تجي الليلة ؟
وتعطّر هالسهر بحضورك
وتشعل قناديله !

تفصلنا مسافة وتجمعنا أغنية.

هذه مالت امس نزلتها بالتيليقرام وماكان الورق عندي

خلك على وضع الهجوم
ما لانسحابك فايده

ووقفتك قدام العموم
احذر تكون محايدة

اما ارتفع فوق النجوم
او طيح طيحة كايدة

كل ضحكة راحت لغيرك .. حزينة

ماني حزين ..
هذه ملامح فقد ،
وشويّة حنين !
ترك بي غيابك أثر
تدرين شوقي وش كثر ؟
كثر ضياعي لو سألت :
بترجعين ؟

تذكرتك وانا احسبني نسيتك
بوسط القلب ناظرت ولقيتك !

مالت امس نسيت ارسلها

ساعديني
لي متى انتي بالوعود
تعلّقيني ؟!!
حالي هذا ماهو حال
احكمي لي بالعدال !
اما انسى حبك
او انك تجيني !

انا اللي هناك ..
وقف جسم وبقايا روح
والباقي رحل وايّاك !

تنام العيون ولا غفى جفني الساهر
وتجفّ الدموع ولا ارتوى حزني الظميان

حسبت الفكر يسلى واثاري الوله كافر
يمرّ الفكر غفلة ويدخل بلا استئذان

اشوف التعب بيّن على وجهي الصابر
واغنّي من آه بداخلي ماني بطربان

واقول العذاب اليوم والقى الهنا باجر
ويجي باجر وحالي مثل ما عليه الآن

سبب شخص لا هو حبّ نزوة ولا عابر
سكن بالضلوع وصار قلبي وهو جيران

كتبته من اعذب ما جمع فكرة وشاعر
وغنّيت له بالحبّ "يا غالي الأثمان"

تعاهدت انا وايّاه نبقى إلى الآخر
والى اليوم لا خنت بعهدنا ولا هو خان

نسافر .. ونرجع دايم ونرجع نسافر
واجي مثل ماكنت ويجيني مثل ماكان

احبه وابد ما شاف خذلان أو قاصر
وهو ما حصلّ لي منه قاصر ولا خذلان

اذا احتجت له كفّى واذا كان مو قادر
يحاول يلبّي حاجتي له قدر لامكان

قريب ومنع قلبي عن مواصله حاجر
بعيد واحسّه ليّ اقرب من الشريان

لعينه اسوق الرجل له سوق واخاطر
واسوّي واسوّي وارجع بهقوتي خسران

انا ما نقضت العهد يوم اني اهاجر
قسم كانت الخطوة تعب والزمن أزمان

حدتني ظروفي عنّه وحظّي العاثر
وانا لو عليّ الموت ارحم ولا الحرمان

شسوي وانا لي بالهوى خافقٍ طاهر
زرع من حنينه ورد والدمع له هتّان

حزين وملامح ضحكته تكسر الخاطر
يزيّف فرح لكن عجز يستر الأحزان

ترجّى الظروف ولا لقى ابشر وحاضر
زهم هالطريق ولا لقى حروة وعنوان

كُبر والغرام اللي سكن فيه يتكاثر
ولا له سوى الأحلام والصبر والكتمان

سعد الردعان

انتهينا من مشوار الدفتر وان شاء الله كم يوم على ما اضبط الدفتر وبنختار الفايز فيه

‏بها من اللطافة ما يجعل الحروف تخرج من فمها على هيئة ورد.

‏تجي ندندن ؟
‏ونتبادل أغانينا ،
‏نغنّيها .. وتغنّينا
‏ونقول لهالسهر :
‏طوِّل ..
‏نحبّك أكثر من أوّل !
‏ما دام الليل يجمعنا
‏شعاع الشمس ..
‏لا يجينا !

‏إيه انا جداً أناني !
‏راضي إن بيني وبينك :
‏ألف دار ودار وبحور ومواني
‏بس ماهو ..
‏"شخص ثاني"

مَ حنّا اثنين ..
أنا وايّاك روحٍ واحدة
مقسومة بـ جسمين !!
تغيّر كثر ما ودّك
أنا اللي مهما تتغيّر ..
أعرفك زين !

‏وتسألينه ؟!
‏ما كفاك انه بمكانه
‏من وعدتيه بتجينه !
‏شوفي صوته ..
‏وشكثر مخنوق من عبرة حنينه !
‏شوفي وجهه ..
‏وش كثر وجهه حزين !!
‏مافي داعي تسألين
‏دايم المشتاق نلقى ..
‏كلّ اجاباته ..
‏بـ عينه !

لو هي على النية نصرنا الشام
لكنها ما هي على النية ..!

كلماتي
اداء ثامر الحربي
https://youtu.be/EFyTDRR7pI8