هاي شنو بعدك على السايبة حتى وجهك صاير اسود واني اشتريت التاهو وكل يوم بدولة مكضيها وانت بعدك على السايبة
اسوء شغلة ممكن اسويها في حق نفسك مو في حقي انك تستعرض نفسك عليه تستعرض شكلك وجمالك او فلوسك او حتى الرزق اللي ربنا مطكياه اشوف نفسك على العالم وتحسسني ان ماكو من عدك لان كذا كذا الانسان من يكون عينه مليانة وراضي باللي رب العالمين كاتبه افضل نعمة لازم يحمد الله الف مرة فأنت ركز على نفسك واحمد الله على اللي كاتبه واياك تتغير وتشوف نفسك على غيرك لان كل هاي الفلوس والسيارات اللي الله مطيها الك على ثانية تروح كلها وانت ولا باقيه ولا هيه باقيه ومايبقى من البشر غير المعدن والطيب

#الكاتب_مستر_عبودي❤️

رحتي تشترين ملابس واختاريتي قميص عجبج ورجعتي للبيت وطلع ضيق عليج يوم راح تلبسي وتشمري لان ميناسبج مو كل الي يتقدملج اشوفي تختاري لانو صار عمرج 30 وراح تعنسين اشوفين صديقاتج بنونه وزهوره وزنوبه انخطبن وانتي لا وتكولين اني ليش ماعدي حظ هيه الشغلة مو مثل سباق السيارات ياهو الاسبق راح ينطونه جائزة اكو شخص يصير مثل القميص ضيق وماينطاق وماتتحملي يوم هذا شريك حياة راح يدوم وياج طول العمر باجر راح تبقون انتي وياه كبال صينية تاكلون وميبقى من البشر غير الأصل والمعدن والطيب اختاري شخص يناسبج مثل ماتختارين قميص يكون مريح الج مو تختاري ضيق يوم واشمري بالكنتور
( اذا تزوجتي لمجرد الزواج فلن تسعدي )

#الكاتب_مستر_عبودي❤️

احب الجملة التكول ( كل من يراك بعين طبعه ) تلكه هواي ناس تشوفك اطيب الناس وتلكه بكدهم تشوفك اسوأهم
تشوف ناس تنسالك خمسين موقف حلو على مود موقف واحد قصرت بي وناس تدورلك اعذار ويظهرولك شكد انت حلو
تشوف ناس يريد اي حجاية منك حتى ينتقدك وناس تخلص كل الكلام الراقي بوصفك ناس تكرهك بدون سبب وناس تخترع اسباب تحببها بيك وبالنهاية انت نفس الشخص بس كل عين تشوفك على قدر محبتها الك

#الكاتب_مستر_عبودي❤️

‏الشخص إلي ما موجود بأوقاتك الصعبة
‏لا تخلي يكون بأيامك السهلة

اكو اسلوب بالفترة الاخيره كمت اتبعه وكلش كاعد يخليني انسان مرتاح الاسلوب هو انو اي شخص يكلي انت غلط اني اكله صح اني غلط وانت الصح واي شخص ميفتهم وجهة نظري ومكاعد ياخذها بنيه صافية كبل ما اخلي مجال للنقاش والتحاور ليش هيج افضل لان انت بمجرد حتخسر وقت وطاقه ويه انسان قافل او شخص هو اصلا ممستلطفك او هو جاي يريد يتهجم عليك فحتروح لدوامه تكون انت لا فايز بيها ولا انت الخسران فالافضل انو تنسحب من اي كعده او نقاش وتعرف شوكت تحجي وشوكت تنطي طاقتك بالمكان الصحيح ودير بالك تندمج ببيئه غير بيئتك لان راح تخرب الصحيح الي بيك

#الكاتب_مستر_عبودي❤️

طول ما انته مماذي احد ومغلطان بحق احد دير بالك بيوم من الأيام تفكر تبرر لاي احد شي إنت راضي عنه ومقتنع بي طول ما رب العالمين الي هو أعلى مني ومنك يعرف نيتك لتنطي إنسان أهمية هو صحيح اكو كلام ياذي اكثر من الضرب أو اي شي ثاني
لهيج جبر الخواطر من اعظم العبادات عند رب العالمين هاي حياتك عيشها مثل متحب وشلون متريد الحياة مره وحدة وكل يوم وساعة تمشي بحياتك إنت مسؤول عليها خليهم يحجون الي يريدوا انته بمجتمع بكل الاحوال راح ينجاب طاريك النبي ماخلص من حجي الناس متوقع انته تخلص انسى وعيش حياتك حجي الناس مجرد تحصيل حاصل ارضاء الناس غايه لا تدرك

#الكاتب_مستر_عبودي❤️

الله هو من سيُجازيك وليس الناس، والله يجازي على كلِّ شيء ويجازيك برحمته وليس فقط بعملك سيُجازيك الله على كلِّ مرة حاولت فيها ارضاء أحد على حساب نفسك وسيُجازيك على لُطفك مع الناس حتى لو لم يُقدِّر أحد ذلك وسيُجازيك على تفويض أمورك له وامتناعك عن رد الأذى بالأذى رغم قدرتك على ذلك الله لا يغفل عن شيء، ولطفه موجود دائمًا في جميع أمور حياتنا، وفي كل مرة قدمت فيها الخير لن تجد إلا كل الخير من لطف الله وكرمه، فلا تقلق، ولا تحمل همًّا، لُطف الله يجري ونحن لا ندري.

(والله يعلم وانتم لا تعلمون )
الحمد لله على النصيب والواقع الحمد لله على الشدائد والمحن الحمد لله على الأقدار خيرها وشرها الحمد لله دائماً وأبداً

#الكاتب_مستر_عبودي❤️

مرات الفشل مايجي وراه نجاح
ولا نجاح يمنع يجي وراه فشل كل شي بالحياة مؤقت لو تبذل مجهود حتى تغيرها لو تبذل مجهود حتى تحافظ عليها لا شغلك ولا دراستك هن كل شي بالدنيا تقّبل توكع مرة وتكوم مرة وتبقى هيج هون على نفسك حفاظك على هدوءك واستقرارك النفسي اهم من هواي امور ببالك نظم حياتك واجتهد بس لاتحمل نفسك فوك طاقتها طبيعة الحياة معاناة وطبيعة المعاناة ضغط ومقاومة الضغط بحد ذاته يحتاجله مجهود يتعبك طول مانفسيتك بخير اهلك بخير مهما تفشل راح تصير عندك فرصة تكوم مرة ثانية

#الكاتب_مستر_عبودي❤️

رب العالمين يعين كل واحد بينا على واقع ماكان عندنا ذنب فيه ولا عمره كان اختيارنا وعلى زمن ماكان عندنا ذنب فيه رب العالمين يكون بعون البنت الانفصلت وعدها اطفال الي مالهم كل ذنب كانوا وعلى ناس حوالينا طلع عدهم الف وجهه وخذلونا للاسف كانوا من ضمن اختيارنا رب العالمين يعين كل واحد بينا على حياة نعيش فيها مجبرين ومتأقلمين وصابرين ونحاول نعدي اليوم بيومه رب العالمين يعين كل واحد بينا يعيش حياة عمرها ما كانت اختياره ولا اتمناها في يوم بس صابرين وراضيين بقدرنا وبالكاتبه الله
اللهم أرزقنا الرضا والعوض واجعلنا من الصابرين
امين يارب

#الكاتب_مستر_عبودي❤️

التوكل على الله ❤️

سبب كلش جبير من أسباب الراحة النفسية .التوكل راحة ويقين بان الله أكبر من كلشي أكبر من المشاكل والناس والظروف والصعاب أكبر من الحياة كلها بالرغم من ان الإنسان قليل الحيلة بس إحساس الأمان بالله يهون عليك كلشي ويخليك أقوى من أي شي فكرة ان الله هو مدبر شؤون حياتك كلها أمان لتدور على الأمان والراحه بين الناس بس اتوكل على رب الناس وكون على يقين هو وكيلك بكل مشاكلك وكون على يقين هو يدبرلك كل الخير الي تتوقعه والي متتوقعه اللهم إني توكلت عليك ووكلت أمري إليك فبشرني بما أريد وبما اخترته لي خيراً

#الكاتب_مستر_عبودي❤️

مرات الأنسان ينرفض بسبب مميزاته مو بسبب عيوبه مرات محبتك تصير جبيرة على فلان او عطائك يصير اكبر منه او ماصادف گلب نظيف مثلك او مامتعود على صدق المشاعر الي عاش عمره متعكل بناس غلط مايفهم قيمة الناس الصح من يقابلهم هذا طبع الحياة وغلطان اليلوم نفسه اذا باب انسد بوجهه مثل ماتلكه ناس ترفض النعمة راح تلكه بشر ترفض الناس الصح

#الكاتب_مستر_عبودي❤️

الحكم الأيراني
اليوم امك راح تصير ترند

الحاقد مينظف قلبه لو بعد
مليون سنه .

متفيد بعد سالفة حساب الحكم وتروح تغلط علّي لاراح يفتهمك والوحيد انت التحرك اعصابك عدا الطرد الغير مستحق المنتخب ماقدم اداء بهالمباراة يشفعله الشوط الاول لوما سيد جلال خسرانين ٣
من انولدت للحياة دفاعنا متصيرله جارة لازم كاساس يلكه حل سريع مدرب محترم واداء بالثلاث مباريات مقنع واللاعبين ماقصروا وهذي المباراة درس للمستقبل وعندي قناعة كاملة منتخبنا يكدر يتأهل لكأس العالم كل الدعم لكم بهيج جمهور مُحب ومساند تكدرون توصلون والحسرة وحزن اليوم حق مشروع وماكو داعي تروح لبيجات يستفزوك بيها كرة القدم فوز وخسارة كما هي الحياة ايضاً

#الكاتب_مستر_عبودي❤️

هاي الفترة من بين كل الفترات ما الها شعور محدد مرات تكعد من النوم وتتمنى تختفي ومره تكون متصالح ويا الحياة مره تگعد قلقان بدون سبب مره تتمنى يمشي اليوم و انت ساكت وهذا غير انك تتمنى تنام لساعات طويلة كلش بدون
ما يزعجك شي

النصائح الي من نوعية لاتقارن حياتك بغيرك نصيحة كاذبة وغير عملية وهي محاولة لأرضاء النفس مؤقتاً الأنسان بكل زمان ومكان يقارن نفسه بالغير ومرات تتعجب شلون هذا الشخص المتزن او الثكيلة وصلت مرحلة هيج تلبس او تسولف او يسخف من نفسه بفيديوات تحقيق الذات بكل الوسائل المتاحة ممكن يستخدمها الأنسان في سبيل راحته او شهرته فتشوف السياسي يستخدم الوسيلة المذهبية لكسب جمهوره وتشوف الجسمها حلو تغلط وتركص لأن هذا السلوك يثير غريزة الغير وتجيها عروض اكثر وتشوف الاعلامي يحاول يسقط بكل انجاز حتى يصير المختلف واسمه يوصل للعالم وللعلم الناس الغلط ادمان شلون ادمان ؟ من تتعود على وحدة وفية او تتعودين على شخص مخلص برغم هالصفة الحلوة بي بس يصير كتاب مفتوح وممل بنظر الناس المريضة او المجتمعات المضطهدة فمن تشوف وحده عدها ملايين المتابعين ومحتواها بس ستوريات بالسيارة متكول شنو الخلاها تشتهر او شنو الدافع الي خله العالم تتابعها الناس الغلط ادمان مو بس بالفيس او الاتستغرام حتى بالعلاقات وحدة شريفة تنعاف لأجل وحدة مو راحة وامين بالعمل يبطلوه لأجل منافق جبان وكلما تبقى على طبيعتك او اصلك راح تعاني بهذا المجتمع او هذي الحياة

#الكاتب _مستر_عبودي❤️

قبل 3 سنين جنت اتناقش ويه واحد بموضوع وبنهايه الكلام كلي : امنيتي افهم الناس مثلك هسه " وكتها صفنت حوالي نص دقيقة وضليت ساكت وبيني وبين نفسي كلت: "نيالك انته لحد هسه مفتهمت الناس ولا شفتهم على حقيقتهُم"تروح السنين وتجي واشوف نفس الشخص هذا قبل كم يوم اجاني يكلي: "اني كلش ندمان بعد ما فهمت الناس وشفتهم على حقيقتهُم شفت حقد من القريب قبل الغريب شفت الاذيه من الناس الي اسويلهم معروف واقدملهم الخير شفت النفاق بالناس الي تضحك بوجهي شفت الحقارة والغل من الناس الي اتمنالهم الخير ومن وكتها اني ممرتاح ولا اعرف اتعامل ويه اي احد بسبب فهمه وإدراكه لكُلشي يصير داير مدايره أحيانًا فهمك الزايد عن اللزوم يضرك إنتَ بس يوعيك

#الكاتب_مستر_عبودي❤️

هاي اكو ناس هلكد ما گلبهم ابيض ، اول ما تحجيلهم عن شي يخرب وما يصير 🙂

هُنا إنسان يُقاوم نفسه والدنيا دائمًا؛
ليُصبح النسخة الأفضل مِنه
وفخور دائمًا بمحاولاته التي لا يراها أحد غيره. ❤️