🌷 Ана қуаты: Энергетика министрлігіндегі көпбалалы ханымдардың табыс формуласы

▪️Халықаралық әйелдер күні қарсаңында Энергетика министрлігі өзінің ерекше қызметкерлері туралы сыр шертпек. Бұл мереке әрқайсымыз үшін ана бейнесімен тығыз байланысты. Біздің ведомствода жеті көпбалалы ана еңбек етеді. Олар жауапты мемлекеттік қызметті әлемдегі ең маңызды жұмыс — бала тәрбиесімен шебер ұштастырып, күн сайын елеусіз ерлік жасап жүрген таңғажайып жандар. Олардың әрқайсысы — кәсіби маман бола отырып, үлкен әрі тату отбасының ұйытқысы болып қалудың шынайы үлгісі.

▪️Осындай кейіпкерлеріміздің бірі — Өтініштерді бақылау және орындаушылық тәртіп департаментінің басқарма басшысы Жанар Әлиева. Оның мемлекеттік қызметтегі еңбек өтілі 23 жылды құрайды. Жанар Қабиденқызының алғашқы мамандығы — математика пәнінің мұғалімі. Дәл осы салаға тән дәлдік пен тәртіп бүгінде оған министрліктің күрделі құжаттамалық қызметінде көмектесуде. Бірақ оның ең басты жетістігі — төрт баласы мен аяулы әже мәртебесі. Тығыз жұмыс кестесіне қарамастан, ол би мен сурет салудан шабыт алып, шығармашылыққа уақыт табады. Бұл нәзіктік пен энергияның шекарасы жоқ екенін тағы бір мәрте дәлелдейді.

▪️Заманауи басшы мен көпбалалы ананың жарқын үлгісі — Назым Бекбатырова. Бүгінде ол Мұнай өңдеу және мұнай өнімдерін өндіру басқармасын басқарады. Оның табысты мансабының іргетасы жас кезінен қаланған: Назым Төлегенқызы — дарынды балаларға арналған «Дарын» мамандандырылған лицейінің түлегі. Ол лицейді үздік аттестатпен бітіріп, ҰБТ-да 120-дан 116 балл жинаған. Мұндай кемелдікке ұмтылыс пен академиялық шыңдалу бүгінде оған министрліктегі мұнай өңдеудің ең күрделі процестерін сәтті басқаруға септігін тигізуде. Қызметтегі осындай зор жауапкершілікке қарамастан, ол тарих, мәдениет және спортпен айналысуға уақыт табады, ең бастысы — төрт баласының тәрбиесі мен біліміне бар күш-жігерін жұмсайды. Оның «табыс формуласы» жоғары еңбекқорлық пен оптимизмге негізделген.

▪️Өтініштерді бақылау департаментінің бас сарапшысы Әлия Қадырбекова да рух беретін үлгілердің бірі. Оның мемлекеттік қызметтегі жолына жиырма жыл толды. Еңбек жолын көлік саласынан бастаған ол, 2009 жылдан бері энергетика саласына адал қызмет етіп келеді. Әлия Аманжолқызы — төрт баланың анасы. Үлкен қызы дарынды балаларға арналған мектепте және спортта жетістіктерімен қуантса, ұлдары күрес, каратэ, шахмат және робототехника секцияларын белсенді бағындыруда. Осы қарбалас тіршілікте Әлия өзіне де уақыт бөледі: йогамен, жүзумен айналысады. Сондай-ақ оның дастарқан мәзірін сәндеу секілді сирек хоббиі бар — ол қарапайым отбасылық кешкі асты нағыз мерекеге айналдыра біледі. Үйі жайқалған гүлдерге толы, ал есейіп қалған балалары қазірдің өзінде оның сенімді көмекшілеріне айналған.

▪️Осындай оқиғалар бізге қатаң жұмыс есептері мен мемлекеттік міндеттердің артында үлкен жүректі әйелдер тұрғанын еске салады. Біздің көпбалалы аналарымыз бәріне үлгереді: министрліктегі орындаушылық тәртіпті қадағалап, күрделі өндірістік процестерді басқарып және жақындарына жылулық сыйлап жүр. Осынау мерекелік күні біз олардың таңдаған ісіне адал бола отырып, отбасы ошағын сақтай білу шеберлігіне бас иеміз.

⚜️Кәсібилік пен құрмет: Энергетика министрі сала аруларына мемлекеттік наградалар табыстады

✔️Астана – Халықаралық әйелдер күні қарсаңында Энергетика министрі Ерлан Ақкенженов отын-энергетика кешенінің қызметкерлерімен және ардагерлерімен салтанатты кездесу өткізді.

✔️Ведомство басшысы әріптестерін құттықтай отырып, еліміздің энергетикалық жүйесінің тұрақтылығы – әйелдер қауымы негізгі рөл атқаратын ұжымдық жұмыстың нәтижесі екенін атап өтті.

«Энергетика саласы темірдей тәртіпті, жоғары құзыреттілік пен төзімділікті талап етеді. Біздің салада мыңдаған кәсіби маман әйелдердің еңбек етіп жүргенін мақтан тұтамыз. Сіздер күрделі процестерді сәтті басқарып, инновацияларды енгізіп қана қоймай, біздің қатал жұмысымызға үйлесімділік пен парасаттылық сыйлап келесіздер», — деп атап өтті Ерлан Ақкенженов.

✔️Кездесудің маңызды бөлігі марапаттау рәсімі болды. Қазақстан Республикасы Президентінің Жарлығына сәйкес, мемлекеттік және қоғамдық қызметтегі еңбегі үшін бірқатар қызметкерлер жоғары марапаттарға: «Құрмет» орденіне және «Ерен еңбегі үшін» медальдарына ие болды.

✔️Бұдан бөлек, ведомство басшысы салалық ерекшелік белгілерін табыстады. Басқарушылық, инженерлік және сараптамалық жұмыстарда жоғары нәтиже көрсеткен мамандар «Электр энергетикасы саласына қосқан үлесі үшін» медальдарымен және Құрмет грамоталарымен марапатталды.