Телграм каналымды қолға алам деп жиі ойлаймын. Бірақ қалып қоя береді 😔 Қазір енді үзік ойларымды жазатын жер етсем деп тұрмын.

Өлім жайлы аз ойланамыз-ау біздер деген. Күні кеше бір жағдай жүрегімді ауыртты. Инстаграмда бір оқырманым бар еді. Аракідік сөйлесіп қалатынбыз. Кейін кітаптарымызды алды. Тіпті уатсапта да сөйлескенбіз. Енді бірер күн бұрын сол кісінің уатсабынан "А... қа уақыт болды. Жаназа намазы ертең 11.00-де" деген хат кеп тұр.

Жан дүнием алай-дүлей боп кетті. Талай өлім туралы естіп жүрміз ғой. Бұл жерде әсер еткені "уақыт болды" дегкен сөз сияқты. Бәріміздің де бір күні уақытымыз бітеді...

Ех! Қандай ауыр еді... Бастысы Алланың алдында жүзіміз жарық болғай!

Тамақтану әдетімді өзгертуді бұрыннан ойлап жүрмін. Өйткені жас та болсақ, белгілі бір ауруларымыз бар. Дәрігерге жүгінсек олар «Дұрыс тамақтаныңыз, қуырылған жемеңіз, тәтті жемеңіз, ұнды тағамдарды азайтыңыз. Бәрі тамақтан» деп жатады. Коронавирустың бір пайдасы десек те болар, соңғы кезде өзімнің әрі отбасымның денсаулығы туралы шындап ойланып, аурудың алдын алғым келді. Амал – бізден, шипа – Алладан.
⠀
Осыған дейінгінің бәрі дайындық болатын. Төменде ертеңнен бастап енгізетін әдеттерімнің тізімі. Біріңізге болмаса, біріңізге пайдалы боп қалар деп жазып отырмын. Бір айдан соң нәтижесін тағы жазамын, бұйыртса.
⠀
• Ояна сала аш қарынға 500 мл жылы су ішу;
• Тамақ ішіп отырғанда телефон ұстамау, кітап оқымау, тек тамақ туралы ойлау. Себебі, басқа нәрсеге алданып отырып, байқамай тамақты көп жеп қоюың мүмкін;
• Шанышқы қағидасы. Аузыңа тамақ салған соң қасығыңды не шанышқыңды қолыңда ұстап отырмай, үстелге қоя тұру. Бұл аузыңыздағы тамақты дұрыс шайнауға көмектеседі;
• Үстел басында 20 минуттан артық отырмау, қажет болса таймер қойып қою;
• Консервіленген, қуырылған тағамдардан, полуфабрикаттан бас тарту;
• Глютен, қантты және сиыр сүтінен жасалған тағамдардан бас тарту;
• Таңғы асты оянған соң 1 сағат ішінде ішу;
• Таңғы асқа ақуыз+май (мыс: топл майға пісірілген жұмыртқа) жеу;
• Түскі асқа ақуыз+бұқтырылған көкөніс+май (мыс: ет, қызанақ, қиярды зәйтүн майына араластырып салат);
• Кешкі асқа қиын көмірсу (көкөніс сорпалары, күріш, қарақұмық) жеу;
• Ақуызды тағамдарды кешкі 17.00-ге дейін жеп алу және жанына міндетті түрде көк шөп қосу;
• Күніне сорпа ішу;
• Тамақты тек жануар майына пісіру;
• Күні бойы 2,5 л су ішу;
• 19.00-ден кейін суды азайту;
• Витаминдерімді уақтылы ішу;
• Өлшеулі мөлшерде жеміс-жидек жеу.
⠀
Аптасына 1 күн өзіме қалағанымды жеуге рұқсат беремін. Ал қалған уақытта барынша ұстануға тырысамын. Нәтижесін осында салып тұрармын.
⠀
⠀
#марфу_жекедаму #тамақтану #жақсыәдет #әдет

1-күн. Шүкірлік күнделігі

1. Аяланың тыныш ұйқысы үшін Аллаға шүкір;
2. Алла тағаланың небір тағамдар жегізіп, соншалық нығмет бергені үшін шүкір;
3. Денсаулығым үшін шүкір.

Бүгін қандай жақсы амал істедім?

Жанұям үшін тамақ әзірледім;
Глютенсіз нан пісірдім;
Өзгелермен білімімді бөлістім;
Аяламен уақыт өткіздім;
20 заттан құтылдым.

Ұйқымыздан оятқан Аллаға шүкір!

Аллаға шүкірлікті өмірімдегі жақсылықтар үшін ғана емес, кейбір келеңсіздіктер үшін де айтып үйренгім келеді. Мысалы, бүгін күн өте ыстық. Соның арқасында жайған кірім тез кепті, Аллаға шүкір деген секілді 😊

Бүгін Алматыда жаңбыр жауып тұр. Бізді салқындатып, сергітіп алғысы келген Аллаға шүкір!

Кеше Төрем❤️ екеуміз ерлі-зайыптылардың қарым-қатынасы туралы сөйлестік. Жұптар неге бір-ақ сәтте бір-біріне жат боп кетеді? Неге "әңгімелері таусылады"?

Төрем ❤️ бәрін құндылықтар өзгеруімен байланыстырады. Яғни уақыт өте келе екеуінікі екі түрлі боп кетуі мүмкін дейді. Сондықтан екеуінің бірге дамып отыруы өте маңызды.

Жаңа бір істі қолға алып жатырмын. Алла берекесін бергей!

Бүгін қандай жақсы амал жасадым?

Аяламен сапалы уақыт өткіздім.
Отбасыма тамақ пісіріп бердім.
Кітап оқуға уақыт таптым.
Көптен ойда жұрген жаңа істі қолға алып жатырмын.
Дұрыс тамақтануымды бұзған жоқпын 😇

Жазды қимай жүрмін. 5-ақ күн қалды.

Күз берекелі болғай! Жақсы көретін мезгілім. Аллаға шүкір!

Күзде істегім келетін істер тізімін жасап шықтым😊 Күз басталғалы ойлап жүр ем. Алла тағала орындалуын нәсіп етсін!
1. Ботаникалық баққа барып, жапырақ жинау;
2. Асқабақ сорпасын пісіру;
3. Жақын қалалардың біріне саяхат жасау;
4. Табиғаттағы пикник яғни, күзгі баққа барып, таңғы ас ішу;
5. Фотосессия жасау;
6. Жаңбырлы күні кофейня терезесінен қарап отырып, кофе ішу;
7. Күздің аурасын сездіретін фильмдер көру;
8. Алматыдағы Баум тоғайына барып көру;
9. Сүйікті кітабымды қайталап оқу;
10. Күздің әдемі күнінде қала көшелерімен жаяу қыдыру;
11. Күн батып бара жатқан сәтті тамашалау;
12. Маникюр жасату;
13. Ғаламторсыз күн өткізу;
14. Алма пирогын пісіру.

Инстаграмдағы, айналамыздағы тым "успешный" адамдарға қарап, кейде өзіңді қамшылайсың. "Менің де мүмкіндігім көп қой", "мен де көп ақша таба алам", "асығу керек", "көбірек жұмыс істеу қажет" деп. Тезірек... Көбірек...

Айына миллиондаған табыс туралы естіп, сен де дүрмекке ере бастайсың. Жанталасқа қосыласың. Ол жанталастың осы сәтпен өмір сүруді ұмыттыратынын, отбасыңа бөлетін уақытты алып қоятынын, дінің туралы ойлауға мұрша бермейтінін, Құдайға құлшылығыңды көркем жасаудан қалдыратынын да естен шығарасың.

Бірақ сен ондай емессің, жанталасып өмір сүру - сенікі емес. Сен өзен емес, көл шығарсың. Олар сарқырап ақпаса, тоқтап қалса, жоғалып кетеді. Ал сен өз орныңда ақырын ғана буырқанып жатасың, күн сәулесімен айдының жарқырап шұғыласын шашады. Қажет болса, айналаңа бақыт та сыйлайсың, жұбатасың. Көл де, өзен де жаман емес. Тек әркімнің өз жолы бар.

Ешқайда асықпай, әдемі айдын көл болуға мүмкіндік туып тұрғанда, КӨЛ бол. Және сол үшін Аллаға шүкіршілік айт! 🤗

"Намазды қалай қаза етпеуге болады? Құлшылыққа ықыласты қалай арттыруға болады?" деп үнемі сұрайсыздар. Соңғы кезде өзім орындауға тырысып жүрген 2 лайфхакпен бөлісейін.
⠀
Ең алдымен дұға. Яғни таң намазын оқып біткен соң Алладан "Бесін намазын оқуға ықыласымның артуын, қаза етпеуімді" сұраймын. Бесін намазында келесі намаз - екінтінің сәтті өтелуін тілейміг. Көп емес, тек келесі намазды ғана көздеймін. Солай бір намаз бір намазға жалғасуда.
⠀
Келесі бір істеуге тырысып жүрген амалым - Пайғамбарымыздың (с.а.у.) сүннеті. Алла елшісі намаз уақыты кіргенде қандай іспен айналысып жатса да, оны тоқтатып, бірден мешітті бетке алады екен. Не істеп жатса да! Мен де осыны жасауға тырысып жүрмін. Намаз уақыты кірген соң көп ұзатпай намазды оқып алуды. Үнемі қолымнан келе бермейді. Бірақ барынша тырысып жүрмін. Өйткені намаз оқымасаң, оқығанша "оқу керек еді" деген ойдың өзі біраз энергияңды құртады.
⠀
Намазға немқұрайлы боп жүрген достарым, осы екі әдісті қолданып көріңіздерші. Мүмкін кәделеріңізге жарап қалар 🤗

Ертең Арафа күні. Бұл күні не істеу керек екенін мына видеомнан көріңіз 🤗

https://youtu.be/NoAWIXzP3ek

Сіз өзіңізді мына әлемде еш құны жоқ жан секілді сезінуіңіз мүмкін. Алайда...

Біреу сіз сыйлаған әдемі ыдыспен күнде таңертең кофе ішіп, бақытты...

Енді біреу радиодан Сізді еске түсіретін әнді тыңдап, мәз болып келеді...

Тағы біреу Сіз ұсынған кітапты оқып, өзге әлемде саяхатта жүр...

Енді біреу жұмыстан шаршап келгенінде Сіз айтқан әзілді еске түсіріп, бір күліп алды...

Тағы біреу Сіз айтқан комплименттен кейін өзін бағалай бастады...

Ештеңені өзгерте алмаймын, еш нәрсеге әсер алмаймын деп ешқашан ойламаңыз. Сіз жайған жылулық пен кішігірім деген жақсылықтардың өзін мынп әлемнен өшіріп тастау мүмкін емес.

Алла сүйген құлдың мынандай белгілері бар екен:
⠀
Ауру адамды өзіне зиян әкелетін белгілі бір тамақтан сақтандырғанымыз секілді Алла тағала да сүйген құлын дүниеден қорғайды. Дүние берсе де, оны жүрегіне кіргізбейді, соңынан қудырмайды;
⠀
Оған құлшылықтың түрлі есіктерін ашып береді;
⠀
Оған ізгі амалдардың түр-түрін үйретеді;
⠀
Шынайы дұға жасауға әкелетін істі тапсырып қояды;
⠀
Жолынан Алланы еске түсіріп тұратын жақсы адамдарды кездестіреді.
⠀
Салиқалы адамдарды жақсы көргізеді, салиқалы адамдар мұны да жақсы көретін болады;
⠀
Мешітке жиі барғызады;
⠀
Өзін жиі еске алғызады;
⠀
Күнә мен оның арасына қорған қояды;
⠀
Жанына тура жолдан тайғандарды жолатпайды;
⠀
Оған Құран оқығаннан ләззат алдырады;
⠀
Оны Пайғамбарына (с.а.у.) ғашық етеді;
⠀
Жүрегінен Өзінен алыстататын істі алып тастайды;
⠀
Оны даудан қашырады;
⠀
Дәрет, намазға асықтырады;
⠀
Ондай жанның тілі истиғфардан босамайды.
⠀
Шади Альмасридан орысшаға аударған Иман Қуанышқызы. Мен қазақшаладым. Осы тізімге қараңыз да ойланып көріңізші. Алла жақсы көретін жандардың қатарындасыз ба? Өміріңізде қай пункт бар?

Құрбылармен кездесіп отырғанбыз. Әңгімеден әңгіме шығып, тақырып бай болуға, жалпы Исламдағы байлыққа қатысты тақырыпқа ойысты. Біріміз көзсіз ақшаға ұмытла берудің дұрыс еместігін, енді біріміз «кедейлердің жұмаққа бірінші кіретінін» айтып жаттық. Сонда қыздардың бірі мына бір әдемі оқиғаны баяндап берді. Соны сіздерге жеткізбекпін 😊
⠀
Баяғыда бір кісі сауда жасамақ болып үлкен керуенмен жолға шығыпты. Бір жерде аялдап, демалып отырғанда көзі екі көгершінге түседі. Байқап қараса, көгершіннің бірінің көзі соқыр екен. Ал жанындағы көгершін тұмсығымен тістеп әкелген асын соқыр көгершінге беріп, тамақтандырып жатады. Мұны көріп қайран қалған саудагер «О, мейірімі шексіз Алла тағалам! Қандай жағдайда болсақ та Сен бізді аш, ризықсыз қалдырмайды екенсің ғой!» дегенді қайталай береді. Ақырында керуенін кері бұрып, ауылына қайтады.
⠀
Ауылға керуен-керуен жүкпен қайта кіріп келе жатқанын көрген адамдар саудагерден себебін сұрайды. Екі көгершіннің оқиғасын баяндаған саудагер «Жұмыс істеп қиналмай-ақ қойсақ та болады екен. Алла тағала бізді ризықсыз қалдырмайды», - дейді. Сонда оның жауабын естіп тұрған бір адам басын шайқап: «Еее, сен соқыр көгершіннің емес, оған тамақ тасыған жанындағы көгершіннің орнында болуды ойламадың ба?» - деген көрінеді.
⠀
Ғажап мысал, иә? Алушы қолдан беруші қол жақсырақ, әлсіз мұсылманнан күшті мұсылман Алланың алдында сүйкімдірек. Сондықтан Алла тағаладан байлыққа жеткіз деп сұрағанның, сосын ризық-несібеге жету үшін қолдан келгенше еңбектенгеннің айыбы жоқ.
⠀
Алайда ондағы ниет ақшаңды адамдармен бөлісу, әлсізге көмектесу, қоғамға пайдалы іс жасау болу керек. Тек қарақан басың мен құлқыныңды тойдыру үшін байлыққа ұмтылу – дінімізде құпталмайтын іс.
⠀
Қазақта Құнанбай, Маман, Досжан, Қаражан секілді бір ауылды, әулетті ғана емес, мұқым елді асыраған небір байлар өткен. Меккеде қазақ түссін деп қонақүй салдырған, мешіт-медресе тұрғызған, бала оқытқан, «Қазақ» газетін шығартқан, ұлтының оқығандарына қызмет еткен, міне, солар.
⠀
Сондықтан бүгінгі жұмадағы тілек, бәріміз бай болайық, Қарынбайлардан емес, жомарт байлардан болайық! Алла тағала дүниені жүрегімізге кіргізбесін, тек қолымызға берсін!🤲