اجتني رسالة على التلكرام قريتها عبدالله هوايه تكتب تنميه وتحفيز لان مؤمن الكلمه تأثيرها كبير على أرواحنا ودليل المدرسين الي كسرونا من جنا اطفال كدام الصف بقينا كسالى ونكره الماده بسبب كلامهم تراكمات بداخلنا من الطفوله بسبب كلمه وأشياء بنت شخصياتنا قويه هم بسبب كلمه سمعناها واسلوب لطيف
لتركز على سلبية الشخص ركز على ايجابياته حتى يتقدم اكثر واكثر من نكون مؤمنين بالأشخاص راح يقدم بكل طاقه عاليه لتكسر شخص مهما كنت ومهما تشوف نفسك افضل منه هو عنده قوة داخليه لكن مصاعب الحياة خلته يخاف يواجه ويخاف يطلقها الكلام يبني الإنسان ⁦⁩

#الكاتب_مستر_عبودي❤️

كل اللي احنا محتاجينه في الأخير ان مايجي يوم نندم عليه على اي خطوة ميشناها واي قرار اتخذناه ونكتشف ان كل وقت وجهد بذلنا راح بالخالي بلاش ونفسيتك تنسد وما اطيق بعد اي شي بالحياة وراح نشوف نفسنا واكفين بنص الطريق مانعرف نرجع بالزمن لوره ولاكادرين نكمل اللي احنا بيه فيارب ارزقنا جمال النهايات والوصول لكل شغلة خططنالها وكل امنيه اتمنيناها وكل تعبنا باللي نستحقه وماضاقت الا لتفرج وما تعسرت الا تيسرت وما اشتدت الا وسهلت وما اجه هم الا وراه خير وفرح وسعادة بإذن الله امين يارب ...❤️

#الكاتب_مستر_عبودي❤️

‏مبارك لكم العيد ايها الابطال فأنتم قوتنا وكرامتنا وخيرنا✌♥️

‏⁧ #عيد_الجيش_العراقي ⁩

اللهم لك الحمدُ حتى ترضى ولك الحمدُ إذا رضيت ولك الحمدُ بعد الرضى ولك الحمدُ على كل حال❤️

لو تريد تمشي في الحياة بالورقة والقلم وبحساباتك فالحياة عمرها مراح تمشي وراح تحس نفسك عاجز كدام اول موقف صعب يعدي عليك اقدارنا كلها بأيد رب العالمين فعود نفسك على التسليم وريح بالك شويه خوفك من اللي جاي ومن المستقبل وكل هذا مراح يخليك تتحرك من مكانك رب العالمين خلقك علمود يرحمك ولطفه دائما محاوطك من كل الجهات ، وعدت قبل كذا يوم وراح تعدي دائما بلطف رب السموات انت اوقات اشوف كل الابواب تنقفل بوجهك ولكن تلاكي الفرج جاي من مكان وماتتوقعه ولايوم خطر على بالك هو هذا لطف رب العالمين راح ينجيك من كربك و همك حتى لو كان كربك عظيم لو تبقى تخطط وتحسبلها عمرها مراح تعدي ولاتمر مثل ما انت رايدها ومن كال يعقوب ( واخاف ان ياكله الذئب ) فقد يوسف وفقد بصره
ومن رجع كال ( وافوض امري الى الله )
رجع يوسف ورجع بصره فخلي كل امورك بالحياة وفوضها لرب العالمين ماكو واحد مايخلو من ضغوطات الحياة
"وأفوض أمري إلى الله إنه بصير بالعباد"


#الكاتب_مستر_عبودي❤️

"الراضي رب العالمين راح يراضي بكلشي ،
الكلام هذا حقيقي لأقصى درجة ماكو مرة راح ترضى بيها بوضع صعب لو ابتلاء ثكيل إلا وراح تشوف رب العالمين انطاك القدرة تستحمله ويراضي قلبك بجوانب ثانيه بحياتك وماكو مرة راح ترضى بيها بأمر واقع او فقدان عزيز إلا وراح تشوف ربنا منزّل عليك كل الصبر ويعوضك من عنده واذا جان هالشي عكسي ومو راضي على أقدار الله والابتلاءات الي تواجهك راح تشوف قلبك دائماً مهموم ونفسيتك تعبانة و بالنازل والدنيا داير مدايرك ضيقة رغم وسعها رب العالمين يرضينا بأقداره ويراضي قلوبنا بكرمه وعوضه ويخلي نفوسنا ساكنة مُطمئنة لحكمته

#الكاتب_مستر_عبودي❤️

عاجَبتني هواااية نفسي ما اناقش صار فتره
وما اصحح نظرة احـّد خلي ياخُذ غير نظرة
أسلوبي هذا مايعجبك؟
گلي بي،
"حتى اغيّرك مو اغيره "

مرات شكد ماجانت درجة القرابة بينك وبين بعض الأشخاص اكو بعض المواقف تصير تنجبر تمحيهم من حياتك تشوفهم مخلينك آخر شي وبخانه القائمة السوداء عبالك مايعرفون منو انته ويطلعون بيك اسوء العبر الفكرة انه مو كل واحد وياك وداير مدايرك معناها هو قلبه عليك ونيته صافية وياك لو حتى توكف العشرة بعينه نهائياً لتفكر عندك وياه علاقة قوية لان وكت الصدك راح تشوفها كلش هشه واصلا حاضره وجاهزه للانهدام ويه اول سوء تفاهم يمكن كلمن يشوف نفسه مصلحجي ويه الناس عباله الشخص المقابل مثله لا غلطان كلمن يشوف الناس بعين طبعه

#الكاتب_مستر_عبودي❤️

جانت كل خساره بحياتي وكل الم اصبر نفسي اكول الله ويايه الله ضاملي شي بعد هالتعب كل صدمه جانت اكبر من الثانيه بس جنت اكعد احجي ويه رب العالمين اكله اعرف ضاملي شي أعظم وأكبر ربي لك الحمد والشكر على كل درس عظيم هناك خير اعظم الايمان بالقدر خيرا وشر هو نجاة لنا ولارواحنا المتعبه اليقين والإيمان برب العالمين يوصلك لابعد الحدود

#الكاتب_مستر_عبودي❤️

"بسم اللّٰه نبدأ شهر رجب ."

يسر لنّا الصعب وحاوطنا بِلُطفك يا ربّ. 🤍

عمري وحياتي من اخسر شيئ بحياتي ما ادك على فلان شخص وابقى افضفضله واشرحله عن تفاصيل حياتي لا اصفن بين نفسي واكرر هاي الآية مليار مرة ما أمل من عدها واصير اقوى بعد من الاول { يُؤْتِيكُم خَيْراً مِّمَّا أُخِذَ مِنكُمْ} لاتضوج على اللي راح ولا تخلصها دك بچي واغاني هيثم يوسف على اللي راح يمكن مو نصيبك ولا خير الك ارض رب العالمين واسعة ورزقك جاي جاي ثق في عوض رب العالمين

#الكاتب_مستر_عبودي❤️

😍1/14❤️

اليوم عيد ميلاد أحب وأعز وأغلى إنسان على قلبي أبي الغالي والحنون كل عام وأنت بألف ألف خير وعقبال المئة سنة يا رب وأدعو الله أن تبقى فوق رأسي. اليوم عيد ميلاد أبي الغالي كل سنة وأنت بألف خير أحبك أبي. عيد ميلاد سعيد يا أبي الغالي أطال الله في عمرك يا أجمل ما في حياتي ربي يطيك الصحه والعافيه 🤲

الانسان يحتاج ينلبس مرات من وقت للثاني علمود يحس بقيمة الي عنده

اغلب الاشياء الي جنت اخاف اخسرها
صرت اني الي أتنازل عليها 🙂

تسيدك الموقف بالگعدات و الاجتماعات الرسمية او الغير رسمية ميحتاجلها تعاند كل الاراء وتنتقص من مواضيعهم التنطرح حتى تبرز وتبين انت قائد المجموعة الچفصات والمبالغه والاستفزاز الي رح يطلع من جنابك اتجاه الاخرين هالشي رح يبين فشلك وهمجيتك وقلة ثقافتك والموضوع رح ينگلب ضدك وتصير مضحكة لامة محمد

#الكاتب_مستر_عبودي❤️

اكو ناس بداخلهم نقص اسمه عقدة الكمال انت تشوفه بالواقع كلش حلو ومرتب واسلوبه مقبول بس هو بداخله مامقتنع بهذا الشي ويسعى يلبس اغلى لبس ومايخلي العالم اليحبهم تشوفه اله يوكف ساعة عالمرايه لحد مايقتنع هو يستحق هسه ينشاف والواقع لاالأيفيكت ينطيك شكلك الحقيقي ولا كامرة الموبايل
العين التحبك تشوفك احلى واحد بالدنيا، بحيث مرات تشوف شخص تعرفه بالفيس يكلك انت بالواقع احلى من الصور برغم شافك بحالتك الطبيعية هذي طبيعة البشر من تحب تشوف المقابل احلى البشر حتى لو مظهرك الخارجي مامقتنع بي وهالشخص مايجذب عليك او يجاملك حتى يرضيك بس هو صدك يشوفك بگلبه مو بعين مادية يشوف اسباب بيك هواي تنحب بشخصيتك وهذا الشي انعكس على نظرته لمظهرك فالحب الأسمى هو حب الگلوب والتفاهم والأحترام مو حب الشكل اليزول ويه الوكت

#الكاتب_مستر_عبودي❤️

اول متشوف نفسك عندك مشاعر هواي تجاه شخص تريد تشوفه بكثرة خايف تفقده اعرف معنى هالعلاقة هي علاقة مؤذية اغلبنا مااتربى على الحب الحقيقي صارت مشاعرنا اغلبها مجاملة بسبب شكل او غريزة او مصلحة ومن اكتفينا بعد سنين صرنا مانعرف نميز اللهفة حسب تعبير فرويد هو الأحساس بالخوف عندي لهفة على الشخص الأحبه او اتصور آني احبه اللهفة هذي هي خوف الفقدان او خايف انعاف الأنسان الي بينك وبينه حب حقيقي ممكن ماتحس انت مشتاقله او مشتاقلك بهالطريقة المبالغ بيها انت مطمئن لوجودك عنده ووجوده عندك من تغيب ساعات ماراح تخاف او تشتاقله بطريقة توجعك اللهفة المبالغ بيها هي احساس بالخوف وكل خوف هو اذى

#الكاتب_مستر_عبودي❤️

اسوء عقاب ممكن تتعرضله لما جسمك يقرر يعاقبك بسبب حالتك النفسية ف تشوف نفسك مرة وحدة سمنت لانك تفرغ عصبيتك بالاكل أو ضعفت هواي لانك بطلت تاكل من الاكتئاب تتفاجئ ان جسمك ظهرت عليه علامات غريبة و لما تروح الدكتور يگولك ماتخف م غير لما حالتك النفسية تتحسن ممكن تصاب بأمراض ثانية هواي مثل الضغط والقلب و السكر و والكانسر وغيرهم كأن جسمك يريد يحسسك بس بطريقة مؤلمة شوية يريد يگولك ماكو شي مهما كانت غالية تستاهل إنك تقصر بحق صحتك علمودها يريد يگولك ببساطة إن صحتك هي الحاجة الوحيدة اللي باقيالك و إنها لو ضاعت منك راح تتحول لشخص عاجز و غالبا راح تصير حمل علي اللي حواليك
فدير بالك على حالك عزيزي نفسك اهم

#الكاتب_مستر_عبودي❤️

راح توصل لمرحلة بسيطة من حياتك
بوقتها راح تعرف أن اغلب الكلام والجهود وحتى الاعمال الي جنت تسويها علمود الناس جانت مجرد ضياع تام للوقت والجهد الي دتبذلة انت لو ستثمرت هذه الاعمال وكل جهد بذلته بس علمود نفسك
فراح يكون أفضل بهواي وراح تسمح لنفسك انو تعيش وتستمتع بهل حياة
بوقتها أغلب الناس راح يعتبروك اناني مغرور من كلامهم بهل وقت بس خليها بعلمك اختيار النفس. وتفضيلها ابداً مو انانية عيش حياتك واصنع الها السعادة والفرح بدون قيود لاتنتضر من شخص يصنعلك السعادة اختار نفسك وحبها وابذل الجهد على نفسك مو على الناس وبعدها راح تشوف روحك الحلوة شكد سعيدة وشكد ايامك حلوة

#الكاتب_مستر_عبودي❤️