تعدّتك المشاريه، وجفـاك اللوم

"وين أسج منّك؟ وأتليها وأعيش الدور
وأنا حالف أوصي على طيوفك..عيالي"

-بداح أبن الذيب
جسّد شعور بعض المشاعر اللي من كبرها وثقل قيمتها ووزن غلاها تحس إن حتى عيالك بيتوارثونها وراك

‏ولهتك يا النديم اللي على صافي وفاك اضرمت
‏بصفحة ذكريات العام واللي من ورا العامي

‏أحسب إنك تيمّم باتجاهي وين ما يمّمت
‏واثر ما انت بورايّه في الطريق ولا انت قدامي :(

عناد الشيبان كان حنون لما قال؛
‏"وأنا على رجوى لقى واليا نويتي ترجعين
‏المقدره عند الغلا..و العفو عند المعذره"

بينما (لأ) قسى وقال؛
عجزت أسامحك لجرحٍ أجامل حرّته للحين
أنا آسف..هالمره العفو قد فاق مقدرتي.

"فالحبّ والموت لهما أوان"

لكن القاعدة كسرها أبن قضعان لما قال؛
‏"يا عظيمة.. كل شيٍ له حدود وله نهاية / لكن إنتي ما وقفتي عند حدّك، يا عظيمة"

"لو إن الزمن قادر يرجعك، بين يدي
من يرجعك في نظرتي؟ مثل ما كنتي"

وفي رواية أُخرى
‏"من كثر ماهي بـ توجع طيحتك من عيني
‏احسب ان عيوني الثنتين طاحت معها"

المُحب قليله بعينك واجد، ويا كثره كثراه
لو رسالة منه، تخليك مبتهج ثلاث شهور فما بالك لو كانت نظرة أو إلتفاته وما طرّاه الشعر في هالأمر

‏"مكتفي باللي يجي منك من باب الوصال
‏إن عجزت تسوي الصعب..سو المفترض"
وأيضاً
‏"أنا فقير المواصل وانت كلك نظر
‏ترى الفقارى.. قليلك يبهّج صدورها"

( أنا اليوم شرهاتي على الطيب..ما تعنيك )
مزيد الوسمي، قفّل طيبة الخاطر وإنكساره
في هالشطر

"وشلون طحت انا من عيونك السود
وانا من عيون الرياجيل ما طحت"

مرات، تشاء الأيام والأقدار
أن خلِّك..ينثر على جرحك ملح، ويزيد طعنتك طعون..وتعددّت الأبيات في ذلك

منها هذا البيت الجميل
"جيتي وقلت الجرح يوم أقبلت، هاااان
وأثرك على الجرح القديم..أرتكيتي"

وأيضاً
"‏جيتك وأنا جرحي ندي.. ولابغيت إلا الضماد
‏ولا دريت إن الضماد أقسى من الجرح الندي"

وتغنى أبو نوره أيضاً

"والله ما أنت بميراث جدي وأبي
التعفف كرامة..والسماح السماح"

- عن الخاطر إذا طاب

اللهم إرحم كل عزيز على قلوبنا، وإجعل قبره روضة من رياض الجنة، وإجعل مقامه في جنات النعيم مع الأنبياء والشهداء والصالحين