2026-yil 10-iyun kuni O‘zbekiston Milliy kutubxonasida taniqli diplomat va elchi Yodgorxo‘ja Shodmonovning “Ikki qutb orasida” kitobi taqdimoti bo‘lib o‘tdi.

“Yangi sahifa” nashriyotida chop etilgan mazkur kitobda muallifning Afg‘onistondagi diplomatik faoliyati, kuzatuvlari, tahlillari va teran falsafiy mushohadalari bayon qilingan.

Memuar janrida yozilgan mazkur hujjatli-badiiy va falsafiy-ma'naviy asarda Y.Shodmonov voqealarni bayon etmasdan, balki o‘z qalb iztiroblari, Sharq diplomatiyasining o‘ziga xos nozikliklari, inson taqdiri va hayotning qarama-qarshi qirralari, ya'ni qutblarini tahlil qiladi.

Taqdimotda so‘zga chiqqanlar kitobning ahamiyati, muallifning bayon etish uslubi,afg‘on xalqiga bo‘lgan cheksiz ehtiromi haqida fikr bildirdilar.

“Ikki qutb orasida” kitobi diplomatlar, afg‘onshunoslar, mintaqashunoslar, professor-o‘qituvchilar, talabalar, ilmiy tadqiqotchilar hamda keng kitobxonlar ommasi uchun mo‘ljallangani bilan ahamiyatlidir.

2026-yil 10-iyun kuni O‘zbekiston Milliy kutubxonasida “Mutolada she'riyat” loyihasi doirasida iste'dodli shoir Dadaxon Muhammadiev ijodiga bag‘ishlangan she'riyat kechasi bo‘lib o‘tdi. Unda “Kechikkan yo‘lovchi” kitobi taqdimoti ham o‘tkazildi.

She'riyat kechasi davomida ishtirokchilar shoirning jimjimador satrlar, balandparvoz ohang, quruq chaqiriqlardan xoli she'rlarni tinglab, shoirning o‘ziga xos uslubini baholash imkoniga ega bo‘ldilar.

Har bir she'rga mantiqan yondashilib, uning sahnalashtirilgan ko‘rinishda taqdim etilishi tinglovchilarga shoir tabiati, tuyg‘ulari, kayfiyat hamda so‘zlarining mohiyatini to‘laroq anglashga yordam berdi.

She'rlar muallifning do‘stona monologda o‘qilishi kecha ishtirokchilarini vaqt, nadomat hijron haqiqat manzil, makon tushunchalari haqida mulohaza yuritishga ular bilan bog‘liq qalb kechinmalarini xis qilishga undaydi.

“Kechikkan yo‘lovchi” kitobidan shoirning muhabbat, adolat, erk, sadoqat kabi mavzulardagi dil so‘zlari ifodalangan she'rlari joy olgan.