#mehmonlar_tashrifi

📚 Kecha kutubxonamizda O‘zbekiston nodavlat ta’lim muassasalari uyushmasi raisi, falsafa doktori Nuriymon Abulhasan mehmon bo‘ldilar.

Tashrif jarayonida mehmonimiz shonli o‘tmishimizda ajdodlarimizning kitobxon millat yetishtirish yo‘lidagi uslublari va qadimiy an’analariga to‘xtalib o‘tdilar.

🕊 Milliy o‘zligimizni anglashda tarixiy-ilmiy merosimizning tutgan o‘rni hamda bugungi kunda yoshlardan kutilayotgan vazifalar haqida o‘z fikrlarini bildirdilar.

Shuningdek, Yangi O‘zbekiston sharoitida buyuk ajdodlarimizga munosib millatparvar avlod sifatida Uchinchi Renessans sari dadil qadam qo‘yishimiz zarurligi haqida ham tavsiya va ko‘rsatmalar berdilar.

💡 KitobQand – ma’naviy yuksalish sari yetaklovchi ma’rifat maskani.

Telegram | Instagram

#hadya_kitoblar

📚 Bugun kutubxonamizga bir kitobxonimiz bir nechta kitoblaridan hadya qildilar. Bunday ezgu ishlar bizning ma’naviy xazinamizni boyitib, ko‘plab kitobxonlarning ilm-ma’rifatdan bahramand bo‘lishlariga sabab bo‘ladi.

📖 Siz ham kutubxonamiz fondini yanada boyitish uchun kitoblar hadya qilishingiz mumkin. Har bir tuhfa qilingan kitob – ilmga, ma’rifatga, kelajak avlodga qo‘shilgan bebaho hissa!

Manzil: Toshkent, Uzumbog‘ 9-tor ko‘chasi, 4.
Murojaat uchun: @kitobqand_murojaat

💚 Birgalikda ilm-ma’rifat xazinamizni kengaytiraylik!

Telegram | Instagram

Jadidlarni yod olib…

4-oktyabr. 1938-yil. Ruhi tetik, qalbi uyg‘oq o‘g‘lonlar, millat kelajagini o‘zgartirib yuborishga qodir bo‘lgan ziyolilar o‘sha davr tuzumi qaroriga binoan otib tashlandi. O‘q yetmaganlar bolta bilan chopildi. Biroq Abdulla Qodiriy, Abdulhamid Cho‘lpon, Abdurauf Fitrat, G‘ozi Olim Yunus, Otajon Hoshim, Ziyo Said, Xudoybergan Devon kabi millat oydinlari umriga ularning ta’siridan cho‘chigan vahshiy tuzum tomonidan nuqta qo‘yildi. Ertasiga bo‘lsa “qarori”ning ijrosi amalga oshirib bo‘lingan sud “sahnalashtirildi”...

✨ Shukrlar bo‘lsinki, jadidchilik deya atalgan ijtimoiy-ma’rifiy harakat a’zolarining nomlari oqlandi. Ular qoldirgan, erkinlik g‘oyalari bilan sug‘orilgan meros tadqiq etila boshlandi, ular intilgan ezgu g‘oyalar amalga oshib bormoqda.

✅ Bugun “Kitobqand” kutubxonasida o‘tgan tadbirda mustaqillikka qadar yashirilgan haqiqatlar ochiqlandi. Hech qayerda aytilmagan, qiziqarli ma’lumotlar olindi.

🟢 Xususan, yozuvchi, jurnalist, shoir va tarjimon, O‘zbekiston Yozuvchilar uyushmasi a’zosi, Cho‘lpon hayoti va ijodiga bag‘ishlangan “Cho‘lpon: qush esdaligi” hujjatli filmi ssenariysi muallifi Nabi Jaloliddin Cho‘lponning isyonkor tabiatini ajib chizgilar bilan ochib bergan bo‘lsa, o‘zbek adabiyoti yetakchi vakillaridan bo‘lgan Abdulla Qodiriyning nabiralari, yozuvchi Sherkon Qodiriy “O‘tgan kunlar” romani qahramonlariga alohida to‘xtalib, “Zaynab Kumushning o‘rnida bo‘lishi mumkinmidi?” degan masalaga ham oydinlik kiritdi.

O‘zbekiston Respublikasida xizmat ko‘rsatgan jurnalist Erkin Malik boshqargan uchrashuvda Yozuvchilar uyushmasi raisining o‘rinbosari, shoir G‘ayrat Majid jadidlar bilan faxrlanib yurish emas, balki o‘z davrining ilg‘or farzandi bu bobokalonlarimizga munosib avlod bo‘lish kerakligini ta’kidladi. Yig‘ilganlarning ma’ruzalarni qiziqish bilan tinglaganlarini, o‘qishga, izlanishga ishtiyoqlarini ko‘rgan G‘ayrat Majid “Kitobqand”ga uyushma tomonidan 100 ta kitob hadya qilinishini ma’lum qildi.

⚠️ Fotosuratlar oq-qara tasmaga suratga olinganga o‘xshaydi. Sabab zalimiz qorong‘i. Boisi bugun “Kitobqand”da chiroq o‘chib qolgan. Lekin bu anchadan buyon kutilgan tadbirni o‘tkazishga to‘sqinlik qila olmadi. Balki chiroq o‘chib, bir muddat zulmatning g‘olib kelishi millatning erkparvar jangchilari, qalam bilan, so‘z bilan jang qilgan ziyolilari vahshiyona otib tashlangan o‘sha sanani yana bir karra esga soldi xolos.

⌛ Samimiy kechgan suhbat parchalarini tez orada kanalimiz orqali e’tiboringizga havola etamiz.

Telegram | Instagram | YouTube | Facebook