2026-yil 28-sentyabr kuni O‘zbekiston Milliy kutubxonasi mutaxassislari uchun Prezident Shavkat Mirziyoyevning O‘zbekiston Respublikasi davlat mustaqilligining 35 yilligiga bag‘ishlangan tantanali marosimdagi nutqining mazmun mohiyatini keng jamoatchilikka yetkazish bo‘yicha o‘quv seminari tashkil etildi

📹 Unda Milliy kutubxona tasarrufidagi Qoraqalpogʻiston Respublikasi, viloyatlar va Toshkent shahar, tuman (shahar) axborot-kutubxona markazlari ham Zoom platformasi orqali ishtirok etdilar.

🇺🇿 Seminar avvalida O‘zbekiston Respublikasi Davlat madhiyasi yangradi.

📌 Milliy kutubxona direktori o‘rinbosari Nasiba Xoldorova so‘zga chiqib mustaqillik yillarida qonunchilik va huquqiy siyosat sohasida amalga oshirilgan islohotlar, inson huquq va erkinliklari kafolatlarini mustahkamlash borasida amalga oshirilayotgan ishlarni qayd etdi. Jumladan, mamlakatimiz rahbarining inson qadri, ta'lim, yoshlar, ilm-fan va jamiyat taraqqiyotiga qaratilgan e'tibori alohida e'tirof etildi. “Biz kutubxonachilar sifatida yurtboshimizning bayram tantanasida so‘zlagan nutqi mohiyatini keng targ‘ib etishimiz, oilada, jamoatchilikda, ish joylarimizda aholiga, ayniqsa o‘sib kelayotgan yosh avlodga yetkazishimiz kerak, zero unda nafaqat o‘tgan yillar sarhisobi, balki istiqboldagi rejalarga doir muhim fikrlar mujassam”, - dedi N.Xoldorova.

📝 Seminar davomida tarix fanlari doktori F.Ochilovning inson qadri, 35 yillik islohotlar, erkinlik, bilim, sog‘lik va yoshlar masalasiga bag‘ishlangan “Uch ming yillik ildiz va Uchinchi Renessans: tarixiy vorislik, milliy o‘zlik va ma'naviy meros” hamda Respublika Ma'naviyat va ma'rifat markazi bosh mutaxassisi P.Norqobilovaning “Milliy yuksalish o‘n yilligi: yetti milliy dastur yaxlit tizim sifatida” mavzularidagi ma'ruzalari tinglandi. Ma'ruzachilar Prezidentimiz nutqining mohiyatan inson qadri va erkin hayoti, milliy qadriyatlari va kelajagimizga egalik qilish tuyg‘usi orqali talqin etilganini, xalqimizning ko‘p asrlik davlatchilik tarixi, ajdodlarimiz, jadidlarimizning ozodlik va taraqqiyot yo‘lidagi intilishlari alohida yodga olinganini ta'kidladilar.

🎞 Tadbir davomida Yangi O‘zbekistonda amalga oshirilgan islohotlarga bag‘ishlangan videorolik hamda Respublika Ma'naviyat va ma'rifat markazi tomonidan tayyorlangan “O‘zbek kelayotir tarix qa'ridan” videoklipi namoyish etildi.

Rasmiy sahifalarimizga obuna bo‘ling
Telegram l Instagram  YouTube l Facebook l Twitter l Website

2026-yil 29-sentyabr kuni O‘zbekiston Milliy kutubxonasida O‘zbekiston Yozuvchilar uyushmasi va O‘zbekiston Jurnalistlar uyushmasi a’zosi, shoir, taniqli adib hamda mohir tarjimon Abdunabi Hamroyevning “Farishta qo‘li bilan”, “Chorrahadagi odamlar”, “Nurali Qobul dunyosi” va ”O‘zbeklar” nomli kitoblari taqdimoti bo‘lib o‘tdi.

Abdunabi Hamro Toshkent Davlat madaniyat institutini tugatib, badiiy ijod bilan shug‘ullanib keladi. 1995-yildan beri O‘zbekiston Yozuvchilar uyushmasi a’zosi. “Xiyonat”, “Oq alvasti”, “Otam aytgan qo‘shiqlar”, “Yirtqich”, “Unutilgan qo‘shiq”, “Olis manzillar sari”, “Bolalikka sayohat”, “Qishda ochilgan gul”, “Vaqt daryosi” kabi she’riy va nasriy kitoblar muallifi. Bugungi kunda Abdunabi Hamro “Olot hayoti” gazetasi bo‘lim muharriri sifatida faoliyat yuritadi.

Adabiyotshunos va yozuvchi Abdunabi Hamro tomonidan yozilgan “Nurali Qobul dunyosi” kitobi taniqli o‘zbek yozuvchisi, tarixchi va jamoat arbobi Nurali Qobulning hayoti va ijodiy merosiga bag‘ishlangan adabiy-tanqidiy, maqolalar yoki xotiralar to‘plamidir.
Kitob atoqli adib Nurali Qobulning o‘zbek nasri rivojiga qo‘shgan hissasi, uning betakror badiiy olami, qissa va romanlari (masalan, “Oyqor”, “Tubsiz osmon”, “Sukut suiqasdi” va boshqalar) tahliliga bag‘ishlangan.
Abdunabi Hamro o‘zbek adabiy muhitida taniqli ijodkor sifatida tanilib, u Nurali Qobul ijodining o‘ziga xos jihatlari, yozuvchining uslubi va adabiyotdagi o‘rnini mazkur kitobda keng yoritib bergan.
Ilmiy-adabiy qimmati asarning Nurali Qobulning yubiley sanasi va ijodiy faoliyati munosabati bilan tashkil etilgan adabiy anjumanlar, tadqiqotlar qatorida adib ijodini o‘rganuvchilar uchun muhim manbalardan biri ekanligidadir.

O‘zbekiston Yozuvchilar uyushmasi a’zosi, shoira. “Shuhrat” medali sohibasi Gulchehra Shahobiddin, O‘zbekiston Yozuvchilar uyushmasi raisi o‘rinbosari Gʻayrat Majid, O‘zbekiston Yozuvchilar uyushmasi a’zosi, adib, shoir va tarjimon Nurali Qobul, falsafa fanlari doktori, professor Viktor Alimasov, olim munaqqid , filologiya fanlari doktori Suvon Meli, O‘zbekiston Yozuvchilar uyushmasi a’zosi, jurnalist va yozuvchi Norto‘xta Qilich, O‘zbekiston Yozuvchilar uyushmasi a’zosi, shoira va adiba Shahodat Isaxonova, Samarqand viloyati, Kattaqo‘rg‘on shahar nuroniylar kengashi raisi, mahoratli rassom shoir va jurnalist Toxirjon Hamidov, tarjimon Ma’ruf Toshpo‘latovlar so‘zga chiqdi.

Taniqli san’atkor Muzaffar Xo‘jamberdiyev va “Zulfiya” nomidagi davlat mukofoti va “Shuhrat” medali sohibasi, O‘zbekistonda xizmat ko‘rsatgan artist Mohichehra Shomurodovalarning musiqiy chiqishlari tadbirga o‘zgacha ruh bag‘ishladi.

Muallif Abdunabi Hamro o‘z kitoblarining yozilishi tarixi, ularning g‘oyasi haqida ma’lumot berdi, kitobxonlar savollariga javob berdi hamda ishtirokchilarga va tadbir tashkilotchilariga minnatdorlik bildirdi.

Rasmiy sahifalarimizga obuna bo‘ling
Telegram l Instagram  YouTube l Facebook l Twitter l Website