Tadbir doirasida bir guruh askarlar o‘zlarining oliy ta’lim muassasalariga kirishlari uchun bilim va tarbiya bergan ustozlarini bayram bilan tabriklash maqsadida Qarshi shahridagi 20-sonli umumiy o‘rta ta’lim maktabida bo‘ldi. Harbiy libosda, qo‘llarida gullar va bayram sovg‘alari bilan tashrif buyurgan askarlar ustozlariga samimiy minnatdorlik va ezgu tilaklarini izhor etdi.

Bugungi kunda harbiy xizmat bilan bir qatorda oliy ta’limda tahsil olayotgan muddatli harbiy xizmatchilar o‘z muvaffaqiyatlarida ustozlarining mehnati va bergan bilimlari alohida o‘rin tutishini ta’kidladi. O‘z navbatida, maktab jamoasi ham sobiq o‘quvchilarining Vatan himoyasidek sharafli burchni ado etib, bilim va salohiyatini yurt ravnaqi yo‘lida safarbar etayotganidan mamnun ekanini bildirdi.

Shuningdek, harbiy qismda muddatli harbiy xizmat davomida muayyan kasb-hunarlarni egallayotgan askarlar ham o‘zlariga hunar sirlarini o‘rgatayotgan murabbiylarini muborakbod etish maqsadida Qarshi shahridagi 3-sonli texnikumga sayohat uyishtirdi.

Samimiy muloqotlar davomida harbiy xizmatchilar ularga kasb-hunar o‘rgatib, kelajakda o‘z o‘rnini topishlari, mehnat bozorida munosib faoliyat yuritishlari hamda oilasiga ko‘mak berishlari uchun zarur bilim va ko‘nikmalarni berayotgan ustoz-murabbiylarga o‘z minnatdorliklarini bildirdi.

Janubi-g‘arbiy maxsus harbiy okrugning Nishon tumanida joylashgan harbiy qismida harbiy texnika, qurol-aslaha va anjomlarga mavsumiy texnik xizmat ko‘rsatish bo‘yicha amaliy-ko‘rgazmali mashg‘ulotlar o‘tkazildi.

Mashg‘ulotlar davomida okrug hamda harbiy qism qo‘mondonligi mas’ullari tomonidan texnikaga mavsumiy xizmat ko‘rsatish ishlarini sifatli va belgilangan talablar asosida tashkil etish, bunda texnika xavfsizligi qoidalariga qat’iy rioya qilish muhimligi alohida ta’kidlandi.

Amaliy mashg‘ulotlar bir nechta o‘quv nuqtalarida tashkil etilib, harbiy xizmatchilarga akkumulyator batareyalari va elektr jihozlariga texnik xizmat ko‘rsatish, qurol-aslahalarning texnik holatini ko‘zdan kechirish va baholash, payvandlash hamda bo‘yash postlaridagi ishlarni to‘g‘ri tashkil etish, aloqa texnikasi va vositalariga xizmat ko‘rsatish kabi yo‘nalishlar bo‘yicha zarur ko‘nikmalar berildi.