📌 Ақтауда құрылыс саласын дамыту және жаңа Құрылыс кодексін қолдану мәселелері талқыланды

Қазақстан Республикасы Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков Ақтау қаласында өткен «Атамекен» ҚР ҰКП Төралқасының Құрылыс және ТКШ комитетінің көшпелі отырысына қатысты.

Отырысқа мемлекеттік органдардың, салалық бірлестіктердің және Маңғыстау облысының құрылыс саласындағы бизнес өкілдері қатысты.

🖋Отырыстың негізгі тақырыптарының бірі 2026 жылғы 1 шілдеден бастап күшіне енген Қазақстан Республикасының Құрылыс кодексін практикада қолдану мәселесі болды. Жиын барысында қатысушыларға Кодекстің негізгі жаңашылдықтары, оның ішінде құрылыс саласын реттеудің жаңа тәсілдері, өзін-өзі реттеу, жобалау, сараптама және техникалық қадағалау мәселелері, сондай-ақ құрылыс процесіне қатысушыларға қойылатын талаптар түсіндірілді. Сонымен қатар тұрғын үй саясаты саласындағы өзгерістер мен азаматтарды тұрғын үймен қамтамасыз ету тетіктерін жетілдірудің жаңа тәсілдері таныстырылды.

Отырыс барысында бизнес өкілдері құрылыс жобаларын іске асыру кезінде туындайтын бірқатар өзекті мәселені көтерді. Атап айтқанда, жобалау-сметалық құжаттаманы әзірлеу кезіндегі баға белгілеу, құрылыс саласы субъектілерін лицензиялау және техникалық қадағалау қызметтеріне ақы төлеу тетігін жетілдіру мәселелері қаралды.

Құрылыс процесіне қатысушылардың нысандардың бүкіл өмірлік циклі кезеңдеріндегі — жобалау мен құрылыстан бастап пайдалануға беруге және одан әрі күтіп-ұстауға дейінгі жауапкершілігіне ерекше назар аударылды.

Сондай-ақ қатысушылар Маңғыстау облысы үшін өзекті жер қатынастары, құрылыс және инвестициялық жобаларды іске асыру мәселелерін талқылады. Өңірлік бизнес өкілдері өз ұсыныстарын білдіріп, шешуді қажет ететін мәселелерді ортаға салды.

🤝 Отырыс қорытындысы бойынша мемлекеттік органдар мен кәсіпкерлік қоғамдастық арасындағы ашық өзара іс-қимылды одан әрі жалғастырудың маңыздылығы атап өтілді. Бизнес өкілдері ұсынған бастамалар мен ұсыныстар белгіленген тәртіппен қосымша қаралып, пысықталатын болады.

📌Маңғыстау облысында үлестік құрылыстың проблемалық нысандары бойынша мәселелерді шешу барысы қаралды

Қазақстан Республикасы Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков Ақтау қаласына жұмыс сапары аясында үлестік құрылыстың проблемалық нысандарын аралады.

🏢 Аралау барысында Комитет төрағасы бес тұрғын үй кешеніне барды. Атап айтқанда, «Лепес Примера», «Атамекен», «Султан», «Аққала» және «Мұрагер» тұрғын үй кешендері қамтылды.

Әр нысанда Бақытжан Жүнісбеков құрылыс жұмыстарының қазіргі жай-күйімен және өзекті мәселелермен танысты. Жергілікті атқарушы органдар мен жауапты ұйымдардың өкілдерімен бірлесіп, құрылыс жұмыстарын аяқтаудың ықтимал тетіктері және азаматтардың мәселелерін шешу жолдары қарастырылды.

🔛 Нақты шаралар қабылдау қажеттілігіне ерекше назар аударылды. Қатысушылар әрбір тұрғын үй кешені бойынша қалыптасқан жағдайды егжей-тегжейлі қарастырып, алдағы іс-қимыл алгоритмін және туындаған мәселелерді шешу үшін қажетті шараларды талқылады.

Кеңес қорытындысы бойынша жауапты тараптарға тиісті тапсырмалар берілді. Проблемалық нысандардың құрылысын аяқтау мәселелері Комитеттің бақылауында.

🇰🇿🇩🇪Қазақстан мен Бавария өзара ынтымақтастықтың басым бағыттарын айқындады

📍Мюнхен қаласында (Германия) экономика, ғылым және ауыл шаруашылығы салаларындағы ынтымақтастық жөніндегі Қазақстан-Бавария жұмыс тобының 1-отырысы өтті.

🤝 Отырысқа Қазақстан Республикасы Өнеркәсіп және құрылыс вице-министрі Олжас Сапарбеков пен Баварияның Еуропа және халықаралық істер жөніндегі мемлекеттік министрі Эрик Байссвенгер тең төрағалық етті.

Іс-шараға екі елдің тиісті органдары, даму институттары және жетекші іскер топтарының өкілдері қатысты. Тараптар екіжақты ынтымақтастықтың басым бағыттарын талқылады. Шикізат ресурстары, энергетика, экологиялық технологиялар, машина жасау және су ресурстарын басқару салаларындағы инновациялар мен жоғары технологияларды дамыту, сондай-ақ ауыл шаруашылығы саласындағы өзара іс-қимыл мәселелеріне баса назар аударылды.

Кездесу барысында тараптар қала құрылысы, көлік салаларындағы ынтымақтастықтың перспективаларын, сондай-ақ Баварияның ғылым және білім беру мекемелері мен бизнес-қоғамдастығының қатысуымен дуальды кәсіптік білім беруді дамыту мәселелерін жеке қарастырды.

📌 Кездесу қорытындысы бойынша тараптар практикалық өзара іс-қимылды одан әрі дамытуға өзара мүдделі екендерін растады және бірлескен бастамаларды іске асырудың нақты тетіктерін әзірлеу бойынша жұмысты жалғастыруға уағдаласты.

📌 Қазақстан мен KUHN Group өнеркәсіп саласындағы өзара ынтымақтастық бағыттарын айқындады

Қазақстан Республикасы Өнеркәсіп және құрылыс вице-министрі Олжас Сапарбеков Францияға жасаған жұмыс сапары аясында Саверн қаласындағы KUHN компаниясының кәсіпорнына барды.

Қазақстан делегациясы құрамында Ауыл шаруашылығы министрлігі, KUHN компаниясының еліміздегі мүдделерін қорғайтын Eurasia Group AG компаниясы өкілдері, AGROMASH зауытының басшылығы болды.

▪️KUHN – ауыл шаруашылығына қажетті тіркемелі және аспалы техникалар шығаратын әлемдегі ең ірі өндірушілердің бірі. Делегация мүшелеріне өндірістің толық циклі, негізгі технологиялық үдерістер және зауытта қолданылатын сапаны бақылау стандарттары таныстырылды.

🤝Келіссөздердің негізгі тақырыбы ауыл шаруашылығы машиналарын жасау саласындағы ынтымақтастықты дамыту болды. Атап айтқанда, KUHN техникаларын Қазақстанда өндіруді локализациялау перспективалары, технологиялық өзара іс-қимыл және өндірістік құзыреттерді арттыру мәселелері қаралды.

▪️Саверн – KUHN компаниясының тарихи өндірістік орталғы. Бүгінде оның өндірістік құрылымына үш құрлықта орналасқан 11 зауыт кіреді, компания өнімдері әлемнің 110-нан астам еліне ұсынылады.

Сапар ҚР Премьер-министрі Олжас Бектеновтің 2026 жылғы сәуірде ауыл шаруашылығы техникасын өндіретін әлемдік жетекші өндірушілермен өткізген кездесуінің заңды жалғасы болды. Сол кезде AGROMASH зауыты, Eurasia Group AG ЖШС және KUHN Group арасында өнеркәсіптік кооперацияны тереңдетуге және өндірісті локализациялау ісін пысықтауға бағытталған келісім жасалған еді.

Саверндегі келіссөздер қорытындысы бойынша тараптар қол жеткізілген уағдаластықтарды іске асыру жөніндегі одан арғы бірлескен іс-қимыл тәртібін айқындады.