✨ Abdulla Qodiriy ijodi va "Oʻtkan kunlar" asari tahlili boʻyicha uchrashuv boʻlib oʻtdi

📖 25-dekabr kuni "Kitobqand" kutubxonasida taniqli yozuvchilarimiz Sherkon Qodiriy, Nabijon Boqiy, Erkin Malik, radio jurnalist Nasibaxon Ziyovuddinova va kitobxonlar oʻrtasida ijodiy uchrashuv boʻlib oʻtdi.

🎤 Tadbirda Sherkon Qodiriy bobolari Abdulla Qodiriy, otalari Habibullo Qodiriy haqidagi xotiralarini biz bilan boʻlishdilar. Uchrashuv davomida Erkin Malik ustoz "Oʻtkan kunlar" asarini 1950-yillarda qayta chop qilish masalasi boʻyicha oʻsha vaqtda Olmoniyada boʻlgan vatandoshlarimiz Vali Qayumxon va Boymirza Hayitning Saudiyada yashayotgan yana bir ziyoli yurtdoshimiz Zuhriddin Mirzaobidga yozgan xatlarini oʻqib berdilar. Jurnalist Nasiba Ziyovuddinova esa Qodiriy bilan uchrashgan olim Sulaymon Azimovning Qodiriy siyratlari bo'yicha olingan intervyu matnlarini o'qib berdilar. Suhbat yozib olingan magnit tasmasini Abdulla Qodiriyning nabirasi Sherkon Qodiriyga topshirdilar.
Sevimli yozuvchimiz Nabijon Boqiyning “Qatlnoma” asariga oid qiziqarli va shu bilan birga muhim boʻlgan ma’lumotlarini ham oʻzlaridan tingladik.

Ushbu ijodkorlarimiz nutqi kitobxonlar tomonidan oʻzgacha qarshi olindi, ular tarafidan avval hech qayerda aytilmagan ma'lumotlar berildi, samimiy savol-javoblar ham oʻtkazdik.

🏆 Shu bilan birga "Kitobqand kitobxoni" tanlovining gʻoliblari kitoblar va vaucher bilan taqdirlanishdi.

🇺🇿 Bunday tadbirlar milliyligimizni, oʻzbekona qadriyatlarimizni saqlab qolishga xizmat qiladi deb umid qilamiz!

Telegram | Instagram | YouTube | Facebook