Shaxsiydan shunga o‘xshash savollar ko‘paygan

Bursdan esa darak yo‘q, na xabar jo‘natish to‘xtadi deyishadi, na qaysi yo‘nalishlar chaqirilib-chaqirilmaganini ochiqlashadi...

Turkiya burslari hay’ati aynan qaysi mezonlar asosida nomzodlarni saralashi bizga ham qiziq, afsuski, ma’lumot berilmagan hech qayerda.

Oilali nomzodlarga burs berilmaydi deyishadi, bu yilgi nomzodlarimiz orasida bor edi oilali, suhbatga chaqirildi.

Yutuqlarga qaraladi deyishadi, o‘tkan yili naq 3-5 til biladigan, sertifikatlari bor nomzodlarimizga burs chiqmadi, bu yil ham saralab, faqat eng kuchlilarni qabul qilganmiz mentorlikka. Lekin...

Audio egasi Azim ham Amerikaning TOP-300 universitetlariga mustaqil hujjat topshirib qabul qilingan, til sertifikati bor, sabablarni keltirgan, letter'larni zo‘r yozgan, kuchli profil egasi. Ammo...

O‘ynab, qiziqishga hujjat topshirgan, yutuqlari yo‘q, baholari past nomzodning suhbatga chaqirilganini ko‘ribdi Azim, alam qiladi to‘g‘risi. Omad shu bo‘lsa kerak. Kutaylikchi...

@Ijoddardi

Yosh o‘zbek ota-onasi obrazi

Milliy kino/seriallarimizda, dada yoki ona haqidagi kliplarda ota-ona obrazi hamisha 40 dan oshgan o‘rta yoshli insonlar timsolida tasvirlanadi. Lekin...

O‘zbekiston - yoshlar mamlakati. Bizda oila qurish yoshi ham nisbatan erta, shaxsan o‘zim Turkiya ko‘chalarida fotosessiya qilayotgan yosh kelin-kuyovlarni ko‘rmadim, kamida 28-30 yoshdan keyin uylanishadi bular.

Tanishlarim, qarindoshlar va o‘rtoqlarim 20-23 yoshida oila qurishgan, o‘zi “mushtday” bo‘lsa ham 1-2 nafar farzandi bor. Men ham o‘zim va ayolimni unday katta yoshli odam deb hisoblamayman, yosh bolamiz hali...

Menimcha, yosh o‘zbek ota-onasi qanday bo‘lishi, o‘zini qanday tutishi, hali o‘zi bola bo‘la turib farzand tarbiyalashi, oilani boshqarishi, turmushdagi muammolarni yelkama-yelka yengib o‘tishi bo‘yicha qahramonlar yaratilishi kerak.

Shaxsan menga qiziq bu. O‘rganadigan ilmlarimiz bisyor bu borada. Qachon ulg‘ayib, boshi devorga tekkanida anglagandan ko‘ra tirik misollar bilan xulosa qilishsa, oila yanayam mustahkam, ajrimlari soni kamaygan bo‘larmidi...

@Ijoddardi

Rus, turk multfilmlarining g‘oyalari, voqealar rivoji bilan o‘zimiznikilar tubdan farq qilishini ham angladim yaqinda...

Chol-u kampir farzandsiz bo‘ladi; qirolning merosxo‘ri bo‘lmaydi; bola baxtini izlab safarga ketadi; cho‘qqidagi oltin meva beradigan daraxtni topib, oilasini “qutqarish” uchun yo‘lga otlanadi...

Bu aksariyat o‘zbek multfilmlaridagi ssenariy. Xuddi seriallarimizdagi qaynona-kelin mavzusidek bir xil va zerikarli. 3-5, boringki 7-8 yoshli bola ulardan qanday xulosa oladi?

Ko‘p tanishlarim maktab paytidan qizil pasport olib, ishlash uchun Rossiya yo “qozoq”qa ketishni kutib, hatto orzu qilib yurardi. Hozir “Susambil” yo “oltin meva beradigan daraxt”ni qidirib chet ellarda ishlayapti. Bunda ham o‘sha bolalikdagi multfilmlarning oz bo‘lsa-da ta’siri bor deb o‘ylayman...

Atrofimdagi turk yoshlari bilan gaplashaman, imkoning bo‘lsa xorijga ishlagani ketasanmi desam, u yerda nima qilaman, tanishim yo‘q, til bilmayman, Turkiyadan qimirlamayman deyishadi.

Begona davlatda qora ishni qo‘ya turing, shunchaki ishlash bularning xayoligayam kelmagan, savol so‘rasam, miyasi zo‘riqib javob beradi. Hatto katta yoshli ustalar ham chetda ishlagani kam topiladi. Bizda-chi, “bir gap bo‘lar” deb til va ish bilmasdan har qanday ishga rozi bo‘lib chetga ketayotganlar qancha?!

Tabiat, hayvonlar, o‘rmon, baliqlar, qushlar mavzusidagi bolaning dunyoqarashini shakllantirib, rivojlantiruvchi ertak va multfilmlarimiz qo‘l bilan sanoqli. Chiroyli xulosa beradigan asarlar yetishmaydi bolalar kontentida.

Farzand tarbiyasi, uni to‘g‘ri g‘oyalar bilan ulg‘aytirish muhim masala. Bu boradagi bo‘shliqlarimiz bisyor...

@Ijoddardi

“Hurriyat”da ishlagan paytim Multiplikatsion filmlar studiyasi rahbari bilan bir sahifalik intervyu qilgandim

Multfilm sohasidagi muammolarga to‘xtalganmiz, ochiq-oydin javob bergandi Sevara opa. Keyin nima bo‘ldi?

Maqola e’lon qilindi, ertasi kuni esa opa ishdan olinib, o‘rniga yangi rahbar tayinlangandi :(

Xulosa o‘rnida demoqchimanki... hamayli, xulosa o‘zingizdan!

@Ijoddardi

Amerikaga “Green Card” o‘ynalardi bir paytlar, lotereye edi u, qabul qilingan odam minglab dollarlar xarajat qilib ketardi ISHLAGANI...

Green Card yutgan tanishim viza ishlamlariga pul topolmasdan ketolmagandi masalan. Boshog‘rig‘i ko‘p edi qabul qilinsa ham. Lekin hech kim g‘ing demasdi...

“Türkiye Bursları” ham shunga o‘xshash tizimda ishlaydi. Farqi, ishga emas o‘qishga olib keladi talabalarni. Viza xarajatlaridan tortib samolyot bileti, ta’lim kontrakti, yotoqxonasi, issiq ovqatigacha ta’minlaydi.

Evaziga esa, shuncha qarg‘ishga qolibdi, faqat o‘zlariga ma’lum bo‘lgan mezonlariga javob bermagan “kuchli nomzodlar”ning gap-so‘zlari urchibdi shu kunlarda...

Tushunmayman, katta avlodku mayli, yoshlarimizda bunchalik nafrat, g‘azab, pessimist kayfiyat qayerdan paydo bo‘ldi ekan?!

Zotan, nomzod hujjat topshirishdan oldin bilmasmidi burs chiqish ehtimoli kamligini, bilmagan bo‘lsa nega avval izlanib, o‘rganib ko‘rmagan? Har bir hujjat yuklagan odam yuz foiz grand yutadi deyilmaganku hech qayerda...

Turkiya kul bo‘lsin, YTB cho‘ksin, xodimlari o‘lsin, Xudodan topsin, bla-bla-bla... deb qarg‘ash uchun bilmadim insonning qalbida nima bo‘lishi kerak...

Bunaqa dunyoqarash bilan xorijda yashash, xalqaro darajada ta’lim olish, ILM qilish mumkinmi? Bunaqa fikrlar bilan faqatgina o‘zingizni bursga loyiq emasligingizni isbotlayapsiz, boshqa narsa emas...

Yaxshiyam hujjat topshirish tekin, konsalting firma yoki hujjat yuklab beruvchilar o‘z xizmati uchun haq olishadi, bemalol o‘zingiz mustaqil yuklay olasiz “dokument”laringizni. Agar buyam pullik bo‘lganida bilmadim nimalar yozishardi...

Men hech kim tarafda emasman va bu yozayotganlar ham tanishim emas, xusumatim ham yo‘q ularga. Shunchaki bilib-bilmay behuda vaqt yo‘qotishayotgani, asabini buzib miyasini zo‘riqtirayotgani uchun achinganimdan yozyapman bularni.

Befoyda, taqdiringizda yo‘q ekan, peshanada yozilmagan, nasibangiz qo‘shilmagan ekan, mag‘lubiyatni qabul qilishni ham o‘rganing. Agar bu mag‘lubiyat deb hisoblansa. Hayot har doim ham xohlaganingizni beravermaydi...

@Ijoddardi

Ertaga hamkasbimiz Furkan yillik iznga ketyapti, naq 15 kun dam oladi, bizdagi “otpuska”ga to‘g‘ri keladi bu...

Ertalab sartaroshga borolmabdi, qarasam siqilib o‘tiribdi. Kechki 3 da qishloqqa ketyapman, sochlar bir ahvol, yakshanba bo‘lgani uchun birorta ochiq “Kuaför” topolmadim, deydi.

Ishxonaning otopark qismida “oto Kuaför” bor edi, deyarli har kuni ko‘zim tushadi, yarim kechagacha ochiq turadi.

Ish kamayganda pastga tushib qarab keldim, ochiq ekan yakshanba bo‘lsa ham. Yaxshilik qilmoqchi bo‘ldim-da!

Siqilma dedim, o‘zim senga sartarosh topib beraman, ishdan keyin borsang ham ochiq bo‘ladi, ham yaqinimizda dedim. Bola xursand bo‘ldi.

Hozir ish tugadi va olib bor yoki manzilini ayt dedi, hamrohlik qildim. Oto Kuaför qarshisiga borib, “mana!” dedim faxrlanib.

Yigit kulishniyam, yig‘lashniyam bilmasdi. Men uni otoparkning sartaroshi deb o‘ylarkanman, xuddi vokzallarda maishiy xizmat ko‘rsatish shoxobchalari bo‘lganidek. Bu esa “moyka” ekan🤦‍♂

@Ijoddardi

Ertalabdan kayfiyatim zo‘o‘o‘o‘r, chunki...

Kecha Sitora Migros' marketdan 2 ta oltilik pampers buyurtma beribdi, har biri 32 tadan. Chegirma ketyapti ekan, ayni “razmer”dan ikkita olasiz, bittasiga pul to‘laysiz. U ikkisini 360 tlga olgan, donasi 180 liradan to‘g‘ri keladi...

Migros' qimmatroq market, ming chegirma qilsayam odatda boshqa do‘konlardan arzon bo‘lmasdi. Shunga ozgina ko‘nglim bo‘lmadida, xo‘p deb qo‘ydim. Necha kunga yetadi bu desam 4-5 kun dedi...

Ertalab uyga bozorlik qilaman deb A101 ga kirsam, biz doim oladigan 5-6 lik pamperslar 219 liradan 265 ga ko‘tarilibdiku. Uyga qaytishim bilan Migros'dan to‘rtta beshlik, to‘rtta oltilik pampers buyurtma qilib qo‘ydim, 1-2 soatda yetkazishadi.

Uyda jami 10 ta taglik bor, bu kamida 15-20 kun qulog‘im tinch degani. Ishga ketyapman, jahldor avtobus haydovchisining qovog‘idan ham nur yog‘yapti go‘yo, xuddi hamma baxtli, mehribon, xushchaqchaq, menga o‘xshab! :)

Aka hamma joyda 265 liralik pampersni 180 TLdan olib g‘amlab qo‘ydi-da😎

@Ijoddardi

Bugun dushanba, ish eng kam bo‘ladigan kun, o‘o‘o‘tiribman. Ertaga esa seshanba, dam olish kunim. Muncha baxtlimaaan😂

Safinaning pasporti ham tayyor bo‘lib qoladi, topshirib kelganmiz, qochoq qolmasdan kimlik ovolamiz, Xudo xohlasa!

Kecha avans olganman, tez orada yillik izn pulimniyam taxlab berisharkan. Har oyning birinchisida tushadigan Sitoraning “Barınma” puliyam kechikayotgandi, mish-mishlarga ko‘ra bugun-erta tashlab berisharkan uniyam.

Kamiga, ishxonadagi ovqat ham achchiq bo‘lmabdi-da. Usta xayol bilan qalampir o‘rniga qizil bolgar kukunidan qo‘shgan ekan, qip-qizil rang bergan shunchaki, maza!

Ishxona “muhasebechi”si keldi boya, “Çalışma izni” uchun kerakli hujjat va ma’lumotlarni olib ketdi. Erta-indin “başvuru” qilamiz, uzog‘i ikki haftada bir yillik ruxsatnomang tayyor bo‘ladi, dedi.

Rasm esa uydagi gyo‘zallik, chegirmalar bor bo‘lsin!

Ichimdagi maraz odamcha “X-Factor”dagi Fazliddinga o‘xshab aksent bilan qo‘shiq aytib yuribdi ertalabdan beri: Haaaaydi so‘o‘o‘o‘yleeeeee... :)

@Ijoddardi

Ertalab uyg‘onib kerishsam, Mahdi kuzatib turgan ekan, bir jilmaydi-da, darrov xuddi mendek kerishishni boshladi...

Ovqatlanayotganda ham xuddi mendek suviga non botirib yeydi. Suvni stakanda ichsak, bo‘sh bardakni ko‘tarib suv so‘rab qoladi. Baklajkada ko‘tarib ichganimni ko‘rganda takrorlayman deb to‘kib qo‘ygandi...

Safinani qanday erkalayapmiz, yig‘laganda nima deb ovutyapmiz, qanday mimikalar qilyapmiz... hammasini kuzatib o‘tiradi. Biroz o‘tmasdan o‘rganib, aynisini takrorlayotgan bo‘ladi...

Rakovina quvuri yorilganida tuzatganimizni ko‘rgandi. Shundan beri uydagi klyuch va boshqa temir-tersaklarni yashirib yuramiz, oyna-poynani urib sindirmasin deb :)

Ayasining ovqatini maqtasam, uyam “Vaaau!”, “Zo‘y!” deb ishtaha bilan yeb qoladi. Aniq bilaman, ovqating yaxshi chiqmabdi desam Mahdi ham yemaydi...

Qo‘limdagi po‘choq-mo‘choqni chiqindi idishiga solsam, darrov uyni yig‘ishtirishga tushib qoladi. Kerak narsalarniyam idishga oborib soladi. Yerga tashlasam, axlatdagi “musor”larniyam pashshalab, aylantirib uyga sochib chiqqandi...

Ishdan charchab borganda kiyimlarimni veshilkaga ilish yoqmasdan yerga tashlardim. Dam olish kunimda e’tibor berdim, parkdan qaytgach shartta ust-boshini yechib, oyoq ostiga otib ketdi...

Bunday misollar ko‘p, esimga kelmagani qancha. Anglaganim, biz farzand tarbiyalamayapmiz, aksincha, u bizni tarbiya qilmoqda. O‘zimizga ko‘zgu tutmoqda!

Bolam o‘rganmasin deb uyg‘ongandan tortib kundalik yumushlarimiz, xatti-harakatlarimiz va og‘zimizdan chiqayotgan har bir jumlani nazorat qiladigan bo‘lganman. Sendan oladigan o‘rnaklarimiz ko‘p, Mahdi...

@Ijoddardi

Bayram arafasi ish kamaygan, onda-sonda buyurtma keladi, ham bu issiqda hech kim baliq yemaydi-da...

Kitob do‘konimizga post qo‘yaman deb telegramga kirsam, Jontemir aka kanalida she’riy konsert You Tube'ga chiqqanini yozibdi.

Shartta havolaga bosib, naq ikki soatligi uchun telefonni qulay yerga joylashtirdim-da, oshxonaning bir burchagida ko‘rishni boshladim.

Ishxonada turk, arab, afg‘on, turkmanlar bor, yonimdan o‘tgan-qaytgan telefonga qaraydi va “Ne biçim adam bu?!”, “Dervişi nereden buldun?”, “Adam ne yapmaya çalışıyor, bir de iki saatmış a!” deyishadi.

“Shoir!”, deyman, she’r o‘qiyapti, konsert beryapti, muxlislari tinglayapti deb tushuntiraman. Hozir ham bormikan bunday odamlar, bu boshqa nima ish qiladi, nahotki faqat she’r bilan yashab bo‘lsa deb hayratlanishadi kapitalizm suyak-suyagigacha singib ketgan “robot odamlar”...

Oradan bir qancha vaqt o‘tadi, atrofimda 4-5 kishi to‘plangan, yana ofitsiantu komi, avyorlar ham qiziqib kelishyapti. Ish yo‘q, bahona topildi ularga vaqt o‘tkazish uchun deb o‘ylayman.

Rasmga tushirish xayolimga kelmabdi. Bu manzarani ko‘rsatishim kerak edi sizga ham. Ularni bunday to‘planib, ekrandan ko‘zini uzmay tikilganini oxirgi marta “Galatasaray” va “Fenerbahche” o‘yinida ko‘rgandim. Qaysi fanatligidan, qaysi biri esa totalizator qimor o‘yinlarida pul tikkanidan :)

Pauzani bosdim. Menku taniyman bu bolani, azbaroyi qiziqqanimdan tomosha qilyapman, sizlar nega bunchalik termulyapsizlar desam, ustaboshimiz: “Aziz, vallohi nima deyotganini zig‘ircha tushunganim yo‘q, lekin she’r o‘qish ohangi boshqacha ekan, bu bolaning maza qilayotganini ko‘rib men maza qivordim!” desa bo‘ladimi :)

Haqiqatan zo‘r chiqibdi, she’rlar, musiqa, ohang, sahna, improvizatsiya, hatto Shahbozning “Hayyu chittigul”da Jontemir akaga jo‘r bo‘lolmay adashib ketgani ham tabiiy, samimiy. Oldindan rejalashtirilib, fit-fillion marta “repetitsiya” qilingan konsertlardan ancha baland voqea bo‘libdi bu!

Xayrli va bardavom bo‘lsin, kelasi she’riy konsertlarda qatnashish bizga ham nasib qilsin, aka. Maza qildim, ish, avans, oylik, ijara, kommunallar, dokument... deb yugurib yurgan holimda tin ovolishimga sababchi bo‘ldingiz. Yashasin, she’riyat, yashasin, adabiyot!

• Jontemir akaning “Janoza”sini ko‘rmaganlar bo‘lsa, havola: https://youtu.be/4dHvDD8B840?si=_S11kMDj0vdUPhIn

@Ijoddardi