بحياتي ماعرفت اباوع على احد واني ماخذ على خاطري منه ولا عرفت أضحك بوجه احد ثكيل على قلبي اني إنسان وجهي مراية قلبي ومرتاح بهذا الشي ما اعرف اصير انسان ثاني واغير من نفسي . ودائماً اسوي بس الي يخليني راضي على نفسي رغم هالشي يزعل هواي ناس مااجي اتصنع لو اصير مثالي ولا احس اني محتاج امثل علمود أرضي احد البساطة تشدني والطيبة والحنيه ياخذوني اضحك بوجه الغريب، واحب أحاوط نفسي بناس ما أضطر واني وياهم أبرر كلشي اسوي ناس يعذروني اذا غلطت ويقدرون ظرفي، يرجعوني اذا ضلّيت بالطريق احب النوايا الصافية ومااعرف احسب حساب لسوء الظن أهلي وناسي همه أكبر نعمة بحياتي ولو جانوا همه رزقي من الدنيا فاني أكثر من راضي والله.
الحمد الله على نعمه الناس النظيفه بحياتنه

#الكاتب_مستر_عبودي❤️

‏امك جابتك حتى تفتخر بيك ابوك جابك علمود ترفع راسة، الله خلقك حتى تعبدة لا تذل نفسك علمود أحد أنت انسان غالي اعرف قيمة نفسك

خايف تفشل؟ افشل
خايف تخسر؟ اخسر
خايف تجازف؟ جازف
خايف تغامر؟ غامر
محد يبني منك أنسان عظيم غير شجاعتك محد يخليك شخص ناجح الا بعد ماتكسر الخوف اللي بداخلك محد يصحح اخطائك غير التجربه اللي تاخذها بنفسك شجاعتك سر نجاحك القوه اللي بداخلك خليها تطلع لا تتردد ابداً ♥️

#الكاتب_مستر_عبودي❤️

الكنز الحقيقي من وجهة نظري هو انك تراهن على شخص وميخيب ظنك نهائياً كل شوية يثبتلك هو كد المكانة الي انته حطيته بيها وإنه الشخص اليستاهل انك تنسد عليه بحيث تراهن ومتتندم على ثقتك الي انطيتها اله لأن دائما يطمنك بكلامه وأفعاله وخلي مليون خط على كلمه افعاله شخص يعرف احتياجك من نبرة صوتك حاسب حساب حزنك وزعلك شخص مهما ساءت الأمور او تحسنت تلكاه يمك يمكن الظروف تتغير بس هو ميتغير

#الكاتب_مستر_عبودي❤️

#لتستعجل
كلمه من جم حرف بس اذا نطبقها راح نقلل خساراتنا بشكل كلش جبير لتستعجل وتنطي حب چبير لشخص عابر لتستعجل وتنطي ثقه لصديق قبل لتجربه لتستعجل وتختبر معزتك عد شخص علاقتك بيه مو قويه الموقف السلبي الي راح تنحط بيه بسبب تسرعك راح يسوي عندك صدمه تغير تعاملك ويه الكل وتخليك شخص جاف لذلك لتستعجل

#الكاتب_مستر_عبودي❤️

اليريد يشوفَك شي عَظيم راح يشوفَك عَظيم حتى لو چنت أسوَء المَخلوقات اليحبَك راح يحبَك لو شگد ما تكون عادي ويشوف العادي مالتك جَنة اليريد يعوفَك راح يعوفَك لو تاخذ ضوة عيونَك و تنطي إله اليريد يروح عنَك حياخذ أي حجة ويقنع نفسه بيها حتى لو چنت مساويه ويّ أنفاسَك المتعَوّد يكون وية الكُل حيترك مَكانه وقت ما تستثني و تنطي اكبر من حجمة
الرايد يلزم إيدك و يكمل راح يلزمها لو تكون جَمرة المَوضوع موضوع اولويات واحترام و تَقدير ما إله علاقة بكونَك شقَدمت للمُقابل

#الكاتب_مستر_عبودي❤️

من سن من أسنانك يوجعك ومن شدة الالم يصير همك الوحيد هو تشلعة ورة متشلعه لا ارادياً لسانك طول الوكت يروح على الفراغ الي صار بمكان السن بمعنى أقوى واوضح أنه ترك فراغ مرات ياخذ وكت طويل حتى تتعود على هذا الفراغ بس بكل الاحوال راح تتعود وتسأل نفسك جان المفروض اشلعه بينك وبين نفسك تكول : اي طبعا جان لازم اشلعه لان جان الالم مالته نهار وليل يصل عليه اكو بعض الناس بحياتنه وبعض المواقف تجبرك على التخلي عنهم وتكمل حياتك بدونهم رغم همه جانوا مصدر سعادتك بيوم من الايام صحيح يتركون فراغ بحياتك بس كلش كافي ماكو ألم ولا
وجع

#الكاتب_مستر_عبودي❤️

اكو ناس طلعناهم من حياتنا مو علمود غلطوا بحقنا غلطة جبيرة بس علمود ماحسينا وياهم بالمصداقية والوضوح والراحة طلعناهم من حياتنا شويه شويه بالتدريج منعرف شلون وشوكت بس صاروا ميعنون النه بشي منكرهم بس بنفس الوكت منحتاجهم بعد ويانه يوم من الايام جانوا اقرب الناس النه بس بمرور الايام صار فتور وكمنه نحس فرحتنا كلش ثكيلة عليهم حتى السؤال علينه مصطنع والقرب من عدنه مصلحة كلامهم جبير وافعالهم صغيره
طلعناهم من حياتنا لان ماصدكوا ويانه بشي

#الكاتب_مستر_عبودي❤️

القوة مو دائماً انك تضل تواجه مرات اكو شغلات ما تستحق المواجهة اكو أشياء الطريقة الوحيدة للتعامل وياها هي انك تتركها وتكمل بدونها مو كل واحد يستحق التضيحة مو كل وظيفة تستحق تفني عمرك علمودها مو كل انسان يستحق تجي على نفسك علموده مو كل جبل يستحق تتسلقه "لا يكلف الله نفساً إلا وسعها" فلا تكلف نفسك فوك وسعك

#الكاتب_مستر_عبودي❤️

رسالة اليوم قبل النوم :

بقانون رب العالمين ماكو شي اسمه مستحيل المستحيل هذا موجود بمفهومك انت ف الشي الي دتشوفه انت مستحيل اعرف هذا مستحيل بس عندك اما عند رب العالمين فهو يحقق الامور المستحيلة بالطريقة الاكثر استحاله طيب شلون يتحقق هذا المستحيل الي انت متقدر عليه بكل بساطة سلمه للقادر المقتدر القدير شفتلك فد يوم واحد سلم امره بيد الله وخذله؟!


#الكاتب_مستر_عبودي❤️

صاحب الحظ يعتقد أنهُ محظوظ حتى أصبحَ محظوظ بالفعل الشخص المنحوس يعتقد أنهُ منحوس حتى أصبح منحوس بالفعل يقول علي بن أبي طالب عليه السلام كل متوقع آت فتوقع ما تتمنىٰ

#الكاتب_مستر_عبودي❤️

تدرس أربع أو خمس ست سنين و تتخرج يكولون شنو استفاد ابوها بس عمر الأب ما فكر يدرس بنتة لتشتغل و تجيبلة افلوس هوة يدرسها لتحقق حلمها و يشوفا متعلمة و بنت مثالية لحتى يشوفا احسن بنت بالعالم
الأب يدرس بنتة مو علمود تجيبلة راتب لا علمود تكون احسن بنت بنظرة و يشوف يروحها بيها و يحس انو طلع من هالدنيا ب انجاز هو يدرسها لتكون قدوة لكل حدا يعرفها يدرسها و يدفع دم قلبة عليه وعلمود هية قبل الكل
وعلمود ما تحتاج احد البنت حلم ابوها قبل ما تكون حلم حدا الولد صح يشيل اسم ابوه بس البنت بحنيتها بتحمل أبوها بذات نفسة
الله يخليك يا غالي

#الكاتب_مستر_عبودي❤️

من اكثر الشغلات الي ممكن تتعلمها كل ما تكبر وتزيد خبرتك بالحياة #لا_تبالغ لا تبالغ بالزعل ولا تبالغ بالتقدير ولا تبالغ بالحب ولا تبالغ بطرحك لأي موضوع تجي مرات نزعل ونعصب بشكل مُبالغ بيه على شغلة ممكن هية صح تزعل بس مو لدرجة احنا نبالغ بيهة من تگول لأحد انُ انت تحبه ومتگدر تعوفه و وجوده مُهم بحياتك لا تبالغ بكلامك وتگوله كلام اكبر من مشاعرك بهـواي لان هذا الشي راح يسويلك خلل بتحليلاتك بعدين ويخليك تايه وضايع بمواقف بعلاقات هواي انطي لكلشي بحياتك حجمهة الحقيقي ( زعلك ، كُرهـك ، فرحتك ، عصبيتك )
بس لا تبالغ

#الكاتب_مستر_عبودي❤️

دائمًا الاوقات الصعبه تخلّيني اعرف شكثر انا قوي ما عمرها خلّتني اعرف منو يحبني ومنو يتمنى لي الخير ومنو يريد قُربي.

من الأمور المرعبة بالحياة الواحد ميعرف نوايا الناس اليتعامل وياها يومية 💜

مع كل احترامي لمشاعر الناس واحساسهم وتعاطفهم مع كل احترامي لاندفاعهم وتاثرهم ويه العالم بس مو من حقك تسمع اي قصه صارت بين عدة اطراف وتاخذ الكلام من طرف واحد وتنطي رأيك واحتمال رأيك يكون باطل واكيد من تنطي رأيك انته هم راح تاخذ موقف ع اساس الي سولفلك سولفلك بمصداقيه تامه مو من حق احد يسمع كلام عن احد ويصدكه ويمشي ع اساسه رب العالمين انطانه عقل علمود الواحد يميز ويفكر .مو علمود يمشي بالدنيا ويه القطيع بالمختصر وياكم وياكم عليكم عليكم معدوم الشخصيه من الاساس الا اذا انت ممصدك تعيش اللحظه هذا موضوع ثاني

#الكاتب_مستر_عبودي❤️

أسوء فترة مريت بيها بحياتي الفترة الي مجنت اعرف أرفض اي شي راح يضرني مجنت اعرف اكول لأ بشكل أصح اعرف إن الطلب بي إستغلال وأكول عادي مو مشكلة أشيل فوق طاقتي واكول عادي مو مشكلة وأكمل وعادي أكمل بعلاقة تضرني وعادي اكعد بأماكن ممرتاح بيها وأصبر كمت افضل أجي على نفسي في سبيل الناس ومو مهم تعبي ومو مهم راحتي وللأسف الفترة هاي ندمان على كل ثانية بيها وحقيقة اكثر فترة سببتلي ضغط نفسي وعصبي وماشفت طعم الراحة بيها بس بالنهايه تجاوزتها والحمد لله وصلت لمرحلة كله يهون كدام صحتي وراحتي

#الكاتب_مستر_عبودي❤️