«Imkon ta’lim»нинг янги филиали — ёшлар келажаги учун яна бир имконият

Наманган шаҳрида таълим соҳасида 2020 йилдан буён самарали фаолият юритиб келаётган «Imkon ta’lim» ўқув марказининг навбатдаги филиали фойдаланишга топширилди.

Бугунги кунда марказнинг мавжуд филиалларида 1 000 нафардан зиёд ўқувчи тарих, она тили ва адабиёт ҳамда чет тиллари йўналишлари бўйича таҳсил олиб, ўз билим ва кўникмаларини мустаҳкамлаб келмоқда. Янги филиал эса 400 нафар ўқувчига мўлжалланган бўлиб, ёшлар учун сифатли таълим олиш ва ўз салоҳиятини рўёбга чиқариш имкониятларини янада кенгайтиради.

Марказ фаолиятининг эътиборга молик жиҳатларидан бири — унинг олий таълим муассасаларига кириш бўйича 95 фоизлик натижага эришиб келаётганидир. Бу кўрсаткич таълим жараёнига бўлган эътибор, устозларнинг меҳнати ҳамда ўқувчиларнинг билим олишга интилиши самараси эканини кўрсатади.

Янги филиалнинг тантанали очилиш маросимида иштирок этган Наманган шаҳар ҳокими Аюбхон Камалов таълим масканининг ёшлар келажагидаги ўрни ва аҳамиятига алоҳида тўхталди. У мазкур каби ўқув марказлари ёшларнинг пухта билим олиши, замонавий билим ва кўникмаларни эгаллаши ҳамда келгусида мамлакат тараққиётига муносиб ҳисса қўшадиган етук кадрлар бўлиб вояга етишида муҳим аҳамият касб этишини таъкидлади.

Янги филиалнинг иш бошлаши Наманган шаҳрида таълим хизматлари кўламини кенгайтириш, ёшларнинг билим олишга бўлган интилишини қўллаб-қувватлаш ва уларнинг келажакдаги муваффақиятлари учун муносиб шароит яратиш йўлидаги яна бир муҳим қадамдир.

Наманган шаҳар ҳокимлиги Матбуот хизмати
____________

“Imkon ta’lim”ning yangi filiali — yoshlar kelajagi uchun yana bir imkoniyat

Namangan shahrida ta’lim sohasida 2020-yildan buyon samarali faoliyat yuritib kelayotgan “Imkon ta’lim” o‘quv markazining navbatdagi filiali foydalanishga topshirildi.

Bugungi kunda markazning mavjud filiallarida 1 000 nafardan ziyod o‘quvchi tarix, ona tili va adabiyot hamda chet tillari yo‘nalishlari bo‘yicha tahsil olib, o‘z bilim va ko‘nikmalarini mustahkamlab kelmoqda. Yangi filial esa 400 nafar o‘quvchiga mo‘ljallangan bo‘lib, yoshlar uchun sifatli ta’lim olish va o‘z salohiyatini ro‘yobga chiqarish imkoniyatlarini yanada kengaytiradi.

Markaz faoliyatining e’tiborga molik jihatlaridan biri — uning oliy ta’lim muassasalariga kirish bo‘yicha 95 foizlik natijaga erishib kelayotganidir. Bu ko‘rsatkich ta’lim jarayoniga bo‘lgan e’tibor, ustozlarning mehnati hamda o‘quvchilarning bilim olishga intilishi samarasi ekanini ko‘rsatadi.

Yangi filialning tantanali ochilish marosimida ishtirok etgan Namangan shahar hokimi Ayubxon Kamalov ta’lim maskanining yoshlar kelajagidagi o‘rni va ahamiyatiga alohida to‘xtaldi. U mazkur kabi o‘quv markazlari yoshlarning puxta bilim olishi, zamonaviy bilim va ko‘nikmalarni egallashi hamda kelgusida mamlakat taraqqiyotiga munosib hissa qo‘shadigan yetuk kadrlar bo‘lib voyaga yetishida muhim ahamiyat kasb etishini ta’kidladi.

Yangi filialning ish boshlashi Namangan shahrida ta’lim xizmatlari ko‘lamini kengaytirish, yoshlarning bilim olishga bo‘lgan intilishini qo‘llab-quvvatlash va ularning kelajakdagi muvaffaqiyatlari uchun munosib sharoit yaratish yo‘lidagi yana bir muhim qadamdir.

Namangan shahar hokimligi Matbuot xizmati

Sayt | Telegram | Facebook | Instagram | X | YouTube