman. Supermarketdan qo‘ymasin...

Yaqinda “CedGo” bolalar maydonchasini kashf etdik o‘zimiz uchun. Bu ham juda qulay ekan biz kabi yosh bolasi bor ota-onalarga. Batafsil videoda aytib berganman...

@Ijoddardi

Hazil o‘z yo‘ligakuya, lekin eski rasmlarimni ko‘rsam yuragim siqiladi...

Talabaman, ishim bor edi, yaxshi ko‘rgan kasbimdaman, go‘yo orzularimda yashayotgandim o‘sha kezlarda. Lekin...

Kecha oilasi bilan Amerikada yashaydigan ukam, do‘st va hamkasbim, “Mard o‘g‘lon” mukofoti sohibi Murodjon eski rasmlarni jo‘natib qoldi. Biroz dardlashdik...

Menimcha, bizning “pokoleniya”dan faqat ikkimiz ayni karyera qilib, yangi marralarni zabt etadigan pallada chet elga chiqib ketganmiz.

Garchi qora ishdaman, 12 soat ishlayman, yaqinlarimdan uzoqda musofir bo‘lib yuribman. Ammo hayotimizda halovat bordek, bugungi kunlarimizdan ko‘nglim to‘ladi, Anqaraga ilk kelganimdagi postlarimni o‘qib faxr hissi tuyaman, “uddaladik”, “uddalayapmiz” degan bir taskin bor ichimda.

Xudoning rejalari boshqacha, hayot har doim ham kutganimizni beravermaydi. Lekin vaqti kelib, o‘ylaganimizdan ming marta ziyodasi bilan siylarkan...

Har bir holimizga Alhamdulillah, yursak yo‘limiz, ichsak choyimiz bor, baxtlimiz...

@Ijoddardi

Dadamning nigohlaridek og‘ir jazoni ko‘rmadim shu kungacha...

O‘g‘li bilan faxr tuygan paytlarda tuyg‘ularini ochiq aytolmasdan jilmayib qo‘yishi, bag‘riga bosganidagi quvonchimni ham topolmadim boshqa joylardan...

Dadam bilan o‘rtamizda ayam elchi edi har doim. Dardimni qo‘rqa-pisa ayam orqali yetkazardim. Va hech bir zamon ayam dadamning javobini menga keltirguncha yuragim hapqiradigan darajada o‘takam yorilmadi...

Boshimga ishq savdosi tushib, ichimga qamalib yurgan kunlarim, umrimda ilk va so‘nggi marta dadam bilan “erkakchasiga” gaplashganmiz.

Mashinaga gaz quyib kelamiz, deb uydan olib chiqdi, ikki tarafi qator tutzor bo‘lgan uzun yo‘lning chekkasida to‘xtadik, eshiklar qulflandi, “Chindan ham yaxshi ko‘rasanmi u qizni?!” dedi to‘satdan. U kungacha hech bir savol qarshisida bunchalik kalovlanmagandim...

Ota-onasining roziligini olmagunimizcha ayangni ostonalariga jo‘natishga tayyorman. Ja bo‘lmasa, olib qochib kelamiz kelinimni. Lekin vaqt o‘tib “kelisholmadim”, “ajrashaman”, “adashgan ekanman” desang, o‘zim tilingdan osaman...

Bugungacha mening baxtli bo‘lishim yo‘lida aytilgan bunchalik go‘zal va qo‘rqinchli “tahdid”ni qaytib hech bir yerda eshitmadim. Otalar - faylasuf, otalar - daho, borligining o‘zi eng katta boyligimizdir...

@Ijoddardi

Kecha uyda Mahdi bilan futbol o‘ynadik, shunchalar berilib ketdimki... ota-bola oynani sindirdik

Sitora yugurib keldi, Mahdiga to‘nkadim, u buni sezdi, kap-katta ikki bolali ota uyda to‘p o‘ynashga nima bor, dedi. Ammo u bilmadiki, ichimdagi bolakay erkinlikka chiqqandi...

Mahdi, garchi ayang uyda futbol o‘ynashimizni taqiqlagan bo‘lsa ham, bu “xato”ni qayta-qayta takrorlagim keladi. Ko‘zlaringga qarab o‘zimni ko‘raman.

Kun kelib ulg‘ayasan, Turkiya, O‘zbekiston, balki yana boshqa davlatlar bilan bog‘liq bir dunyo shirin xotiralari bor katta odamga aylanasan. Dunyo bo‘ylab yaqinlaring, do‘stlaring bo‘ladi...

O‘shanda men 70-80, 100 yoshda bo‘larman, bilmadim. Xohlaymanki, oilang bilan yashagan onlaring hech qachon esingdan chiqmasin, har qanday go‘zal xotirangdan ustun bo‘lsin. Hech kim senga bizdan-da yaqin do‘st bo‘lolmasin...

Sen hamisha men uchun 6 oylik Mahdi bo‘lib qolasan. Va ayni rasmdagi 6 oylik “yosh bola” dadang har doim sen bilan. Buni bil va faqat gaziga bos, o‘g‘lim...

@Ijoddardi