.

انا عشت طفولة قاسية بكل ماتحمل الكلمة وكل العوامل البتخليني اطلع انسان فاشل وغير مفيد للمجتمع اتلمت فيني الجهل والفقر والجوع والمرض
😝😝😝
الصباح امشي المدرسة مغبش وشعري منكوش
😨😨
بس عادي الموضوع ماخطير لانو اصحابي عندهم (قوب ومقملين) والموضوع بالنسبة لي ماخطير
😎😎😎
بمشي المدرسة بنطلوني مشروط من بدايتو لي نهايتو وبعد دة مربوط بي حبل جون قرنق بس ماحنك ولا فارق معاي بي حاجة لانو اكتر واحد مرطب في فصلنا
بكون قميصو فيهو زراتين
😂😂😂
والباقين كلهم زرارة واحدة في القميص

الواحد تلقاهو جاري زي باتمان بس الفرق بينا وبين باتمان انو باتمان ماعندو
كريشة وصرة مارقة لي برة
😂😂😂
كنا شفع صغااااار لكن الشكل عبارة عن كريشة ورويس صغير
😞😞😞
بنفطر فتة فول او بالاصح (موية فول موية جبنة موية زيت موية عيش) وبنتغدي عدس
مافارق معاي بي حاجة لانو اصلآ ماقايل في شئ بيٲكلوهو غير الحاجتين ديل
😔😔
اللهم الا الاكل البنشوفو في المسلسلات المصرية
دة كلوووو ماكان فارق معاي بي شئ

اكتر شئ كان مخلي حياتي قاسية ومؤلمة كلب جيرانة 🐕🐕
ياااخ كلب شرس وحقااااار ومابرحم وكل محاولاتي لي استعطافو فشلت فشل ذريع
اي لحمة يدوني ليها بشيلها بوديها ليهو عشان يبقي صحبي ويخليني امشي واجي مرتاح
😁😁
ودة كل ماشفع لي وزي المابعرفني ولاحصل شافني
بالله المغرب يرسلوني اجيب اللبن من البقالة

لمن اكون ماشي مابسٲلني بس اشتري اللبن واجي راجع
شايل بستلتي وماشي بيتنا من مايشوفني يجيني جااااري وانا اجرررري اكشح اللبن داك كلو في الارض
نص رطل مابفضل في البستلة
ومايرتاح الا لمن يشوف البستلة فاضية بعديها اتنفض وامشي البيت ابكي جنس بكي دموعي ومخاخيتي مابتفرزو من بعض
😭😭😭
امي تقول لي مالك يا ولد
اقول ليها الكلب سكاني
اها واللبن وينو
اللبن اتكشح يمة
شنوووووووو
😞😞
كشحت اللبن
وتشيل المفراكة وتجيني تدقني بالمفراكة في الساق والركب والرويس جلد زي الجلد انوم جسمي دة كلو وارام من الجلد
😩😩😴😧
وسبحان الله الكلب دة شكلو بكرهني انا بس وشكلو الموضوع شخصي ماعارف انا عملت ليهو شنو
😠😠😠
ماف زول بسالوه في حلتنا غيري
الناس دي كلها تمشي وتجي فيهو الا انا من مايشوفني شايل حاجة يجيني طاير الا يكشحها مني
ومايرتاح الا يسمع امي بتجلدني وانا اكورك
زي البستمتع بي كواريكي صراحة حسيتو كدة
😭😭😭
المهم مرت السنين ورحلنا خلينا ليهو الحلة ونكرته الماضي حطب زي م عمل عمكم بشه زمان نكر الكنكشه 😂😂😂
😢😢
وخلي فيني عقدة من الكلاب ابت تطلع للان
اي شارع اجي ماشي فيهو القي كلب ارجع طوالي
والعجب كان معاي جكسوية ولا بجازف
كان مانبح فيني انا بجري. منو

قبل كم يوم جيت حلتنا القديمة زيارة لي جيرانة القدام

ولقيت الكلب الكان مشهيني العافية وقاطع قلبي
لقيتو بقي كبيييييير وحالتو تحنن اليهودي
سنونو وقعت كلها ونباح مابقدر ينبح
😢😢
لقيتو طالع في الحيطة ليهو ساعة مشرور فوق وماقادر ينزل

مسكتو من اضانو وسٲلتو عرفتني هز لي راسو
يعني عرفتك
قلت ليهو اها اسكك زي ماكنت بتعمل معااااااي
هز لي راسو لا لا
نزلتو برااااحة في الارض اكلتو وشربتو
ومسحت ليهو جسمو
وحسيتو زي البعتذر لي
وودعتو ومشيت منو

#واخيراً

لمن الزول يجيك ضعيف ومنكسر
وانت في موضع قوة وهو كان بعاملك كعب

عاملو كويس عكس ماهو بتوقع منك
وصدقني ماحاينسـٲك ولا حاينسي الدرس دة
وقيمتك كٲنسان بتكبر في نظرو

ودة بي اختصار اسمو (العفو عند المقدرة)

#صباح_الخير

#الاسكندر

الباقيات الصالحات :
‏- سُبحان الله
‏- الحمدُ لله
‏- لا إله الا الله
‏- اللهُ أكبر
‏- سُبحان اللهِ وبحمده
‏- سُبحان اللهِ العظيم
‏- أستغفرُ الله وأتُوب إليّهِ
‏- لا حول ولا قُوة إلّا بالله
‏- اللّٰهُمَّ صلِّ على نبيِّنا مُحمّد
‏- لا إلٰه إلّا أنت سُبحانك إنِّي
كُنتُ من الظالمين.❤️

#الاء

.

صحيت الصباح وأنا في قمة النشاط، قلت أبدأ يومي بقرار مصيري يغير مجرى التاريخ.
دخلت على ناس البيت وقلت ليهم بكل ثقة ومن غير اي مقدمات
أنا داير أعرس.
فجأه صنوو المكان بقي هادئ
بعدها انفجرو من الضحك
#احمد قال : – بالله شوف الجرأة!.... مع انو ما من ناس البيت لكن صابيها معانا قنقر كده😁
واخوي قال: – الزول ده شكلو لسه نايم ؟
قلت ليهم: – مالكم؟ العرس بقى ممنوع ولا شنو؟
احمد قال لي بخبث: – العرس دا مشروع… وإنت حاليا ما عندك حتى لافتة المشروع.
قلت: – ليهم ، في بنات دايرات الستره، ما دايرات قصور ولا دهب. لا ولا...... الخ
قالوا لي: – الستره ذاتها دايره أساس… وإنت أساسك واقف على الأمل والدعاء.
دخلت في نقاش فلسفي: – يعني الراجل ما يتقيم بأخلاقو؟
ردوا علي: – الأخلاق ممتازة، لكن ما بتدفع إيجار ولا بتشتري شيله ولا بتاكل عيش
قلت: – خلاص أنا تعبت من العزوبية، بأي طريقة، المهم أطلع منها.
واحد قال لي: – ياخ إنت ما داير عرس… إنت داير هروب رسمي من العزوبية.
بعد شوية حسيت إنو متحمس ساي من البرد، والواقع بدأ يتكلم بصوت عالي.
قلت: – خلونا نأجل الموضوع شوية… لحدي ما ربنا يفتحها.
رد علي واحد مبتسم: – أيوة كده… دا القرار الحكيم.
عرفت ساعتها إنو
العرس ما محتاج شجاعة بس… محتاج ميزانية دوله عظمي
طلعت منهم بكل بهدوء،
وقعدت أفكر شوية…
ولقيت نفسي تلقائياً فاتح التلغرام
بفتش عن منشورات:

“كيف تتعايش مع العزوبية وأنت #مكسور...

#صباح_الخيــــــــــر
#جمعه_مباركه

#الاسكندر

.

نحن السودانيين وين ما نمشي، بنقسم نفسنا شلليات بدون أي اتفاق مسبق.
في الداخليات الموضوع ده بكون أوضح:
كل شلة عندها مكانها، ونستها الخاصة.
بتزكر زمان داخليتنا كانت فيها شلليات كتيرة، أهمها شلة احمد وشلة عبدالرحمن وشلتنا نحن

شلتنا كانت شله عادية شديد.
لا كعبين رسمي، ولا ناس نموذج.

يعني شلة ساي ناس ونسه وضحك

وونسة ما بتتجاوز الكورة والفنانين وأسعار السوق
في يوم عادي شديد فجأه قامت مشكلة بين شلة أحمد وشلة عبدالرحمن.
السبب بسيط لدرجة تضحك:
بسبب كباية شاي كلمة زيادة، صوت علي…
وبس، الداخلية كلها سخنت.
نحن في اللحظة دي كنا بعيد،
متفرجين من غير نية دخول،
نقول لبعض الشكله دي م حتطول باعتبارنا ناس سناير حافظييين وفاهمين امور الداخليات🌝
وبالفعل، ما طولت.
الناس اتفرقت،
أحمد رجع شلتو،
وعبدالرحمن رجع شلتو.
لكن القصة ما انتهت هنا.
بعد يومين، لاحظنا إنو أحمد بقى ما بيسلم علينا
يمر جنبنا كأننا ما موجودين.
عبدالرحمن نفس الحركة.
استغربنا.
سألنا: «في شنو؟»
الرد جا بسيط وواضح:
«إنتو السبب».
قلنا:
«سبب شنو؟»
قالوا:
«ما عارفين… لكن الناس قالت».
ومن اللحظة دي بقينا متهمين رسميًا.
لا دليل، لا سؤال، لا مواجهة.
بس قناعة جماعية إنو شلتنا كانت ورا الحاصل.
أحمد قاطعنا،
لا هو عارف قاطعنا ليه،
ولا نحنا عارفين هو قاطعنا ليه،
وليومنا هذا ما عارفيين السبب شنو
لكن مقتنعين قناعه تامه انو نحن السبب
#دحييين يا عبدالرحمن و احمد بدور اعرف السبب شنو؟
#واخيراً
في مجتمعات كتيرة،
الحقيقة ما بتهم…
المهم الناس قالت شنو،
والقطيع مشى وين.
#المهم
القصه مقتبسه من فيديو لاحد مشاهيير التك توك تكلم عن ما اعنيه بصريح العباره شاركته احدي صديقات الصفحه🌝

#الاسكندر

الصوره من مطار الخرطوم اليوم 1/2/2026

مرحبتين بلدنا حبابها❤️🇸🇩

#الاء

.

يحكى ـ ولا يستبعد أن يكون قد حدث البارحة ـ
أن صداقة دامت عشرين عاما انتهت لأن إحداهن لم تكمل الرقص في عرس ابن صديقتها حتى نهاية الحفل.
الفنان مازال يغني، لكن القلوب توقفت… والخصام أعلن رسميا.
ويروى كذلك أن أختين افترقتا، لا بسبب ميراث ولا خيانة،
بل لأن إحداهما لم تطلق الزغرودة المطلوبة في تخريج ابن أختها من الروضة.
زغرودة واحدة كانت كفيلة بإنقاذ العشرة… لكنها لم تخرج، فخرجت الأخت من الحياة.
وفي المقابل — وهنا تبلغ المفارقه ذروتها —
رجل يسير في حال سبيله، فتأتيه سيارة من حيث لا يدري، تضربه وتختفي.
يمضي الزمن، ويظهر السائق بعد حين، يعتذر لأن “الظروف كانت أقوى منه”.
فيصافحه الرجل، يسامحه، يشربان الشاي معا،
ثم يصبحان صديقين حميمين،
ويضحكان لاحقا على تلك الحادثة التي كادت تودي بحياته.
وهنا يقف الراوي متأملا المفارقة:
ضربة سيارة تغتفر،
لكن رقصة ناقصة لا تنسى.
حادث كاد يقتل إنسانا يطوى بالاعتذار،
أما زغرودة لم تطلق… فتسجل كجريمة مكتملة الأركان.

#اخيراً
في هذا الزمن، إن أردت السلامة فاعتذر بعد أن تدهس،
ولا تعتذر أبدا إن جلست في الفرح.
فالحوادث لها تأمين…
أما التفاهات، فلها ذاكرة لا تنسى 😁
#مساء_الخير

#الاسكندر

اللهم صلِّ وسلِّم على سيدنا وحبيبنا محمد ❤️
#الاء

واصلح لي آخرتي التي فيها معادي❤️

#الاء

-

سُبحَان الذي إذا ذَكرتَهُ ذكَرَك ،
و إن شكَرتَهُ زادَك ،
و إن توكّلت عليه كفَاك ،
سُبحانَ الله وَبِحمدِه ..
سُبحَان اللّه العَظِيم .. ❤️

#الاء

.

أنا قبل الجامعة كنت عايش حياة واضحة وبسيطة؛
أنا في وادي… والإناث في وادي ، لكن بدون إحداثيات.
الانثي الوحيده القعدته معاها وش لوش كانت امي الله يديها العافيه،
ودي كانت أكتر قعدة طويلة بيني وبين أنثى
ودي زاتها كان يوم تكلم الشبش نيابتا عنها وانجبرت اقعد انضف معاها الملوخيه لاني كنت زايغ من المدرسه

دي كانت أقصى درجات الاختلاط عندي 😅
بتزكر اول يوم لي في الجامعه
وانا برلوم كرت كرترنه لسه شايل رهبة المكان،
حاسي نفسي داخل دولة تانية بدون تأشيرا
خشيت الكافتيريا مع صاحبي
لقينا احمد طبعا كان سنيير قاعد مع وحده وشكلو كان قاطع موضوع 😁😁 فحبى يتظارف بينا كان قاعد
قعدة فيها ثقة الزول البعرف المكان
وبعرف نفسو
وبعرف إنو البرالمة ديل لسه في مرحلة الاستكشاف.
نادانا  تعالوا يا برالمه
مشينا تسالما واتعارفنا وقعدنا معاهم
أنا جسمي قاعد،
لكن مخي فتح دفتر ملاحظات.
قلت:
يا سلام… الناس هنا بتقعد كده ساي؟
ضحك، كلام،  وونسه
ولا زول قال:
– عيب
ولا زول قال:
– استغفر الله
ولا زول سأل:
– إنت ولد منو؟
أنا في اللحظة دي حسيت إني دخلت مستوى جديد في الحياة،
زي لما تفتح مرحلة زيادة في لعبة.
أسبوع كامل وأنا ماشي الجامعة بعين مختلفة،
أي قعدة أشوفها أحللها،
أي ضحكة أفسرها،
أي ونسه أحسها إنو حدث تاريخي.
الأسبوع التاني؟
بقيت ألاحظ أقل.
الشهر التالت؟
بقيت أمشي جنب البنات عادي
زي الزول البمرق من بيتو يشوف الشارع:
عارف المنظر،
ما محتاج يقيف.
وهنا الحكاية ما عن الجامعة…
ولا عن القعدات…ولا عن البنات
الحكاية عن السرعة العجيبة
الإنسان بتعود بيها على أي شي.
الحاجة البتخليك تقول أول مرة:
شنو ده؟
بعد شوية تقول:
ممم
بعدها تقول:
عادي
وفي مرحلة متقدمة
تلقى زول قاعد يشرح ليك
ليه “العادي” ده هو الصح
وليه الاستغراب بتاعك دليل علي إنك متأخر شوية.
العجيب إنو في ناس
ما بتعيش الحدث…
بتعيش تفسيرو.
ما بتتعود ساي…
بتقنع غيرها إنو التعود ده تطور.
وبتتبني الفكره وتدافع عنها باستماته
وأنا ذاتي مرات كنت  بقيف وأسأل نفسي:
هو نحن بقينا متكيفين
ولا بس بقينا متعودين؟
لأنو في فرق كبير
بين إنك تتأقلم عشان تعيش،
وبين إنك تتبنى الحاجة
وتدافع عنها
وتستغرب من أي زول لسه شايفها غريبة.
واضح إنو أخطر مرحلة في أي قصة
ما البداية،
ولا النهاية…
أخطرها اللحظة
البتبقى فيها الحاجة
جزء من المشهد العام
وتدافع عنها وتحارب وجهات النظر التانيه بأستماته....


#الاسكندر

.

وفي ايام الثانوي الايام الحلوة والفترة الجميلة في تاريخ اي زول فينا زمن تشرك لي حبيبتك في درس العصر
وزمن الحب بالجوابات تكتب الجواب بالالوان وتبخ فيهو فتيل ريحة وفي نهاية الجواب تكتب ليها
"الرد سريعآ"
وزمن الود بجيب لي حبيبتو وردة جهنمية لارائحة فيها وحبيبتو تشمها وتقول ليهو الله
سمحة ومن هنا بدأ النفاق العاطفي ومن هنا كان مفروض نعرف ونتاكد انو البنات كضابات في الحب
ومابحكو مشاعرهم الحقيقية
بس مشكلتنا كنا بنباري قلوبنا وانحنا قلوبنا رهاااااف

المهم في الفترة ديك انا كنت مجكس نفيسه بنت جيرانة هي ماسمحة لكن مافي خيارات قدامي كتيييرة والفلنتاين قررب وكنت مزنوووق وماعندي حبيبة تجيب لي هدية

اصحابي كلهم عندهم جكسويات الا انا واي واحد حبيبتو وعدتو تجيب ليهو هدية يوم 2/14
و قلت اجكسها عشان الفلنتاين قرب واضمن لي هدية زي وزي باقي اولاد فصلنا

وماقصرت تب جابت لي هدية ومن ديييييك شبكت فيني وصراحة كدة بقيت متعلق بيها شديييد وبقييت بحبها من غير ما اشعر
وزي ماقال #احمد صحبي انت يا اسكندر قايل الحب دة شنو "مازول بتتعود عليهو وبس "

يوم طلبت مني اجيها المدرسة عندها احتفال نهاية العام وقالت لي في قصيدة انا كاتباها فيك تعال اسمعها
قلت ليها مدرسة البنات لا لا لا ممنوع نخشها

قالت لي تعال نضيف وظريف وانا بدخلك مع الضيوف لاني ماسكة الاستقبال وبكلم صحباتي يدخلوك

وفعلا جيت من دغش الرحمن واخر قشرة احلي قميص ابيض واحلي بنطلون بني ولقيت نفيسه راجياني في خشم الباب و دخلتني انا ومعاي زي اربعة من اصحابي وقعدنا في قعر الصيوان في ذحمة من الجكس امورنا ظابطة

واعاين في نفيسه وتعاين لي سااااكت نتكشم زي نار القصب

وفجاءة شافنا ليك مدير مدرسة البنات زول فقر وعواليق كان شفتو من شكلو ساااي بتكرهو
اي شئ شين في الدنيا دي فيهو
صلعة وشيب وكرش ورجلين مكعوجات وصوتو مقروش
وشال سوط العنج وختاهو وراهو وجاء علينا عديييل يتسحب براحة براحة
اصحابي عرفو الحنك انو جاينا قامو جرو
وانا قلت والله العظيم مابجري قدام 700 بنت
في مقدمتهم نفيسه مستحيل اجري
وانا نفيسه مسجلاني في تلفونها ب بطلي اجري من سوط مستحيل
وجاني ليك المدير انت يازفت الدخلك هنا شنووو

قطع فيني السوط الاول في ضهري والله الدنيا دي ضلمت في وشي
والله صاعقة بس ونزلت في ضهري اضنيني صنو قمة الالم وقمة الوجع انا حسيتهم ف اللحظة ديك

ورفع يدو ونزل السوط التاني في محل السوط الاول
لا لا لا دة فظييييييع مرة وحدة شلاني شلل
و سوط عجيب سوط حقد دفين سوووط" مر " ولا بنبلع ولافي طريقة استحملو جسمي كلو بقي ينتح وقلت يا اسكندر اصبر قربنا للباب كلها تلاتة سيطان تااااني
اصمد لحدي ما تطلع بعدين انكرش بي راحتك

لكن قدام البنات عيب وشينة في حقك تحكحك
والمدير رفع السوط التالت فوق وداير ينزلو في ضهري
والله من غير ما اشعر
ومن غير ما احس لا اراديـآ لقيت نفسي مشتت
وقمت جاااري
والله جريييت جري لمن نسيت شبطي في مدرسة البنات جابتو لي نفيسه نهاية اليوم لمن حصلت بيتنا

سامع ضحك البنات ف المدرسة من جريتي

#اخيراً
لايكلف الله نفسآ الا وسعها
والناس ماتدخل نفسها في حتات ضيقة
والمابتقدر عليهو ماتسويهو
وماعشان ترضي ليك زول تضيع روحك

#الاسكندر

دَنَت أيَّام رمَضان فيا ربَّ طَهّر قُلوبنَا،
ونقِ سَـرائِرنا ، وبلِّغـنا جمـالَ لحظَاتِه! 💜

#الاء

.

في حاجات شكلها كويس… لكن ما كلها معمولة عشانك.
الـ“كويس” ممكن يعجب الناس كلها،
لكن الـ“المناسب” داك البيلبس روحك على مقاسها.
الكويس ممكن يكون فرصة كويسة ليك
لكن المناسب  هو البيناسب ظروفك، شخصيتك، قدراتك، وحتى جنونك .
أحياناً نمشي نجري ورا الحاجة لأنها ممتازة في عيون الناس،
لكن نكتشف بعدين إنها ما شايلانا…
بس الحاجة المناسبة؟
دي بتحسك إنك في مكانك الصح، حتى لو كانت بسيطة.
الحاجة الحقيقية البتستاهل،
ما بالضرورة تكون أحسن خيار متاح،
لكن  بتكون أحسن خيار ليك إنت.
ولو يوم فقدت حاجة كانت “حلوة”
ما تزعل شديد…
يمكن ربنا شايل ليك حاجة مفصلة باسمك،
تيجيك في زمنها، وتقول:
“أها… دي كانت مستنياني.”
#وهكذا
وبكرة الضيقة تبقى ذكرى،
والوجعة تبقى حكاية،
ونضحك على الأيام الكانت بتختبر صبرنا.

#الاسكندر

رؤية هلال رمضان بالسعودية وغدا الاربعاء أول أيام شهر رمضان المبارك 🌙

رمضان كريم
تصوموا وتفطروا على خير ، ينعاد علينا و السودان بخير آمن و مطمئن ❤️

#الاء

صلاة التراويح اليوم من مسجد السيده سنهوري /الخرطوم ❤️
الخرطوم تتعافى❤️✨

.

رمضان مبارك عليكم اعاده الله علينا وعليكم بالخير و اليمن والبركات ؛
وهنالك عدة قواعد مهمه للتعامل معي اثناء الصيام :
١_لو لاقيتني الصباح لا قدر الله م تسلم علي سلام طويل غمزه بعينك كافيه جدا توصل احساسك
٢_م تحاول تخش معاي في اي جدال علمي او غير علمي
٣_م تسألني اساله عميقه محتاجه تفكير
٤_م تسالني اسأله غبيه من شاكلة انت جيت او انت قاعد
٥_لو عاينته للساعه رجاءا ما تجود علي بالمعلومه لانو انا في الغالب بكون ما عايز اعرف الساعه كم
٦_ ما تتغالط معاي
٧_ ما تسألني الليله يوم كم
٨_ اذا شالتك نومه وما اتسحرته رجاءا م تشتكي لي لانو انا م حأديك اذن تعوض السحور الطار عليك
٩_ كلامك صاح عشان كده م تجرني للغلاط
١٠_ أي إعلان أكل قدامي يُعتبر محاولة اغتيال معنوي… وسيتم التعامل وفقاً للائحة
١١_ خلينا نتخاطب بالعيون وما تجرنا للغلاط
١٢_ رمضان كريم الله اكرم يلا تاني م تقول لي العباره دي كل يوم لانها بتعطش
سيتم التعامل ابتداءا من يوم غدا باذن الله بناءا علي هذه الروشته ولا عزر لمن انذر.

#الاسكندر