✅ O‘zbekiston Milliy kutubxonasi direktori Umida Teshabayeva va direktor o‘rinbosari Alimardon Raxmanovlar 2026-yil 19-oktabr kuni Toshkentda o‘z ishini boshlagan “Oydin gurunglar — 2026” forumining ochilish marosimida ishtirok etdilar

🤝 O‘zbek tiliga davlat tili maqomi berilganining 37 yilligi munosabati bilan tashkil etilgan forumning asosiy maqsadi kitobxonlikni rivojlantirish, ma’rifiy loyihalarni qo‘llab-quvvatlash, kitobxonlarning moliyaviy savodxonligini oshirish, yangi nashrlarning keng ommaga yetib borishini ta’minlash, jahon adabiyoti namunalarini o‘zbek kitobxonlaringa targ‘ib etish hamda xususiy teatrlar faoliyatini yangi darajaga olib chiqishdan iborat.

🎤 Umida Teshabaeva forumning ochilish marosimida so‘zga chiqib, O‘zbekiston Milliy kutubxonasida O‘zbekiston Respublikasi Markaziy banki bilan birgalikda o‘tkazilgan “Ma’rifat va Bank: Bilimli jamiyat bilan qudratli iqtisodiyot sari” anjumani, “Moliyaviy sarguzasht” tanlovi, “Mahalla kutubxonasi”, “Moliyaviy savodxon mahalla”, “Moliyaviy bilim markazi” loyihalari hamda “Kitob karvoni” tashabbusi doirasida hamkorlikda amalga oshirilgan ishlar haqida ma’lumot berdi. “Hamkorlik doirasida aholining ma’naviy va moliyaviy savodxonligini oshirishga xizmat qiluvchi kitoblar bilan ta’minlangan mahalla kutubxonalari tashkil etilmoqda. Yaqinda kutubxonamizda Asakabank homiyligida O‘zbekiston Yozuvchilar uyushmasining “So‘zmunchoq” loyihasida chop etilgan kitoblar taqdimoti o‘tkazilganligi bank, nashriyot va kitobxon o‘rtasida mana shunday ma’naviy ko‘prik paydo bo‘layotganidan darak beradi”, - dedi U.Teshabaeva.

📚 22-25-oktabr kunlari forum o‘z ishini Xiva shahrida davom ettirib, unda jamiyatda iqtisodiy savodxonlik va erkin fikrlashni rivojlantirish masalalarini muhokama qilish, jahonning yetakchi iqtisodiy asarlari va bozor qonuniyatlariga yangicha nigoh bilan qarashga undovchi bir qator mashhur kitoblarning o‘zbek tilidagi yangi nashrlarining taqdimotini o‘tkazish hamda ushbu yangi iqtisodiy va ma’rifiy adabiyotlarni respublikamizdagi barcha jamoat va o‘quv kutubxonalariga bepul tarqatish rejalashtirilgan. Mazkur kitoblar moliyaviy bilimlarni ommalashtirish, yoshlarning shaxsiy moliyasini boshqarish, uni samarali maqsadlarga yo‘naltirish ko‘nikmalarini shakllantirishga ko‘maklashadi.