Kitob oʻqiyotganda havolalar (snoska)ga ham e’tibor qaratish kerak. Chunki siz oʻqiyotgan matn (yoki sharh) uchun kerakli boʻlgan koʻp foydali ma’lumotlar aynan shu yerda beriladi.

#tavsiya

Hozir boraman deding...
Buncha kech!
Hozirdan oldinroq kelish mumkinmi?
Masalan, nafasim tutilsa,
O‘limga tutilsam, masalan...
O‘shanda aybdor qilasan kimni?
O‘lgan men yomonmi?
Kelmagan senmi?

Hozirdan oldinroq kelish mumkinmi?
Shu hozir deganing necha nafaslik?
Necha marta kiprik qoqaman,
Ko‘zlarim yumilsa, so‘kasan kimni?
Ketgan men yomonmi?
Kelmagan senmi?

Yetmish tomirimda muzlasa qonlar,
Qizdirmas hoziring g‘amzor ichimni.
Qoning toshganida, urasan kimni?
Qip-qizil qonini ichdan ichiga
Yutgan men yomonmi?
Kelmagan senmi?

Nafasdek bir uzun ishda ivirsib,
Tiriklikni senga bog‘lab g‘imirsib,
Ishqilib kelguncha o‘lib qolmay deb,
Kutgan men yomonmi?
Kelmagan senmi?

Hozirdan oldinroq kelish mumkinmi?
Ko‘zim kulganida ko‘rib qolsang-chi.
Yig‘ilarga kelsang, ayblaysan kimni?
Yuragin o‘rtasin begona sanchiq
Tutgan men yomonmi?
Kelmagan cyenmi?

Kutgan men yomonman!
Kutgan men yomon!
Bilaman, bir nafas ortiqcha olmay
Dunyodan shumshayib
O‘tgan men yomon!

O‘tkirbek Muhammad Sobir
06.11.2025

#sheriyat

Shoirning oʻzidan ijro!

Imom Moturidiy markazida ishlaydigan hamkasbimiz bir joyga ma’ruza qilishga boribdi. O‘sha yerda ishlaydigan xodim uni tanishtirayotib shunday debdi:

"Mana, bizga bugun ma’ruza qilish uchun Xalqaro ilmiy-tadqiqot markazi ilmiy xodimi Imom Moturidiy keldilar..."

#voqelik

Menda ham shunga o'xshash bir holat bo'lgan. Unda meni shunday tanishtirishgan edi:

"Mana, bizga bugun Imom Moturidiy iqtisodiyot markazidan ma'ruzachi keldilar...".

#voqelik

portal.yek.gov.tr sayti – Turkiyaning Qo‘lyozma asarlar muassasasi (Türkiye Yazma Eserler Kurumu Başkanlığı - YEK) tomonidan yuritiladigan rasmiy portaldir.

Uning asosiy maqsadi Turkiya kutubxonalaridagi qo‘lyozma asarlarning ulkan raqamli bazasini taqdim etishdir.
Bu portal asosan tarixchilar, islomshunoslar, manbashunoslar, tadqiqotchilar va talabalar uchun juda foydali.

Portalda Turkiyaning 24 ta kutubxonasidan 600 mingga yaqin qo‘lyozma va bosma asarlarning katalogi hamda 400 mingga yaqin asarning yuqori sifatli raqamli nusxalari mavjud.

Foydalanuvchilar asarlarni muallif, nomi, mavzusi va boshqa 40 xil mezon bo‘yicha qidirishlari mumkin. Portaldan ro‘yxatdan o‘tib, bepul foydalanish va yuqori aniqlikdagi nusxalarga buyurtma berish imkoniyati bor.

Sayt turk, arab va ingliz tillarida ishlaydi.
Umuman olganda, bu ilmiy ish bilan shug‘ullanuvchilar uchun nodir qo‘lyozmalarni topish va o‘rganish uchun juda muhim hamda boy onlayn manba hisoblanadi.

#qolyozma

Hasanxon Yahyo domla Imom Moturidiyning shoh asari “Ta’vilot al-Qur'on” asarining oʻzbek tilidagi tarjimasi haqida gapiribdilar.

Ushbu asar oʻzbek tilidagi eng katta tafsir boʻladi, insha Alloh. Imkongiz boʻlsa, ushbu asarni sotib oling.

#moturidiy

Chap tomonda odamning o‘pkasi, o‘ng tomonda esa daraxt.

Daraxt odam chiqaradigan havoni (ya’ni karbonat angidridni) o‘ziga oladi, odam esa daraxt chiqaradigan havoni (ya’ni kislorodni) nafas oladi.

Ya’ni, inson va daraxt bir-birini to‘ldirib yashaydi.

Bu – Allohning yaratigʻi!

#tafakkur

Arab tilida mohir boʻlsangiz, shoir Mutannabining:

أَرَقٌ عَلى أَرَقٍ وَمِثلِيَ يَأرَقُ
وَجَوىً يَزيدُ وَعَبرَةٌ تَتَرَقرَقُ.

deb boshlanadigan she’rini topib oʻqing (sharhi bilan, albatta).

Men sizga ushbu she’rdagi quyidagi baytni keltiraman:

وَعَذَلتُ أَهلَ العِشقِ حَتّى ذُقتُهُ
فَعَجِبتُ كَيفَ يَموتُ مَن لا يَعشَقُ.

Ma’nosi:
Men ishq ­ahlini malomat qilardim, toki o‘zim ham uning ta’mini totdim.
Endi hayronmanki, oshiq boʻlmagan odam qanday qilib oʻladi?

#sheriyat

Parijdagi Luvr muzeyida ishlagan oʻzbek qizi

Feruza Maxmasobirova oʻz qadriyatlarini yoʻqotmagan, juda talantli va intiluvchan qiz. U Islom universitetida bakalavr bosqichini tamomlab, Fransiyada magistratura va doktorantura uchun grant yutib, u yerda ta’lim olgan.

Hozirda u Islomshunoslik akademiyasida dars beradi. Feruza yosh ta’lim olayotgan qizlar uchun mativatsiya boʻladi, degan umiddaman.

Toʻliq video:
👉 https://youtu.be/T-Fb4OJlcDA?si=ZbBDrUMbP9AaX6lW

Misrda bir oshxonaning kirish qismiga "ويلكم" deb yozib qo‘yishibdi. Bu so‘z arab tilida: "Sizlarga azob bo‘lsin!" degan ma’noni anglatadi.

Odamlar kirib, nega bunday yozilganini so‘rashsa, do‘kon egasi bu so‘z arabcha emasligini, balki ingliz tilidagi "welcome" so‘zining arab harflari bilan yozilgan shakli ekanini aytgan ekan.

#farosat

Mobodoga kerak bo‘lsa!😀

"Ayollar tabiati, ulardagi ajoibu-g‘aroib narsalar, xabarlar va sir-sinoatlar haqida"

Muallif: Ahmad ibn Muhammad ibn Abdu Rabbih Andalusiy (860-940 h.y.)

Jiddiy, bunday kitob bor.

#ayol

Ayol kishi sovunga o‘xshaydi: silliq, xushboʻy hidli. Lekin uni juda qattiq siqsang, qo‘lingdan chiqib ketadi. Agarda uni yerga tashlab oyoqosti qilsang, o‘zing yiqilib, hatto suyaklaring sinishi ham mumkin.

#ayol
#copy

Koʻpchilik yoshlar ilm hosil qilish juda oson deb oʻylaydi. Menimcha, ularning bunday fikrga kelishlariga 3 kunlik/10 kunlik/1 oylik treninglar yoki 6 oyda IELTS olish kabilar ta’sir qilsa kerak.

Aslida bir sohada mutaxassis boʻlish uchun inson yillar davomida qunt bilan oʻqishi darkor. Aniqrogʻi, shu yoʻlda oʻzini qurbon qilish kerak. Hatto bir dona kitobni anglash va tushunish uchun yillar kerak boʻladi.

Yaqinda bir talabaga 10 mujalladli kitobni tavsiya qildim. U: “Voy, shuncha tomni oʻqiymanmi”, deb hayron boʻldi. Men unga: “Agar olim boʻlmoqchi boʻlsang, oʻqishga majbursan”, deb javob berdim.

Endi biz avvalgi davrdagi olimlar bilan oʻzimizning darajamizni taqqoslab koʻraylik. Ular mana shunday tom-tomlab kitoblarni ta’lif etganlar. Buning uchun ular umrlarini tikkanlar. Biz esa ular yozgan kitobni aqalli oʻqishga ham kuch topa olmayapmiz.

Ilm yoʻliga kirdingizmi, mana shunday mashaqqatlarni oʻz boʻyningizga olishingiz kerak. D.Bashshor Avvod aytganidek, hafta da 2-3 kun yoki bir oyda 10 kun oʻqigan talabadan hech qachon olim chiqmaydi.

Shayx Yorqinjon domla shunday reja qilar ekanlar: “Agar bir yilda 1000 ta kitob oʻqisak, 10 yilda 10.000 ta kitob oʻqir ekanmiz”.

D.Ahmad Damanhuriy bilan suhbatlashayotganimizda, agar men ularni ajablantiradigan biror gap aytsam, u kishi menga: “Sendan katta olim chiqadi, lekin 20 yildan keyin” deb hazillashib qoʻyadilar. Aslida bu gap hazil tarzida aytilgan boʻlsa ham, men buni chin qabul qilaman. Hozir yoshim 35 da. Agar 55 yoshda katta olim boʻlsam, men uchun bu eng katta baxt (duo qilib qoʻyinglar).

#ilm
#mashaqqat
#orzu

Ma’mun oʻzining a’yonlari oldida yozgan bir qasidasini (she’r) oʻqidi.

Keyin mashhur shoir Abu Nuvosdan yozgan she’ri haqidagi fikrini soʻraganda, u: "Men unda balogʻat hidini sezmayapman”, deb javob berdi.

Shunda Ma'mun gʻazablanib, uni bir oy muddatga eshakxonaga qamashni buyurdi.

Bir oy oʻtgach, Abu Nuvos chiqib, majlisga qaytib keldi. Ma'mun yana bir boshqa qasida oʻqishni boshladi. Abu Nuvos esa qasidaning yarmiga yetmasdan oʻrnidan turib, chiqib ketmoqchi boʻldi.

Ma'mun uni toʻxtatib: "Qayoqqa?" deb soʻradi.

Abu Nuvos: "Eshakxonaga”, deb javob berdi

#latifa #sheriyat

18-noyabr – O'zbekiston Respublikasi Davlat bayrog'i qabul qilingan kun.

#bayroq

Qur'on suralari nomida “Zo” (ظ) harfidan boshqa hamma harf ishtirok etgan.

#quronshunoslik