#МиллийҲунармандчилик

🔰 Косонсойнинг усталар сулоласи: нақшларда қолган умр, авлодларда давом этган мерос

▫️Косонсой азалдан моҳир уста ва ҳунармандлари билан танилган. Бежизга бу ердаги маҳаллалардан бири «Усто маҳалла» деб аталмаган. Бу ном ортида авлоддан авлодга ўтиб келаётган катта ҳунармандчилик мактаби бор.

Бу сулоланинг илдизлари Хусаинхўжа бобогача бориб тақалади. У киши уста-шогирдликнинг ўзига хос мактабини яратиб, кўплаб шогирдлар етиштирган. Мадрасалар, масжидлар қурилишида, кўприклар бунёд этилишида хизмат қилган, оғир кунларда Косонсой аҳлига елкадош бўлган. У кишининг номи халқ хотирасида ҳамон яшайди. Бу анъана кейинги авлодларда ҳам муносиб давом этди.

Ўзбекистон халқ устаси, Ўзбекистонда хизмат кўрсатган маданият ходими, «Дўстлик» ордени соҳиби, академик уста наққош Муҳаммад Аминхўжа Хусаинов 1946 йилдан бошлаб мусаввирлик-наққошлик ва ганч ўймакорлиги санъатини эъзозлаб, бутун умрини шу ҳунарга бағишлади.

Муҳаммад Аминхўжа ўғиллари ва шогирдлари билан бирга Самарқанддаги Имом Бухорий мажмуаси безакларида иштирок этди. Мажмуада 38 нафар шогирдлари билан васса жуфтлари ва пештоқларини безашда меҳнат қилди. Бу хизматлари юксак қадрланиб, «Дўстлик» ордени билан тақдирланди.

Устанинг ижодий меҳнати Наманган, Андижон, Қўқон шаҳарларида, шунингдек, Россиянинг Санкт-Петербург шаҳрида ҳам ўз изини қолдирди. Наманган шаҳрининг кўплаб нуфузли биноларида у кишининг наққошлик ва ганчкорлик ишлари бугун ҳам инсонларга маънавий завқ бағишлаб турибди.

Устознинг энг катта мероси эса фақат бинолардаги нақшлар эмас эди. 100 нафардан ортиқ шогирдга ҳунар сирларини ўргатгани, ўғилларининг барчаси ота касбини давом эттиргани у кишининг яратган мактаби нақадар катта эканини кўрсатади.

Тўрақўрғондаги Исҳоқхон Тўра Ибрат музейи бунёдида ҳам шогирдлари билан иштирок этган бу уста ўзидан санъат асарлари билан бирга давомчилар қолдирди. Бир сулола — бир ҳунар. Бир ҳунар — юзлаб шогирд. Юзлаб шогирд эса авлодларга қоладиган мерос. Ана шу буюк ҳунармандчилик мактабининг муносиб давомчиларидан бири — моҳир наққош, ўймакор ва ганчкор Ибодуллахон Ҳусаинов эди...

Ибодуллахон Ҳусаинов — ҳунарини санъат даражасига кўтарган уста
Баъзи инсонлар қўллари билан шундай гўзаллик яратадиларки, улар ҳаётдан кўз юмганидан кейин ҳам меҳнатлари улар ҳақида сўзлаб туради.

Ибодуллахон Хусаинов ана шундай ноёб истеъдод эгаси, ҳунарини санъат даражасига кўтарган моҳир уста эдилар.

У киши наққошлик, ганчкорлик ва ўймакорлик санъатларини чуқур эгаллаган, ҳар бир ишига ўзига хос дид ва маҳорат билан ёндашганлар. Уларнинг қўллари билан яратилган ҳар бир нақшда аниқлик, мутаносиблик ва нафислик мужассам.

Айниқса, Косонсой туманидаги "Корхона" масжидида бажарган меҳнатлари уста маҳоратининг ёрқин намунасидир. Икки йил давомида баланд искала устида туриб, бошларини юқорига кўтариб, улкан равоқлар ва деворларга нақшлар солиш, ганчни ўйиб безак яратиш, мураккаб шаклларни бир-бирига уйғунлаштириш осон иш эмас.

Пастдан қараганда нақшларнинг гўзаллиги кўринади. Аммо унинг ортида устанинг неча бор искала устига чиқиб, узоқ вақт давомида бошларини юқорида тутиб, кўз нури ва кучини сарфлаган машаққатли меҳнати турибди.

Бу ишлар нафақат жисмоний куч, балки юксак бадиий дид, сабр, тасаввур ва йиллар давомида шаклланган усталикни талаб қилади.

Уста ўз ҳунарларини ўзлари билан олиб кетмадилар. Шогирдлар етиштирдилар, ҳунар сирларини ўргатдилар. Шу боис у кишининг санъати ва маҳорати бугун ҳам давом этмоқда. Чунки ҳақиқий уста учун умр фақат яшаган йиллар билан эмас, яратган асарлари ва етиштирган шогирдлари билан ўлчанади.

Ибодуллахон Ҳусаиновнинг умри ҳам ана шу нақшларда давом этмоқда.

Руҳлари шод, жойлари жаннатда бўлсин.

Косонсой тумани ҳокимлиги Ахборот хизмати.

👉 Telegram | Facebook  | Instagram | Youtube

Шавкат Мирзиёев бир гуруҳ ички ишлар ходимларини мукофотлади

Президент Шавкат Мирзиёев Ички ишлар органлари ходимлари куни муносабати билан бир гуруҳ ходимларни мукофотлади.

@KOSONSOY