ҚМГ кен орындарда цифрлық телнұсқарларды енгізудің алдағы кезеңдерін айқындады

📱ҚазМұнайГаз өзінің өндірістік активтерінде цифрлық телнұсқаларды кеңінен енгізіп келеді. «Ембімұнайгаз» АҚ-да (ЕМГ) өткен екі күндік стратегиялық сессия барысында Шығыс Молдабек кен орнының цифрлық телнұсқасының және Интеграцияланған операциялар орталығының алдағы даму кезеңдері айқындалып, ABAI платформасын жетілдіру мәселері қаралды.

📱Шығыс Молдабек кен орнында 2027 жылдың қаңтар айына дейін қабат пен ұңғыма үлгілері, бұрғылау мен ұңғыма ішіндегі жұмыс процестері, өндіру мен жерүсті инфрақұрылымы бірыңғай цифрлық контурға біріктіріледі деп жоспарланып отыр. Бұл активтің цифрлық телнұсқасын жасауға және өндірістік деректермен жұмыс істеуге мүмкіндік береді.

⚙️Бұдан бұрын пилоттық жоба аясында Шығыс Молдабекте 700-ге жуық сценарийлік есептеу жүргізілді. Мұндай жұмыс көлемін орындау уақыты 38 күннен 6 күнге дейін азайды. Модельдеу нәтижелері бойынша көлбеу бағытталған алты ұңғыманың орнына екі көлденең ұңғыманы бұрғылауды көздейтін ең тиімді игеру нұсқасы анықталды. Жоба жылына қосымша 100 мың тоннаға жуық мұнай өндіру көлемін қамтамасыз етеді деп күтілуде.

💻Келесі кезеңде ЕМГ компаниясының Интеграцияланған операциялар орталығын дамыту қолға алынады. Ол өндірудің, ұңғымалар қорының, бұрғылау мен құрылысты мониторингтеуді, өндірістік ауытқуларды талдауды, сондай-ақ инженерлік шешімдердің сценарийлік бағалауын біріктіреді.

🤔Сонымен қатар іс-шарада ABAI платформасы негізінде әзірленген цифрлық құралдарды жетілдіру бағыттары қаралды. Бұл шешімдер ұңғымалардың ағымдағы және күрделі жөндеу жұмыстарын мониторингтеу, жаңа ұңғымалардың тиімді конструкциясы мен орналастыру нұсқаларын таңдау, қабатты гидравликалық жару жұмыстарын жобалау және су айдау процесін басқару үшін қолданылады. Атап айтқанда, «Су айдауды басқару 2.0» модулі ұңғымалардың оңтайлы жұмыс режимін автоматты түрде белгілеп, су айдау көлемін оңтайландыруға ықпал етеді.

✅Айта кетсек, ҚМГ цифрлық телнұсқаларды мұнай өндіру көлемінің 90% астамын қамтамасыз ететін 12 ірі кен орнына таратуды жоспарлап отыр.

📱 ҚазМұнайГаз

KPI компаниясы Шымкенттегі қоймасын ресми түрде ашты

🏭«ҚазМұнайГаз» ҰК АҚ-ның еншілес кәсіпорны — «Kazakhstan Petrochemical Industries Inc.» (KPI) ЖШС Шымкенттегі қоймасының ресми ашылу рәсімін өткізді. Логистикалық нысан еліміздің оңтүстік өңірлеріндегі отандық қайта өңдеушілерді полипропиленмен қамтамасыз етуге, сондай-ақ өнімді сақтауға арналған.

🗣Шымкенттегі қойма биыл ақпан айынан бері тесттік режимде жұмыс істеп тұр, осы күнге дейін өңдеуші кәсіпорындарға 3 800 тонна полипропилен жөнелтілді. Мұнда бір уақытта 1 000 тоннаға дейін өнім сақтауға болады.

— Біздің міндетіміз — клиенттерді сапалы өніммен қамтамасыз етіп қана қоймай, қажетті көлемді уақытында жеткізу. Шымкенттегі қойманың іске қосылуы оңтүстік өңірдегі қайта өңдеушілер үшін KPI полипропиленінің қолжетімділігін арттырып, жеткізу уақытын қысқартуға мүмкіндік берді. Бұл клиенттерге өндірісін тұрақты жоспарлап, логистикалық шығындарын оңтайландыруға мүмкіндік береді, — деді KPI өкілдері.

▪️Қойманың ресми ашылу рәсімінде KPI-дың тұрақты клиенттеріне – Bal Carpet, Marvik Partners және т.б. өнім жөнелтілді.

▪️Отандық өңдеуші кәсіпорындарға полипропилен жеткізу көлемі артып келеді, осыған байланысты KPI компаниясы да қойма инфрақұрылымын кеңейтуде. 2026 жылдың сегіз айында ішкі нарыққа полипропилен жөнелту көлемі былтырғы осы кезеңмен салыстырғанда 23,4% өсті.

▪️KPI өнімін қайта өңдейтін кәсіпорындар саны 2025 жылдың басындағы 105 кәсіпорыннан 2026 жылы 180-ге жетті. KPI-дың Астана, Алматы және Шымкент қалаларындағы өңірлік қоймалары арқылы өнім жөнелту көлемі де үш еседен астам артты. Биылғы сегіз айда бұл көрсеткіш 3,68 мың тоннадан 13,55 мың тоннаға дейін өсті.

▪️Бүгінде қазақстандық кәсіпорындар KPI полипропиленін құрылыс материалдарын, медициналық бұйымдарды, агротекстиль, кілем және басқа да өнім өндіруде пайдаланады. Отандық полимер шикізатын бұрын импорттық жеткізілімдерге тәуелді болған жаңа өндірістерде де қолданылып келеді.

▪️KPI өнім қатарында азық-түлік өнімдеріне арналған қаптама мен гигиеналық мақсаттағы тауарларды өндіруге қолданылатын полипропилен маркалары бар. Бұл шикізат түрлері дайын өнімнің сапасы мен қауіпсіздігіне қойылатын талаптарға сәйкес келеді.

✅Компания полипропиленнің жаңа маркаларын шығару арқылы өнім қатарын кеңейтуде: қазіргі уақытта 17 марка өндіріледі.

✅KPI іске қосылғаннан кейін Қазақстанның полипропилен бойынша ішкі нарығының құрылымы айтарлықтай өзгерді. 2022 жылдан бері полипропилен бойынша импортқа тәуелділік 63%-дан 4% дейін төмендеді, ал KPI өнімінің үлесі 2%-дан 80% дейін өсті.

✅Газ-химия кешені ішкі нарықтың полипропиленге деген қажеттілігін едәуір көлемде қамтамасыз етіп, полимерлерді қайта өңдеу саласындағы шағын және орта бизнестің дамуына жағдай жасап отыр.

📱 ҚазМұнайГаз