📌 Төле би айтқандай, «кеңесіп пішкен тон келте болмас». Соңғы жылдары Ұлттық құрылтай дәл осындай ақылдасу мен нақты шешімге бастайтын, сөзден іске өтетін алаңға айналды. Бүгінде ол Мемлекет басшысының негізгі тапсырмалары қалыптасып қана қоймай, олардың орындалуы жүйелі түрде бақыланатын нақты жұмыс тетігі болып отыр.

2022–2025 жылдары Мемлекет басшысы Ғылым және жоғары білім министрлігіне бірқатар маңызды тапсырмалар жүктеді. Сол тапсырмалардың елеулі бөлігі толық орындалып, бақылаудан алынды. Қалған бағыттар бойынша жұмыс бекітілген мерзімдер аясында жалғасуда.

✔️ Нәтиже бүгіннің өзіде байқалады, нақты ілгерілеу бар. Қазақстан тарихы бойынша 7 томдық академиялық басылымды дайындаудың негізгі кезеңі аяқталды. Бұл ауқымды еңбекке 250 отандық және 60 шетелдік ғалым атсалысты. Аталған басылым енді оқулықтарға, университеттік бағдарламаларға және қоғамдық талқылауларға берік ғылыми негіз болмақ.

📝 Ахмет Байтұрсынұлы кезінде: «Тілі жоғалған жұрттың өзі де жоғалады» деп дөп айтқан. Бүгін бұл ой бұрынғыдан да өзекті. Алайда қазір тіл мәселесі тек оны сақтау ғана емес, ұлттың өміршеңдігі мен бәсекеге қабілеттілігін айқындайтын мәселе. Сондықтан қазақ тіліне қатысты жұмыс енді тек ұранмен емес, нақты инфрақұрылыммен өлшенеді.

🔍 Осы орайда, Республикалық орфографиялық комиссия құрылды, емле нормалары мен сөздіктер жаңартылуда, ондаған миллион сөзқолданысты қамтитын цифрлық тілдік базалар жасалып жатыр. Сонымен қатар жасанды интеллект шешімдері енгізілуде: сөйлеуді тану, дыбыс синтезі, мәтіндерді интеллектуалды тексеру жүйелері іске қосылуда.

Бұл жұмыстың түпкі мәні қарапайым. Қазақ тілі күнделікті өмірде, оқуда, жұмыста, құжат айналымында және технологияда қолдануға ыңғайлы, жанды әрі табиғи болуы тиіс.

Сонымен қатар Президенттің тапсырмасына сәйкес ғылым қалашықтарын (наукоградтар) құру мәселесі пысықталды. Қажетті заңнамалық нормалар әзірленіп, тиісті заң жобасы Парламент қарауында жатыр.

Мұның қарапайым адамдарға берері не?
– Ғылыми тұрғыда дәлелденген, түсінікті ұлттық тарих.
– Қолдануға, оқуға, жұмыс істеуге және қызмет алуға ыңғайлы қазақ тілі.
– Жастар үшін ел ішінде жаңа жұмыс орындары мен даму мүмкіндіктері.

Біз үшін әрбір тапсырманың қағаз жүзінде қалып қоймай, жүйеге еніп, адамдарға нақты пайда әкелуі – басты қағида. Осы ұстаныммен жұмысты жалғастырып келеміз, әрі жалғастыра береміз.