🟢ROMITANDA INKLYUZIV TA’LIM O‘QUVCHILARINING IJODIY ISHLARI AUKSIONGA QO‘YILDI

Bugun Romitan tumanida inklyuziv ta’lim oluvchi o‘quvchilarning ijodiy qobiliyatlarini namoyon etish, ularning iste’dodini qo‘llab-quvvatlash hamda jamiyatda mehr-oqibat, bag‘rikenglik va teng imkoniyatlar muhitini mustahkamlashga qaratilgan xayrli tadbir tashkil etildi.

Tadbir doirasida o‘quvchilar tomonidan katta mehr, ishtiyoq va ijodiy yondashuv bilan chizilgan rasmlar auksion savdosiga qo‘yildi. Bolalarning o‘z qo‘llari bilan yaratgan ijodiy ishlari ishtirokchilarda katta qiziqish uyg‘otib, ularning qalbida yashiringan iste’dod va imkoniyatlarni yana bir bor namoyon etdi.

Har bir rasmda bolalarning beg‘ubor dunyosi, orzu-umidlari, hayotga bo‘lgan o‘ziga xos qarashi va yorqin tasavvurlari aks etdi. Ranglar orqali ifodalangan ushbu ijodiy asarlar bolalarning nafaqat badiiy mahoratini, balki ularning cheksiz imkoniyatlari va katta salohiyatini ham namoyon qildi.

Tadbirning asosiy maqsadi — inklyuziv ta’lim oluvchi o‘quvchilarni har tomonlama qo‘llab-quvvatlash, ularning o‘ziga bo‘lgan ishonchini oshirish, ijodiy salohiyatini rivojlantirish hamda jamiyat hayotida faol ishtirok etishlari uchun keng imkoniyatlar yaratishdan iborat.

Auksion savdosi orqali bolalarning mehnati va ijodiga munosib baho berish, ularni yangi marralar sari ruhlantirish hamda har bir farzandning qobiliyati va iste’dodi qadrlanishi lozimligini keng targ‘ib etish ko‘zda tutilgan.

Zero, inklyuziv ta’lim — bu nafaqat ta’lim olish imkoniyati, balki har bir bolaning o‘z qobiliyatini namoyon etishi, jamiyatda o‘z o‘rnini topishi va o‘ziga bo‘lgan ishonchini mustahkamlashidir.

Bunday ezgu tashabbuslar bolalarga mehr va e’tibor ko‘rsatish, ularning iste’dodini kashf etish hamda jamiyatda insonparvarlik, hamjihatlik va bag‘rikenglik tamoyillarini yanada mustahkamlashga xizmat qiladi.

Har bir bolaga imkoniyat beraylik — iste’dodlar gullasin, orzular ro‘yobga chiqsin!

Romitan tumani hokimligi matbuot xizmati

✝️Telegram | ☮️Facebook | 💟Instagram | ☸️YouTube