Yo‘q aytinglarda, bundan ortiq nima kerak erkak kishiga😁

Pulmi, mashina, uy-joy, boylik, mansab, obro‘-e’tibor... mana shu rasmdagi halovat bo‘lmasa, hammasi bir tiyn, ishonavering!

Eng avval oiladagi xotirjamlikni ta’minlasangiz, qolgani asta-sekin bo‘laverarkan Xudoning izni bilan, vaqti-soati kelib. Alhamdulillah!

@Ijoddardi

Kecha ishdan chiqib, suvga pul tashlash uchun suvmatik qidirib sarson bo‘ldim. Yarim kechasi 1 ga yaqin uyga kelsam, eshik tagida ovqat turgan ekan...

Sitora buyurtma bergandir, deb uyga olib kirdim. “Burger King”dan 6 ta burger, uchta kola, kartoshka frilari bilan, katta-katta paketda edi. Sitora ovqat aytmagan.

Aloqa markazi ishlamadi, ish vaqtidan tashqari bo‘lgani uchun uzib tashlayverdi, gudok ham ketmadi. Mas’ullar bilan nomiga emas rostakamiga harakat qilib bog‘lana olmadim.

Buyurtma 20:30 da berilgan ekan, taxminan 21:00 da uyga kelgan bo‘lsayam, 3-4 soatdan beri eshik tagida turgandi. Ancha sovib qolgan...

Buyurtmachining ham telefon raqami yozilmagan, faqat ismi va familiyasining bosh harfi bor. Keyin uy manzili, bizdan narigi ko‘chada yasharkan.

Bechora kuryer adashgan ko‘rinadi. Yana shuncha narsayaaa dedikda, achib qolmasin deb er-xotin yeb oldik. Sog‘lom ovqatlanish ham tagiga oldi shunday qilib :)

Bir vijdonim qiynaladi, bir men olmasam baribir achib qolardiku deyman. Xullas, yo‘q joydan uyga kelib qolgan uch kishilik burgerlarni kola va kartoshkasi bilan ikki kishi paqqos tushirdik kecha.

Endi Sitora eshikda yo‘l qarab o‘tiribdi, kuryer mobodo kecha adashgan ekanman, eshik tagidan ovqat oldingizmi deb kelib qolsa, pulini to‘lab yuboramiz. Juda g‘alati va kutilmagan voqea bo‘ldi...

@Ijoddardi

Bugun bo‘sh qoldim deguncha instagramga reels olish uchun tayyorlandim, ma’lumotlar to‘pladim, bilganimni yanayam aniqlashtirdim...

Endi vaqt topib, videoga olish uchun kerakli manzilga borib kelsam bo‘lgani, hammangiz taniydigan, kitoblarini o‘qigan yozuvchi haqida ko‘pchilik o‘zbeklar bilmaydigan ma’lumotlarni ulashaman, nasib!

Faqat taxminimcha, video montajlari bilan ikki daqiqadan oshadigandek. Yuqoridagi video qisqaligi uchun tez “rek”ka chiqib, 70 ming+ ko‘rilgandi.

Bu uncha ko‘p “prosmotr” yig‘mas, lekin tayyorlashni ich-ichimdan xohlayapman. Qo‘llab yuborishlaringizga ishonaman!

Menga kuch va ishtiyoq tilash uchun istalgan reaksiyani bosib keting...

@Ijoddardi

Video tayyor boʻldi, instagramga chiqarib qoʻydim, endi uxlasam
boʻladi…

Soat 4 dan oʻtdi, ertalab 9 da ishga ketishim kerak, lekin charchamadim, maaazza, yengil nafas olyapman borku, anchadan beri oʻylab yurgan videomni bitirdim-da!

Aslida, bir nechta manzillarga borib, videoga olib, storytelling formatida gapirib, keyin montaj qilmoqchi edim. Lekin unga vaqt kerak, hali-beri e’lon qilmasdim videoni.

Tinchgina “ozvuchka” qilib qoʻya qoldim, jiddiy va sirli mavzu, shaxsan oʻzim Sabahattin Alining bunday fojiali hayoti bor deb umuman oʻylamagandim…

Video instagramda “probniy”da turibdi, qiziq boʻlsa, sizlarga ham ulashaman! 😁

@Ijoddardi

“Kürk Mantolu Madonna”, “Sırça Köşk”, “İçimizdeki Şeytan” va boshqa asarlari, she’rlarini o‘qigandimu, lekin yozuvchi bunchalik alg‘ov-dalg‘ov yashaganini xayolimgayam keltirmagan ekanman...

Bu voqeani o‘rganganimdan keyin uning kitoblarini, she’rlarini yana qayta o‘qishni boshladim, to‘g‘risi, endi boshqacha ta’sir qilyapti!

Videoning tiniq variantini ham ulashyapman. Instagram ishlatadiganlar uchun havola pastda, o‘tib qo‘llab-quvvatlasangiz xursand bo‘laman!

• https://www.instagram.com/reel/DdnDwbtqssU/?stkn=OXMxMmJqazhvOG1t

Like comment repost... ayamasdan bosib tashlayvering, video uzunligi uchun ko‘pchilikka yetib borishida yordamingiz kerak. Rahmat!

@Ijoddardi

Ishxonada ekstra garson(ofitsiant)lar bor, kechki 6 larda kelib, 11 gacha ishlashadi...

Kunduzi rasmiy ishlari bor, ichki va tashqi ishlar vazirligi, kadastr qo‘mitasi va hokazo joylarda faoliyat yuritishadi.

Oylik daromadlari to‘plam 150 ming (36 million so‘m) atrofida ekan. Gaplashib hayron qoldim, yetmaydi, qarzlar ko‘p, majburman, deyishadi...

Ular o‘qigan qancha yil, me’mur bo‘lish, bunday ishga kirish uchun necha imtihonlardan o‘tishgan, kichkina bo‘lsa ham bitta kursining egasi. Lekin...

Ustaboshimiz esa hech qayerda o‘qimagan, 35-40 yildan beri ovqat pishiradi. Daromadi ham ularchalik emas, qo‘shimcha ishiyam yo‘q...

Lekin qarzni yomon ko‘radi, hech kim bilan oldi-berdisi yo‘q. Yoshi 60 dan oshgan, goho farzandlarimga pul tashlab ber deb telefonini beradi, doim oshiqcha 100 ming (24 million so‘m) liradan ko‘p pul bo‘ladi hisobida...

Yaqinda o‘g‘li oddiyroq mashina olayotgan ekan, ustayam pul qo‘shibdida, Honda Civic' rusumli inomarka olishdi. Bugun esa “hoşuma gitti” deb oltin tasbeh ko‘tarib kelibdi, naq 75 ming (18 million so‘m) liraga olganmish.

Qiziq paradoks, me’mur garsonlarga havas qilay desang, umri ishxonada o‘tib, qancha topsayam qarzda yuribdi. Usta esa qarzi yo‘q, puli bor, lekin yoshi 60 dan o‘tib, oshxonada qora mehnat qilyapti...

Xullas, qanday yashash kerakligi bo‘yicha aniq qonun-qoida yo‘q. Oxirgi manzil bitta, hamma har xil yo‘llar bilan boradi. Xususiy ish, davlat ishi, maosh... shunchaki vosita. To‘g‘ri yo‘ldan, halol luqmasidan adashtirmasin!

@Ijoddardi

“Mehnat” degan shig‘irimdan qadrdon akalar sun’iy intellektda qo‘shiq qilishibdi...

Anchadan beri gaplashmagan, ko‘rishmagan jigarlar bilan bahonada yozishganimiz quvontirsa, bir tomondan xuddi she’rim gazetada bosilganiday xursand bo‘ldim.

Sezon, baliq ko‘p, o‘zim yozgan so‘zlardan bo‘lgan qo‘shiq jo‘rligida ishlayapman, maza, sizga ham ulashyapman...

@Ijoddardi

Sun’iy intellekt baribir jonli ijroga teng kelmaydi a, eski kunlar esimga tushdi...

Videodagi Yusuf Eltoyev akamiz, ayni hozirgiday kuz payti bir shig‘ir yozgandim, aka gitarada bastalagandi. Hozir mashhur qo‘shiqchi bo‘lib ketgan :)

Adashmasam, hali o‘qishim tugamagandi o‘shanda, “Factor books”da SMMchi edim, Shavkat aka ham hozirgiday katta odam bo‘lib ketmagan, kamina ham ertasidan bexabar poytaxtda, osmonlarda uchib yurardim...

Yillar barchamizni har yerga uloqtirdi. Faqat onda-sonda eslanadigan xotira qoldi u kunlardan. Shuning ham boriga shukr...

* * *

Yuuuuuraman.
Xazonlar aro
Pista kabi chaqib vaqtimni.
O‘rlab turar
Tinmay bo‘g‘zimdan
Tutunlari dardimning… 

Suuuuuuraman.
Ming xil xayollar,
O‘ylarim ham g‘alat, betartib.
Uzun yengim
Qo‘yadi gohi
Yuragimning yoshini artib.

Tuuuuuuraman.
Kichik bekatda
Dunyodayin yuragim bilan.
SHE’R yozaman
Qahratonda ham
Sarlavhasin qo’yib
“Baxt”, “Ko‘klam”...

@Ijoddardi

Uylangandan keyin hayotim go‘zal bo‘lishi kerak, yomon yashashni o‘zim ham eplay olaman, deb yurardim bo‘ydoqligimda...

Talabaligim Toshkentning klapa va tarakan bosgan ijara uylarida kechgan. Hatto bir marta dadam qishloqdan mehmonga kelib, nima bu ahvol, bomjlarga o‘xshab yasharkansan, degani esimda :)

Xullas, mana shu travmalar sababmi, oila qurganimdan keyin Toshkentning markazida, yaxshi sharoitdagi uyda yashashga maksimal harakat qilganman.

Bundan uch yil oldin ijaraga 450$ to‘lardik poytaxtda. Oxirgi payt hatto oyligim kechikishni boshlab, ijarani to‘lolmasdan, ukamdan yordam olib uzganman to‘lovlarni...

To‘ydan 3-4 oy o‘tib, Anqaraga keldik. Ijara uy qidirishlar, kalamush bosgan eski binolar, mehmonxonalarda yashadik. Eski uyimiz devorlari qanday pang bo‘lishini, pashshadan turib bo‘lmasligini eski kuzatuvchilar yaxshi eslasa kerak...

Biz Anqarada rostakamiga ulg‘aydik, bir-birimizni yaqindan tanidik. Sabr qilishni o‘rgandik. Bir xonali uyda milliy ovqatlar pishirib sotganimizu, qahraton qishda Mahdining qo‘l-u burni qizarib o‘qishga qatnaganimiz esimda...

Yaxshi-yomon kunlardan o‘tib, shu yergacha yetib keldik. Bugun orzularimizda yashayapmiz. Ichsak choyimiz, yursak yo‘limiz bor, baxtlimiz.

Ko‘rgan har bir kunimizga, yashagan har bir yaxshi-yomon onimizga shukr, xulosa va tajribalarimiz bir dunyo, hech biri behuda ketmadi, bundan ham go‘zal bo‘lishiga ishonaman. Alhamdulillah!

@Ijoddardi

Nonushta. Televizorda “soyuzfilm” ishlagan oltin baliqcha multfilmi. Magistr ayol va baliqchi er suhbati:

- Noshukur xotin, hech orzulari bitmaydi bu ayol zotining. Qancha bo‘lsa kam...
- Kampir ideal obraz! Imkoniyatdan foydalanyapti, yaxshiroq hayotga intilyapti, yerto‘lada teshik tog‘orasi bilan qachongacha yashaydi...
- Yonidagi choliniyam o‘ylashi kerakda. Bechoraning ahvolini qara. O‘zi yaxshi odamlarga yashash qiyin shunaqa!
- Qarigunicha sharoit qilish kerak edi unda. SSSR propagandasi bu. Kambag‘allik yaxshi, boylikka intilish yomon, oddiy bo‘lib, teshik tog‘orada yuraveringlar degan “mesaj” berilyapti tomoshabinga...

Multfilm davom etadi. Baliqchi chol dengizga borib, “ey oltin baliqcha, endi kampirim qirolicha bo‘lishni xohlayapti, uyimizniyam qasr qilib berarkansan...” desa, ayolim:

- O‘zingga sog‘lik, kuch-quvvat so‘ra. Yoki xotining uchun nima so‘rasang, o‘zinggayam bir narsalar ol-da, kampirdan orqada qolib ketma. Ja norozi bo‘lsang, hayotimdan kampirim yo‘qolib qolsin de, maza qilib yasha keyin!
- Yaxshi ko‘rarkanda, mayli o‘zim oddiy baliqchi bo‘lib, kambag‘al holimda qolib ketsam ham kampirimning orzulari amalga oshsin deyapti...
- Yaxshi ko‘rgan odam dardini dengizga doston qilib, baliqqa xotinini yomonlab o‘tirmaydi. Baliq tila tilagingni deb turgan bo‘lsa, ochiqcha so‘rashga or qilib, avval kampirini yomonlab, keyin dardini aytyapti, toje mne!
- Ovqatingni yeda, ko‘p gapirma!😂

@Ijoddardi

Rasmdagi ikki qorako‘z Anqarada yashayotganiga 25-sentabr kuni to‘liq uch yil bo‘libdi. Aniqrog‘i avval men, Sitora o‘n kundan keyin orqamdan kelgandi...

“Abdulaziz xotinining orqasidan ketibdi”, degan gap-so‘zga qolmaslik uchun emas, albatta. Men avval kelib, joylashib, ish va kvartira topishim kerak edi :)

Xullas, mana shu uch yillik munosabati bilan xulosalarimni yozib, bir aqllilik qilsam:

• Bu davrda ishlash koeffitsientim karrasiga oshdi. Kunda 12 soat ish, bir soat ishga kelish, bir soat uyga qaytish, kunlik 14 soatimni ishga bag‘ishlashni o‘rgandim. Agar shu holatimda eski 8 soatlik rasmiy ishimga qaytsam, har qachongidan ko‘proq qadriga yetsam kerak :)

• Vaqtida oylik olishga moslashdim. Har oyning 5-sanasi maosh kuni, 15-si avans, umuman kechikmaydi. Agar shu vaziyatimda eski ishimga qaytsam, avvalgidek 1-2 oylab maosh kechikishlariga ortiq sabr qilolmasam kerak...

• Farzand tarbiyasi bo‘yicha to‘liq shu yerda tushunchalarim shakllandi. Agar o‘zimizda bo‘lsam, jamiyat va mentalitet ta’sirida bunchalik mehribon ota bo‘lolmasdim, deb o‘ylayman. Yanayam bilmadim...

• Jamoat transporti qulayligiga, ijara uyda yashashning rohatiga moslashdim. Avvalgidek kreditga bo‘lsayam mashina, uy olish fikrlarim yo‘qolib ketgan. Qachon Xudo berib, imkoniyatim yetsa olaman bularni, qarzga umuman yaqinlashmayman...

• Ish tanlamaslikni o‘rgatdi Turkiya. Avval restoranda ofitsiantlik qilish fikri bo‘lgan bir-ikki marta, lekin kursdoshlar kelib qolsachi, hamkasblar ko‘rib qolsa nima degan odam bo‘laman degan g‘urur ustunlik qilardi. Hozir ummmuman farqi yo‘q, hamma ishni qilib ketaveraman. Mehnatning aybi yo‘q...

• Audiokitob o‘qishga mukkamdan ketganman. O‘zbek va turk tillaridagi ovozli asarlar, radiospektakllar jonu dilim, “Martin Iden” eng sevganim. O‘zbekistonda 8 soat ishlab mutolaaga vaqt topolmasdim masalan, chorasini qilsa, buyam bo‘larkan...

• Moliyaviy savodxonligim oshdi, pulni hisob-kitob qilish, sarflash, saqlash bo‘yicha tajribalar to‘pladim, oylik 15 million daromadi bo‘la turib, banklardan mikroqarzga botgan Abdulazizdan kam pul topsayam qarz bo‘lmaslik, pulini tejab sarflash darajasiga olib keldi musofirlik.

• Til o‘rganish ko‘nikmalarimni kashf qildim. Nega turk tilini ertaroq o‘rganib, shu o‘lgur sertifikatni olib qo‘ymagan ekanman deb afsuslandim. Qiyin, o‘rganishim imkonsiz, mening miyam yangi tilni qabul qilmaydi degan qarash bo‘lardi, yo‘q, boshimga tushsa bulbuldek sayrarkanman...

• Xo‘jako‘rsinga poyga o‘ynab, baxtli ko‘rinishdan ko‘ra, chinakamiga baxtli bo‘lib yashashni o‘rgandim. Odamlarning fikri umuman ahamiyatsiz. Nima deb o‘ylashlari zarracha qiziqtirmaydi.

• Foydali bo‘lishni o‘rgandik. Uyda milliy ovqat pishirib sotganimizu, O‘zbekistonga turkcha kitoblar jo‘natayotganimiz... kimgadir nafing tegsa bo‘ladigan hissiyotni bir tatib, voz kecholmay qolganmiz. Ayni damda bu yerda turib ko‘pchilikka foydamiz tegayotgandek nazarimda...

P.s. Xayolimga kelganlari, aytishni xohlaganlarim bular. Yana qancha sanalmagan jihatlar bor. Nima bo‘lganda ham, oxiridan suyuntirsin, yuzimiz va yo‘limizni O‘zi yorug‘ qilsin. O‘rgangan ilm, tajriba hamda xulosalar zoye ketmasin ilohim. Uch yilligimiz bilan! :)

@Ijoddardi

Dadam ukam ikkalamizga Erkinjon Turdimovni ko‘p misol qilib ko‘rsatardi...

Qo‘shrabotlik, oddiy qishloqdan chiqqan odam, o‘qinglar, ming korrupsiyayu pul rol o‘ynaydigan joyda ham tarozining pallasini tenglashtirish uchun kamida bitta ilmli odamga joy ajratiladi, derdi.

Dadam harbiy bo‘lib ishlagan payti janob Turdimov Navoiy viloyati hokimligiga tayinlanadi. Moliyachi odam hududni qanday boshqaradi, iqtisodchidan hokim chiqadimi deb ko‘p norozilik bo‘lgan ekan o‘shanda.

Lekin Navoiyni uzoq yillar gullatdi, keyin Surxondaryo, Sirdaryo... Umuman, Erkin Turdimov bilan bog‘liq ko‘p hayotiy hikoyalar eshitganman dadamdan, hamisha havas qilaman bu odamga. Videolari, xalq bilan muloqotlarini maza qilib ko‘raman.

Endi bo‘lsa, ta’lim va ilm-fan vaziri bo‘ldilar. Rostakamiga quvondim. Bo‘larkankuyey deb yubordim xabarni ko‘rishim bilan. Internetda sizib yurgan vazirlikka nomzodi qo‘yilishi ehtimoli bor piarchilardan hafsalam pirrrr bo‘lib yurgandi ochig‘i.

Bu inson jar yoqasidagi ta’lim tizimini qutqarib qololishi, pedagoglarni mansab tegib qolgan har qalang‘i qasang‘i tashkilotning tazyiq va bosimlaridan himoya qilishi, dangal, jaydarichasiga katta ishlar qilib yuborishiga negadir chin dildan ishonyapman. Yanayam vaqt ko‘rsatadi...

Menimcha, ta’lim tizimiga aynan mana shu inson kerak edi, muammolarni ichidan biladigan, boshqaruv salohiyati yuqori, har xil laganbardorlar gapiga kirmaydigan vazir.

Haligi “piarchi”lar esa yo‘q Singapur ta’lim tizimi, yo‘q Finlyandiya ta’lim tizimi, yo‘q Turkiya tajribasi deb tizimni battar rasvo qilishi aniq edi.

Xayrli bo‘lsin, xalqumdan oldin xalqini o‘ylaydigan amaldorlar, vazirlar ko‘payaversin!

@Ijoddardi

11-oktabr ham bir zumda yetib kelibdi. Ochigʻi payqamay ham qoldim.

Ertaga kechki payt 20:00 da yappa yangi guruhda 0 dan dars boshlaymiz, qatnashmoqchi boʻlsangiz tezroq menga yozing.
@Shaxnoza_filolog profilidaman, qizlar.

Kanalimga va kursimga qizlarni taklif qilinglar, savob ish qilish kerak...😁

https://t.me/Shaxnoz_filolog

Ertalab yangi baliqchi kelgandi, yoshroq turk yigit...

Ish ko‘p, hafta oxiri. Tuzukroq gaplashishga, tanishishga vaqt bo‘lmadi. Kechga tomon rostakamiga bezor bo‘ldi bechora, yugur-yugurdan charchadi...

Bosh ustamiz hadeb ish buyurib, yangi ishchiligi uchun uni qiynayvergani joniga tegdi va bizning yonimizda: “Namuncha ko‘p gapirmasa bu qariya, kim o‘zi bu, kim obkelgan, qayerdan kelib qolgan bu yerga?!” dediku.

Yonimda ustaboshining o‘g‘li Furkan bor edi, birdan tutoqib ketdi. “Sen nima deyapsan, otam bo‘ladi” deb yoqalashib ketdi ikkovi. Men ularni ajratish bilan ovvora.

Bir zumda boshliq xabar topdi, yetib keldi va yigitning haqini bermasdan ishdan haydadi.

Xulosa: Yangi ishga borganingizda maksimal tilingizni tiying, kamida shunday holga tushmaslik uchun!

@Ijoddardi

Bir ekstra ishchi bor edi, kunduzi Anqara shahar hokimiyatida ishlab, kechda yordamga kelardi. Biz 12 soat ishlab oladigan pulimizni soat 18:00 dan 23:00 gacha ishlab topardi...

Yaqinda oylikka qancha qo‘shilganidan gap chiqdi, suhbat orasida maoshimni aytib qo‘yibman. Men sigara ichib kelaman dedi-da yarim soatcha yo‘qoldi odam.

Keyin boshliq meni xonasiga chaqirdi, yo‘lda haligi ekstrachi bilan qarshilashdik. Haqqingni halol et, uka, menga nega muncha zam berdingda, Azizning oyligiga shuncha qo‘shibsan deb rahbarga shikoyat qildim, dediku.

Men ancha gap eshitdim. U odam esa ishdan haydaldi. O‘rniga boshqa ekstrachilar kelishgan. Shu voqeadan keyin birov birovning maoshi bilan qiziqmaydi...

Xulosa: maoshingizni hech kimga aytmang. Ertaga boshingizga balo bo‘lishi mumkin :)

@Ijoddardi