“Turkkitap” jamoasi: kitobni kimlardan olyapsiz?

Abdulaziz - sobiq jurnalist, “Hurriyat”, “Yoshlar ovozi” va boshqa bir nechta davlat nashrlari muxbiri edim, “Factor books” nashriyotida SMM menejeri bo‘lib ham ishlaganman. Qisqagina shu.

Sitora - ayolim, birgalikda Toshkent davlat universitetining Filologiga fakultetini tugatganmiz. Hozir Anqaradagi Hacettepe universitetida magistratura o‘qiyapti, oilaviy Turkiyada yashaymiz.

Doston - O‘zbekistonga jo‘natgan buyurtmalarimizni qabul qilib olib, egalariga tarqatadi, Toshkentdagi Diplomatiya universiteti talabasi, jiyanim bo‘ladi :)

Ko‘pchilik gapga o‘qiganmisizlar, muomalalaringiz zo‘r, kuryer yigit (Doston) ham juda chiroyli gaplashadi, deyishadi. Sababi shundan 😅

Qolaversa, ayolim ikkimiz savdogarlar oilasidanmiz. Ayolim uyidagilari tadbirkor, kamina ham shunday, dadam ichki ishlar xodimi edi, ancha yillar oldin nafaqaga chiqib, savdo-sotiq bilan shug‘ullanadi. Bundan tashqari, er-xotin “tilchimiz”...

Hamd bo‘lsin, so‘nggi kunlarda safimiz karrasiga ko‘paydi, yangi kitobxonlar kelishyapti, turkcha kitoblar buyurtma berishyapti. Ammo kim o‘zi bular degan savol bo‘lishi tabiiy, qisqagina ma’lumot o‘rnida yozyapman bu gaplarni.

Begona emasmiz, xuddi o‘zlaringizga o‘xshagan talaba, oddiy insonlarmiz. Turkiyada yashab, ozgina bo‘lsa ham foydamiz tegishini xohlaganlardan birimiz. Tanishib oldik degan umiddamiz...

✉️Savol va takliflar uchun: @sitora_qarshiyeva

@turkkitap_uz - ko‘p o‘qing, oz to‘lang! 📚🛫

Juda pessimist bo‘lib yurgandim, hech narsa yoqmaydi, ishxonada 2-3 kishi bilan urushdim, O‘zbekistondagi tanishlar yozib qoldi kamiga, qayt deydimiyey, aql o‘rgatadimiyey, ishga chaqirishidamiyey...

Uyda sezdirganim yo‘q. Lekin kayfiyatim tushkun, atigi 10-15 kun oldingi beg‘am, xushchaqchaq, sog‘lom ovqatlanish va sport bilan shug‘ullanishdan boshqa o‘yi yo‘q Abdulazizni sog‘inib yuribman...

Bugun instagram algoritmi ishlab, nuqul holatimga mos videolar aylandi reelsimda. Keyin rahmatli ustoz shoir Anvar Obidjonning “O‘rtancha barmog‘im” she’riga duch keldim, qo‘lim qichib yurmaganmidi, shartta parodiya yozvordim :)

Bu shig‘ir adabiyot qoidalariga mos kelmaydi, ham yozmay qo‘yganimga ancha bo‘lib ketdi. Shunchaki quyilib kelgan ichimdagi gaplarni qaytargim kelmadi, sizlar bilan ham bo‘lishyapman😁

Hayotimni kovlab topgan
Kiringga o‘rtancha barmog‘im.
Yaramga tuz sepib, siqqan
Yiringga o‘rtancha barmog‘im.

Uyga qayt deb topib qo‘ygan
Ishingga o‘rtancha barmog‘im.
G‘iybat qilgan do‘stu tanish,
Xeshingga o‘rtancha barmog‘im.

O‘zing dono bilib bergan
Aqlingga o‘rtancha barmog‘im.
Faqat senga nafi tekkan
Naqlingga o‘rtancha barmog‘im.

Hayotimga suqib kelgan
Burningga o‘rtancha barmog‘im.
Ko‘rsam ko‘nglim ayniydigan
Turqingga o‘rtancha barmog‘im!

P.s. Jiddiy qabul qilmanglar 😂

@Ijoddardi

Oilangizga, ayolingizga qo‘ldan kelgancha yaxshi sharoit yarating, qanday orzulari bor, nimani yaxshi ko‘radi... gaplashing, sekin-asta bo‘lsa ham amalga oshiring!

G‘iybat emas, xulosa qilishingiz uchun ayni kunda o‘z ko‘zim bilan ko‘rib yashayotgan voqeani bo‘lishyapman...

Bir hamkasbimizning eri vafot etgandi, atrofida shoqollar o‘ralashib qoldi, xotini bo‘lsa bo‘lmasa hamma bevaning atrofida girdikapalak.

Juvon ham hech kimning ra’yini qaytarmaydi, hammaga yaxshi muomala qiladi, orzularini aytadi, sovg‘alar oladi, hatto pul berganlar bor ko‘nglini olish uchun...

Opaning tuvak gullarga, noodatiy uy sharoitida yetishtiriladigan mevalarga mehri baland ekan. Eri hayotligida hech ro‘zg‘ordan orttirisholmabdi. Kimdirga gul oldirtirdi, kimga malina, smorodina ko‘chatlarini, piyozgullar vahokazo.

Ustalar istagani olib bersa, xuddi yosh boladay quvonadi, qayta qayta rahmat aytadi. Bo‘lmasa, to‘rt farzandi bor, kap-katta ayol, eri o‘tganiga endi 3-4 oy bo‘ldi, hali tuprog‘i sovimagan...

Mahrni so‘raganidan kattaroq beravering, qo‘rqmang, enasiga eltib bermaydi. Moliyaviy yostiqchangiz imkon qadar baquvvatroq bo‘lsin, qurbingiz yetsa, uy oling, boshpana hamma narsadan muhim.

Opa xo‘jayini o‘lgach, 1 hafta o‘tar-o‘tmas ishga qaytgandi, chorasizlikdan, ijarani to‘lash kerak, kommunalkalar, to‘rt bolaning xarajati, qarzlari...

Aytgancha, qarz olmang, kreditga yaqin yo‘lamang. Opamiz haligacha rahmatli erining qarzlarini to‘lash bilan ovora, kreditlarni yopyapti yolg‘iz boshi bilan, kamiga yana uyoq buyoqdan qarz bo‘lyapti yetkaza olmasdan...

Hammayam shunday demoqchi emasman. Lekin bu tomonlarini mustahkam ta’minlab qo‘yingki, Xudo ko‘rsatmasin tap etib sizga nimadir bo‘lsa, ko‘zingiz orqada qolmasin, uydagilar qiynalishmasin...

@Ijoddardi

Ertaga maosh tarqatiladi va oyligimizga qancha pul qo‘shilgani - “zam” masalasi gaplashiladi...

Bir haftadan beri boshliq tirnoq ostidan kir qidirib yuribdi. Arzimagan narsalarga urushyapti xodimlarni, dakki beryapti.

Ishchilar ham borini berib, jon kuydirib mehnat qilishyapti. Hamma tishini mahkam bosgan. Ko‘proq “zam” olish ilinjida...

Ertaga katta mashmashalar bo‘lishi aniq. Masalan, menga kam pul qo‘shilsa, e’tiroz bildiraman, rahbar shartta o‘tgan kunlardagi “minus”larni sanaydi: ko‘p telefon o‘ynaysan, janjal qilding, tozalik qilmading vahokazo.

Hamma “qurollanish” bilan ovora xullas. Boshliq kamroq pul beray deydi, biz ko‘proq pul qo‘shtiraylik deymiz. Turklar pulga juda qattiq bo‘ladi, harholda men ko‘rgan, tanigan rahbarlar shunday, boshqalarni bilmayman...

Hayotim faqat oyning beshinchisi va o‘n beshinchisidan iborat bo‘lib qolgan. Boshqa narsa yo‘q. Ish uy, uy ish...

Gazetada ishlaganimda, muhim kunlar, kasb bayramlarimizni kutardik. Yozib yurardim hatto, material tayyorlardimda sahifani to‘ldirib. Tayyor mavzu edi bu. Fasllarga bag‘ishlab she’rlar, badialar yozilardi, soha vakillari bilan intervyular, ehhe...

Endi hech biri ahamiyatsiz, kuz kelganini kecha bilibman. Mustaqillik bayramimiz o‘tibdi orada. Hatto to‘yimizning uch yilligini unutgandim, 4-5 kundan keyin ayolim eslatdi men ham e’tiborsiz qoldiribman deb. Katta hayot qozonida qaynash shu bo‘lsa kerak...

Hammasida bir xayr bor, Xudo barakasini bersin, davom etaveraylikchi, oxiri bir gap bo‘lar...

@Ijoddardi

Bu ham bir davr, hayotning muhim bosqichi deb o‘ylayman...

Ertangi kunimizda katta tramplin vazifasini o‘tashiga ishonaman. Va bu jarayondan ayolim bilan birga o‘tayotganimiz yagona taskin beradigan narsa.

Balki hali eng katta sinovlarimiz oldindadir. Qadarga roziman. Shundayam afsuslanmayman, muhimi, tajriba to‘playapmiz, farzandlarimiz qachondir chetda yashayman desa, real ishlaydigan maslahat va  tavsiyalarimiz bor, yo‘l yo‘riq ko‘rsata olamiz...

Umuman, tushkun postlarimga qaramang, plyuslari ko‘p oila bilan chetda yashash, yoki O‘zbekistonda bo‘lsa ham birgalikda sinovlardan o‘tishning...

Masalan, ertaroq uylanmaganimga ko‘p afsuslanaman. Muhimi, o‘z yarmingizni topa olish, aniq yuragingiz sezyaptimi o‘sha inson sizga tegishliligiga, oila qurishni kechiktirmaslik kerak...

@Ijoddardi

Onam biznikiga kelganlarida "bolam sizlar robot ekansizlar", deb xafa bo'lganlarini esladim. Turkiya shunaqa faqat ish, ish:)
O'ynab-kulish uchun yo juda boy bo'lish kerak yoki jinni:))

She’r kayfiyatiga qaytganman shu kunlarda. Ko‘p narsa qoraladim, o‘chirdim, o‘qidim vahokazo...

Bitta ilinishga arziydiganroq nimadir yozilib qoldi, o‘chirishga ko‘zim qiymadi, tushlikka o‘qib yuborasizlarmi?

Ertak

Ertak so‘nggi bilan boshlandi bir kun...
Dadaxon Muhammadiyev

Baxtli yakun bilan... boshlandi ertak!
Hamma mamnun edi bu debochadan...
Sehrlangan qiz yo‘q, yo baxtsiz erkak,
Shodliklar ufurib turar barchadan.

Keyin... O‘lmas Kashshey tuxumi sindi,
Zaharli olmani yedi malika.
Quvonch bir chekkada og‘ir xo‘rsindi,
Ko‘ngilda g‘ulg‘ula, qo‘rquv, tahlika.

Qo‘shboshli ajdarho, yovlar, qaroqchi...
Birda bor, birda yo‘q sinovlar keldi.
Borsa kelmas yo‘llar, dushman, ayg‘oqchi...
Yo o‘ngga, yo so‘lga... tanlovlar keldi.

Dunyo Ko‘hi Qofdir, insonlar Semurg‘,
Ertakdek boshlangan jangga mahkummiz.
Kurashsak, yuzimiz bo‘ladi yorug‘,
Yo‘qsa... oxirgacha baxtdan mahrummiz!

©Abdulaziz AHMAD
05.09.2026

@Ijoddardi

* * *

Mehnat, senga sharafshon!
Hayt, minnatsiz oshingdan!
O‘ynab qo‘yay, bir kunda
Tugagan maoshingdan!

Umrin yeding otamning,
Hunaringga ming qulluq.
Meni ham o‘z domingga
Tortyapsan, to‘ymas maxluq!

Yo‘l qaratding, onamni,
Menda vaqt yo‘q, joningdan!
Tortgan sari cho‘zilgan
Bahona - kamoningdan!

Urib qolding kunimdan,
O‘g‘irlading yoshlarim.
Choy-chaqangga almashdim
Bolamning ko‘z yoshlarin.

Qachongacha bu o‘yin,
To‘xtaydimi charxpalak?
Yana qancha odamlar
Seni deb bo‘lar halak?!

Yasha, bor bo‘l, ofarin!
Sen borsanki, qornim to‘q.
Cho‘ntagim bor qappaygan,
Lek qara, hech vaqom yo‘q.

Mehnat, senga sharafshon...

©Abdulaziz AHMAD
05.09.2026

@Ijoddardi

Bugun oylik oldim, kamiga dam olish kunim, dushanba tongi, ajoyib havo, gazda menemen pishyapti…

Bir oʻzim buncha xursandchilikni koʻtarolmasdim. Quvonchdan yuragim yorilib ketmasin deb Sitoraga gul olib berdim.

Hech qanday sababsiz. Shunchaki borligi uchun. Ancha boʻlgan ekan sovgʻa bermaganimga. Orxidiyani jonli birinchi marta koʻryapman, hidsiz boʻlarkana, oʻylaganimdan ancha chiroyli ekan deb ogʻzi qulogʻida yuribdi…

Alhamdulillah!

@Ijoddardi

Tanishing, bu bizning kolyaska!

Mahdi 4-5 oylik edi taxminan, shungacha kolyaskamiz boʻlmagandi, yangi kolyaskalarga qarab yurardik, narxi qimmatlik qilardi. Ham Sitora xohlagandek emasdi ularning hech biri…

Keyin ikkinchi qoʻldan oʻzimizning kolyaska duch kelib qoldi. Pandemiya davrida olingan, deyarli qoʻllanilmagan, uyda joy egallamasin deb sotilayotgandi. Deyarli yangidek, hamma narsasi bor, Sitora xohlaganining aynisi edi bu.

Yangisi 12-13 ming lira edi oʻshanda, biz buni atigi 2 ming TLga olganmiz. Baraka topib ishlatyapmiz, koʻp duo qilamiz…

Bozorga borsak, arava boʻladi bechora. Gʻing etmay narsalarni tashiydi, joni baquvvat, koʻz tegmasin!

Uyda milliy ovqat pishirib sotgan kunlarimiz bir tomoniga Mahdi oʻtirsa, ikkinchi uchiga buyurtmalarni qoʻyib ovqat tarqatganmiz. Beminnat xizmat qilgan!

Oʻzbekistonga kitob joʻnatamiz, ba’zan savdo yaxshi boʻlib, 20-30 kilo kitobni kolyaskaga terib kargo ofisiga topshirib kelaman, kilometrlab yoʻl bosib. Men eslamagan yana qancha narsa ortilgan bunga, ehhe…

Mahdini ulgʻaytirib, endi Safinani ham katta qilyapti, umri uzoq boʻlgur! Buni bizga Xudo yoʻliqtirgan, aniq, agar yangisini falon ming liraga olgan taqdirimizda ham bunchalik chidab berishi noma’lum edi.

Yana bir muhim narsani kolyaskaga ortib uyga qaytdik kecha. Agar taksida kelganimizda, narxi qimmatligidan tashqari bu matox uchun ham alohida pul toʻlatardi haydovchi. Ancha xarajatdan qutqarib ketdi xullas.

Savol: Kolyaskadagi matox nima, topishingiz oson boʻlishi uchun: biz uni anchadan beri orzu qilib, erishishni kutib yurardik, va nihoyat yetishdik!

@Ijoddardi