📌 Өнеркәсіп және құрылыс министрі азаматтарды қабылдады

Қазақстан Республикасының Өнеркәсіп және құрылыс министрі Ерсайын Нағаспаев азаматтарды жеке мәселелері бойынша қабылдады.
Кездесу Азаматтарды қабылдау орталығында дәстүрлі форматта өтті.

Сондай-ақ елорда мен еліміздің басқа өңірлерінің тұрғындары онлайн режімде байланысқа шығып, өздерін толғандырған мәселелерін баяндауға мүмкіндік алды.

Қабылдау барысында мынадай мәселелер қозғалды:

🔹 Үлестік құрылыс бойынша проблемалық нысандар;
🔹 Архитектура нормалары мен инфрақұрылымның жүктемесі ескерілместен салу жоспарланып отырған жаңа тұрғын үй кешенінің құрылысы;
🔹 Заңсыз қосымша құрылыс салу және құрылыс нормаларын сақтамау;
🔹 Қолданыстағы заңнама және жаңа Құрылыс кодексі шеңберінде аккредиттелген сараптама ұйымдарының қызметі.

💬💬 Ерсайын Нағаспаев көтерілген мәселелер бойынша жан-жақты түсіндіріп, оларды шешудің ықтимал оңтайлы жолдарын ортаға салды. Сондай-ақ ол  Өнеркәсіп және құрылыс министрлігінің тиісті құрылымдық бөлімшелеріне қозғалған сұрақтарға қатысты тапсырмалар берді.

📌 Ерсайын Нағаспаев Cove Kaz Capital Group басшылығымен кездесті

Қазақстан Республикасының Өнеркәсіп және құрылыс министрі Ерсайын Нағаспаев Cove Kaz Capital Group LLC бас директоры Доминик Хитонмен кездесті.

Сондай-ақ келіссөздерге «Тау-Кен Самұрық «ҰТК» АҚ басқарма төрағасы Нариман Абсаметов қатысты.

Кездесу барысында тараптар тау-кен өнеркәсібі саласындағы екіжақты ынтымақтастықтың қазіргі жай-күйі мен оны келешекте дамыту мәселелерін талқылады.

Қазақстан мен АҚШ арасындағы серіктестіктің стратегиялық маңызы және америкалық компаниялардың ел экономикасының дамуына қосып келе жатқан үлесі атап өтілді.

Бірлескен инвестициялық жобаларды іске асыру мәселелеріне ерекше назар аударылды.

Кездесу қорытындысы бойынша министр өзара тиімді ынтымақтастықты одан әрі дамытуға және жаңа бастамаларды іске асыруға мүдделі екенін атап өтті.

ℹ️ Естеріңізге сала кетейік, 2025 жылғы қарашада «Тау-Кен Самұрық «ҰТК» АҚ мен «Cove Capital» компаниясы Қарағанды облысы аумағындағы әлемдегі ең ірі кен орындарының қатарына кіретін Солтүстік Қатпар мен Жоғарғы Қайрақтыны бірлесіп игеру туралы келісім жасасқан-ды.

Келісім шарт бойынша инвестор екі байыту фабрикасы мен бір металлургиялық зауыттың құрылысына 1,1 млрд АҚШ доллары көлемінде инвестиция салуға міндеттенеді. Жоба толық іске қосылғанда жұмыспен қамтылғандардың жалпы саны шамамен мың адамды құрайды, бұл ретте қазақстандық мамандарды жұмысқа қабылдауға басымдық беріледі.

Солтүстік Қатпар жобасы бойынша келісімге стратегиялық ереже кіреді: шикізат пен жартылай фабрикаттарды экспорттауға тыйым салу. Бұл Қазақстанда шикізатты озық өңдеуді және жоғары қосылған құнға қол жеткізуді қамтамасыз етеді.

📌 Ерсайын Нағаспаев АҚШ-тың Қазақстандағы Елшісі Джули Стаффтпен кездесті

Қазақстан Республикасының Өнеркәсіп және құрылыс министрі Ерсайын Нағаспаев АҚШ-тың Қазақстан Республикасындағы Төтенше және өкілетті елшісі Джули Стаффтпен кездесті.

Кездесу барысында тараптар өнеркәсіп, геология, тау-кен өндірісі және инвестиция, сондай-ақ жер қойнауын пайдалану және сирек кездесетін қазба металдар салаларындағы екіжақты ынтымақтастықтың қазіргі жай-күйі мен даму перспективаларын талқылады.

Министр сауда-экономикалық және инвестициялық өзара іс-қимылды одан әрі нығайтудың, сондай-ақ жоғары деңгейде қол жеткізілген уағдаластықтарды сапалы іске асырудың маңыздылығын атап өтті.

«Елдеріміз арасындағы ынтымақтастықтың негізгі бағыттарының бірі – өнеркәсіптік кооперация. Бүгінде жалпы инвестиция көлемі шамамен 950 млн АҚШ долларын құрайтын 12 бірлескен жоба жүзеге асырылуда. Біз өнеркәсіптік саладағы әріптестікті одан әрі кеңейтуге мүдделіміз», – деп атап өтті Ерсайын Нағаспаев.

Министр америкалық тарапты 2026 жылдың 2-3 сәуірінде өтетін «Geoscience & Exploration Central Asia» халықаралық геологиялық форумына және 11-12 маусымда болатын 16-шы «Astana Mining & Metallurgy Congress» көрмесіне қатысуға шақырды. Осы көрме аясында Critical Minerals Dialogue өткізу жоспарлануда.

Кездесу қорытындысы бойынша тараптар өзара тиімді ынтымақтастықтың барлық бағыттары бойынша белсенді байланыстарды қолдауға дайын екендіктерін растады.

ℹ️ Естеріңізге сала кетейік, Қазақстан Республикасының Президенті Қасым-Жомарт Тоқаевтың АҚШ-қа сапары аясында ҚР Өнеркәсіп және құрылыс министрі Ерсайын Нағаспаев пен АҚШ Сауда министрі Ховард Латник Аса маңызды шикізат материалдары саласындағы ынтымақтастық жөніндегі өзара түсіністік туралы меморандумға қол қойды.

Анықтама: Қазақстан нарығында америкалық 600-ден астам компания табысты жұмыс істеуде, олардың арасында ExxonMobil, Chevron, Chevrolet, Wabtec, Citibank, Visa, MasterCard, General Electric, Honeywell, Philip Morris, Coca-Cola, Pepsico, Deere & Company және басқа да көптеген компания бар.

📌 Цифрлық жаңғырту: ЖИ еліміздің тау-кен өндіру кәсіпорындарына енгізілуде

Елімізде өнеркәсіптегі цифрлық трансформация жаңа кезеңге өтті. Ірі кәсіпорындардың өндірістік үдерістеріне жасанды интеллектінің кең мүмкіндіктерін енгізу бойынша 2025-2026 жылдарға арналған Жол картасы аясында отандық 11 компания 40-тан астам жобаны жүзеге асырып жатыр.

QazIndustry Қазақстандық индустрия және экспорт орталығының мамандары қолға алынып жатқан цифрлық жаңғырту барысымен алтын өндіруші Solidcore Resources компаниясында осы бағытта атқарылған жұмыстар мысалында танысты.

Жол картасы аясында кәсіпорында ЖИ-дің төрт элементін іске асыру көзделген. Алғашқы кезеңде Абай облысындағы Бақыршық тау-кен кәсіпорнында автоматтандырылған медициналық тексеру жүйесі іске қосылды.

Қазіргі уақытта компанияда тағы екі жүйені іске қосуға дайындық жүріп жатыр:
▪️ жұмысшыны нүктелік және аймақтық позициялау жүйесі
▪️ оператордың цифрлық ассистенті

Жыл соңына дейін флотация процесін бақылау және басқару жүйесі енгізіледі.

🔗 Толығырақ – сілтеме бойынша https://www.gov.kz/memleket/entities/mps/press/news/details/1180017?lang=kk

📌 TeploCom: мемлекеттік қолдау шаралары өндірісті жаңғырту қуатын арттырады

Өнеркәсіптік кәсіпорынды іске қосу немесе кеңейту кезінде технологиялық жабдыққа жұмсалатын шығындар жалпы бюджеттің 70–80%-ына дейін жетуі мүмкін. Осындай жағдайда инвестиция шығындарының бір бөлігін қайтаруға мүмкіндік беретін «QazIndustry» арқылы ұсынылатын мемлекеттік қолдау тетіктері тиімді шешімге айналады.

Бизнес пен мемлекет арасындағы тиімді әріптестіктің жарқын мысалдарының бірі – Павлодар қаласындағы «TeploCom» компаниясы. Кәсіпорын бес жылдан астам уақыт бойы полиуретанды көбікті (ППУ) оқшаулағыш құбырлар мен фасондық бұйымдар өндірумен айналысып келеді. Өнім елде жылу желілерін жаңғырту және жылу тұтынушылар санының артуына байланысты жоғары сұранысқа ие.

Өсіп келе жатқан сұранысты қамтамасыз ету үшін компания өндірісті жаңғыртып, заманауи жабдық сатып алды. Негізгі жабдықтардың бірі – ПК-450 құю машинасы, ол құбырлар арасындағы кеңістікті пенополиуретанмен толтыру процесін автоматтандырады. Сонымен қатар төмен қысымды полиэтиленнен қорғаныш құбыр-қабықшаларын өндіруге арналған экструзиялық желі іске қосылды.

Жаңа жабдықтың жалпы құны 87,6 млн теңгені құрады. Мемлекеттік қолдау шаралары аясында QazIndustry шығындардың 40%-ын, яғни 35 млн теңгені өтеді.

Жаңғырту нәтижесінде кәсіпорынның өндірістік қуаты айтарлықтай артты: құбыр өндірісі екі есеге, фасондық бұйымдар өндірісі 1,5 есеге өсті.

ℹ️ Еске сала кетейік, QazIndustry еңбек өнімділігін арттыру және өнімді ішкі нарыққа ілгерлету бойынша кәсіпорындардың шығындарын өтеу жөніндегі ұлттық оператор болып табылады. 2025 жылы 1,4 млрд теңгеден астам шығын өтеліп, 60-тан астам кәсіпорын мемлекеттік қолдауға ие болды.

Толығырақ оқуға:
https://www.gov.kz/memleket/entities/mps/press/news/details/1180401?lang=kk