قناة المدربة أم أفنان(سعادة جديدة)

🌹اليوم حبيت نشارككم نصيحة من القلب ونحكيلكم موقف صرالي خلاني نغير طريقة تفكيري بالكامل..👌

🎯كتـــــــــابة الأهـــــــــداف🎯

ونقولهالكم وأنا أول وحدة كانت غالطة في هذي النقطة…وكنت من الناس لي ترفض كتابة اهدافها..ودايما نقول اهدافي راني شافية عليهم خلاص مشي لازم نكتبهم ووو

☝️لكن اكتشفت مع الوقت أني كنت نضيّع خير كبير عليّ...لأن الفرق بين هدف مكتوب
وهدف غير في راسك..فرق بين حلم وخطة تتحقق 💪

نقولك علاش..؟!كي الهدف يبقى في راسك:
اولا راح يتبدل حسب مزاجك
ثانيا راح يتأجل حسب ظروفك
ثالثا راح يتنسى مع ضغط الحياة

أما كي تكتبوه..يولي عندو حضور...و عندو قيمة...وراح يترسخ في عقلك وماتنسايهش ابدااا

وزيد نقولكم حاجة مهمة بزاف..إذا حبيتي تحطي هدف… حطيه عالي كما يقولو حطيه قدّام النجوم ..إذا ما وصلتيش للنجوم… توصلـي للقمر ^_^

سبحان الله حتى النبي ﷺ علّمنا نطلبو الفردوس الأعلى!!!!..الطموح العالي دايما يرفعك حتى ولو ما وصلتيش لأقصى نقطة...

🔴ونحكيلكم على موقف صرى معي شخصيًا منذ سنوات..^_^

كنت كل ما نروح لدارنا نلقى مرت خويا كاتبة أهدافها في ورقة (اهداف قصيرة وبعيدة المدى) ومعلقتهم في المطبخ..وكنت نستغرب من هذا الأمر لي ماكانش داخل راسي هداك الوقت ههههه

وكل ماكنت نروح نلقى الورقة مزالت معلقة حتى حفظت كل الأهداف لي مكتوبين فيها ههههه...وسبحان الله بعد مدة والله كل الأهداف لي كانت كاتبتهم في الورقة تحققوا بفضل من الله...وحتى انو كان فيها أهداف انا كانت تبانلي مستحيلة هداك الوقت...لكنها تحققت سبحان الله!!!

وهنا فهمت شحال كنت غالطة كي كنت نرفض كتابة أهدافي...وتعلمت درس عمري ماننساه^_^

لهذا ما تخلوش حياتكم تمشي مشتتة..اكتبوا أهدافكم… كبّروهم… وتحركوا عليهم كل يوم ولو بخطوة صغيرة👌
ومن يتوكل على الله فهو حسبه.

👇شاركينا في التعليقات هل أنت مع اوضد كتابة الاهداف ^_^

🔴اسمح بالتحويل فقط لنشر الفائدة

@oum_afnane ✍

💯7👏5🏆3🎉1

895 viewsالمدربة أم أفنان🎓, edited 07:17