📚 Milliy kutubxonada “Millat gavhari” kitobi taqdimoti bo‘lib o‘tdi

Joriy yilning 14-sentyabr kuni O‘zbekiston Milliy kutubxonasida ijodkor Miraziz Mirzayevning “Millat gavhari” kitobi taqdimotiga bag‘ishlangan ma’naviy-adabiy tadbir bo‘lib o‘tdi.

Mazkur asar ona mehrining buyukligi, ayolning oiladagi o‘rni, fidoyilik, sabr-toqat, insoniylik va milliy qadriyatlarni yorituvchi samimiy va ta’sirchan asarlardan biridir. Kitobda muallifning onasi hayoti, uning bolalikdagi sinovlari, turmushdagi mashaqqatlari hamda farzandlari kelajagi yo‘lida qilgan fidokorona mehnati haqida hikoya qilinadi.

Muallif bir onaning taqdiri orqali oilasi va farzandlari uchun o‘z orzularini chetga surib, umrini farzandlari kamoliga baxshida etayotgan minglab fidoyi ayollar siymosini gavdalantiradi. Asarda inson boshidan kechirgan sinovlar uni sindirish bilan birga, sabrli, mehribon va matonatli inson sifatida shakllantirishi mumkinligi ham ta’sirchan ifodalangan.

“Millat gavhari” nomi ham asarning asosiy g‘oyasini o‘zida mujassam etadi. Millatning haqiqiy boyligi shon-shuhrat yoki mansabda emas, balki farzand qalbiga singdirilgan tarbiya, mehr, halollik va ezgulikda namoyon bo‘lishi ta’kidlanadi.

Tadbir davomida kitobning mazmun-mohiyati, yaratilish tarixi va unda ilgari surilgan g‘oyalar haqida fikrlar bildirildi. Ijodkor Miraziz Mirzayev asarning yozilishiga turtki bo‘lgan hayotiy kechinmalari hamda ona siymosining kitobdagi o‘rni haqida so‘z yuritdi.

Tadbirning badiiy qismida kuy-qo‘shiqlar ijro etilib, ishtirokchilarga ko‘tarinki kayfiyat ulashildi.

Shuningdek, ilm-fan, ma’naviyat va jamoatchilik faoliyatida alohida faollik ko‘rsatgan insonlarni Tashakkurnomalar hamda “Ilmiy yutuqlar e’tirofi” esdalik ko‘krak nishonlari bilan taqdirlash marosimi ham o‘tkazildi.

Rasmiy sahifalarimizga obuna bo‘ling
Telegram l Instagram  YouTube l Facebook l Twitter l Website

2026-yil 16-sentyabr kuni Alisher Navoiy nomidagi O‘zbekiston Milliy kutubxonasining Raqamlashtirilgan resurslarni qayta ishlash xizmat rahbari S. Olimov tomonidan "Raqamli asrda mualliflik huquqi: Kutubxonalar uchun huquqiy xavfsizlik va ochiq ma’lumotlar manbalari bilan ishlash" mavzusida metodik to'garak tashkil etildi.
Tadbir davomida mualliflik huquqining asosiy tushunchalari, raqamli resurslardan qonuniy foydalanish, mualliflik huquqi bilan himoyalangan asarlarni aniqlash hamda elektron nusxalarni ko‘paytirish va tarqatishda yuzaga kelishi mumkin bo‘lgan huquqiy xavflar haqida ishtirokchilarga zarur bilim va tushunchalar berildi.
Mashg‘ulot jarayonida foydalanuvchilarga elektron adabiyotlarni qonuniy taqdim etish, ochiq ma’lumotlar manbalaridan foydalanish hamda raqamli resurslar bilan ishlashda mualliflik huquqi talablariga rioya etish yuzasidan berilgan savollarga batafsil javob berildi.
Shuningdek, mualliflik huquqining asar yaratilgan paytdan avtomatik ravishda yuzaga kelishi, uning amal qilish muddati hamda turdosh huquqlarning muhofaza qilinishi bo‘yicha amaliy tavsiyalar berildi.
https://lex.uz/docs/-1022944#-1023064