Kitob tumani hokimi xorijda tahsil olayotgan va mehnat qilayotgan yoshlar bilan o‘zining navbatdagi onlayn muloqotini o‘tkazdi

Bugun Kitob tumani hokimi Rustam Gafurov hamda tuman prokurori Xurshid Bahromov boshchiligidagi mutasaddi rahbarlar xorijiy mamlakatlarda tahsil olayotgan va vaqtincha mehnat faoliyati bilan band bo‘lgan tuman yoshlari bilan navbatdagi onlayn muloqotni tashkil etishdi.

Videokonferensaloqa shaklida o‘tgan mazkur uchrashuvda ayni vaqtda Janubiy Koreya, Yaponiya, Buyuk Britaniya, Turkiya, BAA, Rossiya va Xitoy kabi davlatlarda istiqomat qilayotgan 40 nafarga yaqin hamyurtlarimiz ishtirok etishdi.

Muloqotning asosiy maqsadi xorijdagi yoshlarning holidan xabar olish, ularning huquq va manfaatlarini himoya qilish hamda vatanimizga qaytgach, o‘z salohiyatlarini ro‘yobga chiqarishlari uchun zaruriy sharoitlarni muhokama qilishdan iborat bo‘ldi.

Ochiq muloqot davomida yoshlar tomonidan qator masalalar, xususan, O‘zbekistonda tadbirkorlik faoliyatini yo‘lga qo‘yish uchun beriladigan imtiyozlardan foydalanish, investitsiya kiritish tartiblari hamda ijtimoiy xarakterdagi boshqa mavzularda murojaatlar kelib tushdi. Tuman rahbariyati har bir murojaatni atroflicha tinglab, ularni birma-bir qayd etib bordi.

“Sizlarning xorijda orttirayotgan bilim va tajribangiz tumanimiz ravnaqi uchun juda muhim. Davlatimiz rahbari tomonidan yoshlar uchun yaratilgan barcha imtiyoz va imkoniyatlar sizlar uchun ham ochiq. Har bir murojaatingiz shaxsan mening nazoratimda bo‘ladi”, — deya ta’kidladi tuman rahbari.

Uchrashuv yakunida ko‘tarilgan masalalarning ijrosi yuzasidan mas’ul tashkilotlarga aniq topshiriqlar berildi. Bu kabi onlayn muloqotlar xorijdagi vatandoshlarimiz bilan doimiy aloqalarni mustahkamlash va ularni tuman hayotidagi islohotlarga faol jalb etishda muhim platforma bo‘lib xizmat qilmoqda.

Quyidagi havolani bosing va Kitob tumani hokimligi telegram kanaliga qo'shiling👇👇👇
❤https://t.me/joinchat/WIzE6dryhMqccL7h

💬Facebook | 📸Instagram | 🌍Web sayt|  ✅Telegram | ✅Twitter | 📹YouTube