FARGʻONA VILOYATI VAKILLARI XALQARO MIQYOSDAGI TANLOVDA MUVAFFAQIYAT QOZONDI!

Samarqand shahrida «Markaziy Osiyo mamlakatlari sog‘liqni saqlash xodimlari kasaba uyushmalarining eng yaxshi boshlang‘ich tashkiloti» tanlovi bo‘lib o‘tdi.
Ushbu tanlovda Respublika tez tibbiy yordam markazi Farg‘ona viloyati filiali boshlang‘ich kasaba uyushma tashkiloti ham munosib ishtirok etib, faxrli o‘rinni egalladi!

Mazkur natija boshlang‘ich kasaba uyushma tashkilotining samarali faoliyati, xodimlarning mehnat va ijtimoiy huquqlarini himoya qilish, ularni har tomonlama qo‘llab-quvvatlash hamda kasaba uyushmasi faoliyatini yanada rivojlantirish borasida olib borilayotgan ishlarning e’tirofidir.

Tanlovdagi munosib ishtiroki va erishilgan natijalari uchun Respublika tez tibbiy yordam markazi Farg‘ona viloyati filiali boshlang‘ich kasaba uyushma qo‘mitasi raisi F. Vahobova taqdirlandi.

Shuningdek, tadbirda O‘zbekiston sog‘liqni saqlash xodimlari kasaba uyushmasi Farg‘ona viloyati Kengashi raisi Sh. Karimova, Respublika kengashining Farg‘ona viloyati bo‘yicha mehnat inspektorlari Z. Qurbonov va M. Hatamov ham ishtirok etdilar.
Ushbu yutuq Farg‘ona viloyatida sog‘liqni saqlash tizimi xodimlarining manfaatlarini himoya qilish, boshlang‘ich kasaba uyushma tashkilotlari faoliyatini takomillashtirish va ilg‘or tajribalarni ommalashtirish borasida amalga oshirilayotgan ishlarga munosib bahodir.
 
O‘zbekiston kasaba uyushmalari Federatsiyasining Farg‘ona viloyat Kengashi.


Facebook | Telegram | fargona.kasaba.uz

Farg‘onalik shifokorlar sportda ham yetakchi
 
Farg‘ona shahridagi “Samo” sport majmuasida tibbiyot xodimlari o‘rtasida an’anaviy tarzda tashkil etilayotgan «Sog‘liqni saqlash vaziri hamda Kasaba uyushmasi raisi kubogi — 2026» sport musobaqasining viloyat bosqichi bo‘lib o‘tdi.
 
El salomatligi yo‘lida fidokorona mehnat qilayotgan tibbiyot xodimlari sport maydonida ham mahoratlarini namoyish etdilar.
Futbol, stol tennisi, shaxmat va shashka turlari bo‘yicha o‘tkazilgan musobaqalar bir-biridan qizg‘in tus oldi.  Eng kuchli va mahoratli sportsevarlar finalgacha yetib keldi.
 
Futbol bahslarida Furqat tuman tibbiyot birlashmasi jamoasi munosib o‘yin ko‘rsatib, raqiblaridan ustun keldi va faxrli birinchi o‘rinni qo‘lga kiritdi.
 
Stol tennisi musobaqasida ayollar o‘rtasida Farg‘ona shahar tibbiyot birlashmasi xodimi Nilufar Ergasheva, erkaklar o‘rtasida esa Respublika tez tibbiy yordam markazi Farg‘ona filiali xodimi Akbarjon Xolmatov g‘oliblikni qo‘lga kiritdi.
 
Aql va tafakkur sinoviga aylangan shaxmat musobaqasi ham ishtirokchilar va muxlislarda katta qiziqish uyg‘otdi. Unda ayollar o‘rtasida Bag‘dod tuman tibbiyot birlashmasi xodimi Nafisa Abdurahmonova, erkaklar o‘rtasida Oltiariq tuman tibbiyot birlashmasi vakili Ne’matjon Otayev birinchi o‘rinni egalladi.
 
Shashka bahslari ham keskin va qiziqarli kechdi. Mazkur yo‘nalishda ayollar o‘rtasida Farg‘ona tuman tibbiyot birlashmasi xodimi Nargiza Qo‘chqarova, erkaklar o‘rtasida esa Oltiariq tuman tibbiyot birlashmasi shifokori Muxtorali Gapirov g‘olib bo‘ldi.
 
— Futbol musobaqasida g‘oliblikni qo‘lga kiritganimizdan juda mamnunmiz. Endi oldimizda respublika bosqichida munosib ishtirok etish vazifasi turibdi. Ushbu bosqichda ham faol qatnashib, viloyatimiz sharafini munosib himoya qilib,  g‘olib bo‘lishga harakat qilamiz, — deydi Furqat tuman tibbiyot birlashmasi kasaba uyushma qo‘mitasi raisi Hamzaxon Ahmedova.
 
Shu tariqa, viloyat bosqichi g‘oliblari respublika miqyosidagi bellashuvlarda ishtirok etish uchun yo‘llanma qo‘lga kiritdilar. Musobaqa g‘oliblari O‘zbekiston Sog‘liqni saqlash xodimlari kasaba uyushmasi Farg‘ona viloyat kengashi tomonidan munosib taqdirlandi.
 
O‘zbekiston kasaba uyushmalari Federatsiyasining Farg‘ona viloyat Kengashi.


Facebook | Telegram | fargona.kasaba.uz

“Rahbar, yoshlar va yosh ishchi-xodimlar uchrashuvi”
O‘zbekiston kasaba uyushmalari Federatsiyasining Farg‘ona viloyat Kengashi tomonidan “Rahbar, yoshlar va yosh ishchi-xodimlar uchrashuvi” tashkil etildi. Uchrashuvda kasaba uyushmalari tizimida yoshlar bilan ishlash bo‘yicha 2026-yilning 9 oyi davomida amalga oshirilgan ishlar, erishilgan natijalar hamda kelgusidagi ustuvor vazifalar muhokama qilindi.

Mazkur uchrashuvning asosiy maqsadi yoshlar va yosh ishchi-xodimlarni qo‘llab-quvvatlash, ularning taklif va tashabbuslarini o‘rganish, kasaba uyushmalari faoliyatidagi ishtirokini yanada kengaytirish, shuningdek, yoshlarning mehnat va ijtimoiy huquqlarini himoya qilish borasida amalga oshirilayotgan ishlar samaradorligini oshirishdan iborat bo‘ldi.

Uchrashuv davomida kasaba uyushmalari tizimida yoshlar bilan ishlash yo‘nalishida hisobot davrida amalga oshirilgan ishlar, yoshlarning ijtimoiy-iqtisodiy manfaatlarini ta’minlash, ularning bilim va salohiyatini rivojlantirish, mehnat jamoalarida yoshlar uchun munosib shart-sharoitlar yaratish hamda yosh ishchi-xodimlarning kasaba uyushmalari faoliyatidagi faolligini oshirish borasida olib borilgan ishlar yuzasidan ma’lumotlar berildi.

Shuningdek, yoshlarning bandligini ta’minlash, mehnat huquqlari va qonuniy manfaatlarini himoya qilish, ularning kasbiy rivojlanishi uchun imkoniyatlar yaratish, ijtimoiy qo‘llab-quvvatlash mexanizmlarini takomillashtirish hamda yosh ishchi-xodimlarni qiynayotgan muammolarni o‘rganish masalalariga alohida e’tibor qaratildi.

Muloqot jarayonida yoshlar va yosh ishchi-xodimlarning fikr-mulohazalari, taklif va tashabbuslari tinglanib, ularni qiziqtirgan masalalar yuzasidan tegishli tushuntirishlar berildi. Shu bilan birga, kelgusida yoshlar bilan ishlash samaradorligini yanada oshirish, ularning tashabbuslarini qo‘llab-quvvatlash, mehnat jamoalarida ijtimoiy sheriklikni mustahkamlash hamda kasaba uyushmalari faoliyatida yoshlarning o‘rni va rolini kuchaytirish bo‘yicha ustuvor vazifalar belgilab olindi.

O‘zbekiston kasaba uyushmalari Federatsiyasining Farg‘ona viloyat Kengashi.

Facebook | Telegram | fargona.kasaba.uz