ناس 🚶‍🌚🤡الضحكه 🇸🇩😂

مره وانا في البلد ومافي ايييي موضوع وزهج وقرف والكهربا قاطعه بقطعوها ليهم من الصباح وتاني مابتجي الا بعد المغرب زي الحمي والواطه صانه قاعد في بيت ناس حبوبتي وحبوبتي كانت نايمه من بعد الفطور صحت بعد صلاة الضهر اتوضت قبلها في سريرها واتقنعت بتوبا وصلت وبدت تصلي وهي قاعده وتاني نامت وهي مصنقره قبل تتم صلاتا وفي جدادتين قاعدات تحت المزيره والزير ينقط فيهن تف تف تف سخانه شديده حتي الجداد مسخن والديك بتاعن مشي انحشر في المطبخ ودقيقه مافي جا ساكيهو ود خالتي صغير كدا لمن وداهو الحوش التاني والغنم ينبحن في الزريبه وخالي نايم في الراكوبه مشتح شتيح كأنو عاملين عملية بواسير وبدل يتنفس بنخرتو كان بتنفس بخشمو شلاليفو يسون فرررر وانا قاعد مكوع في برنده كدا فيها بابين باب مقابل بيهو المناظر القلتها دي وباب تاني مقابل اوضة جدي شايفو راقد ع قفاهو ورافع كرعياتو سروالو نازل من ركبو في اواركيهو ويتهبب بالهبابه وراديهو شغال جمبو في التربيزه برنامج دكان ود البصير جدي بحب دكان ود البصير دا شديد في حين انو هو ود البصير زاتو بس مالاقي ليهو دكان ساي المهم قلت ياخ النمرق من البيت دا افرق الزهج دا ف طلعت بره لقيت الدنيا هااااااابده الشارع فاضي مافيهو الا الغنم يتحاومن مشيت دكان كدا هم بقولوا ليهو البقاله وهو ماعندو اي علاقه بالبقالات يمكن يكون اي شي الا بقاله اقرب للتكل الزمان داك فيهو رف واحد فيهو كروسة كبريت وحجرين بطاريه وصابونات وظهره مربطه في اكياس وكم صندوق بسكويت وشاي حب وسكر مربطات في اكياس تقريبا وقيه وقيه وقدام الدكان راكوبه كدا شكل برنده المهم جيت لقيت سيد الدكان ومعاهو واحد بلعبو سيجه وجمبهم واحد منبطح يعاين ليهم وجمبو واحد بجلد ليهو في عنقريب ب حبل وفي تلاته تانين نايمين نوم الضان ماعارفهم كانوا مساهرين وين سلمت عليهم وقعدت اتفرج فيهم وهم بلعبوا في السيجه قمة البؤس والله فجأه جا واحد راكب ليهو حماره وصرخ فيهم هاااا ناس ها في مرا عجوز ماتت فوق الكمبو الفوق والمريسه مجااااااني قوموا آناس الحقو المريسه يلحقوكم بالازعاف وفعلا قبل يتم كلامو قاموا جت عليهم حتي الكانوا نايمين ولا ميتين ديك وبتاع الدكان قفل دكانو اصلو ضلفه واحده وفحطوا وبتاع الحمار كرب حمارتو سوطين وقال ليها عررررر غادي ليك الورم اليسدد حلقك ف خلوني براي في راكوبة الدكان بعد شويه جا واحد درويش كدا مربي شعرو ومبرمو ولابس جلابيه مرقعه كدا وملان سبح قال لي المبروك هياكا معانا عندنا حوليه في فريق ناس منو كدي ماعارف المهم قال ضابحين تور اها عاد دا تور يااخوانا وقبل اقول ليهو ماشي ولا لا اللوري جا ملان ناس لابسين جلاليب خدرا ويدقوا في النوبه وهوووووبا نطيت معاهم اها ان شاءالله الناس ديل ماشين بي باللوري دا 7ساعات اللوري يتح وينح ويقع في حفره ويقوم من حفره ويدقوا لي في النوبه في اضني ويتصارخوا لمن وصلنا فريق ناس منو القالوهوا دا بعد المغرب والله التقول فريق ركن المهم لقيتا قريه كدا كان ربطوا فيها الحمار يشرد نحنا جينا نوبتنا داقه ولقيناهم نوبتهم داقه استقبلونا دخلونا في ديوان كدا وجابوا العشاء القاطعين ليهو الفيافي اتفاجأ بيهو عباره عن سليقه سااااااااقطه التقول غارفنها من الحفاظه واللحم عضام كبار لو جدعتهن لكلب يحردن والسليقه غير انها بارده مسقطبه ف برضو مسيخه عباره عن مويه زرقا المهم اكلتها معاهم ضررر بس ومرقونا ع حوش الذكر النوبه تدق وواحدين يتدردقوا وواحدين يبكوا وواحدين يتوقعوا فجأه جاني واحد قصييييير قدر الطراده يبكي ويتشنهف وكف نطا في رقبتي وقعد يرطن الجماعه جوا عرطوهوا مني قالوا لي الفقير مستحول يالمبروك قلت ليهم يعني شنو مستحول؟ مصاص دماء مثلا؟ قالوا لا يعني غرقان قلت ليهم اليغرق غادي مني انا ماعندي ليهو اخلاق وحات الله اكلت في رقبتو دي ماافكو الا جنازه وافشش فيهو مغس السليقه دي المهم ساقوهو مني وماعدا دقايق تاني جاني يدردق ويبكي ويكورك ياابوي هييي يابا هييي واتشربك لي في كرعي من تحت جابني واقع ع خشمي قمت عليهو غمتو ودعكتو زيييينتي وقلت ليهو الببو اليشقك كرررر وتاني حجزونا ومرقت خليت ليهو الذكر مع مرقتي كدا سمعت لي صوت حفله شغاله ع جهة البحر ودغرررري طقيت ناس الحفله لقيت الحوش ملان لحلقو والناس كلها جوه الداره اصلا مافي كراسي الحفله بدون كراسي الا كرسيين فقط بتاعة العريس والعروس انتهت الغنيه بقعدوا في الواطه كأنهم قاعدين في الحمام الاغنيه اشتغلت اي واحد بختف عكازو وبخش الداره اها عاينت للعريس والعروس لقيت العريس لابس كداره مع البدله اي والله لابس كداره بتاعة كوره ام كدايس ديك كأنو جاي التمرين مش جاي ل حفلة عرسو والبدله واسعه عليهو تحس بيهو زي الواقع جواها كدا والبنطلون واسع كل مره ينصل منو ويخمو لفوق تاني والزول الربط ليهو الكرفته ماخاف فيهو الله قرب ينشقو بيهو والله ويريحو من حياتو دي خانقو بيهو خنق لمن عيونو مارقات من جحورن والغريبه بعد دا مبسوط وفرحان نافش شنبو الزي

573 viewsسوزي حمد, 10:38