مرة تبيني يمك .. ومرة تروح
هذا اللي صاير بيننا مدري شنو !

بالله ما سمّيتك علاج الجروح ؟
علمني اللي علمك تجرح منو ؟

‏ما حنّا اثنين ..
‏أنا وايّاك روحٍ واحدة
‏مقسومة بجسمين !!
‏تغيّر كثر ما ودّك
‏أنا اللي مهما تتغيّر
أعرفك زين !

لا تستغربين :
شفتي هذاك اللي يغني ؟
ما يغني
هذا نوع من الأنين !
شفتي هذاك اللي يتلفّت ؟
ما تلفّت
هذا نوع من الحنين !
الحزن علّمنا نميّز بعضنا
ما يفهم عيون الحزين
الا الحزين !

وتسألينه ؟!
‏ما كفاك انه بمكانه
‏من وعدتيه بتجينه ؟
‏شوفي صوته ..
‏وشكثر مخنوق من عبرة حنينه !
‏شوفي وجهه ..
‏وش كثر وجهه حزين !!
‏مافي داعي تسألين
‏دايم المشتاق نلقى ..
‏كلّ اجاباته ..
‏بـ عينه !

احب اشوفك تضحكين
الضحكة هذه أمنية

سوالفك وانتي تحكين
احس فيها أغنية

من كثر مافيها جمال
لو جات تمسك كوبها

كل اللي في هالكون قال
يا ليت انا مشروبها !

‏لو تكلّم ،
‏من جمال الصوت
‏احسّ انّي متحلّم !
‏ما أبي الساعة تفوت
‏كلّ ما عدّت دقيقة ..
‏كنت اموت !
‏عنّه اخفي الشوق
‏وعيوني تعلّم !

أنتِ حُرّة ،
‏ليه علقتي قليبك
‏في وعد ..
‏يمكن يمرّه ،
‏والا يمكنّه نساه !
‏داوي يا بنتي جروحك
‏وشوفي روحك !
‏وموعدك لو هو بغاه؟
‏وين ما كان بيمرّه !

يا حاضرة ما كنّ قبلك غايبين ،
ولا كنّ قبلك راح من عمري زمن

لو ادري انك بعد هالحزن بتجين
ما كان مرّ بخاطري قبلك حزن

كنا نبي .. وكنا نخاف ونكذب
احلامنا متعلّقة بالماضي !

صعبة نقول نحبّ ، بسّ الاصعب
تروح لو نقولها عالفاضي !

طعنة الواقع أقسى من طعون الحراب
لا تعشّم ظنونك .. قل لها "ربّما"

ماهي كل الوسايل تاخذك للصواب
تب تصيب ، وتخيب لكلّ رامٍ رما !

قبل تتقدم ارسم خطة الانسحاب
ماهو كل السحاب ان جف ريقك هما

غلطتك ما حسبت لاي حاجة حساب
لين ما ابعدت نفسك عن حدود الحما

العما مو عماة العين يابو الشباب
انك تصدّق اللي تشوف .. هذا العما

ضاع ثلثين عمرك وانت تلحق سراب
لا قطعت الطريق .. ولا رويت الظما !

ما علمك صمتي شكثر فيني كلام؟
والا انا اللي بس احسك واسمعك

ما ذكرك مُر الجفا بحلو الغرام
والا انت بالثنتين ما تفرق معك ؟

لا يخدعك هالبُعد لو مرّ بسلام
ترا أوّل ايّامه حبيبي تخدعك !!

بكره بتجيك ايام ما تقدر تنام
بتوله لذكرى ، وذكرى توجعك

البُعد ليله موحش وفيه انفصام
تضحك ونفس الوقت تنثر مدمعك

وبتذكر ايامك معاي .. ويا حرام
حتى رجوعك وقتها ما ينفعك

كم قلت لك درب الجفا حزن وظلام
بيضيّعك دربه .. وشوفه ضيّعك

وجهك حزين وبسمتك فيها انهزام
ودك تجي ولا لك طريق يرجّعك

متى على الله نفترق ؟
يا جرحي الظامي
بنهي مشاوير الورق
واكسّر اقلامي !

هي دقايق ..
‏ممكن تحوّل شعوري
‏من حزين اصير رايق !
‏ليش تبخل في حضورك ؟
‏أو شعورك ؟
‏وأنت لو تضحك ..
‏تطيّب خاطر
‏ألفين متضايق !!

لو هي سهلة ،
‏ما تشوف قلوب كهلة
‏وتوّها بسنّ الشباب !
‏الهوى ..
‏ياهو عذاااب !!
‏فجأة نلقى الحبّ فينا
‏وان رحل ؟
‏ما يعطي مُهله !

تعالي مابي لهذا الغياب اعذار
رجوعك يغفر غيابك ولو طوّل !

تعالي نطفي الشوق ونشب انوار
ترا والله الليالي بعدك تهوّل

تعبت .. وكلّ ما فيني بدا ينهار
ادوّر كلّ ليلة صبر .. واتسوّل !!

انا كل ما بديت اتقبّل اللي صار
يناديني الوله وارجع من الاوّل

من أنتِ ؟ ما اسمكِ ؟ كيفَ أصبحتِ هنا ؟
كيف اتّخذتِ القلبَ عندكِ مسكنَ ؟

هل أنتِ حزنٌ جاءَ يشربُ من دمي ؟
أم أنتِ الحلمُ الذي طالَ المُنى ؟

تذكرينه ؟

مَرّ جنبك وانتفض به شوق
وارتعشت يدينه
مَرّ ، لكن ما التفت لك
خايف انك تنكرينه !

كان واضح في عيونه ..
خوفه ، اشواقه ، جنونه !
كلّ ذكرى ماضية مرّت عليه
جدّدت له كلّ جرحٍ كان فيه !
مَرّ .. لكن هالثواني
دمّرت باقي سنينه !
تذكرينه ؟

من رحلتي دايم يمرّ المكان
اللي جمّعكم وفرّقكم زمان !
من غيابك ..
ما هقى انك ترجعين !
شاللي جابك ؟
صدفة او جابك حنين ؟

هزّ وجهك كل ساكن
داخله لما التقاك !
حاول يناديك لكن ..
قدرته عيّت تعينه
تذكرينه ؟
مرّ لكن ما التفت لك
خايف انك تنكرينه !

صبرتِ يا شامُ، هيا الآنَ فاغتسلي
وتزيّني وارقصي فرحاً بلا خجلِ

قد زفَّ نصرُكِ فوقَ الأرضِ أغنيةً
يشدو بها المجدُ للتاريخِ والدول